ပိဋကတ်ပိ ဘာသာမန် - ၁၀.၁.၂။ ဂရုဓရ်ဒ္စါံသာ်

၁၀.၁.၂။ ဂရုဓရ်ဒ္စါံသာ်

၄၀၃။ ယွံအာနန္ဒ မဟာပဇာပတိဂေါတမဳဂှ် ယဝ်ရဒုၚ်ဝန်ကဵု ဂရုဓရ်ဂမၠိုၚ် ဒ္စါံသာ်မ္ဂး ပွမဒုၚ်ဝန်ဂှ်ဟေၚ် ဩဝ်ကဵုဒှ်ပယျၚ် သွက်ဂေါတမဳဂှ်ညိ။

ခမဳဗြဴဂှ် ဒှ်ပယျၚ်တုဲ ၜိုန်ဂွံဝသ်ကၠံကီုလေဝ် ဒးသ္ပပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ ကုခမဳ မဒှ်ပယျၚ်ပ္ဍဲတ္ၚဲဂှ်ရ၊ ဓရ်ဝွံလေဝ် ရှ်ေသှ်ေရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၁)

ခမဳဗြဴဂှ် ဟွံထေက်ကဵုလုပ်ဒဂိုန်ဝှ် ပ္ဍဲဘာဟွံမွဲကဵုခမဳတြုံရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၂)

ခမဳဗြဴဂှ် ဇၟာပ်ဇၟာပ်လပါ်ဂိတု နူဇရေၚ်ဘိက္ခုသၚ် ဒးနွံပၟိက် ဒးရာဒနာမိက် ဓရ်ဂမၠိုၚ်ၜါသာ် မတွံဂးပွမသၟာန်ဥပေါသ်ကီု ပွမပြာပ်အာဒုၚ်ဒၠောံဗတောန်ကီုဝွံရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၃)

ခမဳဗြဴဂှ် လိုက်ဝသ်မ္ဂး ဒးဘိက်လဝ် နကဵုဟိုတ်ဂမၠိုၚ် ပိသာ်မတွံဂး ပွမညာတ် ပွမမိၚ် ပွမသၠေဟ်ပၟာ ပ္ဍဲသၚ်ၜါလပါ်ရောၚ်၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၄)

ခမဳဗြဴဂှ် အာစိုပ်အာပတ်သံဃာဒိသေသ်မ္ဂး ဒးဒ္ဂေတ်ပက္ခမာနတ် ပ္ဍဲသၚ်ၜါလပါ်ရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၅)

ကုသိက္ခမာန် မဒ္ဂေတ်လဝ်ဒ္ဂေတ် ပ္ဍဲဓရ်ဂမၠိုၚ်တြဴသာ် လုကဴၜါသၞာံဂမၠိုၚ်တုဲဂှ် ဒးဂၠာဲသ္ၚဳသ္ပပယျၚ် ပ္ဍဲသၚ်ၜါလပါ်ရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၆)

ခမဳဗြဴဂှ် နကဵုဟိုတ်မမိက်ကဵုမွဲမွဲ ဟွံထေက်ကဵုတွေဟ်လက်လဗပ်ပကီုဟီုစုတ် ကဵုခမဳတြုံရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၇)

သ္ပတမ်နူတ္ၚဲဒှ်ခမဳတုဲ ဂပ်ဝ်ကၟာတ်လဝ်အခေါၚ် ခမဳဗြဴတအ်ဟီုဂး ပ္ဍဲလတူခမဳတြုံတအ်ရ၊ ဟဂပ်ဝ်ကၟာတ်လဝ်အခေါၚ် ခမဳတြုံတအ်ဟီုဂး ပ္ဍဲလတူခမဳဗြဴတအ်ရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၈)

ယွံအာနန္ဒ မဟာပဇာပတိဂေါတမဳဂှ် ယဝ်ရဒုၚ်ဝန်ကဵု ဂရုဓရ်ဂမၠိုၚ်ဒ္စါံသာ်မ္ဂး ပွမဒုၚ်ဝန်ဂှ်ဟေၚ် ဩဝ်ကဵုဒှ်ပယျၚ် သွက်ဂေါတမဳဂှ်ညိ ရဴဝွံ (ဟီုသ္ဂးရ)။

ပ္ဍဲအခိၚ်ဂှ် တဳလပိုဉ်အာနန္ဒ ဂိုၚ်ကတ်ကေတ် ဂရုဓရ်ဂမၠိုၚ်ဒ္စါံသာ် ပ္ဍဲဇရေၚ်တဳလမၞုံပိုဉ်ကျာ်တြဲတုဲ ပ္ဍဲကြဴ ပြာပ်အာဇရေၚ် မဟာပဇာပတိဂေါတမဳတုဲမ္ဂး—

