၁၀.၂။ ခဏ်ဒုတိယ
၄၁၁။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဝေသာလဳ ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်ရ၊ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍကသေဌဳ ဇရေၚ်ဍုၚ်သာရဝှ်ဂှ်ရ။ ပ္ဍဲအခိၚ်ဂှ် ခမဳ ဆဗ္ဗဂ္ဂဳဂမၠိုၚ် “ထၞေန်စပ် ပ္ဍဲပိုဲညးဂမၠိုၚ်တန်ဒှ်အိုတ်ရ” ရဴဝွံ ကိုဟ်ချာဲ ခမဳဗြဴဂမၠိုၚ် နကဵုဍာ်လှိုက်သရီုအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳတြုံဂမၠိုၚ် ဟဂပ်ဝ်ကိုဟ်ချာဲ ခမဳဗြဴဂမၠိုၚ် နကဵုဍာ်လှိုက်သရီုရ၊ ကုခမဳမကိုဟ်ချာဲ ဒးအာပတ်ဒက္ကဋ်ရ၊ ယွံခမဳတအ် ကဵုအခေါၚ် သွက်ဂွံသ္ပပွမ တပ်ဒဏ် ကုခမဳဂှ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုဒဏ်မွဲ ဂွံကဵုရော?” ရဴဝွံ ကသပ်ဒှ် ကုခမဳဂမၠိုၚ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဘိက္ခုနဳသၚ် ဒးသ္ပမဟဂပ်ဝ်လ္ၚောဝ် ခမဳဂှ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ထၞေန်စပ် ပ္ဍဲပိုဲညးဂမၠိုၚ်တန်ဒှ်အိုတ်ရ” ရဴဝွံ ပံက်ဇကုတုဲ ထ္ၜးကဵု ကုခမဳဗြဴဂမၠိုၚ်အိုတ်ရ၊ ပံက်ဒဳတုဲ ထ္ၜးကဵု ကုခမဳဗြဴဂမၠိုၚ်အိုတ်ရ၊ ပံက်အၚ်္ဂဇာတ်တုဲ ထ္ၜးကဵု ကုခမဳဗြဴဂမၠိုၚ်အိုတ်ရ၊ ဟီုသ္ပဂရိုၚ်စရဵု ကဵုခမဳဗြဴဂမၠိုၚ်အိုတ်ရ၊ နှဴရဴပကီုတဴမွဲစွံ ကေုာံခမဳဗြဴဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳတြုံဂမၠိုၚ် ပံက်ဇကုတုဲ ဟဂပ်ဝ်ထ္ၜးကဵု ကုခမဳဗြဴဂမၠိုၚ်အိုတ်ရ၊ ပံက်ဒဳတုဲ ဟဂပ်ဝ်ထ္ၜးကဵု ကုခမဳဗြဴဂမၠိုၚ်အိုတ်ရ၊ ပံက်အၚ်္ဂဇာတ်တုဲ ဟဂပ်ဝ်ထ္ၜးကဵု ကုခမဳဗြဴဂမၠိုၚ်အိုတ်ရ၊ ဟဂပ်ဝ်ဟီုသ္ပဂရိုၚ်စရဵု ကဵုခမဳဗြဴဂမၠိုၚ်အိုတ်ရ၊ ဟဂပ်ဝ်နှဴရဴပကီုတဴမွဲစွံ ကေုာံခမဳဗြဴဂမၠိုၚ်အိုတ်ရ၊ ကုခမဳမနှဴရဴပကီု ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် သွက်ဂွံကဵုဒဏ် ကုခမဳဂှ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုဒဏ်မွဲ ဂွံကဵုရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဘိက္ခုနဳသၚ် ဒးသ္ပမဟဂပ်ဝ်လ္ၚောဝ် ခမဳဂှ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် “ထၞေန်စပ် ပ္ဍဲပိုဲညးဂမၠိုၚ်တန်ဒှ်အိုတ်ရ” ရဴဝွံ ကိုဟ်ချာဲခမဳတြုံဂမၠိုၚ် နကဵုဍာ်လှိုက်သရီုအိုတ်ရ။ ဂရၚ်ပတီ ဟိုတ်ပရူပရူ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂမၠိုၚ် ဟဂပ်ဝ်ကိုဟ်ချာဲ ခမဳတြုံဂမၠိုၚ် နကဵုဍာ်လှိုက်သရီုရ၊ ကုခမဳဗြဴမကိုဟ်ချာဲ ဒးအာပတ်ဒက္ကဋ်ရ၊ ယွံခမဳတအ် ကဵုအခေါၚ် သွက်ဂွံသ္ပပွမတပ်ဒဏ် ကုခမဳဗြဴဂှ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုဒဏ်မွဲ ဂွံကဵုရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံသ္ပပွမ ဆေဝ်ဒဝ်ရ ရဴဝွံ (သ္ဂးရ)။ သ္ပပွမဆေဝ်ဒဝ်မ္ဂး ဟွံကလၚ်ကေတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံတန်ဒေါံဩဝါဒ ဒၠောံဗတောန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် “ထၞေန်စပ် ပ္ဍဲပိုဲညးဂမၠိုၚ်တန်ဒှ်အိုတ်ရ” ရဴဝွံ ပံက်ဇကုတုဲ ထ္ၜးကဵု ကုခမဳတြုံဂမၠိုၚ်အိုတ်ရ၊ ပံက်ဖျုန်ပရဲ (တှ်) တုဲထ္ၜးကဵု ကုခမဳတြုံဂမၠိုၚ်အိုတ်ရ၊ ပံက်ဒဳတုဲ ထ္ၜးကဵု ကုခမဳတြုံဂမၠိုၚ်အိုတ်ရ၊ ပံက်အၚ်္ဂဇာတ်တုဲ ထ္ၜးကဵု ကုခမဳတြုံဂမၠိုၚ်အိုတ်ရ၊ ဟီုသ္ပဂရိုၚ်စရဵု ကဵုခမဳတြုံဂမၠိုၚ်အိုတ်ရ၊ နှဴရဴပကီုတဴမွဲစွံ ကေုာံခမဳတြုံဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂမၠိုၚ် ပံက်ဇကုတုဲ ဟဂပ်ဝ်ထ္ၜးကဵု ကုခမဳတြုံဂမၠိုၚ်ရ၊ ပံက်ဖျုန်ပရဲ (တှ်) တုဲ ဟဂပ်ဝ်ထ္ၜးကဵု ကုခမဳတြုံဂမၠိုၚ်ရ၊ ပံက်ဒဳတုဲ ဟဂပ်ဝ်ထ္ၜးကဵု ကုခမဳတြုံဂမၠိုၚ်ရ၊ ပံက်အၚ်္ဂဇာတ်တုဲ ဟဂပ်ဝ်ထ္ၜးကဵု ကုခမဳတြုံဂမၠိုၚ်ရ၊ ဟဂပ်ဝ်ဟီုသ္ပဂရိုၚ်စရဵု ကဵုခမဳတြုံဂမၠိုၚ်ရ၊ ဟဂပ်ဝ်နှဴရဴပကီုတဴမွဲစွံ ကေုာံခမဳတြုံဂမၠိုၚ်ရ၊ ကုခမဳဗြဴမနှဴရဴပကီု ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် သွက်ဂွံကဵုဒဏ် ကုခမဳဗြဴဂှ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုဒဏ်မွဲ ဂွံကဵုရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံသ္ပပွမ ဆေဝ်ဒဝ်ရ ရဴဝွံ (သ္ဂးရ)။ သ္ပပွမဆေဝ်ဒဝ်မ္ဂး ဟွံကလၚ်ကေတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံတန်ဒေါံဩဝါဒ ဒၠောံဗတောန်ရ ရဴဝွံ (သ္ဂးရ)။
