၂.၄။ ဒ္ဂေတ်ဝတ် ခမဳဃောဒ္ဂေတ်မာနတ်
၉၀။ ပ္ဍဲအခိၚ်ဂှ် ခမဳဃောဒ္ဂေတ်မာနတ်ဂမၠိုၚ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမသ္ပရှေ်သှေ်ရဴဂဴ ပွမလးကဵုသၞာ ပွမလးကဵုသၞာသတိတ် ပွမစွံပတန်ဍာ်ကြဴဇိုၚ် ပွမစွံပတန်ဂတဵုကြာတ်ဇိုၚ် ကေုာံကဝေတ်ပေါတ်ဇိုၚ် ပွမဟောဝ်ဂိုၚ်ကေတ် ဗဗေၚ်သ္ၚာ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရ။
ခမဳပၟိက်အောန်ဂမၠိုၚ်ဂှ် “ခမဳဃောဒ္ဂေတ်မာနတ်ဂမၠိုၚ် မုဟိုတ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲ―
“ယွံခမဳတအ် ခမဳဃောဒ္ဂေတ်မာနတ်ဂမၠိုၚ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုန်ဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် ဟွံထေက်ရ ။ ပ ။ ယွံခမဳတအ် ခမဳဃောဒ္ဂေတ်မာနတ်ဂမၠိုၚ် မုဟိုတ် သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ် အိုတ်ရော?။
ယွံခမဳတအ် (ပွခမဳဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် ဟဂပ်ဝ်သာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမသ္ပရှေ်သှေ်ရဴဂဴ ပွမလးကဵုသၞာ ပွမလးကဵုသၞာသတိက် ပွမစွံပတန်ဍာ်ကြဴဇိုၚ် ပွမစွံပတန်ဂတဵုကြာတ်ဇိုၚ် ကေုာံကဝေက်ပေါတ်ဇိုၚ် ပွမဟောဝ်ဂိုၚ်ကေတ်ဗဗေၚ်သ္ၚာ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ဂမၠိုၚ်ရ၊ ကုခမဳ မသာယျေန်ဂှ် ဒးအာပတ်ဒုက္ကဋ်ရ။
ယွံခမဳတအ် ကုခမဳဃောဒ္ဂေတ်မာနတ်ဂမၠိုၚ် ရၚ်သကအ် အတိုၚ်လၟေၚ်ညးဇၞော်ကဵုအခေါၚ် ပွမသာယျေန်တဴ ပွမလ္ၚောဝ် ပွမဒစးဒုၚ်တၠုၚ်တရဴ ။ ပ ။ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စးဂမၠိုၚ်ရ။
ယွံခမဳတအ် ကုခမဳဃောဒ္ဂေတ်မာနတ်ဂမၠိုၚ် အတိုၚ်လၟေၚ်ညးဇၞော် ပွမသ္ပဥပေါသ်ကီု ပွမသ္ပပဝါရဏာကီု ပွမဒုၚ်ဂိုၚ်ကေတ်သ္ၚာသၞုက်ဗြဲကီု ပွမသၠးဝတ်ပိဏ္ဍပါတ်ကီု ဘတ် (မပတမ်သံဃဘတ်ကီု) ကဵုအခေါၚ် မသုန်ပြကာဝွံရ။
ယွံခမဳတအ် ဒှ်သာ်ဂှ်မ္ဂး ပညပ်တဴ ဒ္ဂေတ်ဝတ်ကုခမဳဃောဒ္ဂေတ်မာနတ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳဃောဒ္ဂေတ်မာနတ်ဂမၠိုၚ် ဒးဒ္ဂေတ်ရ။
