၄.၆။ တဿပါပိယသိကာ
၂၀၅။ ပ္ဍဲအခိင်ဂှ် ခမဳဥပဝါဠဂှ် ဂပ်ဝ်သၟာန်သၟုက်စၟဳစၟက် နအာပတ် ပ္ဍဲလဒေါဝ်သင်မ္ဂး ပါဲကၠေံတုဲ ပ္ဍဲကြဴ ဒုင်ဝန်ရ၊ ဒုင်ဝန်တုဲပ္ဍဲကြဴ ပါဲကၠေံရ၊ ဟီုလ္ၚုသၟးရ၊ ဟီုဂြောပ်ဗ္ဒန်ဟိုတ်မွဲသအာင် နဟိုတ်မွဲသအာင်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ။
ခမဳပၟိက်အောန်ဂမၠိုင် “ခမဳဥပဝါဠဂှ် ဂပ်ဝ်သၟာန်သၟုက်စၟဳစၟတ် နအာပတ် ပ္ဍဲလဒေါဝ်သင်မ္ဂး မုဟိုတ် ပါဲကၠေံတုဲ ပ္ဍဲကြဴ ဒုင်ဝန်ရော?၊ ဒုင်ဝန်တုဲပ္ဍဲကြဴ ပါဲကၠေံရော?၊ ဟီုဂြောပ်ဗ္ဒန် ဟိုတ်မွဲသအာင် နဟိုတ်မွဲသအာင်ရော?၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရောင်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိင်ဂှ် ခမဳဂမၠိုင်ဂှ် ဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဍာံပြဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရင်ပတီအိုတ်ရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး–
ယွံခမဳတအ် ဒှ်သာ်ဂှ်မ္ဂး သင် ဩဝ်သ္ပတဿပါပိယသိကကမ် ‘ပွမဂပ်ဝ်ကဵုသ္ပကုပူဂိုလ်မယုတ်မာဗွဲတၟေင်ဂမၠိုင်’ ကုခမဳဥပဝါဠညိ ရဴဝွံ သ္ဂးကဵုခမဳဂမၠိုင်ရ။
ယွံခမဳတအ် ရဴဝွံ ဒးသ္ပရ။
ဗွဲကိုပ်ကၠာ ဒးစောဒနာ ခမဳဥပဝါဠရ၊ စောဒနာတုဲပ္ဍဲကြဴ ဒးကဵုဗှ်ဗၞုဟ်ရ၊ ကဵုဗှ်ဗၞုဟ်တုဲ ပ္ဍဲကြဴ ဒးပတိုန်အာပတ်ရ၊ ပတိုန်အာပတ်တုဲပ္ဍဲကြဴ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသင်တီရ။
၂၀၆။ “ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ ခမဳဥပဝါဠဝွံ ဂပ်ဝ်သၟာန်သၟုက်စၟဳစၟတ် နအာပတ် ပ္ဍဲလဒေါဝ်သင်မ္ဂး ပါဲကၠေံတုဲပ္ဍဲကြဴ ဒုင်ဝန်ရ၊ ဒုင်ဝန်တုဲပ္ဍဲကြဴပါဲကၠေံရ၊ ဟီုဂြောပ်ဗ္ဒန်ဟိုတ်မွဲသအာင် နဟိုတ်မွဲသအာင်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ကမ်မၞုံကဵုအခိင်မဗဗွဲ ကုသင် ယဝ်ဒှ်မ္ဂး၊ သင် သ္ပတဿပါပိယသိကကမ် ‘ပွမဂပ်ဝ်ကဵုသ္ပ ကုပူဂိုလ်မယုတ်မာဗွဲတၟေင်ဂမၠိုင်’ ကုခမဳဉပဝါဠရ၊ ဣဝွံတုန် ပွမကဵုတီရောင်။
ယွံတဳလပိုဉ်တအ် သင် ဩဝ်ကလင်ပင်မှိင် (ဂလာန်) အဲဍိက်ညိ၊ ခမဳဥပဝါဠဝွံ ဂပ်ဝ်သၟာန်သၟုက်စၟဳစၟတ် နအာပတ် ပ္ဍဲလဒေါဝ်သင်မ္ဂး ပါဲကၠေံတုဲပ္ဍဲကြဴ ဒုင်ဝန်ရ၊ ဒုင်ဝန်တုဲပ္ဍဲကြဴပါဲကၠေံရ၊ ဟီုဂြောပ်ဗ္ဒန်််ဟိုတ်မွဲသအာင် နဟိုတ်မွဲသအာင်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ သင် သ္ပတဿပါပိယသိကကမ် ‘ပွမဂပ်ဝ်ကဵုသ္ပ ကုပူဂိုလ်မယုတ်မာဗွဲတၟေင်ဂမၠိုင်’ ကုခမဳဥပဝါဠရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသ္ပတဿပါပိယသိကကမ် ‘ပွမဂပ်ဝ်ကဵုသ္ပ ကုပူဂိုလ်မယုတ်မာဗွဲတၟေင်ဂမၠိုင်’ ကုခမဳဉပဝါဠရ၊ တဳလပိုဉ်ဂှ် သ္ဒးဒၟံင်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။
သင် ဂပ်ဝ်သ္ပတဿပါပိယသိကကမ် ‘ပွမဂပ်ဝ်ကဵုသ္ပ ကုပူဂိုလ်မယုတ်မာဗွဲတၟေင်ဂမၠိုင်’ ကုခမဳဥပဝါဠတုဲရ၊ ကုသင်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံင်ကၞပ်သ္ၚောံသ္ၚိတ်ဇြရ၊ နမဒၟံင်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
၂၀၇။ ယွံခမဳတအ် ပွမသ္ပတဿပါပိယသိကကမ် မဗဗွဲကဵုဓရ်ဂမၠိုင် ဣဝွံမၞုံမသုန်ပြကာအိုတ်ရ။ မၞုံကဵုဒ္ဂေတ်ဟွံသအးဇ္ၚးရ၊ ဟွံလေပ်ဂွပါပ်ရ၊ ဒးဒုင်စောတ်စောဲရ သင် သ္ပတဿပါပိယသိကကမ် ကုခမဳဂှ်ရ၊ သ္ပတဿပါပိယသိကမ် အတိုင်ဓရ် နမညဳသာသၟဟ်သၟန်ရ။ ယွံခမဳတအ် ပွမသ္ပတဿပါပိယသိကကမ် မဗဗွဲကဵုဓရ်ဂမၠိုင် ဣဝွံမၞုံမသုန်ပြကာအိုတ်ရ
