၄.၉။ သမထဒှ်ဟိုတ်လလမ်အဓိကိုရ် သမ္မုခါဝိနယ်
၂၂၈။ ဝိဝါဒါဓိကိုရ် မုရဴ နသမထဂမၠိုၚ် လလမ်ရော?။ ဝိဝါဒါဓိကိုရ်ဂှ် နကဵုသမထဂမၠိုၚ်ၜါ မတွံဂးသမ္မုခါဝိနယ် ယေဘုယျသိကကမ် လလမ်ရ၊ ဝိဝါဒါဓိကိုရ်ဂှ် ဟွံအာစိုပ်သမထမွဲမတွံဂး ယေဘုယျသိကကမ်တုဲ နကဵုသမထမွဲမတွံဂးသမ္မုခါဝိနယ်ဂှ် လလမ်ဟာ၊ လလမ်ရ ရဴဝွံ ဒးသ္ဂးရ။ မုရဴသာ်လဵုရောမ္ဂးမာ— ပ္ဍဲသာသနာဝွံ ခမဳဂမၠိုၚ် ဓရ်ရဴဝွံကီု ဟွံသေၚ်ကဵုဓရ်ရဴဝွံကီု ဝိနယ်ရဴဝွံကီု ဟွံသေၚ်ကဵုဝိနယ်ရဴဝွံကီု ကျာ်တြဲတွံရရဴဝွံကီု ကျာ်တြဲတွံ ဟွံသေၚ်ရရဴဝွံကီု အလေံ ဒ္ဂေတ်လ္ၚတ်ကျာ်တြဲရဴဝွံကီု အလေံ ဒ္ဂေတ်လ္ၚတ်ကျာ်တြဲ ဟွံသေၚ်ရရဴဝွံကီု ပညပ်ကျာ်တြဲရဴဝွံကီု ပညပ်ကျာ်တြဲ ဟွံသေၚ်ရရဴဝွံကီု အာပတ်ရဴဝွံကီု ဟွံသေၚ်ကဵုအာပတ်ရဴဝွံကီု အာပတ်မသာ ရဴဝွံကီု အာပတ်မဇြိုၚ်ရဴဝွံကီု အာပတ်မၞုံကဵုသှေ်သၟေဟ်ရဴဝွံကီု အာပတ်ဟွံမွဲကဵုသှေ်သၟေဟ်ရဴဝွံကီု အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု ကယျာန်ဓဝါတ်အိုတ်ရ။
ယွံခမဳတအ် ခမဳဂမၠိုၚ်ဂှ် သၟဟ်စောံသွက်ဂွံလလမ်ကၠေံ အဓိကိုရ်ဂှ်အိုတ်မ္ဂး၊ အဓိကိုရ်ဝွံလလမ်ရ ရဴဝွံ ထေက်ကဵုသ္ဂးရ။
မုရဴ နဝိနယ်ကမ်မွဲ လလမ်ရော?။ နကဵုသမ္မုခါဝိနယ် လလမ်ရ။
ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော?၊ ပွမဒှ်ဂတမုက်သၚ် ပွမဒှ်ဂတမုက်ဓရ် ပွမဒှ်ဂတမုက်ဝိနယ် ပွမဒှ်ဂတမုက်ပူဂိုလ်ဂမၠိုၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်သၚ်ရော?။ ပွမက္ညကၠုၚ် ခမဳဂမၠိုၚ်မဗဗွဲကဵုကမ် ပွမရၚ်တၠၚ်ဆန် ခမဳဂမၠိုၚ်မထေက်ကဵုကဵုဆန် ခမဳမဒှ်ဂတမုက်ဂမၠိုၚ် ပွမဟွံဆေဝ်ဒဝ်ဂမၠိုၚ်ဂှ် ဒှ်ပွမဒှ်ဂတမုက်သၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်ဓရ် ပွမဒှ်ဂတမုက်ဝိနယ်ရော?