၅.၃။ အၚ်္ဂလ္ၚာဗဗေၚ်ဒ္စာံသာ်
ယွံခမဳတအ် ကုဥပး မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စာံသာ်ဂှ် ဒးဂတးလ္ၚာဗဗေၚ်ရ၊ (၁) ဟွံသ္ပလွဳပရာ တၞဟ်နဟွံကလိဂွံလာဘ် ကုခမဳဂမၠိုၚ်ရ၊ (၂) ဟွံသ္ပလွဳပရာ တၞဟ်နဂွံဒှ်လလေၚ်ဖဵု ကုခမဳဂမၠိုၚ်ရ၊ (၃) ဟွံသ္ပလွဳပရာ တၞဟ်နဟွံကလိဂွံတန်တဴ ဌာန်တန်တဴဒမၠိ ကုခမဳဂမၠိုၚ်ရ၊ (၄) ဟွံတ္ၜေဟ်လက် ခမဳဂမၠိုၚ်ရ၊ ဟွံဘပဠရ၊ (၅) ဟွံပါ်ဗကး ခမဳဂမၠိုၚ်ရၚ်သကအ်ရ၊ (၆) ဟွံဟီုဂရိုဟ်ကျာ်ရ၊ (၇) ဟွံဟီုဂရိုဟ်ဓရ်ရ၊ (၈) ဟွံဟီုဂရိုဟ်သၚ်ရ။ ယွံခမဳတအ် ကုဥပး မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စာံသာ်ဝွံ ကဵုအခေါၚ် တၞဟ်နဂတးလ္ၚာဗဗေၚ်ရ။
ယွံခမဳတအ် ရဴဝွံ ဒးဂတးလ္ၚာရ၊ ယွံခမဳတအ် ကောန်သၟိၚ်လိစ္ဆဝဳဝဍ္ဎဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် ယာတ်ကၞေဟ် ပ္ဍဲလတူပၞးပါဲမွဲလပါ် လ္ၚောဝ်ဒၠးဇိုၚ် ခမဳဂမၠိုၚ်တုဲ ဂဇအ်ဒၟံၚ်ဗွဲလံက်ဂဇုန် သီုမပၚ်ပတိုန်ခၠအ်သၟိပ်တဲဂှ်—
“ယွံတဳလပိုဉ် သၚ် ဗကပ်ဗဗေၚ် ကုအဲဍိက်ရ၊ အဲဍိက် ဒှ်ညးဟွံမွဲကဵုပွမဆက်ဆောမ် ကေုာံသၚ်ရ၊ အဲဍိက် ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန် ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ် ဒှ်ဟိုတ်တိတ်ဗၠးနူကမ်ရ၊ အာတ်အခေါၚ်သၚ် ပွမဂတးလ္ၚာဗဗေၚ်ရ” ရဴဝွံ ဒးဂရၚ်ပတီရ။ မရနုက်ကဵုၜါဝါလေဝ် ဒးအာတ်အခေါၚ်ရ။ မရနုက်ကဵုပိဝါလေဝ် ဒးအာတ်အခေါၚ်ရ။ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
၂၆၇။ “ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဗကပ်လဝ် ဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွမဟွံဆက်ဆောမ် ကေုာံသၚ်ရ၊ ကောန်သၟိၚ်လိစ္ဆဝဳဝဍ္ဎဂှ် ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန် ‘မာန်စှ်ေ’ ရ၊ ဒ္ဂေတ်တဴ ဒ္ဂေတ်ဝတ် ဒှ်ဟိုတ်တိတ်ဗၠးနူကမ်ရ၊ အာတ်အခေါၚ်သၚ် ပွမဂတးလ္ၚာဗဗေၚ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ဂတးလ္ၚာဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွမဆက်ဆောမ် ကေုာံသၚ်ရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဗကပ်လဝ် ဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွမဟွံဆက်ဆောမ် ကေုာံသၚ်ရ၊ ကောန်သၟိၚ်လိစ္ဆဝဳဝဍ္ဎဂှ် ဒ္ဂေတ်တဴ ဗွဲမဒးရးရ၊ ဖျေံကၠေံ တသော်မာန် ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ် ဒှ်ဟိုတ်တိတ်ဗၠးနူကမ်ရ၊ အာတ်အခေါၚ်သၚ် ပွမဂတးလ္ၚာဗဗေၚ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ဂတးလ္ၚာဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ သ္ပပွမဆက်ဆောမ် ကေုာံသၚ်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမဂတးလ္ၚာဗဗေၚ် ကုကောန်သၟိၚ်လိစ္ဆဝဳဝဍ္ဎရ၊ ပွမသ္ပပွမဆက်ဆောမ် ကေုာံသၚ်ရ၊ တဳလပိုဉ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ဂတးလ္ၚာဗဗေၚ် ကုကောန်သၟိၚ်လိစ္ဆဝဳဝဍ္ဎတုဲရ၊ သ္ပပွမဆက်ဆောမ် ကေုာံသၚ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
၂၆၈။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဝေသာလဳ ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ် ဘဂ္ဂရးမ္ဂး စိုပ်ကၠုၚ်ဘဂ္ဂရးဂှ်တုဲ သ္ပဒတဴတန်ဒၟံၚ် ပ္ဍဲဂြိုပ်ဒြာဲမၞုံယၟုဘေသကဠ ဇရေၚ်ဍုၚ်သုသုမာရဂိရိ လုပ်လၟိဟ်ဘဂ္ဂရးဂှ်ရ။
ပ္ဍဲအခိၚ်ဂှ် ပြာသာဒ် မၞုံယၟုကောကနဒ ကောန်သၟိၚ်ဗောဓိ သိုၚ်ခၞံတုဲအာ ဟွံလအ်ဏီရ၊ ခမဳဗဗၞးကေုာံမၞိဟ်မမိက်ကဵုမွဲမွဲ ဟဂွံပဒတဴဏီရ။
ပ္ဍဲအခိၚ်ဂှ် ကောန်သၟိၚ်ဗောဓိဂှ် ဟီုသ္ဂးကဵုမၚ်ဗၠာဲသဉ္စိကာပုတ္တ ရဴဝွံရ—
ယွံအမာံသဉ္စိကာပုတ္တ သြဝ်ကၠုၚ်ညိ၊ ပြာပ်အာဇရေၚ် တဳလမၞုံပိုဉ်ကျာ်တြဲတုဲ နကဵုဂလာန်အဲဂှ် သြဝ်လ္ၚောဝ်ဂၠးဂတာဇိုၚ် တဳလမၞုံပိုဉ်ကျာ်တြဲဂမၠိုၚ်ညိ၊ ဒဒှ်ဟွံမွဲကဵုယဲ ဒဒှ်ဟွံမွဲကဵုဒဒိုခ် ဒဒှ်မထတ်ယုက် ဒဒှ်မထတ်စောံ ဒဒှ်မဂွံပဒတဴဗွဲတသိုခ်ဂှ် သြဝ်ဂရၚ်ပတီသၟာန်ညိ။
“ယွံတဳလမၞုံပိုဉ် ကောန်သၟိၚ်ဗောဓိဂှ် လ္ၚောဝ်ဂၠးဂတာဇိုၚ် တဳလမၞုံပိုဉ်ကျာ်တြဲဂမၠိုၚ်ရ၊ ဒဒှ်မဟွံမွဲကဵုယဲ ဒဒှ်မဟွံမွဲကဵုဒဒိုခ် ဒဒှ်မထတ်ယုက် ဒဒှ်မထတ်စောံ ဒဒှ်မဂွံပဒတဴ မွဲတသိုခ်ဂှ် သၟာန်ဒၟံၚ်ရ” ရဴဝွံ သြဝ်ဂရၚ်ပတီညိ။
(သအာၚ်နူဂှ်) “ယွံတဳလမၞုံပိုဉ် သွက်တ္ၚဲယးတေံ တဳလမၞုံပိုဉ်ကျာ်တြဲ မွဲဟာန်ကေုာံ ခမဳသၚ် သြဝ်ဒုၚ်တဲပိဏ္ဍပါတ် ကောန်သၟိၚ်ဗောဓိညိ ရဴသာ်ဝွံလေဝ် သြဝ်ဂရၚ်ပတီညိ ရဴဝွံ (ဟီုသ္ဂးရ)။
“ယွံကောန်သၟိၚ် ခိုဟ်ရ” ရဴဝွံ မၚ်ဗၠာဲသဉ္စိကာပုတ္တဂှ် ဒုၚ်ဝန်ကုကောန်သၟိၚ်ဗောဓိတုဲမ္ဂး ပြာပ်အာဇရေၚ် တဳလမၞုံပိုဉ်ကျာ်တြဲတုဲ ဟီုဂလာန်ဆက်မိတ် အိုဟ်တၟိုဟ်မိပ်မြဟ် ကေုာံ တဳလမၞုံပိုဉ်ကျာ်တြဲ မွဲစွံတုဲ၊ ဟီုပတုဲကၠေံ ဂလာန်အိုဟ်တၟိုဟ်မိပ်မြဟ် ထေက်ကဵုဗှ်ဗၞုဟ်တုဲ ဂဇအ်ကေတ် ပ္ဍဲဌာန်မွဲဒၞာဲတုဲ−
