၁၀.၁.၃။ ကဵုအခေါၚ် ဘိက္ခုနဳဥပသမ္ပဒါ

၄၀၄။ ပ္ဍဲအခိၚ်ဂှ် မဟာပဇာပတိဂေါတမဳ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဒတူဒၟံၚ်ဒၞာဲမွဲတုဲ—

“ယွံတဳလမၞုံပိုဉ် စပ်ကဵုကောန်သၟိၚ်ဗြဴသကျဝၚ်ဂမၠိုၚ်တုဲ အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီရ။

ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုမဟာပဇာပတိဂေါတမဳ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာကဵုမြဟ်မြာရ။ ကြဴနူဂှ် မဟာပဇာပတိဂေါတမဳဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှေ်သှေ်ရဴဂဴကၠာ ပါဲစ္ဍးအာရ။

ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး—

“ယွံခမဳတအ် ကဵုအခေါၚ် ခမဳတြုံဂမၠိုၚ် သွက်ဂွံပပယျၚ်ကဵု ခမဳဗြဴဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။

ပ္ဍဲအခိၚ်ဂှ် ခမဳဗြဴဂမၠိုၚ်ဂှ်—

“နာဲဗြဴဂှ် ဟွံဒှ်ပယျၚ်ဏီရ၊ ပိုဲညးဂမၠိုၚ်ဟေၚ် ဒှ်ပယျၚ်အိုတ်ရ၊ ခမဳတြုံဂမၠိုၚ်ဂှ် ဒးပပယျၚ်ကဵု ခမဳဗြဴဂမၠိုၚ်ရ ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံ သ္ဂးကဵုမဟာပဇာပတိဂေါတမဳရ။

ပ္ဍဲအခိၚ်ဂှ် မဟာပဇာပတိဂေါတမဳ ပြာပ်အာဇရေၚ် တဳလပိုဉ်အာနန္ဒတုဲ လ္ၚောဝ်သ္ပဝတ်တုဲမ္ဂး သီုဒတူဒၟံၚ်ဒၞာဲမွဲဂှ်—

“ယွံပိုဉ်အာနန္ဒ ခမဳဗြဴဂမၠိုၚ်ဝွံ ‘နာဲဗြဴဂှ် ဟွံဒှ်ပယျၚ်ဏီရ၊ ပိုဲညးဂမၠိုၚ်ဟေၚ် ဒှ်ပယျၚ်အိုတ်ရ၊ ခမဳတြုံဂမၠိုၚ်ဂှ် ဒးပပယျၚ်ကဵု ခမဳဗြဴဂမၠိုၚ်ရ’ ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ” ရဴဝွံ သ္ဂးကဵုအဲဍိက်အိုတ်ရ။

ပ္ဍဲအခိၚ်ဂှ် တဳလပိုဉ်အာနန္ဒ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သီုမဂဇအ်ဒၟံၚ်ဒၞာဲမွဲဂှ်—

“ယွံတဳလမၞုံပိုဉ် မဟာပဇာပတိဂေါတမဳဂှ် ယွံပိုဉ်အာနန္ဒ မဳဗြဴဂမၠိုၚ်ဝွံ ‘နာဲဗြဴဂှ် ဟွံဒှ်ပယျၚ်ဏီရ၊ ပိုဲညးဂမၠိုၚ်ဟေၚ် ဒှ်ပယျၚ်အိုတ်ရ၊ ခမဳတြုံဂမၠိုၚ်ဂှ် ဒးပပယျၚ်ကဵု ခမဳဗြဴဂမၠိုၚ်ရ’ ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ” ရဴဝွံ ဂရၚ်ပတီရ။

ယွံအနန္ဒ မဟာပဇာပတိဂေါတမဳဂှ် သ္ပတမ်နူတ္ၚဲ ဒုၚ်ဝန် ဂရုဓရ်ဂမၠိုၚ်ဒ္စါံသာ်တုဲ ပွမဒုၚ်ဝန်ဂှ်ဟေၚ် ဒှ်ပယျၚ်တုဲအာရ ရဴဝွံ (သ္ဂးရ)။

