၄.၈။ အဓိကိုရ်
၂၁၅။ ပ္ဍဲအခိင်ဂှ် ခမဳဂမၠိုင် ကယျာန်ဓဝါတ်တဴ (ကေုာံခမဳဂမၠိုင်ကီု) ကေုာံခမဳဗြဴဂမၠိုင်ကီုအိုတ်ရ၊ ခမဳဗြဴဂမၠိုင်လေဝ် ကယျာန်ဓဝါတ်တဴ ကေုာံခမဳဂမၠိုင်အိုတ်ရ၊ ခမဳဆန္နလေဝ်ဃရိခဇ် ခမဳဗြဴဂမၠိုင်တုဲ ကယျာန်ဓဝါတ် ကေုာံခမဳဂမၠိုင်တုဲမ္ဂး ဂိုင်ကေတ် ဗော်သွးခမဳဗြဴဂမၠိုင်ရ ပါလုပ်လပါ်ခမဳဗြဴဂမၠိုင်ရ။
ခမဳပၟိက်အောန်ဂမၠိုင်ဂှ် “မုဟိုတ် ခမဳဆန္န ဃရိခဇ် ခမဳဗြဴဂမၠိုင်တုဲ ကယျာန်ဓဝါတ် ကေုာံခမဳဂမၠိုင်တုဲမ္ဂး ဂိုင်ကေတ် ဗော်သွးခမဳဗြဴဂမၠိုင်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိင်ဂှ် ခမဳဂမၠိုင်ဂှ် ဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဍာံပြဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရင်ပတီအိုတ်ရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ် တုဲမ္ဂး သ္ဂးကဵုခမဳဂမၠိုင်ရ။ ယွံခမဳတအ် အဓိကိုရ်ဂမၠိုင် ဗွဲဝိဝါဒါဓိကိုရ် အနုဝါဒါဓိကိုရ် အာပတ္တာဓိကိုရ် ကိစ္စာဓိကိုရ် မၞုံပန်ဂကူအိုတ်ရ။
ပၞောဝ်ကဵုပန်ဂကူဂမၠိုင်ဂှ် မုအရာမွဲ ကော်ခဴဂး ဝိဝါဒါဓိကိုရ်ရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် ဓရ်ရဴဝွံကီု ဟွံသေင်ကဵုဓရ်ရဴဝွံကီု ဝိနယ်ရဴဝွံကီု ဟွံသေင်ကဵုဝိနယ် ရဴဝွံကီု ကျာ်တြဲတွံရရဴဝွံကီု ကျာ်တြဲတွံ ဟွံသေင်ရရဴဝွံကီု အလေံဒ္ဂေတ်လ္ၚတ်ကျာ်တြဲရဴဝွံကီု အလေံဒ္ဂေတ်လ္ၚတ်ကျာ်တြဲ ဟွံသေင်ရရဴဴဝွံကီု ပညပ်ကျာ်တြဲရဴဝွံကီု ပညပ်ကျာ်တြဲ ဟွံသေင်ရ ရဴဝွံကီု အာပတ်ရဴဝွံကီု ဟွံသေင်ကဵုအာပတ်ရဴဝွံကီု လဟုကအာပတ် ‘အာပတ်မသာ’ ရဴဝွံကီု ဂရုကအာပတ် ‘အာပတ်မဇြိုင်’ ရဴဝွံကီု သာဝသေသအာပတ် ‘အာပတ်မၞုံကဵုသှေ်သၟေဟ်’ ရဴဝွံကီု အနာဝသေသအာပတ် ‘အာပတ်ဟွံမွဲကဵုသှေ်သၟေဟ်’ ရဴဝွံကီု အာပတ်မရုန်မဵုရဴဝွံကီု အာပတ်ဟွံရုန်မဵု ရဴဝွံကီု ကယျာန်ဓဝါတ်အိုတ်ရ။
ပ္ဍဲအရာမကယျာန်ဓဝါတ်ဂှ် ပွမကယျာန်ဓဝါတ်သေက်ဇဵု ဂတမတ်,ကြဴမတ် ပွမသေက်ဇဵု ခဵုခါတ်ကဵုဇိုင်တဲ ပွမဟီုသ္ဂးစှေ်စး ပွမဟီုသ္ဂးတၞဟ်တၞဟ် ပွမဟီုသ္ဂးနအကာဲအရာမွဲသအာင် ပွဟီုသ္ဂးကဵုစိုတ်ဒှ်ဒဒိုခ် ပွမကတဵုဒှ်ဂြဲဂြက်ဂမၠိုင်ဂှ် ကော်ခဴဂး ဝိဝါဒါဓိကိုရ်ရ။ ပၞောဝ်ကဵုပန်ဂကူဂမၠိုင်ဂှ် မုအရာမွဲ ကော်ခဴဂး အနုဝါဒါဓိကိုရ်ရော?။ ယွံခမဳတအ်ပ္ဍဲသာသနာဝွံ ခမဳဂမၠိုင် စောတ်စောဲခမဳ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။
ပ္ဍဲအရာစောတ်စောဲဂှ် ပွမစောတ်စောဲ အကာဲအရာ ပွမစောတ်စောဲ ပွမဟီုသ္ဂး အကာဲအရာပွမဟီုသ္ဂး ဒဒှ်မတ္ၚံက် ဒဒှ်မပတိတ်ဇြဟတ်တူရူ ပွမကဵုဒြဟတ်ဂမၠိုင်ဂှ် ကော်ခဴဂး အနုဝါဒါဓိကိုရ်ရ။
ပၞောဝ်ကဵုပန်ဂကူဂမၠိုင်ဂှ် မုအရာမွဲ ကော်ခဴဂး အာပတ္တာဓိကိုရ်ရော?။ ယွံခမဳတအ် ပ္ဍဲသာသနာဝွံ အာပတ်မသုန်ဘုံဂမၠိုင်လေဝ် အာပတ္တာဓိကိုရ်မ္ဂးရ၊ အာပတ်ထပှ်ဘုံဂမၠိုင်လေဝ် အာပတ္တာဓိကိုရ်မ္ဂးရ၊ အာပတ်မသုန်ဘုံထပှ်ဘုံဝွံ ကော်ခဴဂး အာပတ္တာဓိကိုရ်ရ။
ပၞောဝ်ကဵုပန်ဂကူဂမၠိုင် မုအရာမွဲ ကော်ခဴဂး ကိစ္စာဓိကိုရ်ရော?။ ယွံခမဳတအ် ပ္ဍဲသာသနာဝွံ အပလောကနကမ် ဉတ္တိကမ် ဉတ္တိဒုတိယကမ် ဉတ္တိစတုတ္ထကမ်ဂမၠိုင် ကေင်ကာ အရာထေက်ကဵုဒးပတုဲသင်ဂှ် ကော်ခဴဂး ကိစ္စာဓိကိုရ်ရ။
၂၁၆။ ဟိုတ်သဇိုင်တၞမ် ဝိဝါဒါဓိကိုရ်ဂှ် ညးဍေံရော?။ (ဝိဝါဒမူလ) ဟိုတ်သဇိုင်တၞမ် ပွမကယျာန် ဓဝါတ်ဂမၠိုင်တြဴဂကူဂှ် ဒှ်ဟိုတ်သဇိုင်တၞမ် ဝိဝါဒါဓိကိုရ်ရ။ အကုသဵုဟိုတ်ဂမၠိုင်ပိဂကူလေဝ် ဒှ်ဟိုတ်သဇိုင်တၞမ် ဝိဝါဒါဓိကိုရ်ရ။ ကုသဵုဟိုတ်ဂမၠိုင်ပိဂကူလေဝ် ဒှ်ဟိုတ်သဇိုင်တၞမ်ဝိဝါဒါဓိကိုရ်ရ။
မုရဴဟိုဟ်သဇိုင်တၞမ် ပွမကယျာန်ဓဝါတ်ဂမၠိုင်တြဴဂကူမွဲ ဒှ်ဟိုတ်သဇိုင်တၞမ် ဝိဝါဒါဓိကိုရ်အိုတ်ရော?၊ ယွံခမဳတအ် ပ္ဍဲသာသနာဝွံ ခမဳဂှ် မၞုံအလေံထေဲပၞတ်ရ၊ မၞုံအလေံဒက်ဝဲရ။