“ကောန်သၟိၚ်ဗောဓိဂှ် လ္ၚောဝ်ဂၠးဂတာဇိုၚ် တြနာဲဂေါတမဂမၠိုၚ်ရ၊ ဒဒှ်မဟွံမွဲကဵုယဲ ဒဒှ်ဟွံမွဲကဵုဒဒိုခ် ဒဒှ်မထတ်ယုက် ဒဒှ်မထတ်စောံ ဒဒှ်မဂွံပဒတဴဗွဲတသိုခ်ဂှ် သၟာန်ဒၟံၚ်ရ၊ ယွံတဳလမၞုံပိုဉ် (သအာၚ်နူဂှ်) သွက်တ္ၚဲယးတေံ တြနာဲဂေါတမ မွဲဟာန်ကေုာံ ခမဳသၚ် သြဝ်ဒုၚ်တဲ ပိဏ္ဍပါတ် ကောန်သၟိၚ်ဗောဓိညိ ရဴဝွံလေဝ် သြဝ်ဂရၚ်ပတီညိ” ရဴဝွံ ဂရၚ်ပတီရ။
တဳလမၞုံပိုဉ်ကျာ်တြဲဂှ် နမမံၚ်ထောံသ္ၚိတ်သ္ၚိတ်ဂှ် ဒုၚ်ကေတ်တဲရ။
ပ္ဍဲကြဴနူဂှ် မၚ်ဗၠာဲသဉ္စိကာပုတ္တဂှ် တီကေတ် တဳလမၞုံပိုဉ်ကျာ်တြဲ ဒုၚ်တဲတုဲ ဒလိုက်ကတဵုနူဒၞာဲ ပြာပ်အာဇရေၚ် ကောန်သၟိၚ်ဗောဓိတုဲ “ယွံတြနာဲ ပိုဲညးဂမၠိုၚ်ဂှ် နကဵုဂလာန်တြနာဲဂှ် ကောန်သၟိၚ်ဗောဓိဂှ် လ္ၚောဝ်ဂၠးဂတာဇိုၚ် တြနာဲဂေါတမဂမၠိုၚ်ရ၊ ဒဒှ်မဟွံမွဲကဵုယဲ ဒဒှ်ဟွံမွဲကဵုဒဒိုခ် ဒဒှ်မထတ်ယုက် ဒဒှ်မထတ်စောံ ဒဒှ်မဂွံပဒတဴဗွဲတသိုခ်ဂှ် သၟာန်ဒၟံၚ်ရ၊ ယွံတဳလမၞုံပိုဉ် (သအာၚ်နူဂှ်) သွက်တ္ၚဲယးတေံ တြနာဲဂေါတမ မွဲဟာန်ကေုာံ ခမဳသၚ် သြဝ်ဒုၚ်တဲ ပိဏ္ဍပါတ် ကောန်သၟိၚ်ဗောဓိညိ ရဴဝွံလေဝ် သြဝ်ဂရၚ်ပတီ တြနာဲဂေါတမ မပတၠပိုဉ်တြဴပြကာဂှ်တုဲအိုတ်ရ၊ ခမဳဂေါတမလေဝ် ဒုၚ်တဲရ” ရဴဝွံ ဟီုသ္ဂးရ။
ပ္ဍဲအခိၚ်ဂှ် ကောန်သၟိၚ်ဗောဓိဂှ် ဗတမ်ဂှ်လောန်ၜက်အာတုဲ ကဵုစဳရေၚ်စၞအာဟာရဘောဇိုန်မပြဲပြဲတုဲ ပြာသာဒ်ကောကနဒဂှ်လေဝ် စဵုကဵုစိုပ်ကၞၚ်တၞိန်သၟဝ်အိုတ် ကဵုလးကၠေံ နကဵုယာတ်ပိက်ဗုဂမၠိုၚ်တုဲမ္ဂး ဟီုသ္ဂးကဵုမၚ်ဗၠာဲသဉ္စိကာပုတ္တ ရဴဝွံရ−
“ယွံအမာံသဉ္စိကာပုတ္တ သြဝ်ကၠုၚ်ညိ၊ တၠအဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲ ‘ယွံတြနာဲဂေါတမ ဒးအခိၚ်ရ၊ ပလေဝ်ပလေတ်ပိဏ္ဍပါတ်တုဲရ’ ရဴဝွံ ဒဒှ်ဒးအခိၚ်ရဂှ် သြဝ်ဂရၚ်ပတီ ကုတဳလမၞုံပိုဉ်ကျာ်တြဲညိ” ရဴဝွံ (သ္ဂးရ)။
“ယွံတြနာဲ ခိုဟ်ရ” ရဴဝွံ မၚ်ဗၠာဲသဉ္စိကာပုတ္တဂှ် ဒုန်ဝန် ကုကောန်သၟိၚ်ဗောဓိတုဲမ္ဂး ပြာပ်အာဇရေၚ်တဳလမၞုံပိုဉ်ကျာ်တြဲတုဲ ‘ယွံတြနာဲဂေါတမ ဒးအခိၚ်ရ၊ ပလေဝ်ပလေတ်ပိဏ္ဍပါတ်တုဲရ’ ရဴဝွံ ဒဒှ်ဒးအခိၚ်ရဂှ် သြဝ်ဂရၚ်ပတီ ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး ဗိုက်ပလေဝ်ပလေတ်သ္ၚာတုဲ သီုမထ္ၜဂိုၚ်ရပ်ကေတ်ဗဗေၚ်သ္ၚာဂှ် က္ညပြာပ်အာသ္ၚိနန် ကောန်သၟိၚ်ဗောဓိရ။
ပ္ဍဲအခိၚ်ဂှ် ကောန်သၟိၚ်ဗောဓိဂှ်—
“ယွံတဳလမၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြ သြဝ်လိုန်ယာတ်ဂမၠိုၚ်ညိ၊ တဳလမၞုံပိုဉ်ကျာ်တြဲ မက္ညကၠုၚ်ခိုဟ်ဆာဲ သြဝ်လိုန်ယာတ်ဂမၠိုၚ်ညိ၊ ပွမတိုန်လိုန်ဂှ် ဒှ်တဴတၞဟ်န ဒတုဲမြမောဝ် တၞဟ်နတသိုခ် ကုအဲဍိက် လုကဴကာလမဂၠိၚ်သ္ၚောဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ဂရၚ်ပတီ ရဴဝွံမ္ဂး တဳလမၞုံပိုဉ်ကျာ်တြဲ မံၚ်ကၠေံသ္ၚိတ်သ္ၚိတ်ရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ကောန်သၟိၚ်ဗောဓိဂှ်—
“ယွံတဳလမၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြ သြဝ်လိုန်ယာတ်ဂမၠိုၚ်ညိ၊ တဳလမၞုံပိုဉ်ကျာ်တြဲ မက္ညကၠုၚ်ခိုဟ်ဆာဲ သြဝ်လိုန်ယာတ်ဂမၠိုၚ်ညိ၊ ပွမတိုန်လိုန်ဂှ် ဒှ်တဴတၞဟ်န ဒတုဲမြမောဝ် တၞဟ်နတသိုခ် ကုအဲဍိက် လုကဴကာလမဂၠိၚ်သ္ၚောဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ကလေၚ်သ္ၚဳရံၚ် တဳလပိုဉ်အာနန္ဒရ၊ ပ္ဍဲအခိၚ်ဂှ် တဳလပိုဉ်အာနန္ဒဂှ်—
“ယွံကောန်သၟိၚ် သြဝ်သီရုပ်ကၠေံယာတ်ဂမၠိုၚ်ညိ၊ ကျာ်တြဲ တိုန်လိုန်ယာတ်လးဗုဂှ် ဟွံသေၚ်ရ၊ တဳလမၞုံပိုဉ်ကျာ်တြဲ မၚ်မွဲတဴ ဂကောံခမဳ ကောန်ဗွဲကြဴရ” ရဴဝွံ ဟီုသ္ဂးကဵု ကောန်သၟိၚ်ဗောဓိရ။
ပ္ဍဲအခိဂှ် ကောန်သၟိၚ်ဗောဓိ ကဵုသီရုပ်ကၠေံ ယာတ်ဗုဂမၠိုၚ်ဂှ်တုဲ ကဵုလးသၞာ ပ္ဍဲလတူပြာသာဒ်ကောကနဒရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ မွဲဟာန်ကေုာံ ခမဳသၚ် တိုန်အာ ပြာသာဒ်ကောကနဒတုဲ ဂဇအ်ပ္ဍဲသၞာမလးလဝ်ဂှ်ရ။
ပ္ဍဲအခိၚ်ဂှ် ကောန်သၟိၚ်ဗောဓိဂှ် နကဵုစၞအာဟာရ ဘောဇိုန်မပြဲပြဲ အလဵုဇကုကၠောန်ၜိုတ်ဥပကာ တြာပ်ဖာပ်ဗ္စ ခမဳသၚ်မၞုံပဓာန်ဍေံ တဳလမၞုံပိုဉ်ကျာ်တြဲ စဵုကဵုတရိုပ်ကဵုစိုတ် စဵုကဵုဒးဆေဝ်တာပဒေါအ်ကၠေံရ။
တဳလမၞုံပိုဉ်ကျာ်တြဲ ကဵုပိုဉ်တုဲ ပ္ဍဲအခိၚ်ပါဲကၠေံတဲ နူဗဗေၚ်တုဲဂှ် ကောန်သၟိၚ်ဗောဓိ ဂဇအ်ဒၟံၚ်ပ္ဍဲဒၞာဲမဗဗွဲရ၊ ကုကောန်သၟိၚ်ဗောဓိ မဂဇအ်ဒၟံၚ်ပ္ဍဲဒၞာဲမဗဗွဲမွဲဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲမ္ဂး ဒၠိုက်ကတဵုနူဒၞာဲတုဲ ပါဲစ္ဍးအာရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ—
“ယွံခမဳတအ် ဟဂပ်ဝ်လိုန်ယာတ်ဗုရ၊ ကုခမဳမလိုန်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ဗြဴမွဲတၠ မဟွံကေၚ်ၜံၚ်သၠးကောန်ဂှ် ဘိက်နိမန်ခမဳဂမၠိုၚ်တုဲမ္ဂး လးပညပ်ယာတ်ဗုတုဲ “ယွံတဳလပိုဉ်တအ် သြဝ်တိုန်လိုန်ယာတ်ဗုအိုတ်ညိ” ရဴဝွံ ဂရၚ်ပတီရ။
ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံလိုန်အိုတ်ရ။
ယွံတဳလပိုဉ်တအ် တၞဟ်နဖဵုဂွံဒှ်မ္ၚိုလ် သြဝ်လိုန်ယာတ်အိုတ်ညိ ရဴဝွံ ၜိုန်ဂရၚ်ပတီလေဝ် ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံလိုန်အိုတ်ရ။
