၄.၉.၆။ တဿပါပိယသိကာဝိနယ်
၂၃၈။ အနုဝါဒါဓိကိုရ်ဂှ် ဟွံပြာပ်အာ သမထဂမၠိုင်ၜါဂကူမတွံဂး သတိဝိနယ် အမူဠဝိနယ်တုဲ နကဵုသမထဂမၠိုင်ၜါ မတွံဂးသမ္မုခါဝိနယ် တဿပါပိယသိကာဝိနယ်ဂှ် လလမ်ဟာ၊ လလမ်ရ ရဴဝွံ ထေက်ကဵုသ္ဂးရ။
ညံင်ရဴသာ်လဵုရောမ္ဂးမာ ပ္ဍဲသာသနာဝွံ ခမဳဂှ် “တဳလပိုဉ် ဩဝ်ဗှ်ဗၞုဟ် မအာစိုပ်အာပတ်ပါရာဇ်ကီု အာပတ် မညောန်ကဵုပါရာဇ်ကီု ဂရုကအာပတ် မၞုံပဘဴရဴဝွံညိ” ရဴဝွံ စောဒနာခမဳ နကဵုဂရုကအာပတ် ပ္ဍဲလဒေါဝ်သင်ရ။ ခမဳဂှ် “ယွံကောန်တၠတအ် အဲဍိက် အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ်မၞုံသဘဴရဴဝွံဂှ် ဗှ်ဗၞုဟ်ဟွံဒးရ ‘ဟွံဂွံသတိရ’” ရဴဝွံ သ္ဂးရ။
ခမဳစောဒကဂှ် “ယွံတဳလပိုဉ် ဖအောဝ်ဗတိုက်ရ၊ (တၠအဲ) အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ် မၞုံသဘဴရဴဝွံရ ရဴဝွံ ဂွံသတိမ္ဂး ဩဝ်ဒုင်ဝန် ဗွဲမဒးရးညိ” ရဴဝွံ ဒက်ပူပါတ် ခမဳမသောင်ကလးဒၟံင်ဂှ် ဗွဲမလောန်ရ။
ခမီဂှ် “ယွံကောန်တၠ အဲဍိက် အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ်မၞုံသဘဴရဴဝွံဂှ် ဟွံဂွံသတိရ၊ ယွံကောန်တၠ အဲဍိက် အာစိုပ်အာပတ် ဗၞတ်ညိနာင် မၞုံသဘဴရဴဝွံရဂှ် ဂွံသတိရ” ရဴဝွံ သ္ဂးရ။
ခမဳစောဒကဂှ် “ယွံတဳလပိုဉ် ဖအောဝ်ဗတိုက်ရ၊ (တၠအဲ) အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ် မၞုံသဘဴရဴဝွံရ ရဴဝွံ ဂွံသတိမ္ဂး ဩဝ်ဒုင်ဝန်ဗွဲမဒးရးညိ” ရဴဝွံ ဒက်ပူပါတ် ခမဳမသောင်ကလးဒၟံင်ဂှ် ဗွဲမလောန်ပၠန်ရ။ ခမီဂှ် “ယွံကောန်တၠ အဲဍိက် အာစိုပ်အာပတ်ဗၞတ်ညိနာင် မၞုံသဘဴဝွံဟေင်တုဲ သီုဟွံဒးဒုင်သၟာန်ဂှ် ဒုင်ဝန်ဏီရ၊ အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ် မၞုံသဘဴရဴဝွံမ္ဂး သီုမဒးဒုင်သၟာန်ဂှ် မုဟိုတ် ဟွံဒုင်ဝန်နွံဏီရော?” ရဴဝွံ သ္ဂးရ။
ခမဳစောဒကဂှ် “ယွံတဳလပိုဉ် တၠအဲ အာစိုပ်အာပတ်ဗၞတ်ညိနာင် မၞုံသဘဴရဴဝွံတုဲ သီုဟွံဒးဒုင်သၟာန်ဂှ် ဟွံဒုင်ဝန်ဏီရ၊ အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု အရုကအာပတ် မၞုံသဘဴရဴဝွံမ္ဂး သီုဟွံဒးဒုင်သၟာန်ဂှ် ပသာ်ဂွံဒုင်ဝန်ရော?၊ ယွံတဳလပိုဉ် ဖအောဝ်ဗတိုက်ရ၊ (တၠအဲ) အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ်မၞုံသဘဴရဴဝွံရ ရဴဝွံ ဂွံသတိမ္ဂး ဩဝ်ဒုင်ဝန်ဗွဲမဒးရးညိ” ရဴဝွံ သ္ဂးရ။ ခမဳဂှ် “ယွံကောန်တၠ အဲဍိက် အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ် မၞုံသဘဴရဴဝွံဂှ် ဂွံသတိရ၊ အဲဍိက် အာစိုပ်အာပတ်ပါရာဇ်ကီု အာပတ်မညောန်ကဵုပါရာဇ်ကီု ဂရုကအာပတ် မၞုံသဘဴရဴဝွံဂှ် ဟွံဂွံသတိရ၊ အဲဍိက် ဟီုဒးဂလာန်ဂှ် ဗွဲမဂြိုင်ဝေင်ရ၊ အဲဍိက် ဟီုဒးဂလာန်ဂှ် ဗွဲမဖလုတ်တိတ်ရ” ရဴဝွံ သ္ဂးရ။
