၄.၉.၃။ ပွမကဵုဇြေဟ်လိက်မာဲပိဂကူ
၂၃၅။ ပ္ဍဲအခိၚ်ဂှ် ပ္ဍဲဍုၚ်သာရဝှ် အဓိကိုရ် ကတဵုဒှ်ရဴဝွံရ၊ ဒှ်တိုန်ကၠုၚ်ရဴဝွံရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ်သၚ် ပ္ဍဲဍုၚ်သာရဝှ်အိုတ်ရ။
“ပ္ဍဲဘာမၞုံယၟုဝွံ မှာထေရ်ဇၞော်ဂမၠိုၚ်မဂၠိုၚ် ပဒတဴဒၟံၚ်အိုတ်ရ၊ လၟိၚ်လညာတ်ဂၠိုၚ်အိုတ်ရ၊ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်အိုတ်ရ၊ မၞုံကဵုပညာတုဲ ဍိုဟ်ကေက်စဵကၠးအိုတ်ရ၊ လေပ်ဂွပါပ်အိုတ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာအိုတ်ရ၊ မၞုံပၟိက်ကဵုဒ္ဂေတ်သိက္ခာအိုတ်ရ၊ မှာထေရ်ဇၞော်ဂမၠိုၚ်ဂှ် ကဵုလလမ်ကၠေံ အဓိကိုရ်ဝွံ နကဵုဓမ္မဝိနယ ဉတ်ကမ္မဝါစ်ဂမၠိုၚ်အိုတ်မ္ဂး၊ အဓိကိုရ်ဝွံ လလမ်အာဗွဲမဒးရးရ” ရဴဝွံ ဂွံမိၚ်ကေတ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် က္ညအာဘာဂှ်တုဲ “ယွံတဳလပိုဉ်တအ် အဓိကိုရ်ဝွံ ကတဵုဒှ်ရဴဝွံရ၊ ဒှ်တိုန်ကၠုၚ်ရဴဝွံရ၊ ယွံတဳလပိုဉ်တအ် အာတ်ပါန်အခေါၚ်ရ၊ မှာထေရ်ဂမၠိုၚ် ဩဝ်လလမ်ကၠေံ အဓိကိုရ်ဝွံ နကဵုဓမ္မဝိနယ်ယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်အိုတ်ညိ” ရဴဝွံ ဟီုသ္ဂးကဵုမှာထေရ်ဇၞော်ဂမၠိုၚ်အိုတ်ရ။
ပ္ဍဲအခိၚ်ဂှ် မှာထေရ်ဇၞော်ဂမၠိုၚ်ဂှ် အတိုၚ်သၚ်ကဵုလလမ်ကၠေံ အဓိကိုရ် ပ္ဍဲဍုၚ်သာရဝှ်ဂှ် လလမ်ဗွဲမဒးရးရ ရဴဝွံ ပၠုပ်စိုတ်တုဲ နနယ်ဂှ် ကဵုလလမ်ကၠေံ အဓိကိုရ်ဂှ်အိုတ်ရ။ ပ္ဍဲအခိၚ်ဂှ်ခမဳဂမၠိုၚ်ဂှ် ဟွံတရိုပ်စိုပ် ဟွံပြေစိုတ် နပွမကဵုလလမ်ကၠေံ အဓိကိုရ်သၚ် ပ္ဍဲဍုၚ်သာရဝှ်အိုတ်ရ၊ ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ် မှာထေရ်ဇၞော်ဂမၠိုၚ်မဂၠိုၚ်အိုတ်ရ။ “ပ္ဍဲဘာမၞုံယၟုဝွံ မှာထေရ်ဇၞော်ဂမၠိုၚ်ပိဇကု ပဒတဴဒၟံၚ်အိုတ်ရ။ ပ ။ မှာထေရ်ဇၞော်ဂမၠိုၚ်ၜါဇကု ပဒတဴဒၟံၚ်အိုတ်ရ။ ပ ။ မှာထေရ်ဇၞော်မွဲဇကု ပဒတဴဒၟံၚ်ရ၊ လၟိၚ်လညာတ်ဂၠိုၚ်ရ၊ ဂွံပတိုန်လဝ်ပါၚ်ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်ရ၊ မၞုံကဵုပညာတုဲ ဍိုဟ်ကေက်စဳကၠးရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ၊ မှာထေရ်ဇၞော်ဂှ် ကဵုလလမ်ကၠေံ အဓိကိုရ်ဝွံ နကဵုဓမ္မဝိနယ ဉတ်ကမ္မဝါစ်ဂမၠိုၚ်မ္ဂး၊ အဓိကိုရ်ဝွံလလမ်အာဗွဲမဒးရးရ” ရဴဝွံ ဂွံမိၚ်ကေတ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် က္ညအာဘာဂှ်တုဲ “ယွံတဳလပိုဉ် အဓိကိုရ်ဝွံ ကတဵုဒှ်ရဴဝွံရ၊ ဒှ်တိုန်ကၠုၚ်ရဴဝွံရ၊ ယွံတဳလပိုဉ် အာတ်ပါန်အခေါၚ်ရ၊ မှာထေရ်ဇၞော် ဩဝ်လလမ်ကၠေံအဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်ညိ” ရဴဝွံ ဟီုသ္ဂးကဵု မှာထေရ်ဇၞော်ဂှ်အိုတ်ရ။
ပ္ဍဲအခိၚ်ဂှ် မှာထေရ်ဇၞော်ဂှ် အတိုၚ်သၚ်ကဵုလလမ်ကၠေံ အဓိကိုရ်ပ္ဍဲဍုၚ်သာဝှ် အတိုၚ်မှာထေရ်ဇၞော်ဂမၠိုၚ်ပိဇကု ကဵုလလမ်ကၠေံအဓိကိုရ် အတိုၚ်မှာထေရ်ဇၞော်ဂမၠိုၚ်ၜါဇကု ကဵုလလမ်ကၠေံအဓိကိုရ်ဂှ် လလမ်ဗွဲမဒးရးရ” ရဴဝွံ ပၠုပ်စိုတ်တုဲ နနယ်ဂှ် ကဵုလလမ်ကၠေံ အဓိကိုရ်ဂှ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ်သၚ် ပ္ဍဲဍုၚ်သာရဝှ်အိုတ်ရ၊ ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ် မှာထေရ်ဇၞော်ဂမၠိုၚ်အိုတ်ရ။ ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ် မှာထေရ်ဇၞော်ဂမၠိုၚ် ပိဇကုအိုတ်ရ။ ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ် မှာထေရ်ဇၞော်ဂမၠိုၚ် ၜါဇကုအိုတ်ရ။ ဟွံတရိုပ်စိုတ် ဟွံပြေစိုတ် နပွမကဵုလလမ်ကၠေံ အဓိကိုရ် မှာထေရ်ဇၞော်မွဲဇကုအိုတ်ရ။
ပြာပ်အာဇရေၚ် တဳလမၞုံပိုဉ်ကျာ်တြဲတုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် အဓိကိုရ်ဝွံ ပိုတ်သကုတ်အာတုဲဒှ်ရ၊ လလမ်အာတုဲရ၊ ၜိုဟ်လလမ်အာတုဲဒှ်ရ၊ ၜိုဟ်လလမ်အာဗွဲမဒးရးတုဲဒှ်ရ” ရဴဝွံ (သ္ဂးရ)။ ယွံခမဳတအ် (၁) သွက်ဂွံကဵုတီကေတ်ဇြေဟ်လိက်မာဲ ပၞုက်ဓလုက်ကီု (၂) ဇြေဟ်လိက်မာဲ ပြာပ်အာ ပ္ဍဲတမ်ကတောဝ် ဇကုတုဲမကဵုကီု (၃) ဇြေဟ်လိက်မာဲ ဗၠးၜးတၟးဇးကီု ကဵုအခေါၚ် တၞဟ်နကဵုဂိုၚ်ကေတ်ဇြေဟ်လိက်မာဲဂမၠိုၚ် ပိဂကူဝွံ ကုခမဳဂမၠိုၚ်ဂှ်ရ။