ပ္ဍဲအခိၚ်ဂှ် ဗြဴဂှ် “တဳလပိုဉ်ဂမၠိုၚ် တၞဟ်နဖဵုဂွံဒှ်မ္ၚိုလ် သီုဂပ်ဝ်အာတ်ပါန်အခေါၚ်အိုတ်ဂှ် မုဟိုတ် ဟွံလိုန်ယာတ်ဗုအိုတ်ရော? ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် ဂွံမိၚ်ကေတ် ဂလာန်ဗြဴ မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် မၞိဟ်ဂမၠိုၚ် မၞုံပၟိက်ကဵုမ္ၚိုလ်အိုတ်ရ၊ ယွံခမဳတအ် တၞဟ်နဖဵုမ္ၚိုလ်မၞိဟ်ဂမၠိုၚ် ခမဳ မဂပ်ဝ်အာတ်ပါန်အခေါၚ်မ္ဂးဂှ် ကဵုအခေါၚ် တၞဟ်နလိုန်ယာတ်ဗုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် တၞဟ်နလိုန်တဴ သၞာမဂပ်ဝ်လိုန်ကဵုဇိုၚ် မကြဴကြာတ်တုဲဂှ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံလိုန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် တၞဟ်နလိုန်တဴ သၞာမဂပ်ဝ်လိုန်ကဵုဇိုၚ် မကြဴကြာတ်တုဲရ ရဴဝွံ (သ္ဂးရ)။
✤ခဏ်ဒုတိယ တုဲရ။✤
၂၆၉။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘဂ္ဂရးဂမၠိုၚ် ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်တုဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။
ပ္ဍဲအခိၚ်ဂှ် ဝိသာခါ မစိုန်ဒှ်ညံၚ်မိ မိဂါရသေဌဳ ဂိုၚ်ကေတ်နၚ် နုၚ်သၟတ်ကီု ပေါတ်ဇိုၚ် မဂပ်ဝ်ခၞံလဝ်သဏ္ဌာန်ထိုက်ဒကှ် မၞုံကဵုဇၠဠတ်ကတဵုကီု ကၟဟ်စန်ကီုတုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ကေတ်ပ္ဍဲဒၞာဲမွဲတုဲ—
“ယွံတဳလမၞုံပိုဉ်ကျာ်တြဲ သြဝ်ဒုၚ်ဂိုၚ်ကေတ် နုၚ်သၟတ်ကီု ပေါတ်ဇိုၚ် မဂပ်ဝ်ခၞံလဝ်သဏ္ဌာန်ထိုက်ဒကှ် မၞုံကဵုဇၠဠတ်ကတဵုကီု ကၟဟ်စန်ကီု အဲဍိက်ညိကျာ်၊ ပွမဒုၚ်ဂိုၚ်ကေတ်ဂှ် ဒှ်တဴ တၞဟ်နဒတုဲမြမောဝ် တၞဟ်နတသိုခ် ကုအဲဍိက် လုကဴကာလမဂၠိၚ်သ္ၚောဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲ ဒုၚ်ဂိုၚ်ကေတ် နုၚ်သၟတ်ကီု ကၟဟ်စန်ကီုရ၊ ပေါတ်ဇိုၚ် မဂပ်ဝ်ခၞံလဝ် သဏ္ဌာန်ထိုက်ဒကှ် မၞုံကဵုဇၠဠတ်ကတဵုဂှ်တုန် ဟွံဒုၚ်ဂိုၚ်ကေတ်ရ။
ပ္ဍဲအခိၚ်ဂှ် ဝိသာခါ မစိုန်ဒှ်ညံၚ်မိ မိဂါရသေဌဳဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ ဒၠိုက်ကတဵုနူဒၞာဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှေ်သှေ်ရဴဂဴကၠာ ပါဲစ္ဍးအာရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ—
“ယွံခမဳတအ် ကဵုအခေါၚ် နုၚ်သၟဝ်ကီု ကၟဟ်စန်ကီုရ၊ ယွံခမဳတအ် ဟဂပ်ဝ်ပြဘိုဂ်ရပ်စပ် ပေါတ်ဇိုၚ် မဂပ်ဝ်ခၞံလဝ် သဏ္ဌာန်ထိုက်ဒကှ် မၞုံကဵုဇၠဠတ်ကတဵုရ၊ ကုခမဳ မပြဘိုဂ်ရပ်စပ်ဂှ် ဒးအာပတ်ဒုက္ကဋ်ရ။
ယွံခမဳတအ် ကဵုအခေါၚ် ပေါတ်ဇိုၚ်ဂမၠိုၚ် ပိဂကူ မတွံဂး ပေါတ်ဇိုၚ်တၟံကဠိုအ် ပေါတ်ဇိုၚ်နုက် ပေါတ်ဇိုၚ်ခၜိုဟ်ဍာ်ၜဳရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ဝိသာခါမစိုန်ဒှ်ညံၚ်မိ မိဂါရသေဌဳ ဂိုၚ်ကေတ်နၚ် ပၞိက်ပန်ကၠၚ်ကီု ဗၞဳအဝဏ်ပၞိက်သၠတာကီုတုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲ ဂဇအ်ကေတ်ပ္ဍဲဒၞာဲမွဲတုဲ—
“ယွံတဳလမၞုံပိုဉ် သြဝ်ဒုၚ်ဂိုၚ်ကေတ် ပၞိက်ပန်ကၠၚ်ကီု ဗၞဳအဝဏ်ပၞိက်သၠတာကီု အဲဍိက်ညိကျာ်၊ ပွမဒုၚ်ဂိုၚ်ကေတ်ဂ်ှ ဒှ်တဴ တၞဟ်နဒတုဲမြမောဝ် တၞဟ်နတသိုခ် ကုအဲဍိက် လုကဴ ကာလမဂၠိၚ်သ္ၚောဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲ ဒုၚ်ဂိုၚ်ကေတ် ပၞိက်ပန်ကၠၚ်ကီု ဗၞဳအဝဏ် ပၞိက်သၠတာကီုရ။ ပ္ဍဲအခိၚ်ဂှ် ဝိသာခါ မစိုန်ဒှ်ညံၚ်မိ မိဂါရသေဌဳဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ်(ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ ဒၠိုက်ကတဵုနူဒၞာဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴကၠာ ပါဲစ္ဍးအာရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ—
“ယွံခမဳတအ် ကဵုအခေါၚ် ပၞိက်ပန်ကၠၚ်ကီု ဗၞဳအဝဏ် ပၞိက်သၠတာကီုရ” ရဴဝွံ (သ္ဂးရ)။
ပ္ဍဲအခိၚ်ဂှ် ပၞိက်ဗွိုက်ရုဲ ကတဵုဒှ်ကၠုၚ် ကုသၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် ပၞိက်ဗွိုၚ်ရုဲရ ရဴဝွံ (သ္ဂးရ)
ပၞိက်ဗ္တသတ်စာမရဳ ကတဵုဒှ်ကၠုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ် ပၞိက်ဗ္တသတ်စာမရဳရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ။
ယွံခမဳတအ် ကဵုအခေါၚ် ပၞိက်ဂမၠိုၚ်ပိဂကူ မတွံဂး ပၞိက်မတုဲတဴနကာန် ပၞိက်မတုဲတဴ နကၟဝ်ဥသဳ ပၞိက်မတုဲတဴ နဍုတ်မြာ်စန်ရ ရဴဝွံ (သ္ဂးရ)။
၂၇၀။ ပ္ဍဲအခိၚ်ဂှ် က္ဍိုၚ် ကတဵုဒှ်ကၠုၚ် ကုသၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် က္ဍိုၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ယာပတိုန်လဝ်က္ဍိုၚ်တုဲ ဂေတ်ဂ္ၚေၚ်အာကၠုၚ်အိုတ်ရ။ ပ္ဍဲအခိၚ်ဂှ် ဥပးမွဲတၠ အာဥဒျာန် မွဲဟာန်ကေုာံ ကွးအာဇဳဝကဂမၠိုၚ်မဂၠိုၚ်ရ။ ကွးအာဇဳဝကဂမၠိုၚ် ညာတ်ဒးခမဳဆဗ္ဗဂ္ဂဳဂမၠိုၚ် မကၠုၚ်နူဇမ္ၚောဲ သီုမယာပတိုန်လဝ်က္ဍိုၚ်တုဲ—
“အမာံ တဳလပိုဉ်ခိုဟ်ဆာဲ တၠအဲဂမၠိုၚ်ဂှ် သၟဟ်ညံၚ်ရဴအမာတ်ဇၞော် မစၟဳစၟတ်စရၚ်ဂမၠိုၚ်ကီု ယာပတိုန်လဝ်က္ဍိုၚ်တုဲ ကၠုၚ်အိုတ်ရ” ရဴဝွံ ဟီုသ္ဂးကဵုဥပးဂှ်အိုတ်ရ။
