၄.၉.၄။ သတိဝိနယ်
၂၃၆။ အနုဝါဒါဓိကိုရ်ဂှ် မုရဴနသမထဂမၠိုၚ် လလမ်ရော?။ အနုဝါဒါဓိကိုရ်ဂှ် နကဵုသမထဂမၠိုၚ်ပန် မတွံဂး သမ္မုခါဝိနယ် သတိဝိနယ် အမူဠဝိနယ် တဿပါပိယသိကာဝိနယ် လလမ်ရ။
အနုဝါဒါဓိကိုရ်ဂှ် ဟွံပြာပ်အာ သမထဂမၠိုၚ်ၜါဂကူ မတွံဂး အမူဠဝိနယ် တဿပါပိယသိကာဝိနယ် နကဵုသမထဂမၠိုၚ်ၜါ မတွံဂး သမ္မုခါဝိနယ် သတိဝိနယ်ဂှ် လလမ်ဟာ၊ လလမ်ရ ရဴဝွံ ထေက်ကဵုသ္ဂးရ။
ညံၚ်ရဴသာ်လဵုရောမ္ဂးမာ ပ္ဍဲသာသနာဝွံ ခမဳဂမၠိုၚ် စောတ်စောဲခမဳ နပွမသဳလလီုလာ် မဟွံမွဲကဵုရိုဟ်တၞမ်အိုတ်ရ။
ယွံခမဳတအ် ကုခမဳမအာစိုပ်သတိလှဲလးဂှ် ဒးကဵုသတိဝိနယ်ရ။ ယွံခမဳတအ် ရဴဝွံ ဒးကဵုရ။
ယွံခမဳတအ် ခမဳဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ်ပ္ဍဲလတူပၞးပါဲ မွဲလပါ်တုဲ ။ ပ ။ “ယွံတဳလပိုဉ်တအ် ခမဳဂမၠိုၚ် စောတ်စောဲ အဲဍိက် နပွမသဳလလီုလာ် မဟွံမွဲကဵုရိုဟ်တၞမ်အိုတ်ရ၊ ယွံတဳလပိုဉ်တအ် အဲဍိက်မအာသတိလှဲလးဂှ် အာတ်သၚ် သတိဝိနယ်ရ” ရဴဝွံ ဒးဟီုသ္ဂးရ။
မရနုက်ကဵုၜါဝါလေဝ် ဒးအာတ်ရ၊ မရနုက်ကဵုပိဝါလေဝ် ဒးအာတ်ရ။ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဂမၠိုၚ်စောတ်စောဲ ခမဳမၞုံယၟုဝွံ နပွမသဳလလီုလာ် မဟွံမွဲကဵုရိုဟ်တၞမ်အိုတ်ရ၊ ခမဳ မအာစိုပ်သတိလှဲလးဂှ် အာတ်သၚ် သတိဝိနယ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသတိဝိနယ် ကုခမဳ မအာစိုပ်သတိလှဲလးရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဂမၠိုၚ်စောတ်စောဲ ခမဳမၞုံယၟုဝွံ နပွမသဳလလီုလာ် မဟွံမွဲကဵုရိုဟ်တၞမ်အိုတ်ရ၊ ခမဳ မအာစိုပ်သတိလှဲလးဂှ် အာတ်သၚ် သတိဝိနယ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ကဵုသတိဝိနယ် ကုခမဳ မအာစိုပ်သတိလှဲလးရ၊ ယြဴကုတဳလပိုဉ်မွဲ သ္ဍိုက်မၠိုက် ပွမကဵုသတိဝိနယ် ကုခမဳမၞုံယၟုဝွံ မအာစိုပ်သတိလှဲလးရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။
သၚ် ဂပ်ဝ်ကဵုသတိဝိနယ် ကုခမဳမၞုံယၟုဝွံ မအာစိုပ်သတိလှဲလးတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
ယွံခမဳတအ် အဓိကိုရ်ဝွံ လလမ်ရ ရဴဝွံ ထေက်ကဵုသ္ဂးရ။ မုရဴ နဝိနယ်ကမ်မွဲ လလမ်ရော?။ နကဵုသမ္မုခါဝိနယ်ကီု နကဵုသတိဝိနယ်ကီု လလမ်ရ။ ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော? ပွမဒှ်ဂတမုက်သၚ် ပွမဒှ်ဂတမုဓရ် ပွမဒှ်ဂတမုက်ဝိနယ် ပွမဒှ်ဂတမုက်ပူဂိုလ် ဂမၠိုၚ်ရ ။ ပ ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက် ပူဂိုလ်ရော?။ ပွမဒှ် ဂတမုက် ခမဳမစောတ်စောဲ ခမဳမဒးဒုၚ်စောတ်စောဲဂမၠိုၚ်ၜါဇကုဂှ် ဒှ်ပွမဒှ်ဂတမုက်ပူဂိုလ်ရ။
ပ္ဍဲအရာမလလမ်ဂှ် မုမွဲ ဒှ်သတိဝိနယ်ရော?။ ပွမသ္ပ အကာဲအရာမသ္ပ ပွမပြာပ်အာ ပွမပြာပ်အာတူရူ ပွမအေၚ်ဒုၚ် ပွမဟွံဆေဝ်ဒဝ် သတိဝိနယ်ကမ်ဂမၠိုၚ်ဂှ် သတိဝိနယ်မ္ဂး အိုတ်ရ။
ယွံခမဳတအ် အဓိကိုရ်မလလမ်တုဲရဴဝွံ ခမဳကာကရဂှ် ခ္ဍဟ်ကတဵုမ္ဂး၊ ဒးအာပတ်ပါဲစိုတ်မကတဵုဒှ် ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ပျုတ်ဗ္ဒေက်မ္ဂး၊ ဒးအာပတ်ပါဲစိုတ် မကတဵုဒှ် ဟိုတ်နူပွမပျုတ်ဗ္ဒေက်ရ။