ခမဳမၞုံအလေံထေဲပၞုတ် မၞုံအလေံဒက်ဝဲဂှ် ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဓရ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲသင်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဒ္ဂေတ်သိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ရ၊ ယွံခမဳတအ် ခမဳ ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴ၊ ပ္ဍဲဓရ်လေဝ် ။ ပ ။ ပ္ဍဲသင်လေဝ် ။ ပ ။ ပ္ဍဲသင်ရ၊ ပွမကယျာန်ဓဝါတ်ဂှ် ဒှ်တဴ တၞဟ်နဟွံမွဲကဵုဒတုဲမြမောဝ် မၞိဟ်ဂမၠိုင်မဂၠိုင် တၞဟ်နဟွံမွဲကဵုတသိုခ် မၞိဟ်ဂမၠိုင်မဂၠိုင် တၞဟ်နလလေင်ဖဵု မၞိဟ်ဂမၠိုင်မဂၠိုင် တၞဟ်နဟွံမွဲကဵုဒတုဲမြမောဝ် တၞဟ်နဒှ်ဒဒိုခ် မၞိဟ်ဒေဝတဴဂမၠိုင်ဟေင်ရ။
ယွံခမဳတအ် ဟိုတ်သဇိုင်တၞမ်ပွမကယျာန်ဓဝါတ် မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဂွံညာတ်ကေတ်အိုတ်မ္ဂး။ ယွံခမဳတအ် ဂွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင်ဟေင် ပတိတ်ဇြဟတ် တၞဟ်နပါဲကၠေံ ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်အိုတ်ညိ။
ယွံခမဳတအ် ဟိုတ်သဇိုင်တၞမ် ပွမကယျာန်ဓဝါတ်မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဟွံညာတ်ကေတ်အိုတ်မ္ဂး။ ယွံခမီတအ် ဟွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင် ဒ္ဂေတ်လ္ၚတ် တၞဟ်နဟွံကဵုဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်ဇၞော်မောဝ် ပ္ဍဲကာလကြဴအိုတ်ညိ၊ ပတိတ်ဇြဟတ် ရဴဝွံမ္ဂး ဒှ်ပွမပါဲကၠေံ ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်ရ၊ ဒ္ဂေတ်လ္ၚတ် ရဴဝွံမ္ဂး ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ် ဟွံကတဵုဒှ် ပ္ဍဲကာလကြဴဟေင်ရ။ ယွံခမဳတအ် သအာင်နူဂှ်ပၠန်လေဝ် ခမဳဂှ် မၞုံအလေံဇိုတ်ပိုဟ်ကၠေံဂုဏ်ရ၊ မၞုံအလေံပြိုင်ပကာန်ရ။ မၞုံအလေံစောန်စိုတ်ရ၊ မၞုံအလေံသအေတ်သပါန်ရ။ လေပ်တ္ၚံက်စၞာဲရ၊ လေပ်လှေံလှန်ရ။ မၞုံကဵုပၟိက်ယုတ်သဝ်ရ၊ မၞုံကဵုကွေတ်မှာရာရ။ လေပ်ဇွိတ်သပေါတ် ကွေတ်ဇကု ဗွဲမမှာရာရ၊ လေပ်ဂိုင်ကေတ်ဗွဲမဗိုန်ရ၊ ဇြိုင်ကဵုသၠးကၠေံကွေတ်မာန်ရ။
ယွံခမဳတအ် ခမဳ မလေပ်ဇွိတ်သပေါတ် ကွေတ်ဇကု ဗွဲမမှာရာ မလေပ်ဂိုင်ကေတ်ဗွဲမဗိုန် မဇြိုင်ကဵုသၠးကၠေံကွေတ်မာန်ဂှ် ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဓရ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲသင်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဒ္ဂေတ်သိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ရ၊ ယွံခမဳတအ် ခမဳ ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴ၊ ပ္ဍဲဓရ်လေဝ် ။ ပ ။ ပ္ဍဲသင်လေဝ် ။ ပ ။ ပ္ဍဲသိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ဂှ် ကတဵုဗဒှ် ပွကယျာန်ဓဝါတ် ပ္ဍဲသင်ရ၊ ပွမကယျာန်ဓဝါတ်ဂှ် ဒှ်တဴ တၞဟ်နဟွံမွဲကဵုဒတုဲမြမောဝ် မၞိဟ်ဂမၠိုင်မဂၠိုင် တၞဟ်နဟွံမွဲကဵုတသိုခ် မၞိဟ်ဂမၠိုင်မဂၠိုင် တၞဟ်နလေင်ဖဵု မၞိဟ်ဂမၠိုင်မဂၠိုင် တၞဟ်နဟွံမွဲကဵုဒတုဲမြမောဝ် တၞဟ်နဒှ်ဒဒိုခ် မၞိဟ်ဒေဝတဴဂမၠိုင်ဟေင်ရ။
ယွံခမဳတအ် ဟိုတ်သဇိုင်တၞမ် ပွမကယျာန်ဓဝါတ် မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဂွံညာတ်ကေတ်အိုတ်မ္ဂး။ ယွံခမဳတအ် ဂွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင်ဟေင် ပတိတ်ဇြဟတ် တၞဟ်နပါဲကၠေံ ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်အိုတ်ညိ။