ယွံကောန်နာဲတအ် ညးဂမၠိုၚ်ဂှ် ခမဳဟွံသေၚ်ရ ပြဘာဇ်ဂမၠိုၚ်ရ ရဴဝွံ (သ္ဂးရ)။
“ခမဳဂမၠိုၚ်ရ၊ ခမဳဂမၠိုၚ် ဟွံသေၚ်ရ” ရဴဝွံ သ္ပပွဝေၚ်လံၚ်အိုတ်ရ။
ပ္ဍဲအခိၚ်ဂှ် ဥပးဂှ် ကြပ်ညောန်ကၠုၚ်မ္ဂး တဳကေတ် (ဒှ်ခမဳဂမၠိုၚ်ရ)တုဲ “တဳလပိုဉ်ခိုဟ်ဆာဲဂမၠိုၚ် သီုမယာပတိုန်က္ဍိုၚ်ဂမၠိုၚ် မုဟိုတ် ဂေတ်ဂ္ၚေၚ်အာကၠုၚ်အိုတ်ရော” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။
ခမဳဂမၠိုၚ် ဂွံမိၚ်ကေတ် ဂလာန်ဥပး မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဍာံပြဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲ−
“ယွံခမဳတအ် ဟဂပ်ဝ်ပကၚ်ရၚ် က္ဍိုၚ်ရ၊ ကုခမဳမပကၚ်ရၚ်ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကုဂှ် ဂိယဲဒၟံၚ်ဂှ်ရ စာ်စ္ဍးကေုာံက္ဍိုၚ်တုဲ ‘သီုက္ဍိုၚ်ဟွံပါ’ ဟွံဒှ်တသိုခ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကုခမဳမဂိယဲဂှ် ကဵုအခေါၚ် တၞဟ်နပကၚ်ရၚ်က္ဍိုၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် “ယွံတဳလမၞုံပိုဉ်ကျာ်တြဲဂှ် ကုခမဳမဂိယဲဟေၚ် ကဵုအခေါၚ်က္ဍိုၚ်ရ၊ ကုခမဳဟွံဂိယဲဂှ် ဟွံကဵုအခေါၚ်ရ” ရဴဝွံ (ပၠုပ်စိုတ်တုဲ) တၞဟ်နပကၚ်ရၚ်က္ဍိုၚ် ပ္ဍဲအပ္ဍဲအာရှာမ်ကီု ပ္ဍဲဥပစာအာရှာမ်ကီုဂှ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကုခမဳ မဟွံဂိတယဲလေဝ် ကဵုအခေါၚ် တၞဟ်နပကၚ်ရၚ်က္ဍိုၚ် ပ္ဍဲအပ္ဍဲအာရှာမ်ကီု ပ္ဍဲဥပစာအာရှာမ်ကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကု စုတ်ဗဗေၚ် ပ္ဍဲဂျတုဲ ဂျဂှ် ဒက်ကွက်စုတ် ပ္ဍဲလေံမဂၠိၚ်တုဲ ပ္ဍဲဟွံသေၚ်ကဵုအခိၚ် တတ်အာ နတြၚ်ကွာန်မွဲ ဟွံမွဲကဵုစၟတ်သမ္တီရ။
မၞိဟ်ဂမၠိုၚ် “ယွံနာဲတအ် ကမၠတ်ဂှ် အာဒၟံၚ်ရ၊ သၞာ်ကမၠတ်ဂှ် ဂဵုတၟးရ” ရဴဝွံ သီုမဟီုသ္ဂးဂှ် ဗက်အာနူလက်ကရဴတုဲ ရပ်ကေတ်အိုတ်မ္ဂး တီကေတ် (ဒဒှ်ခမဳ) တုဲ ဗလးထောံအိုတ်ရ။
ပ္ဍဲအခိၚ်ဂှ် ခမဳဂှ် အာအာရှာမ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။
ယွံကောန်တၠ တၠအဲ ပကၚ်ရၚ်လဝ် ဂျမကွက်ပ္ဍဲလေံမဂၠိၚ်ဟာ ရဴဝွံ သၟာန်အိုတ်ရ။ ယွံကောန်တၠတအ် ပကၚ်ရၚ်လဝ်ရ ရဴဝွံ သ္ဂးရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ပကၚ်ရၚ်လဝ် ဂျမကွက်ပ္ဍဲလေံမဂၠိၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး—
“ယွံခမဳတအ် ဟဂပ်ဝ်ပကၚ်ရၚ် ဂျမကွက် ပ္ဍဲလေံမဂၠိၚ်ရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳမွဲဇကုဂ်ှ ဂိယဲဒၟံၚ်ဂှ်ရ စာ်စ္ဍးကေုာံလေံမဂၠိၚ်တုဲ ဂေတ်ဂ္ၚေၚ်အာကၠုၚ်ဟွံမာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကုခမဳမဂိယဲဂှ် ကဵုအခေါၚ် သွက်ဂွံကဵုသၟိတ် (အခေါၚ်ပကၚ်ရၚ်) လေံမဂၠိၚ်ရ ရဴဝွံ (သ္ဂးရ)။
ယွံခမဳတအ် ရဴဝွံ ဒးကဵုရ၊ ခမဳမဂိယဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန်သ္ၚာကၠေဟ် ပ္ဍဲလတူပၞးပါဲမွဲလပါ် လ္ၚောဝ်ဒၠးဇိုၚ် ခမဳဇၞော်ဂမၠိုၚ်တုဲ ဂဇအ်ဒၟံၚ်ဗွဲလံက်ဂဇုန် သီုမပၚ်ပတိုန် ခၠအ်သၟိပ်တုဲဂှ်—
ယွံတဳလပိုဉ်တအ် အဲဍိက် ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲ ဂေတ်ဂ္ၚေၚ်အာကၠုၚ်ဟွံမာန်ရ၊ ယွံတဳလပိုဉ်တအ် အဲဍိက် အာတ်သၚ် သၟိတ်(အခေါၚ်ပကၚ်ရၚ်) လေံမဂၠိၚ်ရ” ရဴဝွံ ဒးဂရၚ်ပတီရ။
မရနုက်ကဵုၜါဝါလေဝ် ဒးအာတ်ရ။ မရနုက်ကဵုပိဝါလေဝ် ဒးအာတ်ရ။ ခမဳ မစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲ ဂေတ်ဂ္ၚေၚ်အာကၠုၚ် ဟွံမာန်ရ၊ ခမဳဂှ် အာတ်သၚ် သၟိၚ် (အခေါၚ်ပကၚ်ရၚ်) လေံမဂၠိၚ်ရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ် (အခေါၚ်ပကၚ်ရၚ်) လေံမဂၠိၚ် ကုခမဳမၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲ ဂေတ်ဂ္ၚေၚ်အာကၠုၚ် ဟွံမာန်ရ၊ ခမဳဂှ် အာတ်သၚ် သၟိၚ် (အခေါၚ်ပကၚ်ရၚ်) လေံမဂၠိၚ်ရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ်(အခေါၚ်ပကၚ်ရၚ်) လေံမဂၠိၚ် ကုခမဳမၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုသၟိတ် (အခေါၚ်ပကၚ်ရၚ်) လေံမဂၠိၚ် ကုခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်ကဵုသၟိတ် (အခေါၚ်ပကၚ်ရၚ်) လေံမဂၠိၚ် ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
၂၇၁။ ပ္ဍဲအခိၚ်ဂှ် ခမဳမွဲဇကုဂှ် ဂိယဲဒၟံၚ်ဂှ်ရ စာ်စ္ဍးကေုာံဂျတုဲ ရၚ်တၠုၚ်ဏာဗဗေၚ်ဟွံမာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကုခမဳမဂိယဲဂှ် ကဵုအခေါၚ် သွက်ဂွံကဵုသၟိတ် (အခေါၚ်ပကၚ်ရၚ်) ဂျရ ရဴဝွံ (သ္ဂးရ)။
ယွံခမဳတအ် ရဴဝွံ ဒးကဵုရ၊ ခမဳမဂိယဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန်သ္ၚာကၠေဟ် ပ္ဍဲလတူပၞးပါဲမွဲလပါ် လ္ၚောဝ်ဒၠးဇိုၚ် ခမဳဇၞော်ဂမၠိုၚ်တုဲ ဂဇအ်ဒၟံၚ်ဗွဲလံက်ဂဇုန် သီုမပၚ်ပတိုန် ခၠအ်သၟိပ်တုဲဂှ်—
“ယွံတဳလပိုဉ်တအ် အဲဍိက် ဂိယဲဒၟံၚ်ရ၊ စာ်စ္ဍးကေုာံဂျတုဲ ရၚ်တၠုၚ်ဏာဗဗေၚ် ဟွံမာန်ရ၊ ယွံတဳလပိုဉ်တအ် အဲဍိက် အာတ်သၚ် သၟိတ်(အခေါၚ်ပကၚ်ရၚ်) ဂျရ” ရဴဝွံ ဒးဂရၚ်ပတီရ။