။ ဓမ္မဝိနယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်ဂှ် ဒှ်ပွမဒှ်ဂတမုက်ဓရ် ပွမဒှ်ကတမုက်ဝိနယ်မ္ဂးအိုတ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်ပူဂိုလ်ရော?။ ပွမဒှ်ဂတမုက်ခမဳဂမၠိုၚ်ၜါဇကု မကယျာန်ဓဝါရၚ်သကအ် မဒှ်သၞသတြု ဟိုတ်နူဟိုတ်မမိက်ကဵုမွဲမွဲ (မပတမ်ဗဗေၚ်သ္ၚာ) ဂှ် ဒှ်ပွမဒှ်ဂတမုက်ပူဂိုလ်ရ။
ယွံခမဳတအ် အဓိကိုရ်မလလမ်တုဲရဴဝွံ ခမဳကာကရ ‘သၚ်ကာရက’ မသ္ပညံၚ်ဂွံလလမ်ဂှ် ဒးအာတ်ပတ်ပါဲစိုတ် မကတဵုဒှ်ဟိုတ်နူ ပွမခ္ဍဟ်ကတဵုရ။ ခမဳမကဵုဆန်ဂှ် ဒးအာပတ်ပါဲစိုတ် မကတဵုဒှ်ဟိုတ်နူ ပွမပျုတ်ဗ္ဒေက်ရ။
၂၂၉။ ယွံခမဳတအ် ခမဳဂမၠိုၚ်ဂှ် ကဵုလလမ်ကၠေံ အဓိကိုရ်ဂှ် ပ္ဍဲဘာဂှ် ဟွံမာန်အိုတ်မ္ဂး၊ ယွံခမဳတအ် ခမဳဂမၠိုၚ်ဂှ် ဒးအာဘာမၞုံကဵုခမဳဂၠိုၚ်အိုတ်ရ။
ယွံခမဳတအ် ခမဳဂမၠိုၚ်ဂှ် ဃောအာဘာဂှ်အိုတ်ဂှ် ပ္ဍဲအကြာဂၠံၚ်တရဴ သၟဟ်အစောံ သွက်ဂွံလလမ်ကၠေံ အဓိကိုရ်ဂှ်အိုတ်မ္ဂး၊ အဓိကိုရ်ဝွံ လလမ်ရ ရဴဝွံ ထေက်ကဵုသ္ဂးရ။
မုရဴ နဝိနယ်ကမ်မွဲ လလမ်ရော?။ နကဵုသမ္မုခါဝိနယ် လလမ်ရ။
ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော? ပွမဒှ်ဂတမုက်သၚ် ပွမဒှ်ဂတမုက်ဓရ် ပွမဒှ်ဂတမုက်ဝိနယ် ပွမဒှ်ဂတမုက်ပူဂိုလ်ဂမၠိုၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်သၚ်ရော။ ပွမက္ညကၠုၚ်ခမဳဂမၠိုၚ်မဗဗွဲကဵုကမ် ပွမရၚ်တၠုၚ်ဆန် ခမဳဂမၠိုၚ်မထေက်ကဵုကဵုဆန် ခမဳမဒှ်ဂတမုက်ဂမၠိုၚ် ပွမဟွံဆေဝ်ဒဝ်ဂမၠိုၚ်ဂှ် ဒှ်ပွမဒှ်ဂတမုက်သၚ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွဒှ်ဂတမုက်ဓရ် ပွမဒှ်ဂတမုက်ဝိနယ်ရော?။ ဓမ္မဝိနယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်ဂှ် ဒှ်ပွမဒှ်ဂတမုက်ဓရ် ပွမဒှ်ဂတမုက်ဝိနယ်မ္ဂးအိုတ်ရ။