၄၀၅။ ကြဴနူဂှ် မဟာပဇာပတိဂေါတမဳ ပြာပ်အာဇရေၚ် တဳလပိုဉ်အာနန္ဒတုဲ လ္ၚောဝ်သ္ပဝတ် တဳလပိုဉ်အာနန္ဒတုဲမ္ဂး သီုဒတူဒၟံၚ်ဒၞာဲမွဲဂှ်—

“ယွံပိုဉ်အာနန္ဒ အဲဍိက် အာတ်လာဘ် ကုတဳလမၞုံပိုဉ်ကျာ်တြဲမွဲရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ကဵုအခေါၚ် ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ အတိုၚ်လၟေၚ်ညးဇၞော် ကုခမဳတြုံဂမၠိုၚ်ကီု ကုခမဳဗြဴဂမၠိုၚ်ကီုမ္ဂး ခိုဟ်သန်ရ” ရဴဝွံ ဂရၚ်ပတီရ။

ပ္ဍဲအခိၚ်ဂှ် တဳလပိုဉ်အာနန္ဒ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သီုမဂဇအ်ဒၟံၚ်ဒၞာဲမွဲဂှ်—

“ယွံတဳလမၞုံပိုဉ် မဟာပဇာပတိဂေါတမဳဂှ် ယွံပိုဉ်အာနန္ဒ အဲဍိက် အာတ်လာဘ် ကုတဳလမၞုံပိုဉ်ကျာ်တြဲမွဲရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲ ကဵုအခေါၚ် ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ အတိုၚ်လၟေၚ်ညးဇၞော် ကုခမဳတြုံဂမၠိုၚ်ကီု ကုခမဳဗြဴဂမၠိုၚ်ကီုမ္ဂး ခိုဟ်သန်ရ ရဴဝွံ ဂရၚ်ပတီရ” ဂှ် ဂရၚ်ပတီရ။

ယွံအာနန္ဒ ဟိုတ်အခေါၚ်အရာ မကဵုအခေါၚ် ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ ကုမာတုဂါမ်ဂမၠိုၚ် ဟွံမွဲရ။

ယွံအာနန္ဒ တဳဂမၠိုၚ် မၞုံကဵုကွေတ်မသအာၚ်နူသာသနာ မၞုံကဵုဓရ်မဂပ်ဝ်တွံလဝ် ဗွဲဟွံဒးရးဝွံလေဝ် ဟွံသ္ပပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှ်ေသှ်ေရဴဂဴကုမာတုဂါမ် ဂမၠိုၚ်အိုတ်ဏီရ။

ကျာ်တြဲဂှ် သာ်လဵုဂွံကဵုအခေါၚ် ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ ကုမာတုဂါမ်ဂမၠိုၚ်မာန်ရော?” ရဴဝွံ (သ္ဂးရ)။

ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး—

“ယွံခမဳတအ် ဟဂပ်ဝ်သ္ပ ပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ ကုမာတုဂါမ်ရ၊ ကုခမဳမသ္ပဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။

ပ္ဍဲအခိၚ်ဂှ် မဟာပဇာပတိဂေါတမဳ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သီုမဒတူဒၟံၚ်ဒၞာဲမွဲဂှ်—

“ယွံတဳလမၞုံပိုဉ်ကျာ်တြဲ ယြဴသိက္ခာပိုဉ်ခမဳဗြဴတအ်ဂမၠိုၚ် ဆက်ဆောံကေုာံခမဳတြုံဂမၠိုၚ်အိုတ်ရ၊ စပ်ကဵု သိက္ခာပိုဒ်ဂမၠိုၚ်ဂှ်တုဲ ပိုဲဍိက်တအ်ညးဂမၠိုၚ် ပသာ်ဂွံဒ္ဂေတ်သ္ပအိုတ်ရော?” ရဴဝွံ ဂရၚ်ပတီရ။

