၂.၅။ ဒ္ဂေတ်ဝတ် ခမဳထေက်ကဵုကော်ပၠုပ်အဗ္ဘာန်
၉၅။ ပ္ဍဲအခိၚ်ဂှ် ခမဳမထေက်ကဵုကော်ပၠုပ်အဗ္ဘာန်ဂမၠိုၚ် သာယျေန်တဴ ပွမလ္ၚောဝ်ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရ။ ခမဳပၟိက်အောန်ဂမၠိုၚ်ဂှ်―
“ခမဳထေက်ကဵုကော်ပၠုပ်အဗ္ဘာန်ဂမၠိုၚ် မုဟိုတ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲ―
“ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂမၠိုၚ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုန်ဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် ဟွံထေက်ရ ။ ပ ။ ယွံခမဳတအ် ခမဳထေက်ကဵုကော်ပၠုပ်အဗ္ဘာန်ဂမၠိုၚ် မုဟိုတ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ် အိုတ်ရော?။
ယွံခမဳတအ် (ပွခမဳဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
ယွံခမဳတအ် ခမဳထေက်ကဵုကော်ပၠုပ်အဗ္ဘာန်ဂှ် ဟဂပ်ဝ်သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်ရ၊ ကုခမဳ မသာယျေန်ဂှ် ဒးအာပတ်ဒက္ကဋ်ရ။
ယွံခမဳတအ် ကုခမဳထေက်ကဵုကော်ပၠုပ်အဗ္ဘာန်ဂှ် ရၚ်သကအ် အတိုၚ်လၟေၚ်ညးဇၞော်ကဵုအခေါၚ် ပွမသာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စးဂမၠိုၚ်ရ။
ယွံခမဳတအ် ကုခမဳထေက်ကဵုကော်ပၠုပ်အဗ္ဘာန်ဂှ် အတိုၚ်လၟေၚ်ညးဇၞော် ပွမသ္ပဥပေါသ်ကီု ပွမသ္ပပဝါရဏာကီု ပွမဒုၚ်ဂိုၚ်ကေတ်သ္ၚာသၞုက်ဗြဲကီု ပွမသၠးဝတ်ပိဏ္ဍပါတ်ကီု ဘတ် (မပတမ်သံဃဘတ်ကီု) ကဵုအခေါၚ် မသုန်ပြကာဝွံရ။
ယွံခမဳတအ် ဒှ်သာ်ဂှ်မ္ဂး ပညပ်တဴ ဒ္ဂေတ်ဝတ်ကု ခမဳထေက်ကဵုကော်ပၠုပ်အဗ္ဘာန်ဂှ်ရ၊ အတိုၚ်ဒ္ဂေတ်ဝတ်ဂှ် ခမဳထေက်ကဵုကော်ပၠုပ်အဗ္ဘာန်ဂမၠိုၚ် ဒးဒ္ဂေတ်ရ။
၉၆။ ယွံခမဳတအ် ခမဳထေက်ကဵုကော်ပၠုပ်အဗ္ဘာန်ဂှ် ဒးဒ္ဂေတ်ဗွဲမဒးရးရ။ ကြက်သ္ဂးဂတဝွံတုန် ပ္ဍဲအရာမဒ္ဂေတ်ဂှ် ဒ္ဂေတ်ဝတ် မဒးဒ္ဂေတ်သ္ပဗွဲမဒးရးရောၚ်။
(သ္ပအ္စာဥပဇ္ၛာယ်တုဲ) ဟဂပ်ဝ်ပကဵု ပယျၚ်ရ ။ ပ ။ (ခမဳမထေက်ကဵုတံၚ်ဓဇက်တမ် ခမဳထေက်ကဵုဒ္ဂေတ်မာနတ် ခမဳထေက်ကဵုကော်ပၠုပ်အဗ္ဘန် ကုခမဳဂမၠိုၚ်ပိဂကူဝွံ နနယ်အာကာရအရာတုပ်သၟဟ် ဒးတြးရ။) ဟွံထေက်ကဵုစိုန်သကိုန်နှဴရဴ ကေုာံခမဳပကတတ်ဂမၠိုၚ်ရ။