ပၞောဝ်ပန်ဂကူဂမၠိုၚ်ဂှ် မုမွဲ ဒှ်ပွမဒှ်ဂတမုက်ပူဂိုလ်ရော?။ ပွမဒှ်ဂတမုက်ခမဳဂမၠိုၚ်ၜါဇကု မကယျာန်ဓဝါတ်ရၚ်သကအ် မဒှ်သၞသတြု ဟိုတ်နူဟိုတ်မမိက်ကဵုမွဲမွဲ (မပတမ်ဗဗေၚ်သ္ၚာ) ဂှ် ဒှ်ပွမဒှ်ဂတမုက်ပူဂိုလ်ရ။
ယွံခမဳတအ် အဓိကိုရ် မလလမ်တုဲ ရဴဝွံ ခမဳကာကရ ‘သၚ်ကာရက’ မသ္ပညံၚ်ဂွံ လလမ်ဂှ်ဒးအာပတ်ပါဲစိုတ် မကတဵုဒှ်ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ဒးအာပတ်ပါဲစိုတ် မကတဵုဒှ် ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ဒးအာပါဲစိုတ် မကတဵုဒှ်ဟိုတ်နူပွမ ပျုတ်ဗ္ဒေက်ရ။
၂၃၀။ ယွံခမဳတအ် ခမဳဂမၠိုၚ်ဂှ် ဃောအာဘာဂှ် ပ္ဍဲအကြာဂၠံၚ်တရဴ ဟွံသၟဟ်စောံ သွက်ဂွံလလမ်ကၠေံ အဓိကိုရ်ဂှ်အိုတ်မ္ဂး၊ ခမဳဂမၠိုၚ်ဂှ် အာဘာဂှ်အိုတ်တုဲ—
“ယွံကောန်တၠတအ် အဓိကိုရ်ဝွံ ကတဵုဒှ်ရဴဝွံရ၊ ဒှ်တိုန်ကၠုၚ်ရဴဝွံ၊ အာပါတ်အခေါၚ်ရ၊ တဳလပိုဉ်တအ်ညးဂမၠိုၚ် ဩဝ်လလမ်ကၠေံ အဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ် မဒှ်ဟိုတ်လလမ်အဓိကိုရ်အိုတ်ညိ” ရဴဝွံ ဒးဟီုသ္ဂးကဵု ခမဳပဒတဴဘာဂမၠိုၚ်ရ။ ယွံခမဳတအ် ခမဳပဒတဴဘာဂမၠိုၚ် ဒှ်ခမဳဇၞော်တုဲ ခမဳအာဂန္တုကဂမၠိုၚ် ဒှ်ခမဳသၟတ်အိုတ်မ္ဂး ယွံခမဳတအ် ခမဳပဒတဴဘာဂမၠိုၚ်ဂှ် “ယွံတဳလပိုဉ်တအ် စဵုကဵုပိုဲညးဂမၠိုၚ် ချပ်ဂၞန်သဳကၠဳတုဲ မၞးတအ်ညးဂမၠိုၚ် ဗၞတ်မွဲခဏ ဩဝ်ပဒတဴဒၟံၚ် ပ္ဍဲမွဲဒၞာဲအိုတ်ညိ” ရဴဝွံ ဒးဟီုသ္ဂးကဵု ခမဳအာဂန္တုကဂမၠိုၚ်ရ။
ယွံခမဳတအ် ခမဳပဒတဴဘာဂမၠိုၚ် ဒှ်ခမဳသၟတ်တုဲ ခမဳအာဂန္တုကဂမၠိုၚ် ဒှ်ခမဳဇၞော်အိုတ်မ္ဂး ယွံခမဳတအ် ခမဳပဒတဴဘာဂမၠိုၚ်ဂှ် “ယွံတဳလပိုဉ်တအ် ဒှ်သာ်ဂှ်မ္ဂး စဵုကဵုပိုဲဍိက်တအ်ညးဂမၠိုၚ် ချပ်ဂၞန်သဳကၠဳတုဲ တဳလပိုဉ်တအ်ညးဂမၠိုၚ် ဩဝ်ပဒတဴဒၟံၚ် ပ္ဍဲဌာန်ဝွံဟေၚ်အိုတ်ညိ” ရဴဝွံ ဒးဟီုသ္ဂးကဵု ခမဳအာဂန္တုကဂမၠိုၚ်ရ။