ပ္ဍဲအခိၚ်ဂှ် “တၞဟ်နသ္ပဥပေါသ် ကေုာံခမဳဗြဴ မတန်ဒေါံလဝ် ဩဝါဒဒၠောံဗတောန်ဂှ် ဂပ်ဝ်ဟာ ဟွံဂပ်ဝ်ဟာ” ကသပ်ဒှ် ကုခမဳဂမၠိုၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဗၞတ်အဓိကိုရ်ဂှ် ဟွံလလမ်ဏီ ဟဂပ်ဝ်သ္ပဥပေါသ်မွဲစွံ ကေုာံခမဳဗြဴ မတန်ဒေါံလဝ် ဩဝါဒဒၠောံဗတောန်ရ ရဴဝွံ (သ္ဂးရ)။
၄၁၂။ ပ္ဍဲအခိၚ်ဂှ် တဳလပိုဉ်ဥဒါယဳ တန်ဒေါံလဝ် ဩဝါဒဒၠောံဗတောန်တုဲ စ္ဍးအာဒေသစာရိတ်ရ၊ “တဳလပိုဉ်ဥဒါယဳ တန်ဒေါံလဝ် ဩဝါဒဒၠောံဗတောန်တုဲ မုဟိုတ် စ္ဍးအာဒေသစာရိတ်ရော?” ရဴဝွံ ခမဳဗြဴဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳမၞုံပိုဉ်ကျာ်တြဲအိုတ်ရ။
ယွံခမဳတအ် တန်ဒေါံလဝ် ဩဝါဒဒၠောံဗတောန်တုဲ ဟဂပ်ဝ်စ္ဍးအာ ဒေသစာရိတ်ရ၊ ကုခမဳမစ္ဍးအာဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳတြုံမဒိုဟ်ဓီု ဟွံစဳကၠးဆိုက်ဗ္ဒက်ဂှ် ဟဂပ်ဝ်တန်ဒေါံလဝ် ဩဝါဒဒၠောံဗတောန်ရ၊ ကုခမဳမတန်ဒေါံဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် တန်ဒေါံ ဩဝါဒဒၠောံဗတောန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် ဟဂပ်ဝ်ဒေါံလဝ် ဩဝါဒဒၠောံဗတောန်ရ၊ ကုခမဳတန်ဒေါံဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် တန်ဒေါံ ဩဝါဒဒၠောံဗတောန်တုဲပ္ဍဲကြဴ ဟွံကဵုသ္ဂုတ်သွာတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တန်ဒေါံဩဝါဒဒၠောံဗတောန်တုဲ ပ္ဍဲကြဴ ဂပ်ဝ်ဒးကဵုသ္ဂုတ်သွာတ်ဟေၚ်ရ၊ ကုခမဳဟွံကဵုဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၁၃။ ပ္ဍဲအခိၚ်ဂှ် ခမဳဗြဴဂမၠိုၚ် ဟွံအာဌာန်ဒၠောံဗတောန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဂပ်ဝ်ဒးအာ ဌာန်ဒၠောံဗတောန်ဟေၚ်ရ၊ ကုခမဳဗြဴဟွံအာဂှ် ဒးသ္ဂုတ်သွာတ် ဗွဲမဗဗွဲကဵုဓရ် ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဗြဴဂမၠိုၚ်အိုတ်သီု အာဌာန်ဒၠောံဗတောန်ရ။ “ခမဳဗြဴဂမၠိုၚ်ဝွံ ဒှ်သမ္ဘာဇၞော် ခမဳတြုံဂမၠိုၚ်ဝွံအိုတ်ရ၊ ခမဳဗြဴဂမၠိုၚ်ဝွံ ဒှ်သမ္ဘာသၟတ် ခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ်ဝွံ ကြက်မိပ်ဇြိပ်လဟိၚ်မွဲစွံ ကေုာံခမဳဗြဴဂမၠိုၚ်ဝွံအိုတ်ရ” ရဴဝွံ မၞိဟ်ဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟိုတ်ထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂမၠိုၚ်အိုတ်သီု ဟဂပ်ဝ်အာဌာန်ဒၠောံဗတောန်ရ၊ အာအိုတ်မ္ဂး ဒးအာပတ်ဒုက္ကဋ်ရ။ ယွံခမဳတအ် ခမဳဗြဴပန်ဇကု မသုန်ဇကုဂမၠိုၚ် ကဵုအခေါၚ် တၞဟ်နအာဌာန်ဒၠောံဗတောန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴပန်ဇကု မသုန်ဇကုဂမၠိုၚ် အာဌာန်ဒၠောံဗတောန်အိုတ်ရ။ ခမဳဗြဴဂမၠိုၚ်ဝွံ ဒှ်သမ္ဘာဇၞော် ခမဳတြုံဂမၠိုၚ်ဝွံအိုတ်ရ၊ ခမဳဗြဴဂမၠိုၚ်ဝွံ ဒှ်သမ္ဘာသၟတ် ခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ်ဝွံ ကြက်မိပ်ဇြိပ်လဟိၚ်မွဲစွံ ကေုာံခမဳဗြဴဂမၠိုၚ်ဝွံအိုတ်ရ” ရဴဝွံ မၞိဟ်ဂမၠိုၚ်တုပ်နယ်ကိုပ်ကၠာတေံဟေၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟိုတ်ထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴပန်ဇကု မသုန်ဇကုဂမၠိုၚ် ဟဂပ်ဝ်အာဌာန်ဒၠောံဗတောန်ရ၊ အာအိုတ်မ္ဂး ဒးအာပတ်ဒုက္ကဋ်ရ။ ယွံခမဳတအ် ခမဳဗြဴၜါဇကု ပိဇကုဂမၠိုၚ် ကဵုအခေါၚ် တၞဟ်နအာဌာန်ဒၠောံဗတောန်ရ ရဴဝွံ (သ္ဂးရ)။