ယွံခမဳတအ် ဟိုတ်သဇိုင်တၞမ် ပွမကယျာန်ဓဝါတ်မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဟွံညာတ်ကေတ်အိုတ်မ္ဂး။ ယွံခမဳတအ် ဟွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင် ဒ္ဂေတ်လ္ၚတ် တၞဟ်နဟွံကဵုဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်ဇၞော်မောဝ် ပ္ဍဲကာလကြဴအိုတ်ညိ။
ပတိတ်ဇြဟတ် ရဴဝွံမ္ဂး ဒှ်ပွမပါဲကၠေံ ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ်ရ၊ ဒ္ဂေတ်လ္ၚတ် ရဴဝွံမ္ဂး ဟိုတ်သဇိုင်တၞမ် ပွမကယျာန်ဓဝါတ် မယုတ်သဝ်ဂှ် ဟွံကတဵုဒှ် ပ္ဍဲကာလကြဴဟေင်ရ။ ဟိုတ်သဇိုင်တၞမ် ပွမကယျာန်ဓဝါတ်ဂမၠိုင်တြဴဂကူဝွံ ဒှ်ဟိုတ်သဇိုင်တၞမ်ဝိဝါဒါဓိကိုရ်ရ။
မုရဴ အကုသိုလ်ဟိုတ်ဂမၠိုင်ပိဂကူမွဲ ဒှ်ဟိုတ်သဇိုင်တၞမ် ဝိဝါဒါဓိကိုရ်အိုတ်ရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် မၞုံကဵုစိုတ်မထၞေန်စပ်တုဲ ကယျာန်ဓဝါတ်အိုတ်ရ၊ မၞုံကဵုစိုတ်မမိက်ပလီုပလာ်တုဲ ကယျာန်ဓဝါတ်အိုတ်ရ၊ မၞုံကဵုစိုတ်မဝိဝိင်တုဲ ကယျာန်ဓဝါတ်အိုတ်ရ၊ ဓရ်ရဴဝွံကီု ဟွံသေင်ကဵုဓရ်ရဴဝွံကီု ဝိနယ်ရဴဝွံကီု ဟွံသေင်ကဵုဝိနယ်ရဴဝွံကီု ကျာ်တြဲတွံရရဴဝွံကီု ကျာ်တြဲတွံ ဟွံသေင်ရရဴဝွံကီု အလေံဒ္ဂေတ်လ္ၚတ်ကျာ်တြဲရဴဝွံကီု အလေံဒ္ဂေတ်လ္ၚတ်ကျာ်တြဲ ဟွံသေင်ရရဴဝွံကီု ပညပ်ကျာ်တြဲရဴဝွံကီု ပညပ်ကျာ်တြဲ ဟွံသေင်ရရဴဝွံကီု အာပတ်ရဴဝွံကီု ဟွံသေင်ကဵုအာပတ်ရဴဝွံကီု အာပတ်မသာရဴဝွံကီု အာပတ်မဇြိုင်ရဴဝွံကီု အာပတ်မၞုံကဵုသှေ်သၟေဟ်ရဴဝွံကီု အာပတ်ဟွံမွဲကဵု သှေ်သၟေဟ်ရဴဝွံကီု အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု ကယျာန်ဓဝါတ်အိုတ်ရ။ အကုသိုလ်ဟိုတ်ဂမၠိုင်ပိဂကူဝွံ ဒှ်ဟိုတ်သဇိုင်တၞမ် ဝိဝါဒါဓိကိုရ်ဂမၠိုင်ရ။
မုရဴ ကုသိုလ်ဟိုတ်ဂမၠိုင်ပိဂကူမွဲ ဒှ်ဟိုတ်သဇိုင်တၞမ် ဝိဝါဒါဓိကိုရ်အိုတ်ရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် ဟွံမွဲကဵုစိုတ်မထၞေန်စပ်တုဲ ကယျာန်ဓဝါတ်အိုတ်ရ၊ ဟွံမွဲကဵုစိုတ်မမိက်ပလီုပလာ်တုဲ ကယျာန်ဓဝါတ်အိုတ်ရ၊ ဟွံမွဲကဵုစိုတ်မဝိဝိင်တုဲ ကယျာန်ဓဝါတ်အိုတ်ရ၊ ဓရ်ရဴဝွံကီု ဟွံသေင်ကဵုဓရ်ရဴဝွံကီု။ ပ ။ အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု ကယျာန်ဓဝါတ်အိုတ်ရ။ ကုသိုလ်ဟိုတ်ဂမၠိုင်ပိဂကူဝွံ ဒှ်ဟိုတ်သဇိုင်တၞမ် ဝိဝါဒါဓိကိုရ်ဂမၠိုင်ရ။
၂၁၇။ ဟိုတ်သဇိုင်တၞမ် အနုဝါဒါဓိကိုရ်ဂှ် ညးဍေံရော?။ ဟိုတ်သဇိုင်တၞမ် ပွမစောတ်စောဲဂမၠိုင် တြဴဂကူဂှ် ဒှ်ဟိုတ်သဇိုင်တၞမ် အနုဝါဒါဓိကိုရ်ရ။ အကုသိုလ်ဟိုတ်ဂမၠိုင်ပိဂကူလေဝ် ဒှ်ဟိုတ်သဇိုင်တၞမ် အနုဝါဒါဓိကိုရ်ရ။ ကုသိုလ်ဟိုတ်ဂမၠိုင်ပိဂကူလေဝ် ဒှ်ဟိုတ်သဇိုင်တၞမ် အနုဝါဒါဓိကိုရ်ရ။ ဇကုကာယလေဝ် ဒှ်ဟိုတ်သဇိုင်တၞမ် အနုဝါဒါဓိကိုရ်ရ။ ဂလာန်လေဝ် ဒှ်ဟိုတ်သဇိုင်တၞမ် အနုဝါဒါဓိကိုရ်ရ။
မုရဴ ဟိုတ်သဇိုင်တၞမ် ပွမစောတ်စောဲဂမၠိုင်တြဴဂကူမွဲ ဒှ်ဟိုတ်သဇိုင်တၞမ် အနုဝါဒါဓိကိုရ်အိုတ်ရော?၊ ယွံခမဳတအ် ပ္ဍဲသာသနာဝွံ ခမဳဂှ် မၞုံအလေံထေဲပၞတ်ရ၊ မၞုံအလေံဒက်ဝဲရ။
ခမဳမၞုံအလေံထေဲပၞတ် မၞုံအလေံဒက်ဝဲဂှ် ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဓရ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲသင်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဒ္ဂေတ်သိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ရ၊ ယွံခမဳတအ် ခမဳ ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴ၊ ပ္ဍဲဓရ်လေဝ် ။ ပ ။ ပ္ဍဲသင်လေဝ် ။ ပ ။ ပ္ဍဲသိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ဂှ် ကတဵုဗဒှ် ပွမစောတ်စောဲ ပ္ဍဲသင်ရ၊ ပွမစောတ်စောဲဂှ် ဒှ်တဴ တၞဟ်နဟွံမွဲကဵုဒတုဲမြမောဝ် မၞိဟ်ဂမၠိုင်မဂၠိုင် တၞဟ်နဟွံမွဲကဵုတသိုခ် မၞိဟ်ဂမၠိုင်မဂၠိုင် တၞဟ်နလလေင်ဖဵု မၞိဟ်ဂမၠိုင်မဂၠိုင် တၞဟ်နဟွံမွဲကဵုဒတုဲမြမောဝ် တၞဟ်နဒှ်ဒဒိုခ် မၞိဟ်ဒေဝတဴဂမၠိုင်ဟေင်ရ။
