ပိဋကတ်ပိ ဘာသာမန် - ၁၀.၁.၁။ ဝတ္ထုမဟာပဇာပတိဂေါတမဳ

၁၀.၁.၁။ ဝတ္ထုမဟာပဇာပတိဂေါတမဳ

၄၀၂။ ပ္ဍဲအခိၚ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာနိဂြောဓာရာမ် ဇရေၚ်ဍုၚ်ကပိလဝှ် လုပ်လၟိဟ်သက္ကရးဂှ် မဟာပဇာပတိဂေါတမဳ ပြာပ်အာဇရေၚ် တဳလမၞုံပိုဉ် ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သီုမဂဇအ်ဒၟံၚ်ဒၞာဲမွဲဂှ်—

“ယွံတဳလမၞုံပိုဉ် အာတ်အခေါၚ်ရ၊ မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳ ပ္ဍဲ ‘ဓမ္မဝိနယ’ သာသနာ ကျာ်တြဲမတွံလဝ်တုဲ မိက်သ္ပခမဳရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။

ယွံဂေါတမဳ ဟွံထေက်ရ၊ တၠအဲ လ္ပဒးဂၞပ် ပွမဒှ်ခမဳ မာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳ ပ္ဍဲ ‘ဓမ္မဝိနယ’ သာသာနာကျာ်တြဲ မတွံလဝ်ညိ ရဴဝွံ (ဟီုသ္ဂးရ)။

မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် မဟာပဇာပတိဂေါတမဳဂှ်—

“ယွံတဳလမၞုံပိုဉ် အာတ်အခေါၚ်ရ၊ မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳတုဲ မိက်သ္ပခမဳတုဲ သ္ပခမဳ ပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ညိ ရဴဝွံ (ဟီုသ္ဂးရ)။

ပ္ဍဲအခိၚ်ဂှ် မဟာပဇာပတိဂေါတမဳဂှ် “တဳလမၞုံပိုဉ်ကျာ်တြဲ ဟွံကဵုအခေါၚ် ပွမဒှ်ခမဳမာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳ ပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်ရ” ရဴဝွံ မၞုံကဵုဒဒိုခ် မၞုံကဵုစိုတ်ဟွံမိပ်ဒှ်တုဲ မၞုံကဵုမုက္ခဝါ ဍာ်ရမတ်မဇွောဝ်ဒှ်တုဲ သီုကဵုလရိုဟ်ယာံ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှ်ေသှ်ေရဴဂဴကၠာ ပါဲစ္ဍးအာရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ကပိလဝှ် ဗၞတ်မမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်ဝေသာလဳတုဲ သ္ပဒတဴတန်ဒၟံၚ် ပ္ဍဲဘာပြာသာဒ်ဇၞော် မၞုံကဵုအထောဋ်သ္ၚိကၠတ် အပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳဂှ်ရ။

ပ္ဍဲအခိၚ်ဂှ် မဟာပဇာပတိဂေါတမဳဂှ် ကုတ်ကၠေံသော်က္ဍိုပ်ဂမၠိုၚ်တုဲ လတက်ကေတ်ယာတ်ဖျောန်လဝ် ဍာ်လွံက်ဂမၠိုၚ်တုဲ မွဲဟာန်ကေုာံကောန်ဝုတ် သၟိၚ်သာကျဝၚ်ဂမၠိုၚ်မဂၠိုၚ် ပ္ၚောံအာဍုၚ်ဝေသာလဳမ္ဂး ဗွဲလၟေၚ်လၟေၚ်ပြာပ်အာစိုပ်ဘာပြာပ်သာဒ်ဇၞော် မၞုံကဵုအထောဋ် သ္ၚိကၠတ် ပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳရ။

