၄.၅။ ယေဘုယျသိကာ
၂၀၂။ ယွံခမဳတအ် ခမဳဂမၠိုင် ပ္ဍဲလဒေါဝ်သင် ကယျာန်ဓဝါတ်သေက်ဇဵု ဂတမတ် ကြဴမတ် ဟီုသ္ဂးစှေ်စး အာစိုပ်ပွမအရေဝ်ဂၠိုင်သၟးဟွံက ထ္ပက်ခၠင်ဗၞုဟ်ပါင်တုဲလေဝ် ပဒတဴအိုတ်ရ၊ ကဵုလလမ်ကၠေံ အဓိကိုရ်ဟွံမာန်အိုတ်ရ။ ဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် အဓိကိုရ်မၞုံသဘဴရဴဝွံ ကဵုအခေါင် သွက်ဂွံလလမ်ကၠေံ နကဵုယေဘုယျသိကဝိနယ် ‘ဗက်လပါ်ဓမ္မဝါဒဳဂၠိုင်တုဲမသ္ပ’ ရ။
ဟွံဗက် ဆန္ဒာဂတိရ။
ဟွံဗက် ဒေါသာဂတိရ။
ဟွံဗက် မောဟာဂတိရ။
ဟွံဗက် ဘယာဂတိရ။
ဂိုင်ကေတ်ဇြေဟ်လိက်မာဲတုဲ ဟွံဂွံဂိုင်ကေတ်ဏီလေဝ် လေပ်တီရ၊ ခမဳမဍိုက်ပေင်တဴကေုာံအၚ်္ဂဂမၠိုင်မသုန်သာ်ဝွံ ဒးသၟိတ်ပတိုန်ရဴဝွံမ္ဂး ခမဳကဵုဇြေဟ်လိက်မာဲရ။
ယွံခမဳတအ် ရဴဝွံဟေင် ဒးသၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါင် ခမဳရ၊ အာတ်ပါန်အခေါင်တုဲ ပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသင်တီရ–
၂၀၃။ “ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ ကမ်မၞုံကဵုအခိင်မဗဗွဲ ကုသင် ယဝ်ဒှ်မ္ဂး၊ သင် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ ဣဝွံတုန် ပွမကဵုတီရောင်။
ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ သင် သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲရ၊ တဳလပိုဉ်ဂှ် သ္ဒးဒၟံင်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သင် ဂပ်ဝ်သၟိတ်ပတိုန် ခမဳမၞုံယၟုဝွံ ရဴဝွံမ္ဂး ခမဳကဵုဇြေဟ်လိက်မာဲတုဲရ၊ ကုသင်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံင်ကၞပ်သ္ၚောံသ္ၚိတ်ဇြရ၊ နမဒၟံင်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