ယွံဂေါတမဳ ယြဴသိက္ခာပိုဒ်ခမဳဗြဴတအ်ဂမၠိုၚ် ဆက်ဆောမ်ကေုာံခမဳတြုံဂမၠိုၚ်အိုတ်ရ၊ စပ်ကဵုသိက္ခာပိုဒ်ဂမၠိုၚ်ဂှ်တုဲ ညံၚ်ရဴခမဳတြုံဂမၠိုၚ်ဒ္ဂေတ်ကီု ဩဝ်ဒ္ဂေတ်အိုတ်ညိ ရဴဝွံ (သ္ဂးရ)။

ယွံတဳလမၞုံပိုဉ် ယြဴသိက္ခာပိုဒ်ခမဳဗြဴဂမၠိုၚ် ဟွံဆက်ဆောမ်ကေုာံခမဳတြုံဂမၠိုၚ်အိုတ်ရ၊ စပ်ကဵုသိက္ခာပိုဒ်ဂမၠိုၚ်ဂှ်တုဲ ပိုဲဍိက်တအ်ညးဂမၠိုၚ် ပသာ်ဂွံဒ္ဂေတ်သ္ပအိုတ်ရော?” ရဴဝွံ ဂရၚ်ပတီရ။ ယွံဂေါတမဳ ယြဴသိက္ခာပိုဒ်ခမဳဗြဴတအ်ဂမၠိုၚ် ဆက်ဆောမ်ကေုာံခမဳတြုံဂမၠိုၚ်အိုတ်ရ၊ စပ်ကဵုသိက္ခာပိုဒ်ဂမၠိုၚ်ဂှ်တုဲ အတိုၚ်ပညပ်လဝ်ဂှ် ဩဝ်ဒ္ဂေတ်အိုတ်ညိ ရဴဝွံ (သ္ဂးရ)။

၄၀၆။ ပ္ဍဲအခိၚ်ဂှ် မဟာပဇာပတိဂေါတမဳ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သီုမဒတူဒၟံၚ်ဒၞာဲမွဲဂှ်—

“အာတ်ပါန်အခေါၚ်ရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် ဩဝ်တွံဓရ်ကုအဲဍိက်ဗွဲခမ္ဍန်ညိ၊ အဲဍိက်ဂွံမိၚ်ကေတ်ဓရ် တဳလမၞုံပိုဉ်ကျာ်တြဲဂှ်တုဲ ညးမွဲဓဝ် ပြာပ်အာဌာန်လ္ၚုတုဲ သီုဟွံဟိုတ်မာဲ ပတိတ်ဇြဟတ်တုဲ ဗလးဏာစိုတ်တုဲ မိက်ဂွံပဒတဴရ” ရဴဝွံ ဂရၚ်ပတီရ။

ယွံဂေါတမဳ တၠအဲဂှ် ယြဴဓရ်ဂမၠိုၚ် ဓရ်ဂမၠိုၚ်ဂှ် ဒှ်တဴ တၞဟ်နစောဲလာံအိုတ်ရ၊ ဟွံဒှ်တဴ တၞဟ်နစာ်စ္ဍး နူပွမစောဲလာံအိုတ်ရ၊ ဒှ်အဴ သွက်ဂွံစိုန်သကီု ပ္ဍဲဝဋ်ဟေၚ်အိုတ်ရ၊ ဟွံဒှ်တဴ သွက်ဟွံစိုန်သကီု ပ္ဍဲဝဋ်အိုတ်ရ၊ ဒှ်တဴ သွက် (ကိလေသ) ဂွံဇၞော်မောဝ်ဟေၚ်အိုတ်ရ၊ ဟွံဒှ်တဴ သွက်ဂွံပလီုပလာ်ကၠောံအိုတ်ရ၊ ဒှ်တဴ သွက်ပၟိက်ဂွံဇၞော်ဟေၚ်အိုတ်ရ၊ ဟွံဒှ်တဴ သွက်ပၟိက်အောန်အိုတ်ရ၊ ဒှ်တဴ သွက်ဟွံတရိုပ်ကဵုစိုတ်ဟေၚ်အိုတ်ရ၊ ဟွံဒှ်တဴ သွက်ဂွံတရိုပ်ကဵုစိုတ်အိုတ်ရ၊ ဒှ်တဴ သွက်ဂွံမံၚ်ကေုာံသကအ်ပွံၚ်ဟေၚ်အိုတ်ရ၊ ဟွံဒှ်တဴ သွက်ဂွံသ္ၚိတ်ဇြအိုတ်ရ၊ ဒှ်တဴ သွက်ဂွံလၞုဟ်ဟေၚ်အိုတ်ရ၊ ဟွံဒှ်တဴ သွက်ဂွံလွဳပရာပတိတ်ဇြဟတ်အိုတ်ရ၊ ဒှ်တဴ သွက်ဂွံမြိမြန်ဝါတ်ဂါတ်ဟေၚ်အိုတ်ရ၊ ဟွံဒှ်တဴ သွက်ဂွံမြိမြန်လောဲသွာအိုတ်ရ” ရဴဝွံ ယဝ်တီမ္ဂး၊ ယွံဂေါတမဳ ဓရ်တအ်ဂှ် ဗွဲစၟတ်မ္ဂး “ဣဝွံဂှ် ဓရ်ဟွံသေၚ်၊ ဣဝွံဂှ် ဝိနယ်ဟွံသေၚ်၊ ဣဝွံဂှ် ဒၠောံဗတောန်ကျာ်ဟွံသေၚ်” ရဴဝွံ သမ္တီညိ။