မရနုက်ကဵုၜါဝါလေဝ် ဒးအာတ်ရ။ မရနုက်ကဵုပိဝါလေဝ် ဒးအာတ်ရ။ ခမဳ မစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံဂျတုဲ ရၚ်တၠုၚ်ဏာဗဗေၚ် ဟွံမာန်ရ၊ ခမဳဂှ် အာတ်သၚ် သၟိၚ် (အခေါၚ်ပကၚ်ရၚ်) ဂျရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ် (အခေါၚ်ပကၚ်ရၚ်) ဂျ ကုခမဳမၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံဂျတုဲ ရၚ်တၠုၚ်ဏာဗဗေၚ် ဟွံမာန်ရ၊ ခမဳဂှ် အာတ်သၚ် သၟိၚ် (အခေါၚ်ပကၚ်ရၚ်) ဂျရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ် (အခေါၚ်ပကၚ်ရၚ်) ဂျ ကုခမဳမၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုသၟိတ် (အခေါၚ်ပကၚ်ရၚ်) ဂျ ကုခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ကဵုသၟိတ် (အခေါၚ်ပကၚ်ရၚ်) ဂျ ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
၂၇၂။ ပ္ဍဲအခိၚ်ဂှ် ခမဳမွဲဇကု ဂိယဲဒၟံၚ်ဂှ်ရ စာ်စ္ဍးကေုာံလေံမဂၠိၚ်တုဲလေဝ် ဂေတ်အာကၠုၚ် ဟွံမာန်ရ၊ စာ်စ္ဍးကေုာံဂျတုဲလေဝ် ရၚ်တၠုၚ်ဏာဗဗေၚ် ဟွံမာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳမဂိယဲဂှ် ကဵုအခေါၚ် သွက်ဂွံကဵုသၟိတ် (အခေါၚ်ပကၚ်ရၚ်) လေံမဂၠိၚ်ကေုာံဂျရ ရဴဝွံ (သ္ဂးရ)။
ယွံခမဳတအ် ရဴဝွံ ဒးကဵုရ၊ ခမဳမဂိယဲဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန်သ္ၚာကၠေဟ် ပ္ဍဲလတူပၞးပါဲမွဲလပါ် လ္ၚောဝ်ဒၠးဇိုၚ် ခမဳဇၞော်ဂမၠိုၚ်တုဲ ဂဇအ်ဒၟံၚ်ဗွဲလံက်ဂဇုန် သီုမပၚ်ပတိုန် ခၠအ်သၟိပ်တုဲဂှ်—
“ယွံတဳလပိုဉ်တအ် အဲဍိက် ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲလေဝ် ဂေတ်ဂ္ၚေၚ်အာကၠုၚ်ဟွံမာန်ရ၊ စာ်စ္ဍးကေုာံဂျတုဲ လေဝ် ရၚ်တၠုၚ်ဏာဗဗေၚ် ဟွံမာန်ရ၊ ယွံတဳလပိုဉ်တအ် အဲဍိက် အာတ်သၚ် သၟိတ် (အခေါၚ်ပကၚ်ရၚ်) လေံမဂၠိၚ် ကေုာံဂျရ” ရဴဝွံ ဒးဂရၚ်ပတီရ။
မရနုက်ကဵုၜါဝါလေဝ် ဒးအာတ်ရ။ မရနုက်ကဵုပိဝါလေဝ် ဒးအာတ်ရ။ ခမဳ မစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲလေဝ် ဂေတ်ဂ္ၚေၚ်အာကၠုၚ် ဟွံမာန်ရ၊ စာ်စ္ဍးကေုာံဂျတုဲလေဝ် ရၚ်တၠုၚ်ဏာဗဗေၚ် ဟွံမာန်ရ၊ ခမဳဂှ် အာတ်သၚ် သၟိၚ်(အခေါၚ်ပကၚ်ရၚ်) လေံမဂၠိၚ် ကေုာံဂျရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ် (အခေါၚ်ပကၚ်ရၚ်) လေံမဂၠိၚ်ကေုာံဂျ ကုခမဳမၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ဂိယဲဒၟံၚ်ရ၊ စာ်စ္ဍးကေုာံလေံမဂၠိၚ်တုဲလေဝ် ဂေတ်ဂ္ၚေၚ်အာကၠုၚ် ဟွံမာန်ရ၊ စာ်စ္ဍးကေုာံဂျတုဲလေဝ် ရၚ်တၠုၚ်ဏာဗဗေၚ် ဟွံမာန်ရ၊ ခမဳဂှ် အာတ်သၚ် သၟိၚ် (အခေါၚ်ပကၚ်ရၚ်) လေံမဂၠိၚ် ကေုာံဂျရ၊ ကမ်မၞုံကဵုအခိၚ် မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသၟိတ် (အခေါၚ်ပကၚ်ရၚ်) လေံမဂၠိၚ် ကေုာံဂျ ကုခမဳမၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုသၟိတ် (အခေါၚ်ပကၚ်ရၚ်) လေံမဂၠိၚ် ကေုာံဂျ ကုခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်ကဵုသၟိတ် (အခေါၚ်ပကၚ်ရၚ်) လေံမဂၠိၚ် ကေုာံဂျ ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။ ၂၇၃။ ပ္ဍဲအခိၚ်ဂှ် ခမဳမွဲဇကု လေပ်ဂြေၚ်ရ၊ ခမဳဂှ် ဂြေၚ်တုဲဂြေၚ်တုဲ ၚိတ်ဖျေံရ။
ခမဳဂမၠိုၚ် “မုဟိုတ် ခမဳဝွံ စစၞဘောဇိုန် ပ္ဍဲဟွံသေၚ်ကဵုအခိၚ်ရော” ရဴဝွံ ဟီုဂရိုဟ်အုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဂှ် စုတိချိုတ်တသိုတ်ကၠုၚ် နူဘဝဂၠဴဟွံလအ်ဏီရ၊ ယွံခမဳတအ် ကဵုအခေါၚ် ပွမဂြေၚ် ကုခမဳမလေပ်ဂြေၚ်ရ။
ယွံခမဳတအ် ရၚ်တၠုၚ်ပတိတ်မ္ၚးအပ္ဍဲပါၚ်တုဲ ဟဂပ်ဝ်ၚိတ်ဖျေံရ၊ ကုခမဳ မၚိတ်ဖျေံဂှ် ဒးသ္ဂုတ်သွာတ် ဗွဲမဗဗွဲကဵုဓရ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဂကောံဗော်မွဲဂကောံ ကဵုဒါန်ပိဏ္ဍပါတ် ကုသၚ်ရ၊ ပ္ဍဲဘာရုၚ်ကဵုပိုဉ် မပုၚ်ဂမၠိုၚ်မဂၠိုၚ် ပြးဆာဲဒၟံၚ်အိုတ်ရ။
မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ် ကဵုဒါန်ပိဏ္ဍပါတ်မ္ဂး ဟွံဒုၚ်ဂိုၚ်ကေတ် ဗွဲမဒးရးအိုတ်ရော?၊ မပုၚ်မွဲမွဲဂှ် နကဵုကမၠောန်ကေၚ်ကာမဂၠိုၚ် ဒးကဵုစိုပ်ဒတုဲရ၊ သွက်ဂွံဒှ်မပုၚ်မွဲမ ကမၠောန်ကေၚ်ကာဂၠိုၚ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် ဂွံမိၚ်ကေတ် ဂလာန်မၞိဟ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂမၠိုၚ်ဂှ်အိုတ်ဟေၚ်ရ။ ပ္ဍဲအခိၚ်ဂ်ှ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် စၞအာဟာရဘောဇိုန် မဂပ်ဝ်ကဵုဒါန်ဂှ် ဒတုံစှေ်မ္ဂး လပှ်ကေတ်တုဲ ကဵုအခေါၚ် တၞဟ်နစရ၊ ယွံခမဳတအ် စၞအာဟာရဘောဇိုန်ဂှ် ဒကာဂမၠိုၚ် ဂပ်ဝ်ကဵုလဝ်ဒါန်တုဲရ ရဴဝွံ (သ္ဂးရ)။