ပ္ဍဲအခိၚ်ဂှ် မဟာပဇာပတိဂေါတမဳဂှ် နကဵုဇိုၚ်ဂမၠိုၚ် မခတိုဟ်ခ္ဍတ်ဂုဟ်ဂေန်ဒၟံၚ်ကီု နကဵုဇကုမကၠေဝ်ဒၟံၚ်မၠိုက်ကီု မၞုံကဵုဒဒိုခ် မၞုံကဵုစိုတ်ဟွံမိပ်ဒှ်တုဲ မၞုံကဵုမုက္ခဝါ ဍာ်ရမတ်မဇွောဝ်ဒှ်တုဲ သီုကဵုလရိုအ်ယာံ တန်တဴဒၟံၚ် ပ္ဍဲမ္ၚးပါၚ်မုက်တြၚ်။ တဳလပိုဉ်အာနန္ဒ ညာတ်ကေတ် မဟာပဇာပတိဂေါတမဳ နကဵုဇိုၚ်ဂမၠိုၚ် မခတိုဟ်ခ္ဍတ်ဂုဟ်ဂေန်ဒၟံၚ်ကီု နကဵုဇကုမကၠေဝ်ဒၟံၚ်မၠိုက်ကီု မၞုံကဵုဒဒိုခ် မၞုံကဵုစိုတ်ဟွံမိပ်ဒှ်တုဲ မၞုံကဵုမုက္ခဝါ ဍာ်ရမတ်မဇွောဝ်ဒှ်တုဲ သီုကဵုလရိုအ်ယာံ မတန်တဴဒၟံၚ် ပ္ဍဲမ္ၚးပါၚ်မုက်တြၚ်ဂှ်မ္ဂး “ယွံဂေါတမဳ တၠအဲ မုဟိုတ်နကဵုဇိုၚ်ဂမၠိုၚ် မခတိုဟ်ခ္ဍတ်ဂုဟ်ဂေန်ဒၟံၚ်ကီု နကဵုဇကုမကၠေဝ်ဒၟံၚ်မၠိုက်ကီု မၞုံကဵုဒဒိုခ် မၞုံကဵုစိုတ်ဟွံမိပ်ဒှ်တုဲ မၞုံကဵုမုက္ခဝါ ဍာ်ရမတ်မဇွောဝ်ဒှ်တုဲ သီုကဵုလရိုအ်ယာံဂှ် ဂွံတန်တဴဒၟံၚ် ပ္ဍဲမ္ၚးပါၚ်တြၚ်ဂှ်ရော?” ရဴဝွံ သၟာန်တိုန် မဟာပဇာပတိဂေါတမဳရ။

ယွံတဳလပိုဉ်အာနန္ဒ ဟိုတ်နူတဳလမၞုံပိုဉ်ကျာ်တြဲ ဟွံကဵုအခေါၚ် ပွမဒဒှ်ခမဳမာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ဂှ်ရ တန်တဴဒၟံၚ်ရ ရဴဝွံ (ဂရၚ်ပတီရ)။

ယွံဂေါတမဳ ဒှ်သာ်ဂှ်မ္ဂး ဃောအဲအာတ်အခေါၚ်ဂရၚ်ပတီ တဳလမၞုံပိုန်ကျာ်တြဲ ပွမဒှ်ခမဳမာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ဂှ် တၠအဲတန်ဒၟံၚ်ပ္ဍဲဒၞာဲဝွံ မွဲချိုန်ခဏညိကၠာ ရဴဝွံ (သ္ဂးရ)။

ကြဴနူဂှ် တဳလပိုဉ်အာနန္ဒ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ဒၞာဲမွဲဂှ်—

“ယွံတဳလမၞုံပိုဉ် မဟာပဇာပတိဂေါတမဳဝွံ ‘တဳလမၞုံပိုဉ်ကျာ်တြဲ ဟွံကဵုအခေါၚ် ပွမဒှ်ခမဳ မာတုဂါမ်နူဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ရ’ ရဴဝွံ နကဵုဇိုၚ်ဂမၠိုၚ် မခတိုဟ်ခ္ဍတ်ဂုဟ်ဂေန်ဒၟံၚ်ကီု နကဵုဇကုမကၠေဝ်ဒၟံၚ်မၠိုက်ကီု မၞုံကဵုဒဒိုခ် မၞုံကဵုစိုတ်ဟွံမိပ်ဒှ်တုဲ မၞုံကဵုမုက္ခဝါ ဍာ်ရမတ်မဇွောဝ်ဒှ်တုဲ သီုကဵုလရိုအ်ယာံဂှ် တန်တဴဒၟံၚ် ပ္ဍဲမ္ၚးပါၚ်မုက်တြၚ်ရ၊ အာပါန်အခေါၚ်ရ ယွံတဳလမၞုံပိုဉ် မာတုဂါမ်ဂှ် နူအဝေါၚ်ခရှ် လုပ်စိုပ်အာဝေါၚ်ခမဳတုဲ မိက်ကဵုကလိဂွံ ဒဒှ်ခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။