ယွံဂေါတမဳ တၠအဲဂှ် ယြဴဓရ်ဂမၠိုၚ် ဓရ်ဂမၠိုၚ်ဝွံဂှ် ဒှ်တဴ တၞဟ်နစာ်စ္ဍးစောဲလာံအိုတ်ရ၊ ဟွံဒှ်တဴ တၞဟ်နစောဲလာံအိုတ်ရ၊ ဒှ်တဴ သွက်ဟွံစိုန်သကီု ပ္ဍဲဝဋ်ဟေၚ်အိုတ်ရ၊ ဟွံဒှ်တဴ သွက်ဂွံစိုန်သကီု ပ္ဍဲဝဋ်အိုတ်ရ၊ ဒှ်တဴ သွက်ဂွံပလီုပလာ် (ကိလေသ) ဟေၚ်အိုတ်ရ၊ ဟွံဒှ်တဴ သွက်ဂွံဇၞော်မောဝ်အိုတ်ရ၊ ဒှ်တဴ သွက်ပၟိက်ဂွံအောန်ဟေၚ်အိုတ်ရ၊ ဟွံဒှ်တဴ သွက်ပၟိက်ဂွံဇၞော်အိုတ်ရ၊ ဒှ်တဴ သွက်ဂွံတြိုပ်ကဵုစိုတ်ဟေၚ်အိုတ်ရ၊ ဟွံဒှ်တဴ သွက်ဟွံတြိုပ်ကဵုစိုတ်အိုတ်ရ၊ ဒှ်တဴ သွက်ဂွံသ္ၚိတ်ဇြဟေၚ်အိုတ်ရ၊ ဟွံဒှ်တဴ သွက်ဂွံမံၚ်ကေုာံသကအ်ပွံၚ်အိုတ်ရ၊ ဒှ်တဴ သွက်ဂွံလွဳပရာ ပတိတ်ဇြဟတ်ဟေၚ်အိုတ်ရ၊ ဟွံဒှ်တဴ သွက်ဂွံလၞုဟ်လၞန်အိုတ်ရ၊ ဒှ်တဴ သွက်ဂွံလွဳမြိမြန်လောဲသွာဟေၚ်အိုတ်ရ၊ ဟွံဒှ်တဴ သွက်ဂွံမြိမြန်ဝါတ်ဂါတ်အိုတ်ရ” ရဴဝွံ ယဝ်တီမ္ဂး ယွံဂေါတမဳ ဓရ်တအ်ဂှ် ဗွဲစၟတ်မ္ဂး “ဣဝွံဂှ် ဓရ်ရ၊ ဣဝွံဂှ် ဝိနယ်ရ၊ ဣဝွံဂှ် ဒၠောံဗတောန်ကျာ်ရ” ရဴဝွံ သမ္တီညိ ရဴဝွံ (သ္ဂးရ)။