၁၀၄။ ယွံခမဳတအ် ပွမဂိုင်ကေတ် ဇြေဟ်လိက်မာဲဂမၠိုင် မဟွံဗဗွဲကဵုဓရ်ဂှ် မၞုံစှ်သာ်အိုတ်ရ။ ပွမဂိုင်ကေတ် ဇြေဟ်လိက်မာဲဂမၠိုင် မဗဗွဲကဵုဓရ်ဂှ် မၞုံစှ်သာ်အိိုတ်ရ။ ပွမဂိုင်ကေတ် ဇြေဟ်လိက်မာဲဂမၠိုင် ဟွံဗဗွဲကဵုဓရ်ဂှ် ညးဍေံအိုတ်ရော?။ အဓိကိုရ်ဂှ် ဍောတ်လေဝ်ဍောတ်ရ၊ ‘အယာံမာတ် ကယျာန်ဓဝါတ်လေဝ် ဒှ်ရ’၊ သ္ဂုတ်သွတ်လဝ် ၜါဝါပိဝါတုဲလေဝ် ဟွံသေင်ရ၊ ဂပ်ဝ်ကဵု ခမဳတၠဂဗုဓ် (အမှု) ဂမၠိုင် ဗှ်ဗၞုဟ်ၜါဝါပိဝါ ဂပ်ဝ်ကဵု ခမဳသအာင်ဂမၠိုင် ဗှ်ဗၞုဟ်ၜါဝါပိဝါလေဝ် ဟွံသေင်ရ၊ “အဓမ္မဝါဒဳ ‘ညးဟီုဟွံဓဝ်ကရာ’ ဂမၠိုင် ဂၠိုင်လောန်အိုတ်ရ” ရဴဝွံ တီရ၊ အဓမ္မဝါဒဳဂမၠိုင် ဂၠိုင်လောန်အိုတ်ရောင် တန်ဒှ်ရ ရဴဝွံ တီရ၊ “သင်ကြက်ပါ်ဒးရ” ရဴဝွံ တီရ၊ သင်ပါ်ဒကးတန်ဒှ်ရ ရဴဝွံ တီရ၊ ဂိုင်ကေတ် ဇြေဟ်လိက်မာဲ နဟွံဗဗွဲဓရ်အိိုတ်ရ၊ ဂိုင်ကေတ် မာဲဟွံညဳသၟဟ် ပါ်တၞဟ်အိုတ်ရ၊ ဟွံဂိုင်ကေတ်မာဲ အတိုင်တင်ဒုင်ကေတ် (ကွေတ်ဇကုဇကုတအ်) အိုတ်ရ။ ဣဝွံဂမၠိုင်တုန် ပွမဂိုင်ကေတ် ဇြေဟ်လိက်မာဲမဟွံဗဗွဲဓရ်ဂမၠိုင်စှ်သာ်ရ။
ပွမဂိုင်ကေတ် ဇြေဟ်လိက်မာဲဂမၠိုင် မဗဗွဲကဵုဓရ်ဂှ် ညးဍေံအိုတ်ရော?။ အဓိကိုရ်ဂှ် ဍောတ်လေဝ် ဟွံဍောတ်ရ၊ သ္ဂုတ်သွတ်လဝ် ၜါဝါပိဝါတုဲလေဝ် ဒှ်ရ၊ ဂပ်ဝ်ကဵုခမဳတၠဂဗုဓ် (အမှု) ဂမၠိုင် ဗှ်ဗၞုဟ်ၜါဝါပိဝါ ဂပ်ဝ်ကဵုခမဳသအာင်ဂမၠိုင် ဗှ်ဗၞုဟ်ၜါဝါပိဝါလေဝ် ဒှ်ရ၊ “ဓမ္မဝါဒဳ ‘ညးဟီုဓဝ်ကရာ’ ဂမၠိုင် ဂၠိုင်လောန်အိုတ်ရ” ရဴဝွံ တီရ၊ ဓမ္မဝါဒဳဂမၠိုင် ဂၠိုင်လောန်အိုတ်ရောင် တန်ဒှ်ရ ရဴဝွံ တီရ၊ “သင်ဟွံပါ်ဒးရ” ရဴဝွံ တီရ၊ သင်ဟွံပါ်ဒကးတန်ဒှ်ရ ရဴဝွံ တီရ၊ ဂိုင်ကေတ် ဇြေဟ်လိက်မာဲ နဗဗွဲဓရ်အိုတ်ရ၊ ဂိုင်ကေတ်မာဲ ဗွဲညဳသာသၟဟ်သၟန်အိုတ်ရ၊ ဂိုင်ကေတ်မာဲ အတိုင််တင်ဒုင်ကေတ် (ကွေတ်ဇကုဇကုတအ်) အိုတ်ရ။ ဣဝွံဂမၠိုင်တုန် ပွမဂိုင်ကေတ် ဇြေဟ်လိက်မာဲမဗဗွဲဓရ်ဂမၠိုင်စှ်သာ်ရ။