ပြာပ်အာဇရေၚ် ခမဳတြုံဇကုတုဲ လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ် သီုမဂဇအ်ဒၟံၚ်ဗွဲလံက်ဂဇုန်ဂှ် ပၚ်ခၠအ်သၟိပ်တဲတုဲမ္ဂး—
“ယွံတဳလပိုဉ် ဘိက္ခုနဳသၚ် လ္ၚောဝ်ဒၠးဇိုၚ် ဘိက္ခုသၚ်ဂမၠိုၚ်ရ၊ အာတ်ပါန်အခေါၚ်တၞဟ်နကလၚ်ဩဝါဒကီဒ ပွမပြာပ်ခစကီုရ၊ ယွံတဳလပိုဉ် ဘိက္ခုနဳသၚ် မိက်ကလိဂွံ တၞဟ်နကလၚ်ဩဝါဒကီု ပွမပြာပ်ခစကီုရ” ရဴဝွံ ဒးဂရၚ်ပတီရ။
ခမဳဂှ် ပြာပ်အာဇရေၚ် ခမဳထ္ၜးပါတိမုက်တုဲမ္ဂး “ယွံတဳလပိုဉ် ဘိက္ခုနဳသၚ် လ္ၚောဝ်ဒၠးဇိုၚ် ဘိက္ခုသၚ်ဂမၠိုၚ်ရ၊ အာတ်ပါန်အခေါၚ်တၞဟ်နကလၚ်ဩဝါဒကီဒ ပွမပြာပ်ခစကီုရ၊ ယွံတဳလပိုဉ် ဘိက္ခုနဳသၚ် မိက်ကလိဂွံ တၞဟ်နကလၚ်ဩဝါဒကီု ပွမပြာပ်ခစကီုရ” ရဴဝွံ ဒးဂရၚ်ပတီရ။
“ခမဳမွဲမွဲ မသၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ် နွံဒၟံၚ်ဟာ” ရဴဝွံ ခမဳထ္ၜး ပါတိမုက်ဂှ် ဒးသၟာန်ရ။ ခမဳမွဲမွဲ မသၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ်ဂှ် နွံမ္ဂး “ခမဳမၞုံယၟုဝွံ သၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ်ရ၊ ဘိက္ခုနဳသၚ် ဩဝ်ပြာပ်အာဇရေၚ် ခမဳဂှ်ညိ” ရဴဝွံ ခမဳထ္ၜးပါတိမုက်ဂှ် ဒးဟီုရ။
ခမဳမွဲမွဲ မသၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ်ဂှ် ဟွံမွဲမ္ဂး “မုရဴတဳလပိုဉ်မွဲ သၟဟ်ရထ သွက်ဂွံဒၠောံဗတောန် ခမဳဗြဴဂမၠိုၚ်ရော?” ရဴဝွံ ခမဳထ္ၜးပါတိမုက်ဂှ် ဒးသၟာန်ရ။ ခမဳမွဲမွဲဇကု သၟဟ်ရထ သွက်ဂွံဒၠောံဗတောန် ခမဳဗြဴဂမၠိုၚ်မ္ဂး ခမဳဂှ်လေဝ် ဍိုက်ပေၚ်ကဵုအၚ်္ဂဒ္စါံသာ်မ္ဂး သၟိတ်ပတိုန်တုဲ “ခမဳမၞုံယၟုဝွံ သၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ်ရ၊ ဘိက္ခုနဳသၚ် ဩဝ်ပြာပ်အာဇရေၚ် ခမဳဂှ်ညိ” ရဴဝွံ ဒးဟီုရ။
သွက်ဂွံဒၠောံဗတောန် ခမဳဗြဴဂမၠိုၚ် ညးလဵုမွဲလေဝ် ဟွံသၟဟ်ရထမ္ဂး “ခမဳမွဲမွဲ မသၟိတ်လဝ်ရဴဝွံမ္ဂး ညးဒၠောံဗတောန် ခမဳဗြဴဂမၠိုၚ် ဟွံမွဲရ၊ ဘိက္ခုနဳသၚ် ဩဝ်ကဵုဍိုက်ပေၚ်တဴကေုာံအာကာရအရာကာယပါၚ် မလျုၚ်ဇြုၚ်သ္ဍိုက်ညိ” ရဴဝွံ ခမဳထ္ၜးပါတိမုက်ဂှ် ဒးဟီုရ။
၄၁၄။ ပ္ဍဲအခိၚ်ဂှ် ခမဳဂမၠိုၚ် ဟွံဂိုၚ်ကေတ် ဩဝါဒအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဂပ်ဝ်ဒးဒုၚ်ဂိုၚ်ကေတ် ဩဝါဒဟေၚ်ရ၊ ကုခမဳ ဟွံဒုၚ်ဂိုၚ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ပြာပ်အာဇရေၚ် ခမဳဟွံမွဲကဵုအစောံမွဲဇကုတုဲ “ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ” ရဴဝွံ ဂရၚ်ပတီအိုတ်ရ။ (ဩဝါဒမ္ဂးဂှ် ကလိဂွံဒၠောံဗတောန်ဟာ ရဴဝွံ ဩဝါဒခမဳဗြဴဂမၠိုၚ် မဂပ်ဝ်အာတ်ရောၚ်။)
ယွံဒေံဗြဴတအ် အဲဟွံမွဲကဵုအစောံရ၊ မုရဴသာ်လဵု အဲဂွံဒုၚ်ဂိုၚ်ကေတ်ဩဝါဒရော? ရဴဝွံ (သ္ဂးရ)။ ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ၊ “ခမဳတြုံဂမၠိုၚ် ဒးဒုၚ်ဂိုၚ်ကေတ် ဩဝါဒ ခမဳဗြဴဂမၠိုၚ်ရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံ (ဂရၚ်ပတီအိုတ်ရ)။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပါဲကၠေံခမဳဟွံမွဲကဵုအစောံတုဲ ခမဳသၟေဟ်ဂမၠိုၚ် ကဵုအခေါၚ် သွက်ဒုၚ်ဂိုၚ်ကေတ်ဩဝါဒရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ပြာပ်အာဇရေၚ် ခမဳဂိယဲမွဲဇကုတုဲ “ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ” ရဴဝွံ ဂရၚ်ပတီအိုတ်ရ။
ယွံဒေံဗြဴတအ် အဲဂိယဲဒၟံၚ်ရ၊ မုရဴသာ်လဵု အဲဂွံဒုၚ်ဂိုၚ်ကေတ်ဩဝါဒရော? ရဴဝွံ (သ္ဂးရ)။ ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ၊ “ပါဲကၠေံ ခမဳဟွံမွဲကဵုအစောံတုဲ ခမဳသၟေဟ်ဂမၠိုၚ် ဒးဒုၚ်ဂိုၚ်ကေတ်ဩဝါဒရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံ (ဂရၚ်ပတီအိုတ်ရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပါဲကၠေံခမဳဟွံမွဲကဵုအစောံ ကေုာံခမဳဂိယဲတုဲ ခမဳသၟေဟ်ဂမၠိုၚ် ကဵုအခေါၚ် သွက်ဒုၚ်ဂိုၚ်ကေတ်ဩဝါဒရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ပြာပ်အာဇရေၚ် ခမဳမွဲဇကု မဒှ်ညောန်ကဵု ကွာ်တရဴတုဲ “ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ” ရဴဝွံ ဂရၚ်ပတီအိုတ်ရ။