ယွံခမဳတအ် ဟိုတ်သဇိုင်တၞမ်ပွမစောတ်စောဲ မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဂွံညာတ်ကေတ်အိုတ်မ္ဂး။ ဟွံခမဳတအ် ဂွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင်ဟေင် ပတိတ်ဇြဟတ် တၞဟ်နပါဲကၠေံ ဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ်အိုတ်ညိ။
ယွံခမဳတအ် ဟိုတ်သဇိုင်တၞမ်ပွမစောတ်စောဲ မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဟွံညာတ်ကေတ်အိုတ်မ္ဂး။ ယွံခမဳတအ် ဟွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင် ဒ္ဂေတ်လ္ၚတ် တၞဟ်နဟွံကဵုဟိုတ်သဇိုင်တၞမ် ပွမစောတ်စောဲမယုတ်သဝ်ဂှ်ဇၞော်မောဝ် ပ္ဍဲကာလကြဴအိုတ်ညိ၊ ပတိတ်ဇြဟတ် ရဴဝွံမ္ဂး ဒှ်ပွမပါဲကၠေံ ဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ်ရ၊ ဒ္ဂေတ်လ္ၚတ် ရဴဝွံမ္ဂး ဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ် ဟွံကတဵုဒှ် ပ္ဍဲကာလကြဴဟေင်ရ။ ယွံခမဳတအ် သအာင်နူဂှ်ပၠန်လေဝ် ခမဳဂှ် မၞုံအလေံဇိုတ်ပိုဟ်ကၠေံဂုဏ်ရ၊ မၞုံအလေံပြိုင်ပကာန်ရ။ မၞုံအလေံစောန်စိုတ်ရ၊ မၞုံအလေံသအေတ်သပါန်ရ။ လေပ်တ္ၚံက်စၞာဲရ၊ လေပ်လှေံလှန်ရ။ မၞုံကဵုပၟိက်ယုတ်သဝ်ရ၊ မၞုံကဵုကွေတ်မှာရာရ။ လေပ်ဇွိတ်သပေါတ်ကွေတ်ဇကု ဗွဲမမှာရာရ၊ လေပ်ဂိုင်ကေတ် ဗွဲမဗိုန်ရ၊ ဇြိုင်ကဵုသၠးကၠေံကွေတ်မာန်ရ။
ယွံခမဳတအ် ခမဳ မလေပ်ဇွိတ််သပေါတ် ကွေတ်ဇကု ဗွဲမမှာရာ မလေပ်ဂိုင်ကေတ်ဗွဲမဗိုန် မဇြိုင်ကဵုသၠးကၠေံကွေတ်မာန်ဂှ် ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဓရ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲသင်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴရ၊ ပ္ဍဲဒ္ဂေတ်သိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ရ၊ ယွံခမဳတအ် ခမဳ ပ္ဍဲကျာ်လေဝ် ဟွံမွဲကဵုပွမရှေ်သှေ်ရဴဂဴ ပွမဇအ်သဝ်အောပ်မာတုဲ ပဒတဴ၊ ပ္ဍဲဓရ်လေဝ် ။ ပ ။ ပ္ဍဲသင်လေဝ် ။ ပ ။ ပ္ဍဲသိက္ခာပိပြကာလေဝ် မၞုံအလေံဟွံဒ္ဂေတ် ဗွဲမဍိုက်ပေင်ဂှ် ကတဵုဗဒှ် ပွမစောတ်စောဲ ပ္ဍဲသင်ရ၊ ပွမစောတ်စောဲဂှ် ဒှ်တဴ တၞဟ်နဟွံမွဲကဵုဒတုဲမြမောဝ် မၞိဟ်ဂမၠိုင်မဂၠိုင် တၞဟ်နဟွံမွဲကဵုတသိုခ်မၞိဟ်ဂမၠိုင်မဂၠိုင် တၞဟ်နလလေင်ဖဵု မၞိဟ်ဂမၠိုင်မဂၠိုင် တၞဟ်နဟွံမွဲကဵုဒတုဲမြမောဝ် တၞဟ်နဒှ်ဒဒိုခ် မၞိဟ်ဒေဝတဴဂမၠိုင်ဟေင်ရ။
ယွံခမဳတအ် ဟိုတ်သဇိုင်တၞမ် ပွမစောတ်စောဲ မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚးသန္ထာန်ကီု မၞးတအ်ညးဂမၠိုင် ယဝ်ဂွံညာတ်ကေတ်အိုတ်မ္ဂး။ ယွံခမဳတအ် ဂွံညာတ်ကေတ်သာ်ဂှ်အိုတ်မ္ဂး မၞးတအ်ညးဂမၠိုင်ဟေင် ပတိတ်ဇြဟတ် တၞဟ်နပါဲကၠေံ ဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ်အိုတ်ညိ။ ယွံခမဳတအ် ဟိုတ်သဇိုင်တၞမ်ပွမစောတ်စောဲ မၞုံသဘဴသာ်ဝွံ ပ္ဍဲအပ္ဍဲသန္ထာန်ကီု ပ္ဍဲမ္ၚး သန္ထာန်ကီု မၞးတအ်ညးဂမၠိုင် ယဝ်ဟွံညာတ်ကေတ်အိုတ်မ္ဂး။ ယွံခမဳတအ် ဟွံညာတ်ကေတ် သာ်ဂှ်အိုတ်မ္ဂး မၞးတအ်ညးဂမၠိုင် ဒ္ဂေတ်လ္ၚတ် တၞဟ်နဟွံကဵုဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ်ဇၞော်မောဝ် ပ္ဍဲကာလကြဴအိုတ်ညိ၊ ပတိတ်ဇြဟတ် ရဴဝွံမ္ဂး ဒှ်ပွမပါဲကၠေံ ဟိုတ် သဇိုင်တၞမ် ပွမစောတ်စောဲ မယုတ်သဝ်ဂှ်ရ၊ ဒ္ဂေတ်လ္ၚတ်ရဴဝွံမ္ဂး ဟိုတ်သဇိုင်တၞမ် ပွမစောတ်စောဲ မယုတ်သဝ်ဂှ် ဟွံကတဵုဒှ် ပ္ဍဲကာလကြဴဟေင်ရ။ ဟိုတ်သဇိုင်တၞမ် ပွမစောတ်စောဲ ဂမၠိုင်တြဴဂကူဝွံ ဒှ်ဟိုတ်သဇိုင်တၞမ် အနုဝါဒါဓိကိုရ်ရ။