၉၁။ ယွံခမဳတအ် ခမဳဃောဒ္ဂေတ်မာနတ်ဂှ် ဒးဒ္ဂေတ်ဗွဲမဒးရးရ။ ကြက်သ္ဂးဂတဝွံတုန် ပ္ဍဲအရာမဒ္ဂေတ်ဂှ် ဒ္ဂေတ်ဝတ်မဒးဒ္ဂေတ်သ္ပဗွဲမဒးရးရောၚ်။
(သ္ပအ္စာဥပဇ္ၛာယ်တုဲ) ဟဂပ်ဝ်ပကဵုပယျၚ်ရ၊ ဟဂပ်ဝ်ကဵုနိဿယရ၊ ဟဂပ်ဝ်ကဵုသာမဏဳကၠောန်ၜိုန်ရ၊ ဟဂပ်ဝ်သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ၜိုန်ဂွံဒုၚ်သၟိတ်လေဝ် ဟဂပ်ဝ်ကဵုဩဝါဒကဵုခမဳဗြဴဂမၠိုၚ်ရ၊ ဟွံထေက်ကဵုအာစိုပ်အာပတ်သၚ် ထေက်ကဵုတံၚ်ဓဇက်တမ်ရ၊ အာပတ်သအာၚ် တၠုၚ်လအာတုပ်ကဵုဂှ်ကီု အာပတ်ယုတ်မာ ကြံၚ်မ္ၚိုဟ်လောန်လတူဂှ်ကီု ဟွံထေက်ကဵုအာစိုပ်ရ၊ ဟွံထေက်ကဵုဟီုဓရိုဟ်ကမ်ရ၊ ဟွံထေက်ကဵုဟီုဓရိုဟ် ခမဳသ္ပကမ်ဂမၠိုၚ်ရ၊ ဟွံထေက်ကဵုတန်ဒေါံဥပေါသ်ခမဳပကတတ်ရ၊ ဟွံထေက်ကဵုတန်ဒေါံ ပဝါရဏာရ၊ ဟဂပ်ဝ်သ္ပ ပွမဒၠေံဗတောန်ရ၊ ဟွံထေက်ကဵုဂိုၚ်ကေတ် အရာဇၞော်သကိုပ်သကရ၊ ဟွံထေက်ကဵုအာတ်အခေါၚ်ရ၊ ဟွံထေက်ကဵု စောဒနာရ၊ ဟွံထေက်ကဵု ကဵုဗှ်ဗၞုဟ်ရ၊ ဟွံထေက်ကဵုစိုန်သကီုနှဴရဴ ကေုာံခမဳပကတတ်ဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် ဟွံထေက်ကဵုအာနူဂတ ခမဳပကတတ်ရ၊ ဟွံထေက်ကဵုဂဇအ် နူဂတရ။ သၞာယုတ်ပရေအ်အိုတ် သၞာသတိက်ယုက်ပရေအ်အိုတ် ဘာယုတ်ပရေအ်အိုတ် သၚ်ဂှ် ဒးကဵုကုခမဳဃောဒ္ဂေတ်မာနတ်ရ၊ ခမဳဂှ်လေဝ် ဒးသ္ဍိုက်မၠိုက်သၞာ သၞာသတိတ် ဘာဂှ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် သ္ပအာဂတ ခမဳပကတတ်တုဲကီု သ္ပဗွက်ကြဴတုဲကီု ဟွံထေက်ကဵုပြာပ်အာ သ္ၚိဒကာဂမၠိုၚ်ရ။ ဟွံထေက်ကဵုဒဂိုန်ဒ္ဂေတ် ဓုတၚ်အရညိကရ။ ဟွံထေက်ကဵုဒဂိုန်ဒ္ဂေတ် ဓုတၚ်ပိဏ္ဍပါတ်ရ။ “လ္ပကဵုတီကေတ် အဲအိုတ်ညိ” ရဴဝွံ (ပၠုပ်စိုတ်တုဲ) ဟိုတ်နူဟိုတ်မတွံဂး ပွဃောဒ္ဂေတ်မာနတ်ဂှ် ဟွံထေက်ကဵု ကဵုရၚ်တၠုၚ်ပလံၚ် ပိဏ္ဍပါတ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် ဒှ် (ညးကွာ်တရဴ) ကၟုဲအာဂန္တုတုဲလေဝ် ဒးဟီုလၟိၚ်ရ၊ (ဒှ်အာဝါသိကတုဲလေဝ်) ဒးဟီုလၟိုၚ် ကုခမဳအာဂန္တုကရ၊ ပ္ဍဲတ္ၚဲဥပေါဟ် ဒးဟီုလၟိၚ်ရ၊ ပ္ဍဲတ္ၚဲ ပဝါရဏာ ဒးဟီုလၟိၚ်ရ၊ ရိုဟ်ရိုဟ်တ္ၚဲ (ဇၟာပ်တ္ၚဲ) ဒးဟီုလၟိၚ်ရ၊ ဒှ်ညးဂိယဲမ္ဂး နကလုတ်လေဝ် ဒးဟီုလၟိၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာမၞုံကဵုခမဳ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာဘာဟွံမွဲကဵုခမဳရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာမၞုံကဵုခမဳ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ မပတမ်ဇြပ်တာန်ဆံၚ်မဟွံမွဲကဵုခမဳရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာမၞုံကဵုခမဳ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တာန်ဆံၚ်ကီု မဟွံမွဲကဵုခမဳရ။
ယွံခမဳတအ် ခမဳဃောဒ္ဂေတ်မာနတ်ဂှ် နူမပတမ်ဇြပ်တာန်ဆံၚ်မၞုံကဵုခမဳ ။ ပ ။ ဟွံထေက်ကဵုအာ ဘာမဟွံမွဲကဵုခမဳရ။ ။ ပ ။ ဟွံထေက်ကဵုအာ မပတမ်ဇြပ်တာန်ဆံၚ် မဟွံမွဲကဵုခမဳရ။သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တာန်ဆံၚ်ကီု မဟွံမွဲကဵုခမဳရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာကီု နူမပတမ်ဇြပ်တာန်ဆံၚ်ကီု မၞုံကဵုခမဳ ။ ပ ။ ဟွံထေက်ကဵုအာဘာမဟွံမွဲကဵုခမဳရ။ ။ ပ ။ ဟွံထေက်ကဵုအာ မပတမ်ဇြပ်တာန်ဆံၚ်မဟွံမွဲကဵုခမဳရ။ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တာန်ဆံၚ်ကီု မဟွံမွဲကဵုခမဳရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာမၞုံကဵုခမဳပကတတ် ။ ပ ။ ဟွံထေက်ကဵုအာဘာ မၞုံကဵုခမဳနာနာသံဝါသကဂမၠိုၚ်ရ။ ။ ပ ။ ဟွံထေက်ကဵုအာ မပတမ်ဇြပ်တာန်ဆံၚ် မၞုံကဵုခမဳနာနာသံဝါသကဂမၠိုၚ်ရ။ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တာန်ဆံၚ်ကီု မၞုံကဵုခမဳနာနာသံဝါသကဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် နူမပတမ်ဂှ် နူမပတမ်ဇြပ်တာန်ဆံၚ် မၞုံကဵုခမဳပကတတ် ။ ပ ။ ဟွံထေက်ကဵုအာဘာ မၞုံကဵုနာနာသံဝါသကဂမၠိုၚ်ရ။