၄၀၇။ ပ္ဍဲအခိၚ်ဂှ် ဟဂပ်ဝ်စၞောန်ထ္ၜးပါတိမုက် ကုခမဳဗြဴဂမၠိုၚ်ဏီရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ်တၞဟ်နစၞောန်ထ္ၜးပါတိမုက် ကုခမဳဗြဴဂမၠိုၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုရဴညးမွဲ ဂပ်ဝ်စၞောန်ထ္ၜး ပါတိမုက် ကုခမဳဗြဴဂမၠိုၚ်ရော?” ရဴဝွံကသပ်ဒှ် ကုခမဳတြုံဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ခမဳတြုံဂမၠိုၚ် သွက်ဂွံစၞောန်ထ္ၜးပါတိမုက် ကုခမဳဗြဴဂမၠိုၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳတြုံဂမၠိုၚ် ပြာပ်အာဘာခမဳဗြဴဂမၠိုၚ်တုဲ ထ္ၜးပါတိမုက် ကုခမဳဗြဴဂမၠိုၚ်အိုတ်ရ။

“ခမဳဗြဴဂမၠိုၚ်ဝွံ ဒှ်သမ္ဘာဇၞော် ခမဳတြုံဂမၠိုၚ်ဝွံအိုတ်ရ၊ ခမဳဗြဴဂမၠိုၚ်ဝွံ ဒှ်သမ္ဘာသၟတ် ခမဳတြုံဂမၠိုၚ်ဝွံအိုတ်ရ၊ ခမဳတြုံဂမၠိုၚ်ဝွံ ကြက်မိပ်ဇြိပ်လဟိၚ်မွဲစွံ ကေုာံခမဳဗြဴဂမၠိုၚ်ဝွံအိုတ်ရ” ရဴဝွံ မၞိဟ်ဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳတြုံဂမၠိုၚ် ဟဂပ်ဝ်ထ္ၜးပါတိမုက် ကုခမဳဗြဴဂမၠိုၚ်ရ၊ ကုခမဳမထ္ၜးဂှ် ဒးအာပတ်ဒုက္ကဋ်ရ။ ယွံခမဳတအ် (အဲ) ကဵုအခေါၚ် ခမဳဗြဴဂမၠိုၚ် သွက်ဂွံထ္ၜးပါတိမုက် ကုခမဳဗြဴဂမၠိုၚ်ရ ရဴဝွံ (သ္ဂးရ)။ “ပါတိမုက်ဂှ် ဒးထ္ၜး ရဴဝွံရ” ရဴဝွံ ခမဳဗြဴဂမၠိုၚ် ဟွံတီအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “ပါတိမုက်ဂှ် ဩဝ်ထ္ၜးရဴဝွံအိုတ်ညိ” ရဴဝွံ ကဵုအခေါၚ် ခမဳတြုံဂမၠိုၚ် တၞဟ်နဟီုလဴထ္ၜး ကုခမဳဗြဴဂမၠိုၚ်ရ ရဴဝွံ (သ္ဂးရ)။ ၄၀၈။ ပ္ဍဲအခိၚ်ဂှ် ခမဳဗြဴဂမၠိုၚ် ဟွံဇအုဲဇဗဝဳဗလးအာပတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြုံအိုတ်ရ။ ယွံခမဳတအ် ခမဳဗြဴဂမၠိုၚ် သီုဟွံဇအုဲဇဗဝဳဗလးအာပတ်ဂှ် ဟဂပ်ဝ်ပဒတဴရ၊ ကုခမဳဗြဴ ဟွံဇအုဲဇဗဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ “အာပတ်ဂှ် ဒးဇအုဲဇဗရဴဝွံရ” ရဴဝွံ ခမဳဗြဴဂမၠိုၚ် ဟွံတီအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “အာပတ်ဂှ် ဩဝ်ဇအုဲဇဗရဴဝွံအိုတ်ညိ” ရဴဝွံ ကဵုအခေါၚ် ခမဳတြုံဂမၠိုၚ် တၞဟ်နဟီုလဴထ္ၜး ကုခမဳဗြဴဂမၠိုၚ်ရ ရဴဝွံ (သ္ဂးရ)။