၂၇၄။ ပ္ဍဲအခိၚ်ဂှ် ခမဳမွဲဇကု နကဵုသၞေံတဲဂမၠိုၚ်မဂၠိၚ် အာဂ္ၚေၚ်ပိဏ္ဍပါတ်ရ၊ ဗြဴမွဲဂှ် ညာတ်ဒးမ္ဂး “ယွံတဳလပိုဉ် သြဝ်ကၠုၚ်ညိ၊ သြဝ်သွိုန်ဗပိုန်မေထုန်ညိ” ရဴဝွံ ဂရၚ်ပတီ ခမဳဂှ်ရ။ ယွံဒေံဗြဴ ပွဝွံ ဟဂပ်ဝ်ရ ရဴဝွံ (သ္ဂးရ)။ ယွံတဳလပိုဉ် တဳလပိုဉ် ဟွံသွိုန်ဗပိုန်မ္ဂး အဲဍိက် ကုတ်ဂွါတ်ၛာ်ဇကု နကဵုသၞေံတဲဇကုဂမၠိုၚ်တုဲ “ ခမဳဝွံ ဒ္ဂေတ်သ္ပအဲ ဗွဲမပၠန်ဂတးရ” ရဴဝွံ ကြက်က္ညာၚ်ကရေဲရ ရဴဝွံ (သ္ဂးရ)။ ယွံဒေံဗြဴ (ဗဗွဲ ဟွံဗဗွဲ) ဂှ် တၠအဲ သြဝ်တီကေတ်ညိ ရဴဝွံ (သ္ဂးရ)။ ပ္ဍဲအခိၚ်ဂှ် ဗြဴဂှ် ကုတ်ဂွါတ်ၛာ်ဇကု နကဵုသၞေံတဲဇကုဂမၠိုၚ်တုဲ “ခမဳဝွံ ဒ္ဂေတ်သ္ပအဲ ဗွဲမပၠန်ဂတးရ” ရဴဝွံ က္ညာၚ်ကရေဲရ။ မၞိဟ်ဂမၠိုၚ် ဂြိပ်ကၠုၚ်တုဲ ရပ်ကေတ်ခမဳဂှ်အိုတ်ရ။
မၞိဟ်ဂမၠိုၚ် ညာတ်ဒး စၞာံပရဳကီု ဆီကီု ပ္ဍဲသၞေံတဲဗြဴဂှ်အိုတ်တုဲ “ပွဝွံ ဒှ်ပွဗြဴဝွံဟေၚ်ရ၊ ခမဳဂှ် ဟွံသ္ပရ” ရဴဝွံ ဗလးထောံခမဳဂှ်အိုတ်ရ။
ပ္ဍဲအခိၚ်ဂှ် ခမဳဂှ် အာအာရှာမ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ယွံကောန်တၠ တၠအဲ ပကၚ်ရၚ်လဝ် သၞေံတဲဂမၠိုၚ်မဂၠိၚ်ဟာ ရဴဝွံ သၟာန်အိုတ်ရ။ ယွံကောန်တၠတအ် ပကၚ်ရၚ်လဝ်ရ ရဴဝွံ (သ္ဂးရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ပကၚ်ရၚ်လဝ် သၞေံတဲဂမၠိုၚ်မဂၠိၚ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ် ‘စွံလဝ်’ သၞေံတဲသၞေံဇိုၚ်ဂမၠိုၚ်မဂၠိၚ်ရ၊ ကုခမဳ မကၚ်ရၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)
ပ္ဍဲအခိၚ်ဂှ် ခမဳဂမၠိုၚ် နကဵုသၞေံတဲလေဝ် ကုတ်သၞေံတဲအိုတ်ရ၊ နကဵုပါၚ်လေဝ် ကုတ်သၞေံတဲအိုတ်ရ၊ ပ္ဍဲဗ္ဒၚ်လေဝ် ဓဇိုတ်ပေါတ်အိုတ်ရ၊ လပုဟ်တဲလပုဟ်ဇိုၚ်ဂမၠိုၚ် ဂိသကေဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် ၜုန်သၟတ်ရေက်သၞေံတဲရ ရဴဝွံ (သ္ဂးရ)။ ကုတ်သၞေံတဲသၞေံဇိုၚ် စဵုကဵုဆီတိတ်ဂှ်ရ လပုဟ်တဲလပုဟ်ဇိုၚ်ဂမၠိုၚ် ဂိသကေဝ်အိုတ်ရ။ ပ ။
ယွံခမဳတအ် ကဵုအခေါၚ် သွက်ဂွံကုတ် (ရေက်) သၞေံတဲသၞေံဇိုၚ် နဗၞတ်ဗ္ၜတ်ဖျုန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ကဵုသ္ပသၞေံတဲ သၞေံဇိုၚ်ဂမၠိုၚ်ၜါစှော် ညံၚ်ဂွံကလိတ်ကလောတ်အိုတ်ရ၊ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ကဵုသ္ပသၞေံတဲသၞေံဇိုၚ်ဂမၠိုၚ်ၜါစှော် ညံၚ်ဂွံကလိတ်ကလောတ်ရ၊ ကုခမဳ မကဵုသ္ပဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် သွက်ဂွံထ္ဍဟ်ပတိတ် အယာံမာတ်အိက်တဲရ ရဴဝွံ (သ္ဂးရ)။
၂၇၅။ ပ္ဍဲအခိၚ်ဂှ် သော်က္ဍိုပ်ခမဳဂမၠိုၚ်ဂၠိၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂမၠိုၚ် သၟဟ်ရထ တၞဟ်နပွမကးသော် ကေုာံရၚ်သကအ်အိုတ်ဟာ ရဴဝွံ သၟာန်ရ။ ယွံတဳလမၞုံပိုဉ် သၟဟ်ရထအိုတ်ရ ရဴဝွံ ဂရၚ်ပတီအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲ—
“ယွံခမဳတအ် ကဵုအခေါၚ် ကယျာၜုန်သော်ဂမၠိုၚ်အိုဿီု မတွံဂး ၜုန်သော် တၟံချူၜုန်သော် ကၞပ်သ္ၚိၜုန်သော် ယာတ်ပူပါတ်ၜုန်သော်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ကဵုကုတ် (ကး) သော်သၟိပ်အိုတ်ရ။ ပ ။ ကဵုသော်သၟိပ်ဂၠိၚ်အိုတ်ရ။ ကဵုသ္ပသော်သၟိပ် မတုပ်သၟဟ်ကဵုသော်သၟိၚ်ဗ္ၜေအ်အိုတ်ရ။ ကဵုသ္ပသော်သၟိပ်ပန်ကၠၚ်အိုတ်ရ။ ကဵုသ္ပပွမကးသော်သြိုဟ်အိုတ်ရ။ ကဵုသ္ပပွမစွံစၟတ်သမ္တီသော်သြိုဟ်အိုတ်ရ။ စွံလဝ်သော်ကၟုၚ်အိုတ်ရ။ ကဵုပိုက် (ကး) သော် ပ္ဍဲဌာန်မက္ဍန်ဂြက်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ကဵုကုတ် (ကး) သော်သၟိပ်ရ။ ပ ။ ဟဂပ်ဝ်ကဵုသော်သၟိပ်ဂၠိၚ်ရ။ ဟဂပ်ဝ်ကဵုသ္ပသော်သၟိပ် မတုပ်သၟဟ်ကဵုသော်သၟိပ်ဗ္ၜေအ်ရ။ ဟဂပ်ဝ်ကဵုသ္ပသော်သၟိပ်ပန်ကၠၚ်ရ။ ဟဂပ်ဝ်ကဵုသ္ပ ပွမကးသော်သြိုဟ်ရ။ ဟဂပ်ဝ်ကဵုသ္ပ ပွမစွံစၟတ်သမ္တီသော်သြိုဟ်ရ။ ဟဂပ်ဝ်စွံလဝ် သော်ကၟုၚ်ရ။ ဟဂပ်ဝ်ကဵုပိုက်(ကး) သော် ပ္ဍဲဌာန်မက္ဍန်ဂြက်ရ၊ ကုခမဳ မကဵုပိုက်ကးဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ကုခမဳမွဲဇကုဂှ် ဒှ်သရ ပ္ဍဲဌာန်မက္ဍန်ဂြက်ရ၊ ဂဥုဲ ဟွံတန်တဴရ၊ ‘ဟွံဗာန်’ ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟိုတ်နူဟိုတ် မတွံဂး ယဲ ကဵုအခေါၚ် သွက်ဂွံပိုက် (ကး) သော် ပ္ဍဲဌာန်မက္ဍန်ဂြက်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ကဵုခေပ်သပိုတ်သော်က္ဍိုပ်ဂမၠိုၚ် နကဵုကတ်တြာဲအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ကဵုခေပ်သပိုတ် သော်က္ဍိုပ်ဂမၠိုၚ် နကဵုကတ်တြာဲရ၊ ကုခမဳ မကဵုခေပ်သပိုတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ကုခမဳမွဲဇကုဂှ် ဒှ်သရပ္ဍဲက္ဍိုပ်ရ၊ ကးသော်က္ဍိုပ်ဂၠိုၚ် နကဵုၜုန်သော်ဟွံမာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟိုတ်နူဟိုတ်မတွံဂးယဲ ကဵုအခေါၚ် သွက်ဂွံခေပ်သပိုတ် သော်က္ဍိုပ်ဂမၠိုၚ် နကဵုကတ်တြာဲ(ကြပ်ကြေဝ်)ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ပကၚ်ရၚ်လဝ် သော်မုဟ်ဂမၠိုၚ်မဂၠိၚ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴအပိၚ်သာစ်ဘုတ်တိဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ်လဝ် သော်မုဟ်ဂမၠိုၚ်မဂၠိၚ်ရ၊ ကုခမဳ မပကၚ်ရၚ်ဂှ် ဒ:အာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ပိုက်တသော်မုဟ် နကဵုတၟံကြေဟ်ကီု