။ ပ ။ ဟွံထေက်ကဵုအာ မပတမ်ဇြပ်တာန်ဆံၚ် မၞုံကဵုခမဳနာနာသံဝါသကဂမၠိုၚ်ရ။ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တန်ဆံၚ်ကီု မၞုံကဵုနာနာသံဝါသကဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာကီု နူမပတမ်ဇြပ်တာန်ဆံၚ်ကီု မၞုံကဵုခမဳပကတတ် ။ ပ ။ ဟွံထေက် ကဵုအာဘာ မၞုံကဵုခမဳနာနာသံဝါသကဂမၠိုၚ်ရ။
။ ပ ။ ဟွံထေက်ကဵုအာ မပတမ်ဇြပ်တာန်ဆံၚ် မၞုံကဵုခမဳနာနာသံဝါသကဂမၠိုၚ်ရ။ သီုခမဳပကတတ်ဟွံပါ သီုဟွံမွဲကဵုအန္တရာယ် ဟွံထေက်ကဵုအာ ဘာကီု မပတမ်ဇြပ်တာန်ဆံၚ်ကီု မၞုံကဵုခမဳနာနာသံဝါသကဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာမၞုံကဵုခမဳ ဒးအာဘာမၞုံကဵုခမဳရ ။ ပ ။ ဒးအာ မပတမ်ဇြပ်တာန်ဆံၚ် မၞုံကဵုခမဳရ ။ ပ ။ တီကေတ်ရဴဝွံမ္ဂး “တ္ၚဲဝွံဟေၚ် အာစိုပ်မာန်ရ” မ္ဂး ဒးအာဘာကီု မပတမ်ဇြပ်တာန်ဆံၚ်ကီု မၞုံကဵုခမဳသမာနသံဝါသကဂမၠိုၚ်ရ။ ယွံခမဳတအ် ခမဳဃောဒ္ဂေတ်မာနတ်ဂှ် နူမပတမ်ဇြပ်တာန်ဆံၚ် မၞုံကဵုခမဳဒးအာဘာ မၞုံကဵုခမဳရ ။ ပ ။ ဒးအာမပတမ်ဇြပ်တာန်ဆံၚ် မၞုံကဵုခမဳရ ။ ပ ။ တီကေတ်ရဴဝွံမ္ဂး “တ္ၚဲဝွံဟေၚ် အာစိုပ်မာန်ရ” မ္ဂး ဒးအာဘာကီု မပတမ်ဇြပ်တာန်ဆံၚ်ကီု မၞုံကဵုခမဳသမာနသံဝါသကဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် နူဘာကီု နူမပတမ်ဇြပ်တာန်ဆံၚ်ကီု မၞုံကဵုခမဳ ဒးအာဘာမၞုံကဵုခမဳ ။ ပ ။ ဒးအာမပတမ်ဇြပ်တာန်ဆံၚ် မၞုံကဵုခမဳရ ။ ပ ။ တီကေတ်ရဴဝွံမ္ဂး “တ္ၚဲဝွံဟေၚ် အာစိုပ်မာန်ရ” မ္ဂး ဒးအာဘာကီု မပတမ်ဇြပ်တာန်ဆံၚ်ကီု မၞုံကဵုခမဳသမာနသံဝါသကဂမၠိုၚ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် ဟွံထေက်ကဵုပဒတဴမွဲစွံ ကေုာံခမဳပကတတ် ပ္ဍဲဘာမၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲဘာကီု ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ကီုရ၊ ညာတ်ခမဳပကတတ်မ္ဂး ဒးကတဵုနူဒၞာဲရ၊ ဒးနိမန် ခမဳပကတတ် သွက်ဂွံက္ညကၠုၚ်ဒၞာဲဂှ်ရ၊ ဟွံထေက်ကဵုဂဇအ်မွဲစွံ ကေုာံ ခမဳပကတတ် ပ္ဍဲမွဲသၞာဓဝ်ရ၊ ခမဳပကတတ် ဂဇအ်ပ္ဍဲသၞာမသဝ်မ္ဂး