၄.၉.၂။ ယေဘုယျသိကာဝိနယ်
၂၃၄။ ယွံခမဳတအ် ခမဳဂမၠိုၚ်ဂှ် သွက်ဂွံလလမ်ကၠေံ အဓိကိုရ်ဂှ် နကဵုဥဗ္ဗာဟိကကမ္မဝါစ် ဟွံသၟဟ်စောံအိုတ်မ္ဂး၊ ယွံခမဳတအ် ခမဳဂမၠိုၚ်ဂှ် “ယွံတဳလပိုဉ်တအ် ပိုဲဍိက်တအ်ဂမၠိုၚ် ကဵုလလမ်ကၠေံ အဓိကိုရ်ဝွံ နကဵုဥဗ္ဗာဟိကကမ္မဝါစ် ဟွံမာန်အိုတ်ရ၊ သၚ်ဟေၚ် ဩဝ်လလမ်ကၠေံအဓိကိုရ်ဝွံညိ” ရဴဝွံ ဒးအပ်ပြာပ်ကဵု အဓိကိုရ်ဂှ် ကုသၚ်ရ။ ယွံခမဳတအ် အဓိကိုရ်မၞုံသဘဴရဴဝွံ ကဵုအခေါၚ်တၞဟ်နကဵုလလမ်ကၠေံ နကဵုယေဘုယျသိကဝိနယ်ကမ်ရ။
ယွံခမဳတအ် ခမဳမဍိုက်ပေၚ်တဴ ကေုာံအၚ်္ဂဂမၠိုၚ်မသုန်သာ်ဂှ် ဒးသၟိၚ်ပတိုန်ရဴဝွံမ္ဂး ခမဳကဵုဇြေဟ်လိက်မာဲရ။ ခမဳဂှ် ဟွံဗက် ဆန္ဒာဂတိရ။ ဟွံဗက် ဒေါသာဂတိရ။ ဟွံဗက် မောဟာဂတိရ။ ဟွံဗက် ဘယာဂတိရ။ ဂိုၚ်ကေတ် ဇြေဟ်လိက်မာဲတုဲ ဟွံဂွံဂိုၚ်ကေတ်ဏီလေဝ်လေပ်တီရ ။ ပ ။
ယွံခမဳတအ် ရဴဝွံ ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ် ခမဳရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တိရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ်ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
ခမဳမကဵုဇြေဟ်လိက်မာဲဂှ် ဒးကဵုဂိုၚ်ကေတ် ဇြေဟ်လိက်မာဲဂမၠိုၚ်ရ၊ အတိုၚ်ခမဳဓမ္မဝါဒဳဂမၠိုၚ်မဂၠိုၚ်ဟီုဂှ် ဒးကဵုလလမ်ကၠေံ အဓိကိုရ်ဂှ်ရ။ ယွံခမဳတအ် အဓိကိုရ်ဝွံ လလမ်ရ ရဴဝွံထေက်ကဵုသ္ဂးရ။ မုရဴ နဝိနယ်ကမ်မွဲ လလမ်ရော?။ နကဵုသမ္မုခါဝိနယ်ကီု နကဵုယေဘုယျ သိကဝိနယ်ကီု လလမ်ရ။
ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော?၊ ပွမဒှ်ဂတမုက်သၚ် ပွမဒှ်ဂတမုက်ဓရ် ပွမဒှ်ဂတမုက်ဝိနယ် ပွမဒှ်ဂတမုက်ပူဂိုလ်ဂမၠိုၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်သၚ်ရော?။ ပွမက္ညကၠုၚ်ခမဳဂမၠိုၚ်မဗဗွဲကဵုကမ် ပွမရေၚ်တၠုၚ်ဆန် ခမဳဂမၠိုၚ်မထေက်ကဵုကဵုဆန် ခမဳမဒှ်ဂတမုက်ဂမၠိုၚ် ပွမဟွံဆေဝ်ဒဝ်ဂမၠိုၚ်ဂှ် ဒှ်ပွမဒှ်ဂတမုက်သၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်ဓရ် ပွမဒှ်ဂတမုက်ဝိနယ်ရော?။ ဓမ္မဝိနယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်ဂှ် ဒှ်ပွမဒှ်ဂတမုက်ဓရ် ပွမဒှ်ဂတမုက်ဝိနယ်မ္ဂး အိုတ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်ပူဂိုလ်ရော?။ ပွမဒှ်ဂတမုက်ခမဳဂမၠိုၚ်ၜါဇကု မကယျာန်ဓဝါတ်ရၚ်သကအ် မဒှ်သၞသတြု ဟိုတ်နူဟိုတ်မမိက်ကဵုမွဲမွဲ (မပတမ်ဗဗေၚ်သ္ၚာ) ဂှ် ဒှ်ပွမဒှ်ဂတမုက်ပူဂိုလ်ရ။
ပၞောဝ်ကဵုဝိနယ်ကမ်ဂမၠိုၚ်ၜါဂကူဂှ် မုမွဲ ဒှ်ယေဘုယျသိကဝိနယ်ကမ်ရော?၊ ပွမသ္ပအကာဲအရာမသ္ပ ပွမပြာပ်အာ ပွမပြာပ်အာတူရူ ပွမအေၚ်ဒုၚ် ပွမဟွံဆေဝ်ဒဝ် ယေဘယျသိကဝိနယ်ကမ်ဂမၠိုၚ်ဂှ် ယေဘုယျသိကဝိနယ်ကမ်မ္ဂးအိုတ်ရ။
ယွံခမဳတအ် အဓိကိုရ်မလလမ်တုဲ ရဴဝွံ ခမဳကာကရဂှ် ခ္ဍဟ်ကတဵုမ္ဂး၊ ဒးအာပတ်ပါဲစိုတ် မကတဵုဒှ် ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ပျုတ်ဗ္ဒေက်ရ ရဴဝွံ (သ္ဂးရ)။