“ယွံဂေါတမဳ တၠအဲဂှ် ယဝ်ဒုၚ်ဝန်ကဵု ဂရုဓရ်ဂမၠိုၚ် ဒ္စါံသာ်ဝွံမ္ဂး ပွမဒုၚ်ဝန်ဂှ်ဟေၚ် ဒှ်သ္ပပယျၚ် သွက်တၠအဲရ။

ခမဳဗြဴဂှ် ဒှ်ပယျၚ်တုဲ ၜိုန်ဂွံဝသ်ကၠံကီုလေဝ် ဒးသ္ပပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှ်ေသှ်ေရဴဂဴ ကုခမဳ မဒှ်ပယျၚ်ပ္ဍဲတ္ၚဲဂှ်ရ၊ ဓရ်ဝွံလေဝ် ရှေ်သှေ်ရဴဂဴတုဲ သ္ပအဲပရဲတုဲ သ္ဍိုက်မၠိုက်သၞေံသၞဴတုဲ ပူဇဴတုဲ စဵုကဵုလအိတ်လမျီု ဟွံထေက်ကဵုကလိလောန်ရ။ (၁)

ယွံဂေါတမဳ တၠအဲဂှ် ယဝ်ဒုၚ်ဝန်ကဵု ဂရုဓရ်ဂမၠိုၚ် ဒ္စါံသာ်ဝွံမ္ဂး ပွမဒုၚ်ဝန်ဂှ်ဟေၚ် ဒှ်သ္ပပယျၚ် သွက်တၠအဲရ ရဴဝွံ (ဟီုသ္ဂးရ)။

ယွံတဳလပိုဉ်အာနန္ဒ မၞိဟ်ဗြဴကီု မၞိဟ်တြုံကီု မဍောတ်သွတ် မၜတ်တကတ် မၞုံအလေံမကျိုၚ်ကျဝ် မကြာတ်လဝ်က္ဍိုပ်တုဲဂှ် ကလိဂွံ ပ္ကဴဒကှ်ကဵုဒှ် ပ္ကဴကလအ်ဗြဲ (ပ္ကဴကၟဵုတ္ၚဲ) ကဵုဒှ် ပ္ကဴတၞဴ (ဂမုၚ်) ကဵုဒှ်တုဲ ဒုၚ်ဂိုၚ်ကေတ် နကဵုတဲဂမၠိုၚ်ၜါတုဲ ညံၚ်ရဴစွံပတန်လဝ် ပ္ဍဲလတူက္ဍိုပ် မဒှ်အဝဲမပြဲကီု၊ ယွံတဳလပိုဉ်အာနန္ဒ တုပ်သာ်ဝွံဟေၚ် အဲဍိက် ဒုၚ်ဝန်ကဵု ဂရုဓရ်ဂမၠိုၚ်ဒ္စါံသာ်ဝွံရ၊ ဟွံထေက်ကဵုကလိလောန် စဵုကဵုလအိတ်လမျီုဝွံရ ရဴဝွံ (ဂရၚ်ပတီရ)။

ပ္ဍဲကာလဂှ် တဳလပိုဉ်အာနန္ဒ ပြာပ်အာဇရေၚ် တဳလမၞုံပိုဉ်ကျာ်တြဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ်မွဲဒၞာဲတုဲ “ယွံတဳလမၞုံပိုဉ် မဟာပဇာပတိဂေါတမဳဂှ် ဒုၚ်ဝန်ကဵုဂရုဓရ်ဂမၠိုၚ်ဒ္စါံသာ် ဟွံထေက်ကဵုကလိလောန် စဵုကဵုလအိတ်လမျီုရ၊ မိသွီု တဳလမၞုံပိုဉ်ကျာ်တြဲ ဒှ်အာပယျၚ်တုဲရ” ရဴဝွံ ဂရၚ်ပတီရ။