ယွံအာနန္ဒ ဟွံထေက်ရ၊ တၠအဲ လ္ပဒးဂၞပ် ပွမဒှ်ခမဳ မာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ညိ ရဴဝွံ (ဟီုသ္ဂးရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် တဳလပိုဉ်အာနန္ဒဂှ်—

ယွံအာနန္ဒ ဟွံထေက်ရ၊ တၠအဲ လ္ပဒးဂၞပ် ပွမဒှ်ခမဳ မာတုဂါမ် နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ညိ ရဴဝွံ (ဟီုသ္ဂးရ)။

ကြဴနူဂှ် တဳလမၞုံပိုဉ်အာနန္ဒဂှ် “တဳလမၞုံပိုဉ်ကျာ်တြဲ ဟွံကဵုအခေါၚ် ပွမဒှ်ခမဳ မာတုဂါမ်နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ရ ရဴဝွံတီတုဲ နဟိုတ်မွဲသအာၚ် အဲဂွံအာတ်အခေါၚ် ပွမဒှ်ခမဳ မာတုဂါမ်နူအဝေါၚ်ခရှ် လုပ်စိုပ်အဝေါၚ်ခမဳတုဲ သ္ပခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်မ္ဂး ခိုဟ်သန်ရ” ရဴဝွံ ချပ်တုဲပ္ဍဲကြဴ—

“ယွံတဳလမၞုံပိုဉ် မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်တုဲ ထေက်ကြိုက်ကဵုတၞဟ်နပွမသ္ပဇၞောဝ်မောဝ် သောတာပတ္တိဖိုလ်ကီု သကဒါဂါမိဖိုလ်ကီု အနာဂါမိဖိုလ်ကီု အရဟတ္တဖိုလ်ကီုဟာ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ယွံအာနန္ဒ မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်တုဲ ထေက်ကြိုက်ကဵု တၞဟ်နပွမသ္ပဇၞောဝ်မတ် သောတာပတ္တိဖိုလ်ကီု သကဒါဂါမိဖိုလ်ကီု အနာဂါမိဖိုလ်ကီု အရဟတ္တဖိုလ်ကီုရ ရဴဝွံ (သ္ဂးရ)။

ယွံတဳလမၞုံပိုဉ် မာတုဂါမ်ဂှ် နူအဝေါၚ်ခရှ် လုပ်စိုပ်အဝေါၚ်ခမဳပ္ဍဲ ‘ဓမ္မဝိနယ’ သာသနာကျာ်တြဲမတွံလဝ်တုဲ ထေက်ကြိုက်ကဵု တၞဟ်နပွမသ္ပဇၞောဝ်မတ် သောတာပတ္တိဖိုလ်ကီု သကဒါဂါမိဖိုလ်ကီု အနာဂါမိဖိုလ်ကီု အရဟတ္တဖိုလ်ကီုမ္ဂး ယွံတဳလမၞုံပိုဉ် မဟာပဇာပတိဂေါတမဳဂှ် ဂုဏ်ဂၠိုၚ်ဒၟံၚ်ရ၊ ဒှ်မိသွီုကျာ်တြဲရ၊ စဵုစိုပ်အခိၚ် အာကဵုဇိုၚ်မာန် ညးမမြိမြန်လွဳဝတ်လဝ်ရ၊ ညးမဗမဴလဝ်တှ်ရ၊ မိစဴအာသွဝ်တုဲ ညးဗမဴလဝ်ဍာ်တှ်ကဵုကျာ်တြဲရ၊ ယွံတဳလမၞုံပိုဉ် အာတ်အခေါၚ်ရ၊ မာတုဂါမ်ဂှ် နူဝေါၚ်ခရှ် လုပ်စိုပ်အဝေါၚ်ခမဳတုဲ မိက်ကဵုကလိဂွံ ဒဒှ်ခမဳပ္ဍဲ ‘ဓမ္မဝိနယ’ သာသနာကျာ်တြဲ မတွံလဝ်ရ” ရဴဝွံ (ဂရၚ်ပတီရ)။