ပါရိဝါသိကက္ခန္ဓကဂှ် ဗွဲခမ္ဍန်

ခမဳမဒဂိုန်ဒ္ဂေတ်ပြဝးဂမၠိုၚ် သာယျေန်တဴ ပွမလ္ၚောဝ်ကီု ပွမဒစးဒုၚ်တၠုၚ်တရဴကီု ပွမပၚ်ခၠအ်သၟိပ်တဲကီု ပွမသ္ပရှေ်သှေ်ရဴဂဴကီု ပွမလးကဵုသၞာကီု ပွမလးကဵုသၞာသတိက်ကီု ဍာ်ကြဴဇိုၚ်ကီု ဂတဵုကြာတ်ဇိုၚ်ကီု ကဝေက်ပေါတ်ဇိုၚ်ကီု ပွမဟောဝ်ဂိုၚ်ကေတ်ဗဗေၚ်သ္ၚာကီု ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စးကီု ဒဒက်တဴခမဳပကတတ်ဂမၠိုၚ်အိုတ်ရ၊ ခမဳမသၞေံသၞဴသဳလဂမၠိုၚ် ဂရိုဟ်လေဝ် ဟီုဂရိုဟ်အိုတ်ရ။

ပ္ဍဲအရာဒဂိုန်ဒ္ဂေတ်ပြဝးဂှ် ဒ္ဂေတ်ဝတ် မဂပ်ဝ်ဒ္ဂေတ်ဗွဲမဒးရးရ၊ ပွမအာနူဂတခမဳ ပကတတ်၊ ယြဴသၞာ သၞာသတိက် ဘာမယုတ်ပရေအ်အိုတ်မွဲ နွံရ၊ ဂပ်ဝ်ဒးသာယျေန် မပတမ်ဘာမယုတ်ပရေအ်အိုတ်ရ၊ ပွမသ္ပခမဳ အာဂတပၠဂၠံၚ်တရဴ ပွမသ္ပဗွက်ကြဴတုပ်သၟဟ်သာ်ဂှ်ဟေၚ်―

ပွမဒဂိုန်ဂိုၚ်ကေတ် ဓုတၚ်အရညိက ပွမဒဂိုန်ဂိုၚ်ကေတ် ဓုတၚ်ပိဏ္ဍပါတ် ပွမကဵုရၚ်တၠုၚ်ပလံၚ်ပိဏ္ဍပါတ် ဒှ်ခမဳအာဂန္တုကတုဲ ပွမဟီုလၟိၚ် ပ္ဍဲဇရေၚ်ခမဳအာဂန္တုက ပွမဟီုလၟိၚ် ပ္ဍဲတ္ၚဲဥပေါဟ် ပွမဟီုလၟိၚ် ပ္ဍဲတ္ၚဲပဝါရဏာ ပွမဟီုလၟိၚ် နကလုတ် အာလေဝ် ဒးအာဘာမၞုံကဵုခမဳရ။

ပ္ဍဲဘာမၞုံကဵုကၟဳမွဲဓဝ် အရာမပဒတဴ အရာမဒၠိုက်ကတဵု၊ တုပ်သၟဟ်သာ်ဂှ်ဟေၚ် အရာမဘိက်နိမန် အရာမစပ်ကဵုသၞာ အရာမစပ်ကဵုစၚ်္ကြမ်မသဝ် အရာမစပ်ကဵုတိ အရာမစပ်ကဵု ဘာစၚ်္ကြမ်။

အရာမစပ်ကဵုခမဳဇၞော် အရာမစပ်ကဵုဟွံဒှ်ကမ် ပွမဗတမ်ပိုတ်သကုတ် ပွမသအးဇ္ၚး ပွမဖျေံထောံ ပွမဒဂိုန်ဂိုၚ်ကေတ် ညံၚ်ရဴဒ္ဂေတ်ဝတ် ပ္ဍဲခမဳဒဂိုန်ဒ္ဂေတ်ပြဝးကီု―

ပ္ဍဲခမဳမထေက်ကဵုတံၚ်ဓဇက်တမ်ကီု ပ္ဍဲခမဳမထေက်ကဵုဒ္ဂေတ်မာနတ်ကီု တုပ်သၟဟ်သာ်ဂှ် နယ်မဒးဒ္ဂေတ် ပ္ဍဲခမဳဃောဒ္ဂေတ်မာနတ်ကီု ပ္ဍဲခမဳမထေက်ကဵုကော်ပၠုပ်အဗ္ဘာန်ကီုလေဝ် ဒှ်ရ၊ မွဲလှေ်ပၠန် ဗွဲနယ် တၟေၚ်တၞဟ်ခြာရ။

ပ္ဍဲခမဳမဂိုန်ဒ္ဂေတ်ပြဝးဂမၠိုၚ် ပွမဗတမ်ပိုတ်သကုတ်ပိဂကူ၊ ပ္ဍဲခမဳဃောဒ္ဂေတ် မာနတ်ဂမၠိုၚ် ပွမဗတမ်ပိုတ်သကုတ်ပန်ဂကူ၊ ပ္ဍဲပွမဗတမ်ပိုတ်သကုတ်ဂမၠိုၚ် ဟွံတုပ်သၟဟ်အိုတ်ရ၊ ပ္ဍဲမာနတ်ဂမၠိုၚ် ပွမဒးဟီုလၟိၚ် ရိုဟ်ရိုဟ်တ္ၚဲ (ဇၟာပ်တ္ၚဲ)၊ ကမ်ဂမၠိုၚ်ၜါတုပ်သၟဟ်အိုတ်ရ၊ သှေ်ကမ်ဂမၠိုၚ်ပိဂှ် တုပ်သၟဟ် မွဲပလောပ်ဓဝ်အိုတ်ရ၊ သ္ဂးကၠုၚ်တုဲဝွံတုန် ဗွဲခမ္ဍန်ရ။

☀︎☀︎☀︎ပါရိဝါသိကက္ခန္ဓကတုဲရ☀︎☀︎☀︎