နကဵုအိက်ပၠုဲကီုအိုတ်ဂှ်ရ မုဟ်ဂမၠိုၚ် ဂိသကေဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် သၚေပ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပိုက်သော်သကအ်(သော်ဗု)ဂှ်ရ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပိုက်သော်သကအ်ရ၊ ကုခမဳ မပိုက်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၂၇၆။ ပ္ဍဲအခိၚ်ဂှ် ကတောဝ်ဂမၠိုၚ်ခမဳမွဲဇကုဂှ် ကၟာတ်ဒၟံၚ် နကဵုအိက်ကတောဝ်ဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် လေံထ္ဍဟ်ကတောဝ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပကၚ်ရၚ်တဴ လေံထ္ဍဟ်ကတောဝ်ဂမၠိုၚ် မဒှ်ခိုဟ်ခိုဟ် ပရေအ်ပရေအ် ဍေံလေဝ်မဒှ်လေံထ္ဍဟ်ကတောဝ်ထဝ် ဍေံလေဝ်မဒှ်လေံထ္ဍဟ်ကတောဝ်သြန်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ပကၚ်ရၚ် လေံထ္ဍဟ်ကတောဝ်ဂမၠိုၚ် မဒှ်ခိုဟ်ခိုဟ် ပရေအ်ပရေအ်ရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ယွံခမဳတအ် ကဵုအခေါၚ် လေံထ္ဍဟ်ကတောဝ်ဇုတ်ကီု လေံထ္ဍဟ်ကတောဝ်ဒြၚ်စိၚ်ကီု လေံထ္ဍဟ်ကတောဝ်ဒြၚ်သတ်ကီု လေံထ္ဍဟ်ကတောဝ်ကပိုဟ်ကီု လေံထ္ဍဟ်ကတောဝ်ဖျုန်ဇုတ်ကီု လေံထ္ဍဟ်ကတောဝ်ဒုန်ကီု လေံထ္ဍဟ်ကတောဝ်ကြေက်ကီု လေံထ္ဍဟ်ကတောဝ်သတ်ဆုကီု လေံထ္ဍဟ်ကတောဝ်ဗရိုတ်ပသဲကီု လေံထ္ဍဟ်ကတောဝ်ဠိုတ်ကၞုသၚ်ကီုရ ရဴဝွံ (သ္ဂးရ)။
၂၇၇။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပကောံပကေဝ်ဂိုၚ်ဒေပ်လဝ် ကယျာပသဲ ကယျာဗရိုတ်ဂမၠိုၚ် မဂၠိုၚ်အိုတ်ရ။ မၞိဟ်မဂေတ်ဂ္ၚေၚ်လၟေၚ်ဘာဂမၠိုၚ် ညာတ်ဒးတုဲ “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ် မုဟိုတ် သၟဟ်ညံၚ်ရဴညးဗၞိက်ဗရိုတ်ဂမၠိုၚ်ကီု ပကောံပကေဝ်ဂိုၚ်ဒေပ်လဝ် ကယျာပသဲ ကယျာဗရိုတ်ဂမၠိုၚ် မဂၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကောံပကေဝ်လဝ် ကယျာပသဲ ကယျာဗရိုတ်ဂမၠိုၚ်မဂၠိုၚ်ရ၊ ကုခမဳ မပကောံပကေဝ်လဝ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ဍေၚ်ထကိုအ်ယန်မတ်ကီု ဇြေဟ်ယန်မတ်ကီု လေံထ္ဍဟ်ကတောဝ်ကီု အကောပ် (ကဝးဇုက်)သၟတ်ကီု မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် ဍေၚ်ထကိုအ်ယန်မတ်ကီု ဇြေဟ်ယန်မတ်ကီု လေံထ္ဍဟ်ကတောဝ်ကီု အကောပ် (ကဝးဇုက်)သၟတ်ကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဒက်အာယောဂပတ် (ဒက်တာန်) သကိုပ်တုဲ ဂဇအ်အိုတ်ဂှ်ရ တၞုၚ်သကိုပ်ဂမၠိုၚ် လီုလာ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် သီုမဒက်အာယောဂပတ်သကိုပ်ဂှ် ဟဂပ်ဝ်ဂဇအ်ရ၊ ကုခမဳ မဂဇအ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကုဂှ် ဂိယဲဒၟံၚ်ဂှ်ရ စာ်စ္ဍးကေုာံအာယောဂပတ်တုဲ ဟွံဒှ်တသိုခ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် အာယောဂပတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴသာ်လဵု ဂွံသ္ပ အာယောဂပတ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ (အာယောဂပတ်ဟီုဂှ် ယာတ်သပှ်ေမွဲကရေက် ပါဒၟံၚ်ပ္ဍဲသ္ၚာသေံလၟုဟ်ဂှ်ရ။)
ယွံခမဳတအ် ကဵုအခေါၚ် ကယျာတုတ်တုတ်ဂမၠိုၚ်အိုဿီု မတွံဂး စၚ်တုတ်တုတ် လောန်တုတ်တုတ် ခြပ် ကၠောဝ်(ဗရိုတ်, ဒုန်) ရ ရဴဝွံ (သ္ဂးရ)။
၂၇၈။ ပ္ဍဲအခိၚ်ဂှ် ခမဳမွဲဇကု သီုဇုက်ကာယဗန်ဟွံပါ လုပ်ဂ္ၚေၚ်ပိဏ္ဍပါတ် အပ္ဍဲကွာန်ဂှ်ရ သပိုၚ်သၠောတ်စှေ် ပ္ဍဲသဗာန်ဍာန်ဇၞော်ရ။ မၞိဟ်ဂမၠိုၚ် ထအဴက္ညာၚ်ဂှ်ရ ခမဳဂှ် မုက်မတ်ဟွံကေဝ် ဒှ်အာရ။ ပ္ဍဲအခိၚ်ဂှ် ခမဳဂှ် အာအာရှာမ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် သီုဇုက်ကာယဗန်ဟွံပါ ဟဂပ်ဝ်လုပ်ကွာန်ရ၊ ကုခမဳ မလုပ်ဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် ဇုက်ကာယဗန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပကၚ်ရၚ်လဝ် ဇုက်ကာယဗန်ဂမၠိုၚ် မဒှ်ခိုဟ်ခိုဟ် ပရေအ်ပရေအ် မတွံဂး ဇုက်ကာယဗန် ပံၚ်ပကောံဇုက်ဂမၠိုၚ်တုဲမဂပ်ဝ်သ္ပလဝ် ဇုက်ကာယဗန် မဂပ်ဝ်သ္ပလဝ်သဏ္ဌာန်က္ဍိုပ်ဇြုံဍာ် ဇုက်ကာယဗန် မဂပ်ဝ်သ္ပလဝ်သဏ္ဌာန်ဖမ်မန်ဒိုၚ် ဇုက်ကာယဗန် မဂပ်ဝ်သ္ပလဝ် သဏ္ဌာန်ပၞုတ်ဂဒအ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ်လဝ် ဇုက်ကာယဗန်ဂမၠိုၚ် မဒှ်ခိုဟ်ခိုဟ် ပရေအ်ပရေအ် မတွံဂး ဇုက်ကာယဗန် ပံၚ်ပကောံဇုက်ဂမၠိုၚ်တုဲမဂပ်ဝ်သ္ပလဝ် ဇုက်ကာယဗန် မဂပ်ဝ်သ္ပလဝ်သဏ္ဌာန်က္ဍိုပ်ဇြုံဍာ် ဇုက်ကာယဗန် မဂပ်ဝ်သ္ပလဝ်သဏ္ဌာန်ဖမ်မန်ဒိုၚ် ဇုက်ကာယဗန် မဂပ်ဝ်သ္ပလဝ် သဏ္ဌာန်ပၞုတ်ဂဒအ်ရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် ဇုက်ကာယဗန်ဂမၠိုၚ်ၜါဂကူ မတွံဂး ဇုက်ကာယဗန်ဂၠး ဇုက်ကာယဗန် မဂပ်ဝ်သ္ပလဝ် သဏ္ဌာန်ကြုတ်ကၠိရ ရဴဝွံ (သ္ဂးရ)။
တသာဲဇုက်ကာယဗန်ဂမၠိုၚ် အိုဟ်အာအိုတ်ရ။ ပ ။ ယွံခမဳတအ် ကဵုအခေါၚ် တသာဲ မဂပ်ဝ်သ္ပလဝ် သဏ္ဌာန်ဖမ်မန်ဒိုၚ်ကီု တသာဲ မဂပ်ဝ်သ္ပလဝ် သဏ္ဌာန်ပၞုတ်ဂဒအ်ကီုရ ရဴဝွံ (သ္ဂးရ)။