ယွံအာနန္ဒ မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳတုဲ ယဝ်ဟွံကလိဂွံ ဒဒှ်ခမဳပ္ဍဲ ‘ဓမ္မဝိနယ’ သာသာနာကျာ်တြဲမတွံလဝ်မ္ဂး ‘သာသနာ’ ဒ္ဂေတ်မပြဲဂှ် တန်တဴလုကဴ ဗွဲမလအ်ရ၊ ဓရ်ညးသပ္ပုရိုဟ် တန်တဴလုကဴလ္ၚီသၞာံရ။ ယွံအာနန္ဒ မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ် ခမဳတုဲ ဟိုတ်မကလိဂွံ ဒဒှ်ခမဳပ္ဍဲ ‘ဓမ္မဝိနယ’ သာသာနာကျာ်တြဲမတွံလဝ်ဂှ်ရ ပ္ဍဲကာလလၟုဟ် ‘သာသနာ’ ဒ္ဂေတ်မပြဲဂှ် တန်တဴလုကဴ ဗွဲမလအ်ဟွံမာန်ရ၊ ယွံအာနန္ဒ ပ္ဍဲကာလလၟုဟ် လုကဴမသုန်ကၠံသၞာံဂမၠိုၚ်ဟေၚ် ဓရ်ညးသပ္ပုရိုဟ် ကြက်တုန်တဴရ။

ယွံအာနန္ဒ သ္ၚိမၞိဟ်ဗြဴဂၠိုၚ်တုဲ မၞိဟ်တြုံအောန်တအ်လဵုဟွံဟီု ညံၚ်ရဴကမၠတ် ဍေန်ပၟတ်ပ္ဍဲနုၚ်တုဲ မလေပ်ကၠတ်ဂမၠိုၚ် ပလီုပလာ်လောဲသွာကီု၊ ယွံအာနန္ဒ တုပ်သာ်ဝွံဟေၚ် မာတုဂါမ်ဂှ် ယြဴပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်မွဲ နူအဝေါၚ်ခရှ် လုပ်စိုပ်အဝေါၚ်ခမဳတုဲ ကလိဂွံဒဒှ်ခမဳရ၊ ‘သာသနာ’ ဒ္ဂေတ်မပြဲ တန်တဴလုကဴ ဗွဲမလအ်ဟွံမာန်ရ။

ယွံအာနန္ဒ ပ္ဍဲခံက်သာလဳ မဍိုက်ပေၚ် မဂျိုၚ်ဍိုပ်ဍဴဂှ် ဂကူယဲကြုတ်ဗု (ယဲစၟနော်) ကၠုၚ်စိုပ်မ္ဂး ခံက်သာလဳဂှ် ညံၚ်ရဴတန်တဴ ဗွဲမလအ်ဟွံမာန်ကီု၊ ယွံအာနန္ဒ တုပ်သာ်ဝွံဟေၚ် မာတုဂါမ်ဂှ် ယြဴပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်မွဲ နူအဝေါၚ်ခရှ် လုပ်စိုပ်အဝေါၚ်ခမဳတုဲ ကလိဂွံဒဒှ်ခမဳရ၊ ‘သာသနာ’ ဒ္ဂေတ်မပြဲ တန်တဴလုကဴ ဗွဲမလအ်ဟွံမာန်ရ။

ယွံအာနန္ဒ ပ္ဍဲကၠအ်က္ၜဴ မဍိုက်ပေၚ် မဂျိုၚ်ဍိုပ်ဍဴဂှ် ဂကူကြုတ်ဗကေတ် ကၠုၚ်စိုပ်မ္ဂး ကၠအ်က္ၜဴဂှ် ညံၚ်ရဴတန်တဴ ဗွဲမလအ်ဟွံမာန်ကီု၊ ယွံအာနန္ဒ တုပ်သာ်ဝွံဟေၚ် မာတုဂါမ်ဂှ် ယြဴပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်မွဲ နူအဝေါၚ်ခရှ် လုပ်စိုပ်အဝေါၚ်ခမဳတုဲ ကလိဂွံဒဒှ်ခမဳရ၊ ‘သာသနာ’ ဒ္ဂေတ်မပြဲ တန်တဴလုကဴ ဗွဲမလအ်ဟွံမာန်ရ။

ယွံအာနန္ဒ တြုံဂှ် ညံၚ်ဍာ်ဟွံဂွံကလိလောန်အာဇဵုကၟာတုဲ နူပြဟ်ပြဟ်ဟေၚ် ညံၚ်ရဴမဒးဒက် (တက်) ဇဵုဗၞၚ်ကီု၊ ယွံအာနန္ဒ တုပ်သာ်ဝွံဟေၚ် အဲကျာ်ဂှ် နူပြဟ်ပြဟ်ဟေၚ် ပညပ်လဝ် ဂရုဓရ်ဂမၠိုၚ် ဒ္စါံသာ်သွက်ခမဳဗြဴတုဲရ၊ ဟွံထေက်ကဵုကလိလောန် ဟဵုကဵုလအိတ်လမျီုအိုတ်ရ ရဴဝွံ (သ္ဂးရ)။