ယွံခမဳတအ် ကုခမဳပဒတဴဘာဂမၠိုၚ် မဒှ်ဃောချပ်ဂၞန်သဳကၠဳဂှ် “ပိုဲညးဂမၠိုၚ် ဟွံသၟဟ်စောံ သွက်ဂွံလလမ်ကၠေံ အဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ်အိုတ်ရ” ရဴဝွံ ကသပ်ဒှ်ကၠုၚ်မ္ဂး၊ ခမဳပဒတဴဘာဂမၠိုၚ် ဟဂပ်ဝ်ဒုၚ်တဲ အဓိကိုရ်ဂှ်ရ။ ယွံခမဳတအ် ကုခမဳပဒတဴဘာဂမၠိုၚ် မဒှ်ဃောချပ်ဂၞန်သဳကၠဳဂှ် “ပိုဲညးဂမၠိုၚ် သၟဟ်စောံသွက်ဂွံလလမ်ကၠေံ အဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ်အိုတ်ရ” ရဴဝွံ ကသပ်ဒှ်ကၠုၚ်မ္ဂး၊ ယွံခမဳတအ် ခမဳပဒတဴဘာဂမၠိုၚ်ဂှ် “ယွံတဳလပိုဉ်တအ် တဳလပိုဉ်တအ်ညးဂမၠိုၚ် ဟီုလဴအဓိကိုရ်ဝွံ အတိုၚ်ကတဵုဒှ် အတိုၚ်ဒှ်တိုန်ကၠုၚ် ကုပိုဲဍိက်တအ်ညးဂမၠိုၚ်အိုတ်မ္ဂး၊ အတိုၚ်ပိုဲဍိက်တအ်ညးဂမၠိုၚ် ကဵုလလမ်ကၠေံ အဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ်ဂှ် အဓိကိုရ်ဝွံ ကြက်လလမ်ဗွဲမဒးရးရ၊ ဒှ်သာ်ဝွံမ္ဂး ပိုဲဍိက်တအ်ညးဂမၠိုၚ် ဒုၚ်တဲအဓိကိုရ်ဝွံအိုတ်ရ။
ယွံတဳလပိုဉ်တအ် တဳလပိုဉ်တအ်ညးဂမၠိုၚ် ဟွံဟီုလဴအဓိကိုရ်ဝွံ အတိုၚ်ကတဵုဒှ် အတိုၚ်ဒှ်တိုန်ကၠုၚ် ကုပိုဲဍိက်တအ်ညးဂမၠိုၚ်အိုတ်မ္ဂး၊ အတိုၚ်ပိုဲဍိက်တအ်ညးဂမၠိုၚ် ကဵုလလမ်ကၠေံအဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ်ဂှ် အဓိကိုရ်ဝွံ လလမ်ဗွဲမဒးရး ဟွံသေၚ်ရ၊ ဒှ်သာ်ဝွံမ္ဂး ပိုဲဍိက်တအ်ညးဂမၠိုၚ် ဟွံဒုၚ်တဲ အဓိကိုရ်ဝွံအိုတ်ရ” ရဴဝွံ ဒးဟီုသ္ဂးကဵု ခမဳအာဂန္တုကဂမၠိုၚ်ရ။
ယွံခမဳတအ် ခမဳပဒတဴဘာဂမၠိုၚ် သ္ပမဂပ်ဝ်သီဂိုၚ်ကေတ် ဗွဲမဒးရးရဴဝွံတုဲ ဒးဒုၚ်တဲ အဓိကိုရ်ဂှ်ရ။
ခမဳအာဂန္တုကဂမၠိုၚ်—