ယွံဒေံဗြဴတအ် အဲဒှ်ဒၟံၚ်ညောန်ကဵုကွာ်တရဴရ၊ မုရဴသာ်လဵု အဲဂွံဒုၚ်ဂိုၚ်ကေတ်ဩဝါဒရော? ရဴဝွံ (သ္ဂးရ)။ ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ၊ “ပါဲကၠေံခမဳဟွံမွဲကဵုအစောံ ကေုာံခမဳဂိယဲတုဲ ခမဳသၟေဟ်ဂမၠိုၚ် ကဵုအခေါၚ် သွက်ဒုၚ်ဂိုၚ်ကေတ်ဩဝါဒရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံ (ဂရၚ်ပတီအိုတ်ရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပါဲကၠေံခမဳဟွံမွဲကဵုအစောံ၊ ခမဳဂိယဲ၊ ခမဳကြက်ကွာ်တရဴဂမၠိုၚ်တုဲ ခမဳသၟေဟ်ဂမၠိုၚ် ကဵုအခေါၚ် သွက်ဒုၚ်ဂိုၚ်ကေတ်ဩဝါဒရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ပြာပ်အာဇရေၚ် ခမဳပဒတဴပ္ဍဲဂြိုပ်မွဲဇကုတုဲ “ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ” ရဴဝွံ ဂရၚ်ပတီအိုတ်ရ။
ယွံဒေံဗြဴတအ် အဲပဒတဴဒၟံၚ်ပ္ဍဲဂြိုပ်ရ၊ မုရဴသာ်လဵု အဲဂွံဒုၚ်ဂိုၚ်ကေတ်ဩဝါဒရော? ရဴဝွံ (သ္ဂးရ)။ ယွံတဳလပိုဉ် ဩဝ်ဒုၚ်ဂိုၚ်ကေတ် ဩဝါဒညိ၊ “ပါဲကၠေံခမဳဟွံမွဲကဵုအစောံ၊ ခမဳဂိယဲ၊ ခမဳကြက်ကွာ်တရဴဂမၠိုၚ်တုဲ ခမဳသၟေဟ်ဂမၠိုၚ် ကဵုအခေါၚ် သွက်ဒုၚ်ဂိုၚ်ကေတ်ဩဝါဒရ” ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ ရဴဝွံ (ဂရၚ်ပတီအိုတ်ရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳပဒတဴပ္ဍဲဂြိုပ်ဂှ် သွက်ဒုၚ်ဂိုၚ်ကေတ် ဩဝါဒကီု “ကြက်ကလေၚ်ရၚ်တၠုၚ်ဌာန်ဝွံရ” ရဴဝွံ သွက်ဂွံသ္ပချိၚ်ဖါပ်ကီု ကဵုအခေါၚ်ရ ရဴဝွံ (သ္ဂးရ)။
၄၁၅။ ပ္ဍဲအခိၚ်ဂှ် ခမဳတြုံဂမၠိုၚ် ဒုၚ်ဂိုၚ်ကေတ် ဩဝါဒတုဲမ္ဂး ဟွံဟီုလဴထ္ၜးအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဂပ်ဝ်ဒးဂရၚ်ပတီလဴဗ္စ ဩဝါဒဟေၚ်ရ၊ ကုခမဳ မဟွံဂရၚ်ပတီလဴဗ္စဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳတြုံဂမၠိုၚ် ဒုၚ်ဂိုၚ်ကေတ်ဩဝါဒတုဲမ္ဂး ဟွံကလေၚ်ရၚ်တၠုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဂပ်ဝ်ဒးကလေၚ်ရၚ်တၠုၚ်ဩဝါဒဟေၚ်ရ၊ ကုခမဳမဟွံကလေၚ်ရၚ်တၠုၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ဟွံအာဌာန်ချိပ်ဖါပ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂမၠိုၚ် ဂပ်ဝ်ဒးအာဌာန်ချိၚ်ဖါပ်ဟေၚ်ရ၊ ကုခမဳဗြဴဟွံအာဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၁၆။ ပ္ဍဲအခိၚ်ဂှ် ခမဳဗြဴဂမၠိုၚ် ပကၚ်ရၚ်လဝ် ဇုက်ကာယဗန်ဂမၠိုၚ်မဂၠိၚ်အိုတ်ရ၊ နကဵုဇုက်ကာယဗန် မဂၠိၚ်ဂမၠိုၚ်ဂှ် လၟောဝ်စှေ် ‘ဍောတ်စှေ်’ အိုတ်ရ။ မၞိဟ်ဂမၠိုၚ် ။ ပ ။ သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ပကၚ်ရၚ်လဝ် ဇုက်ကာယဗန် မဒက်ပူပါတ်မွဲပွူ ရုမ်ဂပ်ရ။ နဇုက်ကာယဗန်လေဝ် ဟဂပ်ဝ်ကဵုဇုတ်သကဲဂမၠိုၚ် လၟောဝ်စှ် ‘ဍောတ်စှေ်’ ရ၊ ကုခမဳဗြဴမကဵုလၟောဝ်စှေ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ကဵုဇုတ်သကဲဂမၠိုၚ် လၟောဝ်စှေ် နကဵုဂၠးသပှ်ေချာအိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုဂၠးစၞာံအိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုဂၠးယာတ်အိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုယာတ်ထကတ်အိုတ်ရ။ ကဵုဇုတ်သကဲဂမၠိုၚ် လၟောဝ်စှေ်နကဵုယာတ်ဗ္ၜန်အိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုဂၠးသ္ၚာအိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုသ္ၚာထကတ်အိုတ်ရ။ ကဵုဇုတ်သကဲဂမၠိုၚ် လၟောဝ်စှ်ေ နကဵုသ္ၚာဗ္ၜန်အိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုတောဝ်ထကအ်အိုတ်ရ။ ကဵုဇုတ်သကဲဂမၠိုၚ် လၟောဝ်စှေ် နကဵုတောဝ်ဗ္ၜန်အိုတ်ရ။ မၞိဟ်ဂမၠိုၚ် ။ ပ ။ “သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဗြဴဂှ် ဟဂပ်ဝ်ကဵုဇုက်သကဲဂမၠိုၚ် လၟောဝ်စှေ် နကဵုဂၠးသပှ်ေချာရ။ ပ ။ ဟဂပ်ဝ်ကဵုဇုက်သကဲဂမၠိုၚ် လၟောဝ်စှေ် နကဵုတောဝ်ဗ္ၜန်ရ၊ ကုခမဳဗြဴကဵုလၟောဝ်စှေ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂမၠိုၚ် ဓဇိုတ်ပေါတ်ဂၞိၚ် နကဵုဇုတ်တံၚ်ယျဂၠဴအိုတ်ရ၊ ကဵုခါဂွါတ် ‘ဂဒုတက်’ နကဵုဇုတ်သၟိပ်ဂၠဴအိုတ်ရ၊ ကဵုခါဂွါတ် တဲအိုတ်ရ၊ ကဵုခါဂွါတ် စးတဲအိုတ်ရ၊ ကဵုခါဂွါတ် ဂဒဟ်ဗြာတ်အိုတ်ရ၊ ကဵုခါဂွါတ် စးဇိုၚ်အိုတ်ရ၊ ကဵုခါဂွါတ် ဒဳအိုတ်ရ၊ ကဵုခါဂွါတ် မုက်ခဝါအိုတ်ရ၊ ကဵုခါဂွါတ် ဖျုန်ဓရီုၚေက်အိုတ်ရ။ မၞိဟ်ဂမၠိုၚ် ။ ပ ။ “သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်ကဵုဓဇိုတ်ပေါတ်ဂၞိၚ် နကဵုဇုတ်တံၚ်ယျဂၠဴရ ။ ပ ။ ဟဂပ်ဝ်ကဵုခါဂွါတ် ဖျုန်ဓရီုၚေက်ရ၊ ကုခမဳဗြဴမကဵုခါဂွါတ် ‘ပေါတ်’ ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၁၇။ ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် လံက်လေတ်မုက်ခဝါအိုတ်ရ၊ ဓဇိုတ်ပေါတ်မုက်ခဝါအိုတ်ရ၊ ပၠေတ်မုက်ခဝါ နကဵုခၞိက်ပံၚ်မုက်အိုတ်ရ။ ထ္ပက်ဍံက်ကွေၚ်လဝ်မုက်ခဝါ နကဵုတၟံမြၚ်သိလ္လာအိုတ်ရ။ ဖျောန်အဝယ်ဇၞော်သၟတ်အိုတ်ရ။ ဖျောန်သၟာန်ပါၚ်အိုတ်ရ။ ဖျောန်အဝယ်ဇၞော်သၟတ် ဖျောန်သၟန်ပါၚ်အိုတ်။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ် ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်လံက်လေတ် မုက်ခဝါရ ။ ပ ။ ဟဂပ်ဝ်ဓဇိုတ်ပေါတ် မုက်ခဝါရ။ ဟဂပ်ဝ်ပၠေတ်မုက်ခဝါ နကဵုခၞိက်ပံၚ်မုက်ရ။ ဟဂပ်ဝ်ထ္ပက်ဍံက်ကွေၚ်လဝ်မုက်ခဝါ နကဵုတၟံမြၚ်သိလ္လာရ။ ဟဂပ်ဝ်ဖျောန်အဝယ်ဇၞော်သၟတ်ရ။ ဟဂပ်ဝ်သ္ပ သၟာန်ပါၚ်ရ။ ဟဂပ်ဝ်သ္ပ ပွမဖျောန်အဝယ်ဇၞော်သၟတ် ဖျောန်သၟန်ပါၚ်ရ၊ ကုခမဳဗြဴ မသ္ပဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် သ္ပလဝ်စရိတ် မတ္ၚံက်စှေ်သၟဝ်သကဲတၞေၚ်မတ်အိုတ်ရ ‘သက်ဒၞေၚ်မတ်’ အိုတ်ရ။ ကွေၚ်ဂ္စေအ်ပ္ဍဲကၞိၚ်အိုတ်ရ၊ သ္ၚေဝ်ရံၚ် နပၞော်ဗတၚ်ကျာအိုတ်ရ၊ ဒတူဒၟံၚ်ပ္ဍဲပါၚ်တြၚ်ဌာန်မၞုံကဵုလျး (သီုမထၟံက်လဝ်ဇကု) အိုတ်ရ၊ ကဵုသ္ပတဴပွမလှေ်အိုတ်ရ၊ ကဵုဗြဴစရာဲဍုၚ် ပဒတဴအိုတ်ရ၊ စွံပတန်လဝ် ရုၚ်သၟုၚ် (တေဝ်ဆေၚ်အရက်) အိုတ်ရ၊ စွံပတန်လဝ်ဖျုန်ထၞေက် ကထၞေက်အိုတ်ရ၊ လးဖျာအိုတ်ရ၊ ကဵုဂတှ်အိုတ်ရ (ဖျေံစသြန်) အိုတ်ရ၊ သ္ပပွမကူသာန်အိုတ်ရ၊ ကဵုဍိက်တြုံ ကၠောန်ၜိုတ်အိုတ်ရ၊ ကဵုဍိက်ဗြဴ ကၠောန်ၜိုတ်အိုတ်ရ၊ ကဵုသၟာကမၠောန်ကၠောန်ၜိုတ်အိုတ်ရ၊ ကဵုသၟာကမၠောန်ဗြဴ ကၠောန်ၜိုတ်အိုတ်ရ၊ ကဵုတိရိစ္ဆာန်ကၠောန်ၜိုတ်အိုတ်ရ၊ သွံတဴ ဖျာထၞေက်ဖျာသကှ်တၞဟ်တၞဟ်အိုတ်ရ၊ ပကၚ်ရၚ်လဝ် ဇုက်ဂ္ညိဂၞိၚ် မကဵုသကဲလၟောဝ်စှေ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူ ပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်သ္ပလဝ်စရိတ် မတ္ၚံက်စှေ်သၟဝ်သကဲတၞေၚ်မတ်ရ ။ ပ ။ ဟဂပ်ဝ် သ္ပပွမကွေၚ်ဂစေအ်ပ္ဍဲကၞိၚ်ရ။ ဟဂပ်ဝ်သ္ၚေဝ်ရံၚ် နပၞော်ဗတၚ်ကျာရ။ ဟဂပ်ဝ်ဒတူ ပ္ဍဲပါၚ်တြၚ်ဌာန်မၞုံကဵုလျး (သီုမထၟံက်လဝ်ဇကု) ရ။ ဟဂပ်ဝ်ကဵုသ္ပ ပွမလှေ်ရ။ ဟဂပ်ဝ်ဗြဴစရာဲဍုၚ်ပဒတဴရ။ ဟဂပ်ဝ်စွံပတန် ရုၚ်သၟၚ်ရ။ ဟဂပ်ဝ်စွံပတန် ဖျုန်ထၞေက်ကထၞေက်ရ။ ဟဂပ်ဝ်ကဵုဂတှ်ရ။ ဟဂပ်ဝ်သ္ပ ပွမကူသာန်ရ။ ဟဂပ်ဝ်ကဵုဍိက်တြုံ ကၠောန်ၜိုတ်ရ။ ဟဂပ်ဝ်ကဵုဍိက်ဗြဴ ကၠောန်ၜိုတ်ရ။ ဟဂပ်ဝ်ကဵုသၟာကမၠောန် ကၠောန်ၜိုတ်ရ။ ဟဂပ်ဝ်ကဵုသၟာကမၠောန်ဗြဴ ကၠောန်ၜိုတ်ရ။ ဟဂပ်ဝ်ကဵု တိရစ္ဆာန်ကၠောန်ၜိုတ်ရ။ ဟဂပ်ဝ်သွံ ဖျာထၞေက်ဖျာသကှ်တၞဟ်တၞဟ်ရ၊ ဟဂပ်ဝ်ပကၚ်ရၚ် ဇုက်ဂ္ညိဂၞိၚ်မကဵုသကဲလၟောဝ်စှေ်ရ၊ ကုခမဳဗြဴ မပကၚ်ရၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၁၈။ ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် ပကၚ်ရၚ်သ္ၚာဂမၠိုၚ် မၞုံကဵုသာ်လမ္စံက်အိုတ်သီုအိုတ်ရ ။ ပ ။ ပကၚ်ရၚ်သ္ၚာဂမၠိုၚ် မၞုံကဵုသာ်မိတ်အိုတ်သီုအိုတ်ရ ။ ပ ။ ပကၚ်ရၚ်သ္ၚာဂမၠိုၚ် မၞုံကဵုသာ်ဗကေတ်အိုတ်သီုအိုတ်ရ။ ပကၚ်ရၚ်သ္ၚာဂမၠိုၚ် မၞုံကဵုသာ်ဗကေတ်ကြံၚ် (သာ်တာပရံၚ်) အိုတ်သီုအိုတ်ရ။ ပကၚ်ရၚ်သ္ၚာဂမၠိုၚ် မၞုံကဵုသာ်ဒမျိုၚ်အိုတ်သီုအိုတ်ရ။ ပကၚ်ရၚ်သ္ၚာဂမၠိုၚ် မဖျောန်လဝ်နဍာ်လွံက် မၞုံယၟုမဟာရၚ်္ဂ (မတုပ်ကဵုသာ်စၞိန်စးဂဂဳ) အိုတ်သီုအိုတ်ရ။ ပကၚ်ရၚ်သ္ၚာဂမၠိုၚ် မဖျောန်လဝ်နဍာ်လွံက် မၞုံယၟုမဟာနာမ (မတုပ်ကဵုသာ်ဖျိုဟ်) အိုတ်သီုအိုတ်ရ။ ပကၚ်ရၚ်သ္ၚာဂမၠိုၚ် မဟွံကုတ်တသာဲအိုတ်ရ။ ပကၚ်ရၚ်သ္ၚာဂမၠိုၚ် မၞုံတသာဲမဂၠိၚ်အိုတ်ရ။ ပကၚ်ရၚ်သ္ၚာဂမၠိုၚ် မၜန်လဝ်တသာဲဍောၚ်ကဴအိုတ်ရ။ ပကၚ်ရၚ်သ္ၚာဂမၠိုၚ် မၜန်လဝ်တသာဲ မတုပ်သတ်ဆုအိုတ်ရ။ ပကၚ်ရၚ် ပဠောံခြပ်အိုတ်ရ။ ပကၚ်ရၚ် သ္ၚာသကောဝ်ဆုအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်ပကၚ်ရၚ်သ္ၚာဂမၠိုၚ် မၞုံကဵုသာ်လမ္စံက်အိုတ်သီုရ ။ ပ ။ ဟဂပ်ဝ်ပကၚ်ရၚ် သ္ၚာသကောဝ်ဆုရ၊ ကုခမဳဗြဴ မပကၚ်ရၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၁၉။ ပ္ဍဲအခိၚ်ဂှ် ခမဳဗြဴမွဲဇကုဂှ် ဆိုက်ညောန်ကဵုချိုတ်မ္ဂး “အဲကလိလောန်စဴမ္ဂး ပရိက္ခရာအဲ ဩဝ်ကဵုဒှ် ကုသၚ်ညိ” ရဴဝွံ ဟီုဗကန်လဝ်ရ။ ပ္ဍဲအရာမဟီုသာ်ဂှ် ခမဳတြုံဂမၠိုၚ်ကီု ခမဳဗြဴဂမၠိုၚ်ကီု “ဒှ်ပရိက္ခရာ ပိုဲတအ်ရ၊ ဒှ်ပရိက္ခရာ ပိုဲတအ်ရ” ရဴဝွံ ကယျန်ဓဝါတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဆိုက်ညောန်ကဵုချိုတ်မ္ဂး “အဲကလိလောန်စဴမ္ဂး ပရိက္ခရာအဲ ဩဝ်ကဵုဒှ် ကုသၚ်ညိ” ရဴဝွံ ဟီုသ္ဂးမ္ဂး ပ္ဍဲအရာမဟီုသာ်ဂှ် ဘိက္ခုသၚ် ဟွံဂွံအလဵုအသဳရ၊ ဝတ္ထုဒြပ်ဂှ် ဒှ် ကုဘိက္ခုနဳသၚ်ဟေၚ်ရ။
ယွံခမဳတအ် သိက္ခမာန် ။ ပ ။ ယွံခမဳတအ် သာမဏဳဗြဴ ဆိုက်ညောန်ကဵုချိုတ်မ္ဂး “အဲကလိလောန်စဴမ္ဂး ပရိက္ခရာအဲ ဩဝ်ကဵုဒှ် ကုသၚ်ညိ” ရဴဝွံ ဟီုသ္ဂးမ္ဂး ပ္ဍဲအရာမဟီုသာ်ဂှ် ဘိက္ခုသၚ် ဟွံဂွံအလဵုအသဳရ၊ ဝတ္ထုဒြပ်ဂှ် ဒှ်ကုဘိက္ခုနဳသၚ်ဟေၚ်ရ။
ယွံခမဳတအ် ခမဳတြုံ ဆိုက်ညောန်ကဵုချိုတ်မ္ဂး “အဲကလိလောန်စဴမ္ဂး ပရိက္ခရာအဲ ဩဝ်ကဵုဒှ် ကုသၚ်ညိ” ရဴဝွံ ဟီုသ္ဂးမ္ဂး ပ္ဍဲအရာမဟီုသာ်ဂှ် ဘိက္ခုနဳသၚ် ဟွံဂွံအလဵုအသဳရ၊ ဝတ္ထုဒြပ်ဂှ် ဒှ်ကုဘိက္ခုသၚ်ဟေၚ်ရ။
ယွံခမဳတအ် သာမဏဳတြုံ ။ ပ ။ ယွံခမဳတအ် ဥပတြုံ ။ ပ ။ ယွံခမဳတအ် ဥပးဗြဴ ။ ပ ။ ယွံခမဳတအ် ညးသအာၚ်မမိက်ကဵုမွဲမွဲ ဆိုက်ညောန်ကဵုချိုတ်မ္ဂး “အဲကလိလောန်စဴမ္ဂး ပရိက္ခရာအဲ ဩဝ်ကဵုဒှ် ကုသၚ်ညိ” ရဴဝွံ ဟီုသ္ဂးမ္ဂး ပ္ဍဲအရာမဟီုသာ်ဂှ် ဘိက္ခုနဳသၚ် ဟွံဂွံအလဵုအသဳရ၊ ဝတ္ထုဒြပ်ဂှ် ဒှ်ကုဘိက္ခုသၚ်ဟေၚ်ရ။
၄၂၀။ ပ္ဍဲအခိၚ်ဂှ် ဗြဴမွဲတၠ မကေၚ်ဒှ်သၟာလက်ဗန်ဂှ် သ္ပခမဳ ပ္ဍဲဇရေၚ်ခမဳဗြဴဂမၠိုၚ်ရ၊ ခမဳဗြဴဂှ် ညာတ်ဒးခမဳမဍိုန်ကဵုဇြဟတ် ပ္ဍဲဂၠံၚ်တရဴတုဲ တေက်ပဒေါံဖျေံ နကဵုတၞုၚ်ပၞးရ။ “ခမဳဗြဴဂှ်မုဟိုတ် တေက်ပဒေါံဖျေံ ခမဳတြုံရော?” ရဴဝွံ ခမဳဂမၠိုၚ် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်တေက်ခမဳတြုံရ၊ ကုခမဳဗြဴမတေက်ဂှ် ဒးအာပတ်ဒုက္ကဋ်ရ။ ယွံခမဳတအ် ခမဳဗြဴဂှ် ညာတ်ခမဳတြုံမ္ဂး ပါဲကၠေံနူဇမ္ၚောဲတုဲ သွက်ဂွံကဵုဂၠံၚ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဗြဴမွဲတၠ မဒှ်ဃောသာဲခြာဒၟံၚ်ကဵုတြုံတၠသ္ၚိဂှ် ဂွံအာဂၠမ်ဂဝ် နကဵုတြုံသကဲရ၊ ဗြဴဂှ် ကဵုပတုံဖျေံဂၠမ်ဂဝ်တုဲ “ယွံနာဲဗြဴ ဗတိုက်ဖအောဝ်ရ၊ ကောန်ၚာ်သၟတ်မပလီုလဝ်ဂၠမ်ဂဝ်ဝွံ ဩဝ်ရၚ်တၠုၚ် နကဵုဗဗေၚ်ညိ” ရဴဝွံ ဟီုကဵုခမဳဗြဴ မပြာပ်စဴသ္ၚိရ။ ပ္ဍဲအခိၚ်ဂှ် စုတ်ကောန်ၚာ်သၟတ်ဂှ် ပ္ဍဲဗဗေၚ် ဂြောပ်ဗ္ဒန်ကၠေံ နကဵုသ္ၚာတုဲ စ္ဍးအာရ။