မုရဴ အကုသိုလ်ဟိုတ်ဂမၠိုင်ဂကူမွဲ ဒှ်ဟိုတ်သဇိုင်တၞမ် အနုဝါဒါဓိကိုရ်အိုတ်ရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် မၞုံကဵုစိုတ်မထၞေန်စပ်တုဲ စောတ်စောဲခမဳအိုတ်ရ၊ မၞုံကဵုစိုတ် မမိက်ပလီုပလာ်တုဲ စောက်စောဲအိုတ်ရ၊ မၞုံကဵုစိုတ်မဝိဝိင်တုဲ စောတ်စောဲအိုတ်ရ၊ စောတ်စောဲနပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။ အကုသိုလ်ဟိုတ်ဂမၠိုင်ပိဂကူဝွံ ဒှ်ဟိုတ်သဇိုင်တၞမ် အနုဝါဒါဓိကိုရ်ဂမၠိုင်ရ။
မုရဴ ကုသိုလ်ဟိုတ်ဂမၠိုင်ပိဂကူမွဲ ဒှ်ဟိုတ်သဇိုင်တၞမ် အနုဝါဒါဓိကိုရ်အိုတ်ရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် ဟွံမွဲကဵုစိုတ်မထၞေန်စပ်တုဲ စောတ်စောဲခမဳအိုတ်ရ၊ ဟွံမွဲကဵုစိုတ်မမိက်ပလီုပလာ်တုဲ စောတ်စောဲအိုတ်ရ၊ ဟွံမွဲကဵုစိုတ်မဝိဝိင်တုဲ စောတ်စောဲအိုတ်ရ၊ စောတ်စောဲ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။ ကသိုလ်ဟိုတ်ဂမၠိုင်ပိဂကူဝွံ ဒှ်ဟိုတ်သဇိုင်တၞမ် အနုဝါဒါဓိကိုရ်ဂမၠိုင်ရ။
မုရဴဇကုကာယမွဲ ဒှ်ဟိုတ်သဇိုင်တၞမ် အနုဝါဒါဓိကိုရ်ရော? ယွံခမဳတအ် ပ္ဍဲသာသနာဝွံ ပူဂိုလ်လ္ၚဵုဂှ် ရုပ်သာ်ကျေဝ်ဟိန်ဗြိန်ရ၊ ဗဵုသ္ၚေဝ်ဟွံခိုဟ်ရ၊ သဝ်ကွရ၊ ‘သၠုင်ဒတူသဝ်ရ’၊ ယဲဂၠိုင်ရ၊ ကၠက်လေဝ်ကၠက်ရ၊ တ္ၚံက်လေဝ်တ္ၚံက်ဝေန်ရ၊ ခ္ဍဲလေဝ်ခ္ဍဲလၟေန်ရ၊ ချိုတ်မွဲဒကုတ်ရ၊ နယဲသာ်ဂှ် စောတ်စောဲပူဂိုလ်ဂှ်အိုတ်ရ။ ဇကုကာယဝွံ ဒှ်ဟိုတ်သဇိုင်တၞမ် အနုဝါဒါဓိကိုရ်ရ။
မုရဴဂလာန်မွဲ ဒှ်ဟိုတ်သဇိုင်တၞမ် အနုဝါဒါဓိကိုရ်ရော?။ ယွံခမဳတအ် ပ္ဍဲသာသနာဝွံပူဂိုလ်လ္ၚဵုဂှ် ဟီုသ္ဂးဂလာန်ဝါတ်ရ၊ ဂလာန်ဒလောအ်ဒလာဲ ‘အထေတ်၊ ဟအ’ ရ၊ ပ္ဍဲအရာဟီုဂလာန် ဍာ်ပါင်ဇွောဝ်ရ၊ ‘ဍာ်ပါင်ပြဟ်ကဠာင်တိတ်ရ’ ရ။ နဂလာန်သာ်ဂှ် စောတ်စောဲပူဂိုလ်ဂှ်အိုတ်ရ။ ဂလာန်ဝွံ ဒှ်ဟိုတ်သဇိုင်တၞမ် အနုဝါဒါဓိကိုရ်ရ။
၂၁၈။ ဟိုတ်သဇိုင်တၞမ် အာပတ္တာဓိကိုရ်တုန် ညးဍေံရော?၊ ဟိုတ်ဂွံဒးအာပတ်ဂမၠိုင် တြဴဂကူဂှ် ဒှ်ဟိုတ်သဇိုင်တၞမ် အာပတ္တာဓိကိုရ်ရ၊ အာပတ်ဒး ဟိုတ်နူဇကုဟေင်တုဲ ဟွံဒးဟိုတ်နူပါင်ကီု ဟိုတ်နူစိုတ်ကီုဂှ် မၞုံရ။ အာပတ်ဒး ဟိုတ်နူပါင်ဟေင်တုဲ ဟွံဒးဟိုတ်နူဇကုကီု ဟိုတ်နူစိုတ်ကီုဂှ် မၞုံရ။ အာပတ်ဒး ဟိုတ်နူဇကုကီု ဟိုတ်နူပါင်ကီုတုဲ ဟွံဒးဟိုတ်နူစိုတ်ကီုဂှ်မၞုံရ။ အာပတ်ဒး ဟိုတ်နူဇကုကီု ဟိုတ်နူစိုတ်ကီုတုဲ ဟွံဒးဟိုတ်နူပါင်ဂှ် မၞုံရ။ အာပတ်ဒး ဟိုတ်နူပါင်ကီု ဟိုတ်နူစိုတ်ကီုတုဲ ဟွံဒးဟိုတ်နူဇကုဂှ် မၞုံရ။ အာပတ်ဒး ဟိုတ်နူဇကုကီု ဟိုတ်နူပါင်ကီု ဟိုတ်နူစိုတ်ကီုဂှ် မၞုံရ။ ဟိုတ်ဂွံဒးအာပတ်ဂမၠိုင်တြဴဂကူဝွံ ဒှ်ဟိုတ်သဇိုင်တၞမ် အာပတ္တာဓိကိုရ်ရ။
၂၁၉။ ဟိုတ်သဇိုင်တၞမ် ကိစ္စဓိကိုရ်တုန် ညးဍေံရော?၊ ဟိုတ်သဇိုင်တၞမ် ကိစ္စာဓိကိုရ်မွဲဂှ်တုန် သင်ရောင်။
၂၂၀။ ဝိဝါဒါဓိကိုရ်ဂှ် ကုသိုလ်ဟာ အကုသိုလ်ဟာ အဗျာကတဟာ။ ဝိဝါဒါဓိကိုရ်ဂှ် လဆောဝ်ကုသိုလ်ရ၊ လဆောဝ်အကုသိုလ်ရ၊ လဆောဝ်အဗျာကတရ။
ပၞောဝ်ကဵုပိဂကူဂမၠိုင်ဂှ် ဝိဝါဒါဓိကိုရ်ကုသိုလ်ဂှ် ညးဍေံရော? ယွံခမဳတအ် ပ္ဍဲသာသနာဝွံ ခမဳဂမၠိုင် ဓရ်ရဴဝွံကီု ဟွံသေင်ကဵုဓရ်ရဴဝွံကီု ။ ပ ။ အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု သီုမၞုံကဵုကုသိုလ်စိုတ်ဂှ် ကယျာန်ဓဝါတ်အိုတ်ရ။ ပ္ဍဲအရာမကယျာန်ဓဝါတ်ဂှ် ပွမကယျာန်ဓဝါတ် သေက်ဇဵုဂတမတ်,ကြဴမတ် ပွမသေက်ဇဵု ခဵုခါတ်ကဵုဇိုင်တဲ ပွမဟီုသ္ဂးစှေ်စး ပွမဟီုသ္ဂး တၞဟ်တၞဟ် ပွမဟီုသ္ဂး နအကာဲအရာမွဲသအာင် ပွဟီုသ္ဂးကဵုစိုတ်ဒှ်ဒဒိုခ် ပွမကတဵုဒှ်ဂြဲဂြက်ဂမၠိုင်ဂှ် ကော်ခဴဂး ဝိဝါဒါဓိကိုရ်ကုသိုလ်ရ။ ပၞောဝ်ကဵုပိဂကူဂမၠိုင်ဂှ် ဝိဝါဒါဓိကိုရ် အကုသိုလ်ဂှ် ညးဍေံရော? ယွံခမဳတအ် ပ္ဍဲသာသနာဝွံ ခမဳဂမၠိုင် ဓရ်ရဴဝွံကီု ဟွံသေင်ကဵုဓရ်ရဴဝွံကီု ။ ပ ။ အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု သီုမၞုံကဵုအကုသဵုစိုတ်ဂှ် ကယျာန်ဓဝါတ်အိုတ်ရ။ ပ္ဍဲအရာမကယျာန်ဓဝါတ်ဂှ် ပွမကယျာန်ဓဝါတ် သေက်ဇဵုဂတမတ်,ကြဴမတ် ပွမသေက်ဇဵု ခဵုခါတ်ကဵုဇိုင်တဲ ပွမဟီုသ္ဂးစှေ်စး ပွမဟီုသ္ဂးတၞဟ်တၞဟ် ပွမဟီုသ္ဂးနအကာဲအရာမွဲသအာင် ပွဟီုသ္ဂးကဵုစိုတ်ဒှ်ဒဒိုခ် ပွမကတဵုဒှ်ဂြဲဂြက်ဂမၠိုင်ဂှ် ကော်ခဴဂး ဝိဝါဒါဓိကိုရ် အကုသိုလ်ရ။
ပၞောဝ်ကဵုပိဂကူဂမၠိုင်ဂှ် ဝိဝါဒါဓိကိုရ် အဗျာကတဂှ် ညးဍေံရော?၊ ယွံခမဳတအ် ပ္ဍဲသာသနာဝွံ ခမဳဂမၠိုင် ဓရ်ရဴဝွံကီု ဟွံသေင်ကဵုဓရ်ရဴဝွံကီု ။ ပ ။ အာပတ်မရုန်မဵုရဴဝွံကီု အာပတ်ဟွံရုန်မဵုရဴဝွံကီု သီုမၞုံကဵုအဗျာကတစိုတ်ဂှ် ကယျာန်ဓဝါတ်အိုတ်ရ။ ပ္ဍဲအရာမကယျာန်ဓဝါတ်ဂှ် ပွမကယျာန်ဓဝါတ် သေက်ဇဵုဂတမတ်,ကြဴမတ် ပွမသေက်ဇဵု ခဵုခါတ်ကဵုဇိုင်တဲ ပွမဟီုသ္ဂးစှေ်စး ပွမဟီုသ္ဂးတၞဟ်တၞဟ် ပွမဟီုသ္ဂးနအကာဲအရာမွဲသအာင် ပွဟီုသ္ဂးကဵုစိုတ်ဒှ်ဒဒိုခ် ပွမကတဵုဒှ် ဂြဲဂြက်ဂမၠိုင်ဂှ် ကော်ခဴဂး ဝိဝါဒါဓိကိုရ် အကုသိုလ်ရ။
၂၂၁။ အနုဝါဒါဓိကိုရ်ဂှ် ကုသိုလ်ဟာ အကုသိုလ်ဟာ အဗျာကတဟာ။ အနုဝါဒါဓိကိုရ်ဂှ် လဆောဝ်ကုသိုလ်ရ၊ လဆောဝ်အကုသိုလ်ရ၊ လဆောဝ်အဗျာကတရ။
ပၞောဝ်ကဵုပိဂကူဂမၠိုင်ဂှ် အနုဝါဒါဓိကိုရ် ကုသိုလ်ဂှ် ညးဍေံရော?၊ ယွံခမဳတအ် ပ္ဍဲသာသနာဝွံ ခမဳဂမၠိုင် သီုမၞုံကဵုကုသိုလ်စိုတ်ဂှ် စောတ်စောဲ ခမဳ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။ ပ္ဍဲအရာစောတ်စောဲဂှ် ပွမစောတ်စောဲ အကာဲအရာပွမစောတ်စောဲ ပွမဟီုသ္ဂး အကာဲအရာပွမဟီုသ္ဂး ဒဒှ်မတ္ၚံက် ဒဒှ်မပတိတ်ဒြဟတ်တူရူ ပွမကဵုဒြဟတ်ဂမၠိုင်ဂှ် ကော်ခဴဂး အနုဝါဒါဓိကိုရ်ကုသိုလ်ရ။
ပၞောဝ်ကဵုပိဂကူဂမၠိုင်ဂှ် အနုဝါဒါဓိကိုရ် အကုသိုလ်ဂှ် ညးဍေံရော?၊ ယွံခမဳတအ် ပ္ဍဲသာသနာဝွံ ခမဳဂမၠိုင် သီုမၞုံကဵုအကုသိုလ်စိုတ်ဂှ် စောတ်စောဲ ခမဳ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။ ပ္ဍဲအရာစောတ်စောဲဂှ် ပွမစောတ်စောဲ အကာဲအရာပွမစောတ်စောဲ ပွမဟီုသ္ဂး အကာဲ အရာပွမဟီုသ္ဂး ဒဒှ်မတ္ၚံက် ဒဒှ်မပတိတ်ဒြဟတ်တူရူ ပွမကဵုဒြဟတ်ဂမၠိုင်ဂှ် ကော်ခဴဂး အနုဝါဒါဓိကိုရ်အကုသိုလ်ရ။
ပၞောဝ်ကဵုပိဂကူဂမၠိုင်ဂှ် အနုဝါဒါဓိကိုရ် အဗျာကတဂှ် ညးဍေံရော?၊ ယွံခမဳတအ် ပ္ဍဲသာသနာဝွံ ခမဳဂမၠိုင် သီုမၞုံကဵုအဗျာကတစိုတ်ဂှ် စောတ်စောဲ ခမဳ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု မပွမဂယိုင်လမျီုလီုလာ်ကီုအိုတ်ရ။ ပ္ဍဲအရာစောတ်စောဲဂှ် ပွမစောတ်စောဲ အကာဲအရာပွမစောတ်စောဲ ပွမဟီုသ္ဂး အကာဲ အရာပွမဟီုသ္ဂး ဒဒှ်မတ္ၚံက် ဒဒှ်မပတိတ်ဒြဟတ်တူရူ ပွမကဵုဒြဟတ်ဂမၠိုင်ဂှ် ကော်ခဴဂး အနုဝါဒါဓိကိုရ် အဗျာကတရ။
၂၂၂။ အာပတ္တာဓိကိုရ်ဂှ် ကုသိုလ်ဟာ အကုသိုလ်ဟာ အဗျာကတဟာ။ အာပတ္တာဓိကိုရ်ဂှ် လဆောဝ်အကုသိုလ်ရ၊ လဆောဝ်အဗျာကတရ။ အာပတ္တာဓိကိုရ် ကုသိုလ်တုန်ဟွံမွဲရ။
ပၞောဝ်ကဵုၜါဂကူဂမၠိုင်ဂှ် အာပတ္တာဓိကိုရ် အကုသိုလ်ဂှ် ညးဍေံရော?၊ သီုကဵုမတီတဴ သီုကဵုမတီတဴဗွဲမဒးရး ဖအောဝ်လလဴစေတနာ သ္ပလွဳပရာတုဲ အာပတ်မဂပ်ဝ်ဓလီုဍိုက်တုဲ ကလိလောန်ဂှ် ကော်ခဴဂး အာပတ္တာဓိကိုရ် အကုသိုလ်ရ။
ပၞောဝ်ကဵုၜါဂကူဂမၠိုင်ဂှ် အာပတ္တာဓိကိုရ် အဗျာကတဂှ် ညးဍေံရော?၊ သီုကဵုဟွံတီတဴ သီုကဵုဟွံတီတဴဗွဲမဒးရး ဟွံဖအောဝ်လလဴစေတနာ ဟွံသ္ပလွဳပရာတုဲ အာပတ်မဂပ်ဝ်ဓလီုဍိုက်တုဲ ကလိလောန်ဂှ် ကော်ခဴဂး အာပတ္တာဓိကိုရ် အဗျာကတရ။
၂၂၃။ ကိစ္စာဓိကိုရ်ဂှ် ကုသိုလ်ဟာ အကုသိုလ်ဟာ အဗျာကတဟာ။ ကိစ္စာဓိကိုရ်ဂှ် လဆောဝ်ကုသိုလ်ရ၊ လဆောဝ်အကုသိုလ်ရ၊ လဆောဝ်အဗျာကတရ။