ကြဴနူဂှ် “မုရဴညးမွဲ ဂပ်ဝ်ဂွံဒုၚ်ဂိုၚ်ကေတ် အာပတ်ခမဳဗြဴဂမၠိုၚ်ရော?” ရဴဝွံ ကသပ်ဒှ် ကုခမဳတြုံဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ခမဳတြုံဂမၠိုၚ် တၞဟ်နဒုၚ်ဂိုၚ်ကေတ် အာပတ်ခမဳဗြဴဂမၠိုၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဗြဴဂမၠိုၚ် ပ္ဍဲသဗါန်ဍာန်ဇၞော်ကီု ပ္ဍဲဂၠံၚ်တရဴခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညာတ်ဒးခမဳမ္ဂး ဖျေံစွံဗဗေၚ်ပ္ဍဲတိတုဲ လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ် သီုမဂဇအ်ဒၟံၚ် ဗွဲလံက်ဂဇုန်ဂှ် ပၚ်ခၠအ်သၟိပ်တဲတုဲ ဇအုဲဇဗအာပတ်အိုတ်ရ။ “ခမဳဗြဴဂမၠိုၚ်ဝွံ ဒှ်သမ္ဘာဇၞော် ခမဳတြုံဂမၠိုၚ်ဝွံအိုတ်ရ၊ ခမဳဗြဴဂမၠိုၚ်ဝွံ ဒှ်သမ္ဘာသၟတ် ခမဳတြုံဂမၠိုၚ်ဝွံအိုတ်ရ၊ ကလိလောန် ပ္ဍဲအခိၚ်ဗတမ်တုဲအိုတ်မ္ဂး လၟုဟ်မှ ကလအ်ဒုၚ်ဂုဏ်အိုတ်ရ” ရဴဝွံ မၞိဟ်ဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳတြုံဂမၠိုၚ် ဟဂပ်ဝ်ဒုၚ်ဂိုၚ်ကေတ် အာပတ်ခမဳဗြဴဂမၠိုၚ်ရ၊ ကုခမဳမဒုၚ်ဂိုၚ်ကေတ်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် ခမဳဗြဴဂမၠိုၚ် တၞဟ်နဒုၚ်ဂိုၚ်ကေတ် အာပတ် ခမဳဗြဴဂမၠိုၚ်ရ ရဴဝွံ (သ္ဂးရ)။

“အာပတ်ဂှ် ဒးဒုၚ်ဂိုၚ်ကေတ် ရဴဝွံရ” ရဴဝွံ ခမဳဗြဴဂမၠိုၚ် ဟွံတီအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “အာပတ်ဂှ် ဩဝ်ဒုၚ်ဂိုၚ်ကေတ် ရဴဝွံအိုတ်ညိ” ရဴဝွံ ကဵုအခေါၚ် ခမဳတြုံဂမၠိုၚ် တၞဟ်နဟီုလဴထ္ၜး ကုခမဳဗြဴဂမၠိုၚ်ရ ရဴဝွံ (သ္ဂးရ)။