ပ္ဍဲအခိၚ်ဂှ် ခမဳမဂေတ်ဂ္ၚေၚ်ပိဏ္ဍပါတ်မွဲဇကု “ပိဏ္ဍပါတ်မကလိဂွံဗွဲကိုပ်ကၠာဂှ် သီုဟဂွံကဵုဒါန် ကုခမဳတြုံကဵုဒှ် ခမဳဗြဴကဵုဒှ်ဂှ် အဲဟွံစရ” ရဴဝွံ ဒဂိုန်ဒ္ဂေတ်လဝ် သာရဏဳယဝတ်ရ။ ပ္ဍဲအခိၚ်ဂှ် ခမဳဂှ် ညာတ်ဒးခမဳဗြဴဂှ်မ္ဂး “ယွံဒေံဗြဴ လၟုဟ်ဩဝ်ဒုၚ်ဂိုၚ်ကေတ်ပိဏ္ဍပါတ်ညိ” ရဴဝွံ သ္ဂးရ။ ယွံတဳလပိုဉ် ဒေါံရ ရဴဝွံ (ဂရၚ်ပတီရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ခမဳဂှ် “ယွံဒေံဗြဴ လၟုဟ်ဩဝ်ဒုၚ်ဂိုၚ်ကေတ် ပိဏ္ဍပါတ်ညိ” ရဴဝွံ သ္ဂးကဵုခမဳဗြဴဂှ်ရ။ ယွံတဳလပိုဉ်ဒေါံရ ရဴဝွံ (ဂရၚ်ပတီရ)။ ယွံဒေံဗြဴ “ပိဏ္ဍပါတ်မကလိဂွံဗွဲကိုပ်ကၠာဂှ် သီုဟဂွံကဵုဒါန် ကုခမဳတြုံကဵုဒှ် ခမဳဗြဴကဵုဒှ်ဂှ် အဲဟွံစရ” ရဴဝွံ ဒဂိုန်ဒ္ဂေတ်လဝ် သာရဏဳယဝတ်ရ။ ယွံဒေံဗြဴ လၟုဟ်ဩဝ်ဒုၚ်ဂိုၚ်ကေတ် ပိဏ္ဍပါတ်ညိ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဂှ် ဟိုတ်နူခမဳဂှ် ဟီုသ္ဂးစဵုကဵုဗလေတ်ဟွံဗၠးဂှ်ရ “ယွံတဳလပိုဉ် ဩဝ်သ္ၚေဝ်ရံၚ် ကောန်ၚာ်သၟတ်မပလီုလဝ်ဂၠမ်ဂဝ် ပ္ဍဲဗဗေၚ်ဝွံညိ၊ လ္ပဟီုလဴဗ္စ ကုညးမမိက်ကဵုမွဲမွဲညိ” ရဴဝွံ (ဂရၚ်ပတီတုဲမ္ဂး) ပတိတ်ထ္ၜးကဵုဗဗေၚ်ရ။ ပ္ဍဲအခိၚ်ဂှ် ခမဳဂှ် “ခမဳဗြဴဂှ် မုဟိုတ်ရၚ်တၠုၚ်ပတိတ် ကောန်ၚာ်သၟတ် မပလီုလဝ်ဂၠမ်ဂဝ် နကဵုဗဗေၚ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ကြဴနူဂှ် ခမဳဂှ်ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ရၚ်တၠုၚ်ပတိတ်ကောန်ၚာ်သၟတ် မပလီုလဝ်ဂၠမ်ဂဝ် နကဵုဗဗေၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်ရၚ်တၠုၚ် ကောန်ၚာ်သၟတ်မပလီုလဝ်ဂၠမ်ဂဝ် နကဵုဗဗေၚ်ရ၊ ကုခမဳဗြဴ မရၚ်တၠုၚ်ဂှ် ဒးအာပတ်ဒုက္ကဋ်ရ။ ယွံခမဳတအ် ခမဳဗြဴဂှ် ညာတ်ခမဳတြုံမ္ဂး တၞဟ်နပတိတ် ထ္ၜးဗဗေၚ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် ညာတ်ခမဳတြုံမ္ဂး ဂးတဂတန်တုဲ ထ္ၜးကဵုတကေတ်ဗဗေၚ်အိုတ်ရ။ “မုဟိုတ် ခမဳဗြဴဆဗ္ဗဂ္ဂဳဂမၠိုၚ် ညာတ်ခမဳတြုံမ္ဂး ဂးတဂတန်တုဲ ထ္ၜးကဵုတကေတ်ဗဗေၚ်အိုတ်ရော?” ရဴဝွံ ခမဳဂမၠိုၚ် ဟီုရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ညာတ်ခမဳတြုံမ္ဂး ဂးတဂတန်တုဲ ဟဂပ်ဝ်ထ္ၜးကဵုတကေတ်ဗဗေၚ်ရ၊ ကုခမဳဗြဴ မထ္ၜးဂှ် ဒးအာပတ်ဒုက္ကဋ်ရ။ ယွံခမဳတအ် ခမဳဗြဴဂှ် ညာတ်ခမဳတြုံမ္ဂး သွက်ဂွံလ္ၚာတုဲ ထ္ၜးဗဗေၚ်ဂှ်ကဵုအခေါၚ်ရ၊ နကဵုစၞမၞုံပ္ဍဲဗဗေၚ်လေဝ် ဒးဘိက်ခမဳတြုံရ ရဴဝွံ (သ္ဂးရ)။
ပ္ဍဲအခိၚ်ဂှ် ပ္ဍဲဍုၚ်သာရဝှ် ကၠဟ်ထောံလဝ် အၚ်္ဂဇာတ်တြုံ ပ္ဍဲသဗာန်ဍာန်ဇၞော်ရ၊ ခမဳဗြဴဂမၠိုၚ် သ္ၚေဝ်ရံၚ်ပစၚ်လဝ် အၚ်္ဂဇာတ်တြုံဂှ်အိုတ်ရ၊ မၞိဟ်ဂမၠိုၚ် သ္ပပွမက္ညာၚ်ထအဴအိုတ်ရ၊ ခမဳဗြဴဂမၠိုၚ် မုက်မတ်ဟွံကျေဝ်ဒှ်အိုတ်ရ။ ကြဴနူဂှ် ခမဳဗြဴဂမၠိုၚ်ဂှ် အာဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်အိုတ်ရ။
ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် သ္ၚေဝ်ရံၚ်ပစၚ်လဝ် အၚ်္ဂဇာတ်တြုံအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ကြဴနူဂှ် ခမဳဗြဴဂမၠိုၚ်ဂှ် ဟီုလဴဗ္စ ဟိုတ်ပရူပရာဂှ် ကုခမဳတြုံဂမၠိုၚ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဟဂပ်ဝ်သ္ၚေဝ်ရံၚ်ပစၚ်လဝ် အၚ်္ဂဇာတ်တြုံရ၊ ကုခမဳဗြဴ မသ္ၚေဝ်ရံၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၄၂၁။ ပ္ဍဲအခိၚ်ဂှ် မၞိဟ်ဂမၠိုၚ် ကဵုဒါန် စၞစသုၚ် ကုခမဳတြုံဂမၠိုၚ်အိုတ်ရ။ ခမဳတြုံဂမၠိုၚ်ကဵုဒါန် ကုခမဳဗြဴဂမၠိုၚ်အိုတ်ရ။ မၞိဟ်ဂမၠိုၚ် “တဳလပိုဉ်ဂမၠိုၚ် ကဵုလဝ်ဒါန် သွက်ဇကုဂွံပြဘိုဂ်ဂှ် မုဟိုတ် ကဵုဒါန်ကုညးသအာၚ်ဂမၠိုၚ်အိုတ်ရော?” ပိုဲညးဂမၠိုၚ်လေဝ် ဟွံတီသွက်ဂွံကဵုတဴဒါန်အိုတ်ဟာ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုလဝ်ဒါန် သွက်ဇကုဂွံပြဘိုဂ်ဂှ် ဟဂပ်ဝ်ကဵုဒါန် ကုညးသအာၚ်ဂမၠိုၚ်ရ၊ ကုခမဳမကဵုဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် စၞစသုၚ် နွံဂၠိုၚ်ဂၠၚ် ကုခမဳတြုံဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံကဵုဒါန် ကုသၚ်ရ ရဴဝွံ (သ္ဂးရ)။