ပၞောဝ်ကဵုပိဂကူဂမၠိုင်ဂှ် ကိစ္စာဓိကိုရ် ကုသိုလ်ဂှ် ညးဍေံရော?၊ အပလောကနကမ် ဉ တ္တိကမ် ဉတ္တိဒုတိယကမ် ဉတ္တိစတုတ္ထကမ် သင်မဂပ်ဝ်သ္ပ သီုမၞုံကဵုကုသိုလ်စိုတ်ဂမၠိုင်ဂှ် ကော်ခဴဂး ကိစ္စာဓိကိုရ် ကုသိုလ်ရ။ ပၞောဝ်ကဵုပိဂကူဂမၠိုင်ဂှ် ကိစ္စာဓိကိိုရ် အကုသိုလ်ဂှ် ညးဍေံရော?၊ အပလောကနကမ် ဉတ္တိကမ် ဉတ္တိဒုတိယကမ် ဉတ္တိစတုတ္ထကမ် သင်မဂပ်ဝ်သ္ပ သီုမၞုံကဵုအကုသိုလ်စိုတ်ဂမၠိုင်ဂှ် ကော်ခဴဂး ကိစ္စာဓိကိုရ် အကုသိုလ်ရ။
ပၞောဝ်ကဵုပိဂကူဂမၠိုင်ဂှ် ကိစ္စာဓိကိုရ် အဗျာကတဂှ် ညးဍေံရော? အပလောကနကမ် ဉတ္တိကမ် ဉတ္တိဒုတိယကမ် ဉတ္တိစတုတ္ထကမ် သင်မပ်ဝ်သ္ပ သီုမၞုံကဵုအဗျာကတစိုတ်ဂမၠိုင်ဂှ် ကော်ခဴဂး ကိစ္စာဓိကိုရ် အဗျာကတရ။
၂၂၄။ ဝိဝါဒလေဝ် ဂွံယၟုတုဲ ဝိဝါဒါဓိကိုရ်လေဝ် ဂွံယၟုဟာ၊ ဝိဝါဒဟေင် ဂွံယၟုတုဲ အဓိကိုရ် ဟွံဂွံယၟုဟာ၊ အဓိကိုရ်ဟေင် ဂွံယၟုတုဲ ဝိဝါဒဟွံဂွံယၟုဟာ၊ အဓိကိုရ်လေဝ်ဂွံယၟုဝိဝါဒလေဝ် ဂွံယၟုဟာ။ လ္ၚဵုဂှ် ဝိဝါဒလေဝ်ဂွံယၟုရ၊ ဝိဝါဒါဓိကိုရ်လေဝ် ဂွံယၟုရ၊ လ္ၚဵုဂှ် ဝိဝါဒဟေင်ဂွံယၟုတုဲ အဓိကိုရ် ဟွံဂွံယၟုရ၊ လ္ၚဵုဂှ် အဓိကိုရ်ဟေင်ဂွံယၟုတုဲ ဝိဝါဒဟွံဂွံယၟုရ၊ လ္ၚဵုဂှ်အဓိကိုရ်လေဝ်ဂွံယၟုရ၊ ဝိဝါဒလေဝ် ဂွံယၟုရ။
ပၞောဝ်ပန်ဂကူဂမၠိုင်ဂှ် မုမွဲ ဝိဝါဒလေဝ်ဂွံယၟု ဝိဝါဒါဓိကိုရ်လေဝ် ဂွံယၟုရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် ဓရ်ရဴဝွံကီု ဟွံသေင်ကဵုဓရ်ရဴဝွံကီု ။ ပ ။ အာပတ်မရုန်မဵု ရဴဝွံကီု အာပတ်ဟွံရုန်မဵုရဴဝွံကီု ကယျာန်ဓဝါတ်အိုတ်ရ။ ပ္ဍဲအရာမကယျာန်ဓဝါတ်ဂှ် ပွမ ကယျာန်ဓဝါတ်သေက်ဇဵု ဂတမတ်,ကြဴမတ် ပွမသေက်ဇဵု ခဵုခါတ်ကဵုဇိုင်တဲ ပွမဟီုသ္ဂးစှေ်စး ပွမဟီုသ္ဂးတၞဟ်တၞဟ် ပွမဟီုသ္ဂး နအကာဲအရာမွဲသအာင် ပွဟီုသ္ဂးကဵုစိုတ်ဒှ်ဒဒိုခ် ပွမကတဵုဒှ် ဂြဲဂြက်ဂမၠိုင်ဂှ် ဝိဝါဒလေဝ်မ္ဂးယၟုအိုတ်ရ၊ ဝိဝါဒါဓိကိုရ်လေဝ်မ္ဂးယၟုအိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ ဝိဝါဒဟေင်ဂွံယၟုတုဲ အဓိကိုရ်ဟွံဂွံယၟုရော?။ ပွမကယျာန်ဓဝါတ် မိကဵုကောန် ပွမကယျာန်ဓဝါတ် ကောန်ကဵုမိ ပွမကယျာန်ဓဝါတ် ကောန်ကဵုမအံက် ပွမကယျာန်ဓဝါတ် မအံက်ကဵုကောန် ပွမကယျာန်ဓဝါတ် ကောံဒေံရင်သကအ် ပွမကယျာန်ဓဝါတ် ကောဒေံကဵုဒေံဗြဴ, ၝဲ ပွမကယျာန်ဓဝါတ် ဒေံဗြဴ, ၝဲကဵုကောဒေံ ပွမကယျာန်ဓဝါတ် မိတ်သဟာဲ ရင်သကအ်ဂမၠိုင်ဂှ် ဝိဝါဒဟေင်ဂွံယၟုတုဲ ဟွံဂွံယၟုအဓိကိုရ်အိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်ဟေင်ဂွံယၟုတုဲ ဝိဝါဒဟွံဂွံယၟုရော?။ အနုဝါဒါဓိကိုရ် အာပတ္တာဓိကိုရ် ကိစ္စာဓိကိုရ်ဂမၠိုင်ဂှ် အဓိကိုရ်ဟေင်ဂွံယၟုတုဲ ဝိဝါဒဟွံဂွံယၟုအိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်လေဝ်ဂွံယၟု ဝိဝါဒလေဝ်ဂွံယၟုရော? ဝိဝါဒါဓိကိုရ်ဂှ် အဓိကိုရ်လေဝ်ဂွံယၟုရ၊ ဝိဝါဒလေဝ်ဂွံယၟုရ။
၂၂၅။ အနုဝါဒလေဝ်ဂွံယၟုတုဲ အနုဝါဒါဓိကိုရ်လေဝ် ဂွံယၟုဟာ၊ အနုဝါဒဟေင်ဂွံယၟုတုဲ အဓိကိုရ်ဟွံဂွံယၟုဟာ၊ အဓိကိုရ်ဟေင်ဂွံယၟုတုဲ အနုဝါဒဟွံဂွံယၟုဟာ၊ အဓိကိုရ်လေဝ်ဂွံယၟု အနုဝါဒလေဝ် ဂွံယၟုဟာ။ လ္ၚဵုဂှ် အနုဝါဒလေဝ်ဂွံယၟုရ၊ အနုဝါဒါဓိကိုရ်လေဝ် ဂွံယၟုရ၊ လ္ၚဵုဂှ် အနုဝါဒဟေင်ဂွံယၟုတုဲ အဓိကိုရ် ဟွံဂွံယၟုရ၊ လ္ၚဵုဂှ် အဓိကိုရ်ဟေင်ဂွံယၟုတုဲ အနုဝါဒဟွံဂွံယၟုရ၊ လ္ၚဵုဂှ် အဓိကိုရ်လေဝ်ဂွံယၟုရ၊ အနုဝါဒလေဝ် ဂွံယၟုရ။
ပၞောဝ်ပန်ဂကူဂမၠိုင်ဂှ် မုမွဲ အနုဝါဒလေဝ်ဂွံယၟု အနုဝါဒါဓိကိုရ်လေဝ် ဂွံယၟုရော?။ ယွံခမဳတအ် ပ္ဍဲသာသနာဝွံ ခမဳဂမၠိုင် စောတ်စောဲ ခမဳ နပွမသဳလလီုလာ်ကီု နပွမဒ္ဂေတ်လီုလာ်ကီု နပွမကွေတ်လီုလာ်ကီု နပွမဂယိုင်လမျီုလီုလာ်ကီုအိုတ်ရ။ ပ္ဍဲအရာစောတ်စောဲဂှ် ပွမစောတ်စောဲ အကာဲအရာပွမစောတ်စောဲ ပွမဟီုသ္ဂး အကာဲအရာပွမဟီုသ္ဂး ဒဒှ်မတ္ၚံက်ဒဒှ်မပတိတ်ဒြဟတ် တူရူ ပွမကဵုဒြဟတ်ဂမၠိုင်ဂှ် အနုဝါဒလေဝ်ဂွံယၟု အနုဝါဒါဓိကိုရ်လေဝ်ဂွံယၟုရ။