“ပိုဲညးဂမၠိုၚ် ကြက်ဟီုလဴထ္ၜး အဓိကိုရ်ဝွံ အတိုၚ်ကတဵုဒှ် အတိုၚ်ဒှ်တိုန်ကၠုၚ် ကုတဳလပိုဉ်တအ် ညးဂမၠိုၚ်အိုတ်ရ။
တဳလပိုဉ်တအ်ညးဂမၠိုၚ် နဟိုတ်ဗၞတ်ဝွံ ဗၞတ်ဝွံ သၟဟ်စောံ သွက်ဂွံလလမ်ကၠေံ အဓိကိုရ်ဝွံ နကဵုဓမ္မဝိနယဉတ်ကမ္မဝါစ်ဂမၠိုၚ်အိုတ်ရမ္ဂ၊ အတိုၚ်ဂှ်ဟေၚ် ကဵုလလမ်ဗွဲမဒးရးရ၊ လလမ်ရဴဝွံမ္ဂး ပိုဲညးဂမၠိုၚ် ဂပ်ဝ်အပ်ပြာပ်ကဵု အဓိကိုရ်ဝွံ ကုတဳလပိုဉ်တအ်ညးဂမၠိုၚ်အိုတ်ရ။
တဳလပိုဉ်တအ်ညးဂမၠိုၚ် နဟိုတ်ဗၞတ်ဝွံ ဗၞတ်ဝွံ ကဵုလလမ်ကၠေံ အဓိကိုရ်ဝွံ နကဵုဓမ္မဝိနယ ဉတ်ကမ္မဝါစ်ဂမၠိုၚ် ဟွံမာန်အိုတ်ရမ္ဂး၊ အတိုၚ်ဂှ်ဟေၚ် ကဵုလလမ်ကၠေံ အဓိကိုရ်ဝွံ ဗွဲမဒးရး ဟွံသေၚ်ရ၊ ပိုဲညးဂမၠိုၚ် ဂပ်ဝ်အပ်ပြာပ်ကဵု အဓိကိုရ်ဝွံ ကုတဳလပိုဉ်တအ်ညးဂမၠိုၚ် ဟွံသေၚ်အိုတ်ရ၊ ပိုဲညးဂမၠိုၚ်ဟေၚ် ဒှ်တၠအဓိကိုရ်ဝွံအိုတ်ရ” ရဴဝွံ ဒးဟီုသ္ဂးကဵု ခမဳပဒတဴဘာဂမၠိုၚ်ရ။
ယွံခမဳတအ် သ္ပမဂပ်ဝ်သီဂိုၚ်ကေတ် ဗွဲမဒးရးရဴဝွံတုဲ ခမဳအာဂန္တုကဂမၠိုၚ် ဒးအပ်ပြာပ်ကဵုအဓိကိုရ်ဂှ် ကုခမဳပဒတဴဘာဂမၠိုၚ်ရ။
ယွံခမဳတအ် ခမဳဂမၠိုၚ်ဂှ် သၟဟ်စောံသွက်ဂွံလလမ်ကၠေံ အဓိကိုရ်ဂှ်အိုတ်မ္ဂး၊ အဓိကိုရ်ဝွံလလမ်ရ ရဴဝွံ ထေက်ကဵုသ္ဂးရ။ မုရဴ နဝိနယ်ကမ်မွဲ လလမ်ရော? နကဵုသမ္မုခါဝိနယ် လလမ်ရ။
ပ္ဍဲအရာမလလမ်ဂှ် သမ္မုခါဝိနယ်ဂှ် ညးဍေံရော? ပွမဒှ်ဂတမုက်သၚ် ပွမဒှ်ဂတမုက်ဓရ် ပွမဒှ်ဂတမုက်ဝိနယ် ပွမဒှ်ဂတမုက်ပူဂိုလ်ဂမၠိုၚ်ရ။ ပ ။ ယွံခမဳတအ် အဓိကိုရ်မလလမ်တုဲရဴဝွံ ခမဳကာကရ ‘သၚ်ကာရက’ မသ္ပညံၚ်ဂွံလလမ်ဂှ် ဒးအာပတ်ပါဲစိုတ် မကတဵုဒှ် ဟိုတ်နူပွမခ္ဍဟ်ကတဵုရ။ ခမဳမကဵုဆန်ဂှ် ဒးအာပတ်ပါဲစိုတ် မကတဵုဒှ်ဟိုတ်နူ ပွမခ္ဍဟ်ကတဵုရ။ ခမဳမကဵုဆန်ဂှ် ဒးအာပတ်ပါဲစိုတ် မကတဵုဒှ်ဟိုတ်နူပွမပျုတ်ဗ္ဒေက်ရ။