ဟွံထေက်ကဵုဂဇအ် ပ္ဍဲသၞာမသၠုၚ်ရ၊ ခမဳပကတတ် ဂဇအ်ပ္ဍဲတိမ္ဂး ဟွံထေက်ကဵုဂဇအ်ပ္ဍဲသၞာရ၊ ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ဓဝ်ရ၊ ခမဳပကတတ် ကွာ်စၚ်္ကြမ် ပ္ဍဲစၚ်္ကြမ်မသဝ်မ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်မသၠုၚ်ရ၊ ခမဳပကတတ် ကွာ်စၚ်္ကြမ် ပ္ဍဲတိမ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ရ။
ယွံခမဳတအ် ခမဳဃောဒ္ဂေတ်မာနတ်ဂှ် မွဲဟာန်ကေုာံမဒဂိုန်ဒ္ဂေတ်ပြဝး ။ ပ ။ မွဲဟာန်ကေုာံ မထေက်ကဵုတံၚ်ဓဇက်တမ် ။ ပ ။ မွဲဟာန်ကေုာံခမဳ မထေက်ကဵုဒ္ဂေတ်မာနတ် ။ ပ ။ မွဲဟာန်ကေုာံခမဳဇၞော် ဃောဒ္ဂေတ်မာနတ် ။ ပ ။ ဟွံထေက်ကဵုပဒတဴမွဲစွံ ကေုာံခမဳမထေက်ကဵု ကော်ပၠုပ်အဗ္ဘာန် ပ္ဍဲဘာမၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲဘာကီု ပ္ဍဲဘာကီု ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ကီုရ၊ ဟွံထေက်ကဵုဂဇအ် ပ္ဍဲမွဲသၞာဓဝ်ရ၊ ဂဇအ်ပ္ဍဲသၞာမသဝ်မ္ဂး ဟွံထေက်ကဵုဂဇအ် ပ္ဍဲသၞာမသၠုၚ်ရ၊ ခမဳပကတတ် ဂဇအ်ပ္ဍဲတိမ္ဂး ဟွံထေက်ကဵုဂဇအ်ပ္ဍဲသၞာရ၊ ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ဓဝ်ရ၊ ခမဳပကတတ် ကွာ်စၚ်္ကြမ် ပ္ဍဲစၚ်္ကြမ်မသဝ်မ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်မသၠုၚ်ရ၊ ခမဳပကတတ် ကွာ်စၚ်္ကြမ် ပ္ဍဲတိမ္ဂး ဟွံထေက်ကဵုကွာ်စၚ်္ကြမ် ပ္ဍဲစၚ်္ကြမ်ရ။
ယွံခမဳတအ် သၚ်မဒှ်မရနုက်ကဵုပန်ဇကုမ္ဂး ခမဳဃောဒ္ဂေတ်မာနတ်ဂှ် ‘ခမဳဃောဒ္ဂေတ်မာနတ်ပါမှ ပေၚ်ပန်ဇကု’ ဂှ် ယဝ်ကဵုပြဝးမ္ဂး၊ တံၚ်ဓဇက်တမ်မ္ဂး၊ ကဵုမာနတ်မ္ဂး သၚ်မဒှ်မရနုက်ကဵုၜါစှော်ဇကုမ္ဂး ခမဳဃောဒ္ဂေတ်မာနတ် ‘ခမဳဃောဒ္ဂေတ်မာနပါမှ ပေၚ်ၜါစှော်ဇကု’ ဂှ် ကော်ပၠုပ်အဗ္ဘာန်မ္ဂး၊ ဟွံဒှ်ကမ်ရ၊ သ္ပလေဝ် ဟွံထေက်ကဵုသ္ပရ။ ဣဝွံတုန်ဒ္ဂေတ်ဝတ်ရောၚ် ရဴဝွံ (သ္ဂးရ)။
၉၂။ ပ္ဍဲအခိၚ်ဂှ် တဳလပိုဉ်ဥပါလိ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚေဝ်သ္ပဝတ်တုဲ သီုမဂဇအ်ဒၟံၚ်ပ္ဍဲဒၞာဲမွဲဂှ်―