ပၞောဝ်ပန်ဂကူဂမၠိုင်ဂှ် မုမွဲ အနုဝါဒဟေင်ဂွံယၟုတုဲ အဓိကိုရ် ဟွံဂွံယၟုရော?။ မိဂှ် ပွမစောတ်စောဲကောန် ကောန်ဂှ် ပွမစောတ်စောဲမိ ကောန်ဂှ် ပွမစောတ်စောဲမအံက် မအံက်ဂှ် ပွမစောတ်စောဲကောန် ပွမစောတ်စောဲ ကောံဒေံရင်သကအ် ကောဒေံဂှ် ပွမစောတ်စောဲ ဒေံဗြဴ,ၝဲ ဒေံဗြဴ,ၝဲဂှ် ပွမစောတ်စောဲကောဒေံ ပွမစောတ်စောဲ မိတ်သဟာဲရင်သကအ်ဂမၠိုင်ဂှ် အနုဝါဒဟေင် ဂွံယၟုတုဲ ဟွံဂွံယၟုအဓိကိုရ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်ဟေင်ဂွံယၟုတုဲ အနုဝါဒဟွံဂွံယၟုရော?။ အာပတ္တာဓိကိုရ် ကိစ္စာဓိကိုရ် ဝိဝါဒါဓိကိုရ်ဂမၠိုင်ဂှ် အဓိကိုရ်ဟေင်ဂွံယၟုတုဲ အနုဝါဒဟွံဂွံယၟုအိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်လေဝ်ဂွံယၟု အနုဝါဒလေဝ်ဂွံယၟုရော?။ အနုဝါဒါဓိကိုရ်ဂှ် အဓိကိုရ်လေဝ်ဂွံယၟုရ၊ အနုဝါဒလေဝ်ဂွံယၟုရ။
၂၂၆။ အာပတ်လေဝ်ဂွံယၟုတုဲ အာပတ္တာဓိကိုရ်လေဝ် ဂွံယၟုဟာ၊ အာပတ္တိဟေင် ဂွံယၟုတုဲ အဓိကိုရ်ဟွံဂွံယၟုဟာ၊ အဓိကိုရ်ဟေင်ဂွံယၟုတုဲ အာပတ္တိဟွံဂွံယၟုဟာ၊ အဓိကိုရ်လေဝ်ဂွံယၟု အာပတ္တိလေဝ် ဂွံယၟုဟာ။ လ္ၚဵုဂှ် အာပတ္တိလေဝ်ဂွံယၟုရ၊ အာပတ္တာဓိကိုရ်လေဝ် ဂွံယၟုရ၊ လ္ၚဵုဂှ် အာပတ္တိဟေင်ဂွံယၟုတုဲ အဓိကိုရ်ဟွံဂွံယၟုရ၊ လ္ၚဵုဂှ် အဓိကိုရ်ဟေင်ဂွံယၟုတုဲ အာပတ္တိ ဟွံဂွံယၟုရ၊ လ္ၚဵုဂှ် အဓိကိုရ်လေဝ်ဂွံယၟုရ၊ အာပတ္တိလေဝ် ဂွံယၟုရ။
ပၞောဝ်ပန်ဂကူဂမၠိုင်ဂှ် မုမွဲ အာပတ်လေဝ်ဂွံယၟု အာပတ္တာဓိကိုရ်လေဝ် ဂွံယၟုရော?။ အာပတ်မသုန်ဘုံ အာပတ်ထပှ်ဘုံဂမၠိုင်ဂှ် အာပတ်လေဝ်ဂွံယၟု အာပတ္တာဓိကိုရ်လေဝ် ဂွံယၟုအိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ အာပတ်ဟေင်ဂွံယၟုတုဲ အဓိကိုရ်ဟွံဂွံယၟုရော?။ သောတာပတ္တိ ကေုာံသမာပတ္တိဂမၠိုင်ဂှ် အာပတ်ဟေင်ဂွံယၟုတုဲ ဟွံဂွံယၟုအဓိကိုရ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်ဟေင်ဂွံယၟုတုဲ အာပတ်ဟွံဂွံယၟုရော?။ ကိစ္စာဓိကိုရ် ဝိဝါဒါဓိကိုရ် အနုဝါဒါဓိကိုရ်ဂမၠိုင်ဂှ် အဓိကိုရ်ဟေင်ဂွံယၟုတုဲ အာပတ်ဟွံဂွံယၟုအိုတ်ရ။
ပၞောဝ်ပန်ဂကူဂမၠိုင်ဂှ် မုမွဲ အဓိကိုရ်လေဝ်ဂွံယၟု အာပတ်လေဝ်ဂွံယၟုရော? အာပတ္တာဓိကိိုရ်ဂှ် အဓိကိုရ်လေဝ်ဂွံယၟုရ၊ အာပတ်လေဝ်ဂွံယၟုရ။
၂၂၇။ ကိစ္စလေဝ်ဂွံယၟုတုဲ ကိစ္စာဓိကိုရ်လေဝ် ဂွံယၟုဟာ၊ ကိစ္စဟေၚ်ဂွံယၟုတုဲ အဓိကိုရ်ဟွံဂွံယၟုဟာ၊ အဓိကိုရ်ဟေၚ်ဂွံယၟုတုဲ ကိစ္စဟွံဂွံယၟုဟာ၊ အဓိကိုရ်လေဝ်ဂွံယၟု ကိစ္စလေဝ်ဂွံယၟုဟာ။ လ္ၚဵုဂှ် ကိစ္စလေဝ်ဂွံယၟု၊ ကိစ္စာဓိကိုရ်လေဝ် ဂွံယၟုရ၊ လ္ၚဵုဂှ် ကိစ္စဟေၚ်ဂွံယၟုတုဲ အဓိကိုရ်ဟွံဂွံယၟုရ၊ လ္ၚဵုဂှ် အဓိကိုရ်ဟေၚ်ဂွံယၟုတုဲ ကိစ္စဟွံဂွံယၟုရ၊ လ္ၚဵုဂှ် အဓိကိုရ်လေဝ် ဂွံယၟုရ၊ ကိစ္စလေဝ် ဂွံယၟုရ။
ပၞောန်ပန်ဂကူဂမၠိုၚ်ဂှ် မုမွဲ ကိစ္စလေဝ်ဂွံယၟု ကိစ္စာဓိကိုရ်လေဝ် ဂွံယၟုရော?။ အပလောကနကမ် ဉတ္တိကမ် ဉတ္တိဒုတိယကမ် ဉတ္တိစတုတ္ထကမ်ဂမၠိုၚ် ကေၚ်ကာ အရာထေက်ကဵုဒးပတုဲ သၚ်ဂှ် ကိစ္စလေဝ်ဂွံယၟု ကိစ္စာဓိကိုရ်လေဝ် ဂွံယၟုရ။
ပၞောဝ်ပန်ပကူဂမၠိုၚ်ဂှ် မုမွဲ ကိစ္စဟေၚ်ဂွံယၟုတုဲ အဓိကိုရ်ဟွံဂွံယၟုရော? ကိစ္စကေၚ်ကာဥပဇ္ၛာယ် ကိစ္စကေၚ်ကာအ္စာ ကိစ္စကေၚ်ကာ သဟဓရ်ဥပဇ္ၛာယ်တုပ်သၟဟ် ကိစ္စကေၚ်ကာ သဟဓရ်အ္စာတုပ်သၟဟ်ဂမၠိုၚ်ဂှ် ကိစ္စဟေၚ်ဂွံယၟုတုဲ အဓိကိုရ်ဟွံဂွံယၟုရ။ ပၞောဝ်ပန်ဂကူဂမၠိုၚ်ဂှ် မုမွဲ အဓိကိုရ်ဟေၚ်ဂွံယၟုတုဲ ကိစ္စဟွံဂွံယၟုရော?။ ဝိဝါဒါဓိကိုရ် အနုဝါဒါဓိကိုရ် အာပတ္တာဓိကိုရ်ဂမၠိုၚ်ဂှ် အဓိကိုရ်ဟေၚ်ဂွံယၟုတုဲ ကိစ္စဟွံဂွံယၟုအိုတ်ရ။
ပၞောဝ်ပန်ဂကူဂမၠိုၚ်ဂှ် မုမွဲ အဓိကိုရ်လေဝ်ဂွံယၟု ကိစ္စလေဝ်ဂွံယၟုရော?။ ကိစ္စာဓိကိုရ်ဂှ် အဓိကိုရ်လေဝ်ဂွံယၟုရ၊ ကိစ္စလေဝ်ဂွံယၟုရ။