ယွံခမဳတအ် ကုခမဳဂှ် ဒးသ္ပတဿပါပိယသိကကမ်ရ၊ ယွံခမဳတအ် ရဴဝွံ ဒးသ္ပရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသင်တီရ—
“ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ ခမဳမၞုံယၟုဝွံ ဂပ်ဝ်သၟာန်သၟုက်စၟဳစၟတ် နဂရုကအာပတ် ပ္ဍဲလဒေါဝ်သင်မ္ဂး ပါဲကၠေံတုဲပ္ဍဲကြဴ ဒုင်ဝန်ရ၊ ဒုင်ဝန်တုဲပ္ဍဲကြဴ ပါဲကၠေံရ၊ ဟီုဂြောပ်ဗ္ဒန်ဂလာန်မွဲသအာင် နဂလာန်မွဲသအာင်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ကမ်မၞုံကဵုအခိင်မဗဗွဲ ကုသင် ယဝ်ဒှ်မ္ဂး၊ သင် သ္ပတဿပါပိယသိကကမ် ကုခမဳမၞုံဝွံရ၊ ဣဝွံတုန် ပွမကဵုတီရောင်။
ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ ခမဳမၞုံယၟုဝွံ ဂပ်ဝ်သၟာန်သၟုက်စၟဳစၟတ် နဂရုကအာပတ် ပ္ဍဲလဒေါဝ်သင်မ္ဂး ပါဲကၠေံတုဲပ္ဍဲကြဴ ဒုင်ဝန်ရ၊ ဒုင်ဝန်တုဲပ္ဍဲကြဴ ပါဲကၠေံရ၊ ဟီုဂြောပ်ဗ္ဒန်ဂလာန်မွဲသအာင် နဂလာန်မွဲသအာင်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ကမ်မၞုံကဵုအခိင်မဗဗွဲ ကုသင် ယဝ်ဒှ်မ္ဂး၊ သင် သ္ပတဿပါပိယသိကကမ် ကုခမဳမၞုံဝွံရ၊ ယြဴတကုတဳလပိုဉ်မွဲ မၞုံကဵုပွမသ္ဍိုက်မၠိုက် ပွမသ္ပတဿပါပိယသိကကမ် ကုခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵု ၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။
သၚ် ဂပ်ဝ်သ္ပတဿပါပိယသိကကမ် ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
ယွံခမဳတအ် အဓိကိုရ်ဝွံ လလမ်ရ ရဴဝွံထေက်ကဵုသ္ဂးရ။ မုရဴ နဝိနယ်ကမ်မွဲ လလမ်ရော?။ နကဵုသမ္မုခါဝိနယ်ကီု နကဵုတဿပါပိယသိကဝိနယ်ကမ်ကီု လလမ်ရ။ ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော?၊ ပွမဒှ်ဂတမုက်သၚ် ပွမဒှ်ဂတမုက်ဓရ် ပွမဒှ်ဂတမုက်ဝိနယ်ဂမၠိုၚ်ရ ။ ပ ။ ပ္ဍဲအရာမလလမ်ဂှ် မုမွဲ ဒှ်တဿပါပိယကကမ်ဝိနယ်ရော? ပွမသ္ပအကာဲအရာမသ္ပ ပွမပြာပ်အာ ပွမပြာပ်အာတူရူ ပွမအေၚ်ဒုၚ် ပွမဟွံဆေဝ်ဒဝ် တဿပါပိယသိကဝိနယ်ကမ်ဂမၠိုၚ်ဂှ် တဿပါပိယသိကဝိနယ်မ္ဂးအိုတ်ရ။
ယွံခမဳတအ် အဓိကိုရ်မလလမ်တုဲ ရဴဝွံ ခမဳကာကရဂှ် ခ္ဍဟ်ကတဵုမ္ဂး၊ ဒးအာပတ်ပါဲစိုတ် မကတဵုဒှ် ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ပျုတ်ဗ္ဒေက်မ္ဂး ဒးအာပတ်ပါဲစိုတ်မကတဵုဒှ် ဟိုတ်နူပွမပျုတ်ဗ္ဒေက်ရ။