နွံဂၠိုၚ်ဂၠၚ်လောန်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သွက်ဂွံကဵုဒါန် ဒါန်ပုဂ္ဂလိကဂှ်လေဝ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် မၞိဟ်ဂမၠိုၚ် ကဵုဒါန်စၞစသုၚ် ကုခမဳဗြဴဂမၠိုၚ်အိုတ်ရ။ ခမဳဗြဴဂမၠိုၚ် ကဵုဒါန်ကုခမဳတြုံဂမၠိုၚ်အိုတ်ရ။ မၞိဟ်ဂမၠိုၚ် “ခမဳဗြဴဂမၠိုၚ်ကဵုလဝ်ဒါန် သွက်ဇကုဂွံပြဘိုဂ်ဂှ် မုဟိုတ်ကဵုဒါန် ကုညးသအာၚ်ဂမၠိုၚ်အိုတ်ရော?၊ ပိုဲညးဂမၠိုၚ်လေဝ်ဟွံတီ သွက်ဂွံကဵုတဴဒါန်အိုတ်ဟာ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ကဵုလဝ်ဒါန် သွက်ဇကုဂွံပြဘိုဂ်ဂှ် ဟဂပ်ဝ်ကဵုဒါန်ကုညးသအာၚ်ဂမၠိုၚ်ရ၊ ကုခမဳဗြဴမကဵုဂှ် ဒးအာပတ် ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် စၞစသုၚ် နွံဂၠိုၚ်ဂၠၚ် ကုခမဳဗြဴဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံကဵုဒါန် ကုသၚ်ရ ရဴဝွံ (သ္ဂးရ)။
နွံဂၠိုၚ်ဂၠၚ်လောန်ရ၊ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သွက်ဂွံကဵုဒါန် ဒါန်ပုဂ္ဂလိကဂှ်လေဝ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် စၞစသုၚ်မဒေပ်စွံလဝ် နွံဂၠိုၚ်ဂၠၚ် ကုခမဳဗြဴဂမၠိုၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် စၞစသုၚ်မဒေပ်စွံလဝ် ခမဳဗြဴဂမၠိုၚ်ဂှ် ခမဳတြုံဂမၠိုၚ်ကဵုဗဂိန်တုဲ သွက်ဂွံပြဘိုဂ်ဂှ် ကဵုအခေါၚ်ရ ရဴဝွံ (သ္ဂးရ)။
၄၂၂။ ပ္ဍဲအခိၚ်ဂှ် ဘာသၞာသတိက်သၞာဒၟံၚ် နွံဂၠိုၚ်ဂၠၚ် ကုခမဳတြုံဂမၠိုၚ်ရ။ ကုခမဳဗြဴဂမၠိုၚ်ဂှ် ဟွံဂၠိုၚ်ဂၠၚ်ရ။ “ယွံတဳလပိုဉ်တအ် အာပါန်အခေါၚ်ရ၊ တဳလပိုဉ်တအ်ညးဂမၠိုၚ် ဩဝ်ကဵုဘာကုပိုဲဍိက်တအ်ညးဂမၠိုၚ် ဗွဲဂလေံမွဲခဏအိုတ်ညိ” ရဴဝွံ ခမဳဗြဴဂမၠိုၚ် ဗလးကလုတ် ဇရေၚ်ခမဳတြုံဂမၠိုၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သွက်ဂွံကဵုဘာ ကုခမဳဗြဴဂမၠိုၚ် ဗွဲဂလေံမွဲခဏရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴ ဆီဥတုကၠုၚ်ဂမၠိုၚ် ဓလီုဍိုက် ဇံၚ်မဂပ်ဝ်ဒက်လဝ်ဖုန်ကီု ဂတဵုမဂပ်ဝ်ဒက်လဝ်ဖုန်ကီုတုဲလေဝ် ဂဇအ်အိုတ်ရ၊ ဓလီုဍိုက်တုဲလေဝ် တိက်အိုတ်ရ၊ သၞာသတိက် သၞာဒၟံၚ် ကၠေဝ်ဗာန်ဆီဥတုဒှ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် ဓလီုဍိုက် ဇံၚ်မဂပ်ဝ်ဒက်လဝ်ဖုန်ကီု ဂတဵုမဂပ်ဝ်ဒက်လဝ်ဖုန်ကီုတုဲလေဝ် ဟဂပ်ဝ်ဂဇအ်ရ၊ ဓလီုဍိုက်တုဲလေဝ် ဟဂပ်ဝ်တိက်ရ၊ ကုခမဳဗြဴ မဓလီုဍိုက်တုဲဂဇအ် ဓလီုဍိုက်တုဲတိက်ဂှ် ဒးအာပတ်ဒုက္ကဋ်ရ။ ယွံခမဳတအ် ကဵုအခေါၚ် သ္ၚာဒုၚ်ဆီဥတုရ ရဴဝွံ (သ္ဂးရ)။ ဆီကၠေံဗာန် သ္ၚာဒုၚ်ဆီဥတုရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ်ယာတ်ကသအ် သွက်ဂွံကၟာတ်ချအ်ရ၊ ယာတ်ကသအ်သၠောတ်စှေ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် စန်ကၠေံ နကဵုဇုက်တုဲ သွက်ဂွံဒက်စုတ် ပ္ဍဲဒဳဂှ် ကဵုအခေါၚ်ရ ရဴဝွံ (သ္ဂးရ)။
ဇုက်ဒက် ပိုတ်အာရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် ပွမခါတ်ဂၞိန်ကီု ဇုက်ဂ္ညိဂၞိၚ်ကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဗြဴဆဗ္ဗဂ္ဂဳဂမၠိုၚ် အခါကာလအိုတ်သီု ပကၚ်ရၚ်လဝ် ဇုက်ဂ္ညိဂၞိၚ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴခရှ်ဗြဴ ညးမဒုၚ်စသိုၚ်ကာမဂုဏ်ဂမၠိုၚ်ကီုရောၚ်” ရဴဝွံ ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ခမဳဗြဴဂှ် အခါကာလအိုတ်သီု ဟဂပ်ဝ်ပကၚ်ရၚ်လဝ် ဇုက်ဂ္ညိဂၞိၚ်ရ၊ ကုခမဳဗြဴမပကၚ်ရၚ်ဂှ် ဒးအာပတ်ဒုက္ကဋ်ရ၊ ယွံခမဳတအ် ပ္ဍဲအခိၚ်ဆီဥတုကၠုၚ် ကဵုအခေါၚ်ဇုက်ဂ္ညိဂၞိၚ် ကုခမဳဗြဴဥတုကၠုၚ်ရ ရဴဝွံ (သ္ဂးရ)။
✵✵✵ ခဏ်ဒုတိယတုဲရ။ ✵✵✵