၄၀၉။ ပ္ဍဲအခိၚ်ဂှ် ဟဂပ်ဝ်သ္ပကမ် ကုခမဳဗြဴဂမၠိုၚ်ဏီရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နသ္ပကမ် ကုခမဳဗြဴဂမၠိုၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် “မုရဴညးမွဲ ဂပ်ဝ်ဂွံသ္ပကမ် ကုခမဳဗြဴဂမၠိုၚ်ရော?” ရဴဝွံ ကသပ်ဒှ် ကုခမဳတြုံဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ်ခမဳတြုံဂမၠိုၚ် တၞဟ်နသ္ပကမ် ကုခမဳဗြဴဂမၠိုၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဗြဴမဒးဒုၚ်သ္ပကမ်ဂမၠိုၚ် ပ္ဍဲသဗါန်ဍာန်ဇၞော်ကီု ပ္ဍဲဂၠံၚ်တရဴခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညာတ်ဒးခမဳမ္ဂး ဖျေံစွံဗဗေၚ် ပ္ဍဲတိတုဲ လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ် သီုမဂဇအ်ဒၟံၚ် ဗွဲလံက်ဂဇုန်ဂှ် ပၚ်ခၠအ်သၟိပ်တဲတုဲ “ဗွဲစၟတ် ဂပ်ဝ်သ္ပရဴဝွံရ” ရဴဝွံ သမ္တီထေၚ်ကေတ်အိုတ်တုဲ ကလအ်ဒုၚ်ဂုဏ်အိုတ်ရ။ မၞိဟ်ဂမၠိုၚ် “ခမဳဗြဴဂမၠိုၚ်ဝွံ ဒှ်သမ္ဘာဇၞော် ခမဳတြုံဂၠိုၚ်ဝွံအိုတ်ရ၊ ခမဳဗြဴဂမၠိုၚ်ဝွံ ဒှ်သမ္ဘာသၟတ် ခမဳတြုံဂမၠိုၚ်ဝွံအိုတ်ရ၊ ကလိလောန်ပ္ဍဲအခိၚ်ဗတမ်တုဲအိုတ်မ္ဂး လၟုဟ်မှ ကလအ်ဒုၚ်ဂုဏ်အိုတ်ရ” ရဴဝွံ တုပ်သၟဟ်ကိုပ်ကၠာဟေၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ခမဳတြုံဂမၠိုၚ် ဟဂပ်ဝ်သ္ပကမ် ကုခမဳဗြဴဂမၠိုၚ်ရ၊ ကုခမဳမသ္ပဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ်ခမဳဗြဴဂမၠိုၚ် တၞဟ်နသ္ပကမ် ကုခမဳဗြဴဂမၠိုၚ်ရ ရဴဝွံ (သ္ဂးရ)။

“ရဴဝွံ ဒးသ္ပကမ်ရ’ ရဴဝွံ ခမဳဗြဴဂမၠိုၚ် ဟွံတီအိုတ်ရ။ ပရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “ဩဝ်သ္ပကမ်ရဴဝွံအိုတ်ညိ” ရဴဝွံ ကဵုအခေါၚ် ခမဳတြုံဂမၠိုၚ် တၞဟ်နဟီုလဴထ္ၜး ကုခမဳဗြဴဂမၠိုၚ်ရ ရဴဝွံ (သ္ဂးရ)။

၄၁၀။ ပ္ဍဲအခိၚ်ဂှ် ခမဳဗြဴဂမၠိုၚ် ပ္ဍဲလဒေါဝ်သၚ် ကတဵုဒှ်ကယျာန်ဒဝါတ်သေက်ဇဵု ကတမတ်, ကြဴမတ် ဟီုသ္ဂးစှေ်စး အာစိုပ်အရေဝ်ဂၠိုၚ်ဒှ်တုဲ သီုမထ္ပက်ခၠၚ်ဗၞုဟ်ပါၚ်ရၚ်သကအ်ဂှ် ပဒတဴအိုတ်ရ၊ ကဵုလလမ်ကၠေံ အဓိကိုရ်ဂှ် ဟွံမာန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။