တၞုၚ်မုဟ် ဇုက်ကာယဗန် အိုဟ်အာရ။ ပ ။
ယွံခမဳတအ် ကဵုအခေါၚ် ပွမခ္ဍပ်တၞုၚ်မုဟ်တုဲဇိၚ်ထပက်ကီု ပွမဇိၚ်ထပက်ဗ္တဗကောတ်ကီုရ ရဴဝွံ (သ္ဂးရ)။
မုဟ်ပးဇုက်ကာယဗန် အိုဟ်အာရ။ ပ ။ ယွံခမဳတအ် ကဵုအခေါၚ် မကာယဗန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပကၚ်ရၚ်လဝ် မကာယဗန်ဂမၠိုၚ် မဒှ်ခိုဟ်ခိုဟ် ပရေအ်ပရေအ် မတွံဂး မကာယဗန်ထဝ် မကာယဗန်သြန်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ်လဝ် မကာယဗန်ဂမၠိုၚ် မဒှ်ခိုဟ်ခိုဟ် ပရေအ်ပရေအ်ရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် မကာယဗန်ဇုတ်ကီု ။ ပ ။ မကာယဗန်ဠိုတ်ကၞုသၚ်ကီု မကာယဗန်တောဝ်ရ ရဴဝွံ (သ္ဂးရ)။
၂၇၉။ ပ္ဍဲအခိၚ်ဂှ် တဳလပိုဉ်အာနန္ဒ သၠောံရုၚ်လတက်သ္ၚာမသာဂမၠိုၚ်တုဲ လုပ်ဂ္ၚေၚ်ပိဏ္ဍပါတ် အပ္ဍဲကွာန်ရ၊ ဟိုတ်နူကျာပလက်သကိုပ်ဂမၠိုၚ် သၠိုက်တိုန်အိုတ်ရ။ ပ္ဍဲအခိၚ်ဂှ် တဳလပိုဉ်အာနန္ဒ အာအာရှာမ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် သ္ၚိပ္ၚောန်က္ဍိုပ်ရုဲကီု သ္ၚိပ္ၚောန်ပးကီုရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပကၚ်ရၚ်လဝ် သ္ၚိပ္ၚောန်က္ဍိုပ်ရုဲဂမၠိုၚ် မဒှ်ခိုဟ်ခိုဟ် ပရေအ်ပရေအ် မတွံဂး သ္ၚိပ္ၚောန်က္ဍိုပ်ရုဲထဝ် သ္ၚိပ္ၚောန်က္ဍိုပ်ရုဲသြန်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ပကၚ်ရၚ်လဝ် သ္ၚိပ္ၚောန်က္ဍိုပ်ရုဲဂမၠိုၚ် မဒှ်ခိုဟ်ခိုဟ် ပရေအ်ပရေအ်ရ၊ ကုခမဳ မပကၚ်ရၚ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် သ္ၚိပ္ၚောန်က္ဍိုပ်ရုဲဇုတ်ကီု သ္ၚိပ္ၚောန်က္ဍိုပ်ရုဲဒြၚ်သတ်ကီု သ္ၚိပ္ၚောန်က္ဍိုပ်ရုဲကပိုဟ်ကီု သ္ၚိပ္ၚောန်က္ဍိုပ်ရုဲဒုန်ကီု သ္ၚိပ္ၚောန်က္ဍိုပ်ရုဲဖျုန်ဆုကီု သ္ၚိပ္ၚောန်က္ဍိုပ်ရုဲကြေက်ကီု သ္ၚိပ္ၚောန်က္ဍိုပ်ရုဲသတ်ဆုကီု သ္ၚိပ္ၚောန်က္ဍိုပ်ရုဲဗရိုတ်ပသဲကီု သ္ၚိပ္ၚောန်က္ဍိုပ်ရုဲဠိုတ်ကၞုသၚ်ကီု သ္ၚိပ္ၚောန်က္ဍိုပ်ရုဲတောဝ်ကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ဒက်စုတ်သ္ၚိပ္ၚောန်က္ဍိုပ်ရုဲကီု သ္ၚိပ္ၚောန်ပးကီု ပ္ဍဲသ္ၚာဂှ်ရ သ္ၚာအိုဟ်အာရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် ဂၠးသ္ၚိပ္ၚောန်က္ဍိုပ်ရုဲကီု ဂၠးသ္ၚိပ္ၚောန်ပးကီုရ ရဴဝွံ (သ္ဂးရ)။
ဒက်စုတ် ဂၠးသ္ၚိပ္ၚောန်က္ဍိုပ်ရုဲကီု ဂၠးသ္ၚိပ္ၚောန်ပးကီု ပ္ဍဲလအိတ်မုဟ်ဂှ်ရ ဂၠးအမာတ်ဇမၠိၚ် ပံက်အာရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဂၠးသ္ၚိပ္ၚောန်က္ဍိုပ်ရုဲဂှ် ကဵုအခေါၚ် သွက်ဂွံဒက်စုတ် ပ္ဍဲလအိတ်မုဟ်ရ၊ ဂၠးသ္ၚိပ္ၚောန်ပးဂှ် ဆုတ်စှေ်သၟတ်(ယှအ်ထောံ) ကဵုအခေါၚ် သွက်ဂွံဒက်စုတ်ရ ရဴဝွံ (သ္ဂးရ)။
၂၈၀။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဗိုက်လတက် ပွမဗိုက်ညံၚ်ရဴခရှ်ဂမၠိုၚ် မတွံဂး လကဲဖျေံသၟဝ် ညံၚ်ရဴလပှ်စိၚ်တုဲ ပွမဗိုက် လကဲဖျေံပန်ကၠၚ်တုဲ ပွမဗိုက် လကဲဖျေံသၟဝ် ညံၚ်ရဴဗ္တကတုဲ ပွမဗိုက် လကဲဖျေံသၟဝ် ညံၚ်ရဴဗၞဳအဝဏ်ပၞိက်တုဲ ပွမဗိုက် လကဲဖျေံသၟဝ် အတောအ်မဂၠိုၚ်တုဲ ပွမဗိုက်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ဗိုက်လတက် ပွမဗိုက်ညံၚ်ရဴခရှ်ဂမၠိုၚ် မတွံဂး လကဲဖျေံသၟဝ် ညံၚ်ရဴလပှ်စိၚ်တုဲ ပွမဗိုက် လကဲဖျေံပန်ကၠၚ်တုဲ ပွမဗိုက် လကဲဖျေံသၟဝ်ညံၚ်ရဴဗ္တကတုဲ ပွမဗိုက် လကဲဖျေံသၟဝ် ညံၚ်ရဴဗၞဳအဝဏ်ပၞိက်တုဲ ပွမဗိုက် လကဲဖျေံသၟဝ် အတောအ်မဂၠိုၚ်တုဲ ပွမဗိုက်ရ။ ကုခမဳ မဗိုက်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဓလီုရုၚ်လတက် ပွမရုၚ်လတက်ညံၚ်ရဴခရှ်ဂမၠိုၚ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ဓလီုရုၚ်လတက် ပွမရုၚ်လတက် ညံၚ်ရဴခရှ်ဂမၠိုၚ်ရ၊ ကုခမဳ မဓလီုရုၚ်လတက်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ခါတ်ဂၞိၚ်တုဲ ဗိုက်လတက်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴသၟာကမၠောန်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခါတ်ဂၞိၚ်တုဲ ဟဂပ်ဝ်ဗိုက်လတက်ရ၊ ကုခမဳ မဗိုက်လတက်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၂၈၁။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဂၠေၚ်တဴ ဓလေၚ်မၞုံကဵုလျိုၚ်ၜါလပါ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴသၟာကမၠောန်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခါတ်ဂၞိၚ်တုဲ ဟဂပ်ဝ်ဂၠေၚ် ဓလေၚ်မၞုံကဵုလျိုၚ်ၜါလပါ်ရ၊ ကုခမဳ မဂၠေၚ်ဂှ်ဒးအာပတ်ဒုက္ကဋ်ရ ရဴဝွံ (သ္ဂးရ)။
ယွံခမဳတအ် ကဵုအခေါၚ် ဓလေၚ်မၞုံကဵုလျိုၚ်မွဲလပါ်ကီု ဓလေၚ်မၞုံကဵုလျိုၚ်လဒေါဝ်ကီု လျိုၚ်မယဵုနက္ဍိုပ်ကီု လျိုၚ်တ္ၚိန်ကဵုပၞးကီု လျိုၚ်လေၚ်တခံက်ဂၞိၚ်ကီု လျိုၚ်ဝှက်နတဲကီုရ ရဴဝွံ (သ္ဂးရ)။
၂၈၂။ ပ္ဍဲအခိၚ်ဂှ် ခမဳဂမၠိုၚ် ဟွံစဆုဒကအိုတ်ရ၊ ပါၚ် သၟူအမြာဲ ဟွံဒးရးရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