ယွံခမဳတအ် မုရဴသာလဵု ဒှ်ပွမကဵုဂိုၚ်ကေတ် ဇြေဟ်လိက်မာဲပၞုက်ဓလုက်ရော?။ ခမဳမကဵုဂိုၚ်ကေတ် ဇြေဟ်လိက်မာဲဂှ် သ္ပတဴဗၞတ်ဗ္ၜတ်စၟတ်သမ္တီဂမၠီုၚ် ဇြေဟ်လိက်မာဲဂမၠိုၚ်တုဲ ပြာပ်အာဇရေၚ် ခမဳမွဲမွဲဇကုဇဳတုဲ “ဣဝွံတုန် ဇြေဟ်လိက်မာဲ ညးမၞုံကွေတ်ရဴဝွံရ၊ ဣဝွံတုန် ဇြေဟ်လိက်မာဲ ညးမၞုံကွေတ်ရဴဝွံရ၊ ဩဝ်ဂိုၚ်ကေတ် မာဲနွံပၟိက်ဂှ်ညိ” ရဴဝွံ ဒးဟီုရ၊ ဂိုၚ်ကေတ်မာဲတုဲမ္ဂး “လ္ပထ္ၜးကဵု ကုပူဂိုလ်မမိက်ကဵုမွဲမွဲညိ” ရဴဝွံ ဒးဟီုဏီရ။ “ခမဳအဓမ္မဝါဒဳဂမၠိုၚ်ဂၠိုၚ်လောန်အိုတ်ရ” ရဴဝွံ တီမ္ဂး “ဂိုၚ်ကေတ်မာဲဟွံဒးရးရ” ရဴဝွံ ဟီုတုဲ ဒးတံၚ်ဓဇက်တမ်ပၠန်ရ ‘ဒးကဵုဂိုၚ်ကေတ်မာဲပၠန်ရ’။ “ခမဳဓမ္မဝါဒဳဂမၠိုၚ်ဂၠိုၚ်လောန်အိုတ်ရ” ရဴဝွံ တီကေတ်တှ်ေ “ဂိုၚ်ကတ်မာဲဒးရးရ” ရဴဝွံ ဒးဟီုလလောၚ်ပၟိၚ်ရ။ ယွံခမဳတအ် ရဴဝွံဟေၚ် ဒှ်ပွမကဵုဂိုၚ်ကေတ်ဇြေဟ်လိက်မာဲ ပၞုက်ဓလုက်ရ။
ယွံခမဳတအ် မုရဴသာ်လဵု ဒှ်ပွမကဵုဂိုၚ်ကေတ် ဇြေဟ်လိက်မာဲ ‘ပွမကဵုမာဲ’ ပြာပ်အာ ပ္ဍဲတမ်ကတောဝ်ဇကုတုဲ မကဵုရော?။ ခမဳ မကဵုဂိုၚ်ကေတ် ဇြေဟ်လိက်မာဲဂှ် ပြာပ်အာတမ်ကတောဝ် ကုခမဳမွဲမွဲဇကုတုဲ “ဣဝွံတုန် ဇြေဟ်လိက်မာဲ ညးမၞုံကွေတ်ရဴဝွံရ၊ ဣဝွံတုန် ဇြေဟ်လိက်မာဲ ညးမၞုံကွေတ်ရဴဝွံရ၊ ဩဝ်ဂိုၚ်ကေတ် မာဲနွံပၟိက်ဂှ်ညိ” ရဴဝွံ ဒးဟီုရ၊ ဂိုၚ်ကေတ်မာဲတုဲမ္ဂး “လ္ပထ္ၜးကဵု ကုပူဂိုလ်မမိက်ကဵုမွဲမွဲညိ” ရဴဝွံ ဒးဟီုဏီရ။ “ခမဳအဓမ္မဝါဒဳဂမၠိုၚ်ဂၠိုၚ်လောန်အိုတ်ရ” ရဴဝွံ တီမ္ဂး “ဂိုၚ်ကေတ်မာဲဟွံဒးရးရ” ရဴဝွံ ဟီုတုဲ ဒးတံၚ်ဓဇက်တမ်ပၠန်ရ ‘ဒးကဵုဂိုၚ်ကေတ်မာဲပၠန်ရ’။ “ခမဳဓမ္မဝါဒဳဂမၠိုၚ်ဂၠိုၚ်လောန်အိုတ်ရ” ရဴဝွံ တီကေတ်တှ်ေ “ဂိုၚ်ကတ်မာဲဒးရးရ” ရဴဝွံ ဒးဟီုလလောၚ်ပၟိၚ်ရ။ ယွံခမဳတအ် ရဴဝွံဟေၚ် ဒှ်ပွမကဵုဂိုၚ်ကေတ် ဇြေဟ်လိက်မာဲ မဒးဟီုပ္ဍဲတမ်ကတောဝ်ရ။ ယွံခမဳတအ် မုရဴသာ်လဵု ဒှ်ပွမကဵုဂိုၚ်ကေတ် ဇြေဟ်လိက်မာဲ ဗၠးၜးတၟးဇးရော?။ “ခမဳဓမ္မဝါဒဳဂမၠိုၚ် ဂၠိုၚ်လောန်အိုတ်ရ” ရဴဝွံ တီမ္ဂး ဒးကဵုဂိုၚ်ကတ် ဂံၚ်ဂံၚ်သကာသကာဗၠးၜးတၟးဇးရ။ ယွံခမဳတအ် ရဴဝွံဟေၚ် ဒှ်ပွမကဵုဂိုၚ်ကေတ် ဇြေဟ်လိက်မာဲ ဗၠးၜးတၟးဇးရ။ ယွံခမဳတအ် ပွမကဵုဂိုၚ်ကေတ် ဇြေဟ်လိက်မာဲဂမၠိုၚ်တုန် ဣဝွံမၞုံပိဂကူအိုတ်ရ ရဴဝွံ (သ္ဂးရ)။