ယွံခမဳတအ် ခမဳထေက်ကဵုကော်ပၠုပ်အဗ္ဘာန်ဂှ် ဟွံထေက်ကဵုအာနူဂတ ခမဳပကတတ်ရ၊ ဟွံထေက်ကဵုဂဇအ် နူဂတရ။ သၞာယုတ်ပရေအ်အိုတ် သၞာသတိက်ယုတ်ပရေအ်အိုတ် ဘာယုတ်ပရေအ်အိုတ် သၚ်ဂှ် ဒးကဵုခမဳမထေက်ကဵုကော်ပၠုပ်အဗ္ဘာန်ရ၊ ခမဳဂှ်လေဝ် ဒးသ္ဍိုက်မၠိုက် သၞာ သၞာသတိက် ဘာဂှ်ရ။
ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂှ် သ္ပအာဂတ ခမဳပကတတ်တုဲကီု သ္ပဗွက်ကြဴတုဲကီု ဟွံထေက်ကဵုပြာပ်အာ သ္ၚိဒကာဂမၠိုၚ်ရ။ ဟွံထေက်ကဵုဒဂိုန်ဒ္ဂေတ် ဓုတၚ်အရညိကရ။ ဟွံထေက်ကဵုဒဂိုန်ဒ္ဂေတ် ဓုတၚ်ပိဏ္ဍပါတ်ရ။ “လ္ပကဵုတီကေတ် အဲအိုတ်ညိ” ရဴဝွံ (ပၠုပ်စိုတ်တုဲ) ဟိုတ်နူဟိုတ်မတွံဂး ထေက်ကဵုကော်ပၠုပ်အဗ္ဘာန်ဂှ် ဟွံထေက်ကဵု ကဵုရၚ်တၠုၚ်ပလံၚ် ပိဏ္ဍပါတ်ရ။ ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂှ် နူဘာမၞုံကဵုခမဳ သီုခမဳပကတတ်ဟွံပါ သီုဟွံကဵုအန္တရာယ် ဟွံထေက်ကဵုအာဘာဟွံမွဲကဵုခမဳရ။
ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂှ် နူဘာမၞုံကဵုခမဳ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ မပတမ်ဇြပ်တာန်ဆံၚ်မဟွံမွဲကဵုခမဳရ ။ ပ ။ (ညံၚ်ရဴဂပ်ဝ်တြးတဴ ပ္ဍဲသၟဝ်တေံကီု တုပ်သၟဟ်သာ်ဂှ် ဂပ်ဝ်တြးအိုတ်ရ)။
ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂှ် နူဘာမၞုံကဵုခမဳ ။ ပ ။ ဒးအာရ။ နူမပတမ်ဇြပ်တာန်ဆံၚ် ။ ပ ။ ဒးအာရ။ နူဘာကီု နူမပတမ်ဇြပ်တာန်ဆံၚ်ကီု ။ ပ ။ ဒးအာရ။ ဒးအာ ဘာမၞုံကဵုခမဳရ ။ ပ ။ ဒးအာမပတမ်ဇြပ်တာန်ဆံၚ် မၞုံကဵုခမဳရ ။ ပ ။ တီကေတ်ရဴဝွံမ္ဂး “တ္ၚဲတွံဟေၚ် အာစိုပ်မာန်ရ” မ္ဂး ဒးအာ ဘာကီု မပတမ်ဇြပ်တာန်ဆံၚ်ကီု မၞုံကဵုခမဳသမာနသံဝါသကဂမၠိုၚ်ရ။ ယွံခမဳတအ် ခမဳမထေက်ကဵုကော်ပၠုပ်အဗ္ဘာန်ဂှ် ဟွံထေက်ကဵုပဒတဴမွဲစွံ ကေုာံခမဳပကတတ် ပ္ဍဲဘာမၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ကီုရ၊ ဟွံထေက်ကဵုပဒတဴ ပ္ဍဲဘာကီု ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ကီုရ၊ ညာတ်ခမဳပကတတ်မ္ဂး ဒးကတဵုနူဒၞာဲရ၊ ဒးနိမန် ခမဳပကတတ် သွက်ဂွံက္ညကၠုၚ်ဒၞာဲဂှ်ရ၊ ဟွံထေက်ကဵုဂဇအ်မွဲစွံ ကေုာံ ခမဳပကတတ် ပ္ဍဲမွဲသၞာဓဝ်ရ၊ ခမဳပကတတ် ဂဇအ်ပ္ဍဲသၞာမသဝ်မ္ဂး ဟွံထေက်ကဵုဂဇအ် ပ္ဍဲသၞာမသၠုၚ်ရ၊ ခမဳပကတတ် ဂဇအ်ပ္ဍဲတိမ္ဂး ဟွံထေက်ကဵုကဵုဂဇအ်ပ္ဍဲသၞာရ၊ ဟွံထေက်ကဵုကွာ်စၚ်္ကြမ် ပ္ဍဲမွဲစၚ်္ကြမ်ဓဝ်ရ၊ ခမဳပကတတ် ကွာ်စၚ်္ကြမ် ပ္ဍဲစၚ်္ကြမ်မသဝ်မ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်မသၠုၚ်ရ၊ ခမဳပကတတ် ကွာ်စၚ်္ကြမ် ပ္ဍဲတိမ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ရ။
ယွံခမဳတအ် ခမဳမထေက်ကဵု ကော်ပၠုပ်အဗ္ဘာန်ဂှ် မွဲဟာန်ကေုာံ မဒဂိုန်ဒ္ဂေတ်ပြဝး ။ ပ ။ မွဲဟာန်ကေုာံမထေက်ကဵုတံၚ်ဓဇက်တမ် ။ ပ ။ မွဲဟာန်ကေုာံခမဳ မထေက်ကဵုဒ္ဂေတ်မာနတ် ။ ပ ။ ဟွံထေက်ကဵုပဒတဴမွဲစွံ ကေုာံခမဳဇၞော်မထေက် ကဵုကော်ပၠုပ်အဗ္ဘာန် ပ္ဍဲဘာမၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲဘာကီု ပ္ဍဲမတမ်ဇြပ်တာန်ဆံၚ် မၞုံကဵုကၟဳမွဲဓဝ်ကီုရ၊ ဟွံထေက်ကဵုဂဇအ် ပ္ဍဲမွဲသၞာဓဝ်ရ၊ ဂဇအ်ပ္ဍဲသၞာမသဝ်မ္ဂး ဟွံထေက်ကဵုဂဇအ် ပ္ဍဲသၞာမသၠုၚ်ရ၊ ဂဇအ်ပ္ဍဲတိမ္ဂး ဟွံထေက်ကဵု ဂဇအ်ပ္ဍဲသၞာရ၊ ဟွံထေက်ကဵုကွာ်စၚ်္ကြမ် ပ္ဍဲမွဲစၚ်္ကြမ်ဓဝ်ရ၊ ကွာ်စၚ်္ကြမ် ပ္ဍဲစၚ်္ကြမ်မသဝ်မ္ဂး ဟွံထေက်ကဵုကွာ်စၚ်္ကြမ်မသၠုၚ်ရ၊ ကွာ်စၚ်္ကြမ် ပ္ဍဲတိမ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ရ။
ယွံခမဳတအ် သၚ်မဒှ်မရနုက်ကဵုပန်ဇကုမ္ဂး ခမဳထေက်ကဵုကော်ပၠုပ်အဗ္ဘာန်ဂှ် ယဝ်ကဵုပြဝးမ္ဂး၊ တံၚ်ဓဇက်တမ်မ္ဂး၊ ကဵုမာနတ်မ္ဂး၊ သၚ်မဒှ်မရနုက်ကဵုၜါစှော်ဇကုမ္ဂး ခမဳထေက်ကဵုကော်ပၠုပ်အဗ္ဘာန်ဂှ် ကော်ပၠုပ်အဗ္ဘာန်မ္ဂး၊ ဟွံဒှ်ကမ်ရ၊ သ္ပလေဝ် ဟွံထေက်ကဵုသ္ပရ။ ဣဝွံတုန် ဒ္ဂေတ်ဝတ်ရောၚ် ရဴဝွံ (သ္ဂးရ)။
✤ဒ္ဂေတ်ဝတ်ခမဳထေက်ကဵုကော်ပၠုပ်အဗ္ဘာန် တုဲရ။✤
✵✵✵ ပါရိဝါသိကက္ခန္ဓက ဒုတိယ တုဲရ။ ✵✵✵
ပ္ဍဲခန္ဓကဝွံ ဝတ္ထုဂမၠိုၚ် မၞုံမသုန်အိုတ်ရ။