“ယွံတဳလမၞုံပိုဉ် ကုခမဳဃောဒ္ဂေတ်မာနတ်ဂှ် ပွမဗတမ်ပိုတ်သကုတ်ဂမၠိုၚ် မၞုံဗၞတ်မုစိအိုတ်ရော?” ရဴဝွံ ဂရၚ်ပတီရ။ ယွံဥပါလိ ကုခမဳဃောဒ္ဂေတ်မာနတ်ဂှ် ပွမဗတမ်ပိုတ်သကုတ်ဂမၠိုၚ် မၞုံပန်ဂကူအိုတ်ရ၊ ပွမပဒတဴ ကေုာံခမဳပကတတ်မွဲစွံကီု စာ်စ္ဍဲးကေုာံခမဳပကတတ်တုဲ ပွမပဒတဴကီု ပွမဟွံဟီုလၟိၚ်ဂရၚ်ပတီ မာနတ်ကီု ပွမဒ္ဂေတ်နမဟီုလၟိၚ်မာနတ် ပ္ဍဲဂိုဏ်မယုတ်ဒေက် ‘သၚ်ဟွံပေၚ်’ ကီု၊ ယွံဥပါလိ ကုခမဳဃောဒ္ဂေတ်မာနတ်ဂှ် ပွမဗတမ်ပိုတ်သကုတ်ဂမၠိုၚ် မၞုံပန်ဂကူအိုတ်ရ ရဴဝွံ (သ္ဂးရ)။
၉၃။ ပ္ဍဲအခိၚ်ဂှ် ခမဳသၚ်မဂၠိုၚ်ဂၠၚ် ကောံဓရီုပဒတဴဒၟံၚ် ပ္ဍဲဍုၚ်သာရဝှ်ရ၊ ခမဳဃောဒ္ဂေတ်မာနတ်ဂမၠိုၚ် ဟွံသၟဟ်ရထ သွက်ဂွံသအးဇ္ၚး မာနတ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် သွက်ဂွံဖျေံထောံမာနတ်ရ။
ယွံခမဳတအ် ရဴဝွံ ဒးဖျေံကၠေံရ။ ခမဳဃောဒ္ဂေတ်မာနတ်ဂှ် ပြာပ်အာဇရေၚ် ခမဳမွဲဇကုတုဲ လၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး ဂဇအ်ဒၟံၚ်ဗွဲလံက်ဂဇုန်တုဲ သီုမပၚ်ပတိုန် ခၠအ်သၟပ်တဲဂှ်―
“ဖျေံထောံ မာနတ်ရ” ရဴဝွံ ဒးသ္ဂးရ၊ (သ္ဂးရဴဝွံမ္ဂး) ဒှ်ဖျေံထောံ မာနတ်ရ။ “ဖျေံထောံဝတ်ရ” ရဴဝွံ ဒးသ္ဂးရ၊ (သ္ဂးရဴဝွံမ္ဂး) ဒှ်ဖျေံထောံဝတ်ရ။
၉၄။ ပ္ဍဲအခိၚ်ဂှ် နူဍုၚ်သာရဝှ် ခမဳဂမၠိုၚ် စ္ဍးအာဌာန်ဂှ်ဂှ်အိုတ်ရ၊ ခမဳဃောဒ္ဂေတ်မာနတ်ဂမၠိုၚ် သၟဟ်ရထ သွက်ဂွံသအးဇ္ၚးမာနတ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် သွက်ဂွံဒဂိုန်ဂိုၚ်ကေတ် မာနတ်ရ။
ယွံခမဳတအ် ရဴဝွံ ဒးဒဂိုန်ဂိုၚ်ကေတ်ရ၊ ခမဳဃောဒ္ဂေတ်မာနတ်ဂှ် ပြာပ်အာဇရေၚ် ခမဳမွဲဇကုတုဲ လၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး ဂဇအ်ဒၟံၚ်ဗွဲလံက်ဂဇုန်တုဲ သီုမပၚ်ပတိုန် ခၠအ်သၟိတ်တဲဂှ်―
“ဒဂိုန်ဂိုၚ်ကေတ် မာနတ်ရ” ရဴဝွံ ဒးသ္ဂးရ၊ (သ္ဂးရဴဝွံမ္ဂး) ဒှ်ဒဂိုန်ဂိုၚ်ကေတ်မာနတ်ရ။ “ဒဂိုန်ဂိုၚ်ကေတ် ဝတ်ရ” ရဴဝွံ ဒးသ္ဂးရ၊ (သ္ဂးရဴဝွံမ္ဂး) ဒှ်ဒဂိုန်ဂိုၚ်ကေတ်ဝတ်ရ။
✤ဒ္ဂေတ်ဝတ်ခမဳဃောဒ္ဂေတ်မာနတ်ဂမၠိုၚ်တုဲရ✤