ယွံခမဳတအ် ကဵုအခေါၚ်ခမဳတြုံဂမၠိုၚ် တၞဟ်နကဵုလလမ်ကၠေံ အဓိကိုရ်ခမဳဗြဴဂမၠိုၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳတြုံဂမၠိုၚ် ကဵုလလမ်ကၠေံအဓိကိုရ် ခမဳဗြဴဂမၠိုၚ်အိုတ်ရ၊ သ္ဂုတ်သွာတ်အဓိကိုရ်ဂှ်မ္ဂး ညာတ်တဴခမဳဗြဴဂမၠိုၚ် မဒှ်အာစိုပ်ကမ်ကီု မဒှ်အာစိုပ်အာပတ်ကီုအိုတ်ရ၊ ခမဳဗြဴဂမၠိုၚ် “ယွံတဳလပိုဉ်တအ် အာတ်ပါန်အခေါၚ်ရ၊ တဳလပိုဉ်တအ်ဟေၚ် ဩဝ်သ္ပကမ်ကုခမဳဗြဴဂမၠိုၚ်အိုတ်ညိ၊ တဳလပိုဉ်တအ်ဟေၚ် ဩဝ်ဒုၚ်ဂိုၚ်ကေတ် အာပတ်ခမဳဗြဴဂမၠိုၚ်အိုတ်ညိ၊ ခမဳတြုံဂမၠိုၚ် ဒးကဵုလလမ်ကၠေံ အဓိကိုရ် ခမဳဗြဴဂမၠိုၚ်ရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံဂရၚ်ပတီအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳတြုံဂမၠိုၚ် ပတိုန်ကမ်ကဵုခမဳဗြဴဂမၠိုၚ်တုဲ တၞဟ်နအပ်ပြာပ်ကဵု ကုခမဳဗြဴဂမၠိုၚ်၊ ခမဳဗြဴဂမၠိုၚ် တၞဟ်နသ္ပကမ် ကုခမဳဗြဴဂမၠိုၚ်၊ ခမဳတြုံဂမၠိုၚ် ပတိုန်အာပတ်ကဵု ခမဳဗြဴဂမၠိုၚ်တုဲ တၞဟ်နအပ်ပြာပ်ကဵု ကုခမဳဗြဴဂမၠိုၚ်၊ ခမဳဗြဴဂမၠိုၚ် တၞဟ်နဒုၚ်ဂိုၚ်ကေတ် အာတ်ပတ်ခမဳဗြဴဂမၠိုၚ် ကဵုအခေါၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဗြဴမဒှ်ကွပဒတဴဇရေၚ် ခမဳဗြဴဥပ္ပဝဏ် သီုမဂိုၚ်ကတ်ကေတ် ဝိနယ် လုကဴထပှ်သၞာံဂမၠိုၚ် ဗက်ဒၟံၚ်လက်ကရဴ တဳလမၞုံပိုဉ်ကျာ်တြဲရ၊ ကုခမဳဗြဴသတိဗၠးဂှ် ဝိနယ်မဂိုၚ်ကတ်ကေတ်တုဲ မဂိုၚ်ကတ်ကေတ်တုဲဂှ် ဝိုတ်ကၠေံအာရ။

“တဳလမၞုံပိုဉ်ကျာ်တြဲ က္ညအာဍုၚ်သာရဝှ်ရဂး” ရဴဝွံ ခမဳဗြဴဂှ် ဂွံမိၚ်ကေတ်ရ၊ ပ္ဍဲအခိၚ်ဂှ် “အဲသီုမဂိုၚ်ကတ်ကေတ် ဝိနယ် လုကဴထပှ်သၞာံဂမၠိုၚ် ဗက်ကၠုၚ်ဒၟံၚ်လက်ကရဴ တဳလမၞုံပိုဉ်ကျာ်တြဲရ၊ ကုအဲဂှ် ဟိုတ်မသတိဗၠးဂှ်ရ ဝိနယ် မဂိုၚ်ကတ်ကေတ်တုဲ မဂိုၚ်ကတ်ကေတ်တုဲဂှ် ဝိုတ်ကၠေံအာရ၊ မာတုဂါမ် သွက်ဂွံဗက်ဒၟံၚ်လက်ကရဴ တဳလမၞုံပိုဉ်ကျာ်တြဲ စဵုကဵုလအိတ်လမျီုဂှ်ဇြိုၚ်သန်ရ၊ အဲပသာ်ဂွံဒ္ဂေတ်သ္ပရော?” ရဴဝွံ ကသပ်ဒှ် ကုခမဳဗြဴဂှ်ရ။ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဂှ် ကုခမဳဗြဴဂမၠိုၚ်ရ၊ ခမဳဗြဴဂမၠိုၚ် ဟီုပတီလဴဗ္စ ဟိုတ်ပရူပရာဂှ် ကုခမဳတြုံဂမၠိုၚ်အိုတ်ရ၊ ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ်ကဵုအခေါၚ် ခမဳတြုံဂမၠိုၚ် တၞဟ်နဖျေံပတိုန် ဝိနယ် ကုခမဳဗြဴဂမၠိုၚ်ရ ရဴဝွံ (သ္ဂးရ)။

✵✵✵ ခဏ်ပဌမတုဲရ။✵✵✵