ပါတိမောက္ခဋ္ဌပနက္ခန္ဓကဂှ် ဗွဲခမ္ဍန်
ပ္ဍဲတ္ၚဲဥပေါသ် ယြဴခမဳမယုတ်မာမၞုံဗၞတ်မွဲ ဟွံတိတ်ရ၊ တဳလပိုဉ်မောဂ္ဂလာန် ဂပ်ဝ်ဗက်ပတိတ်ရ၊ အမ်သဝ် ပ္ဍဲသာသနာဒ္စါံသာ်။
လၟေၚ်သဝ် အတိုၚ်လၟေၚ်သိက္ခာကီု ပွမတန်တဴ ဗွဲသဘဴကီု ပွမကလိလောန်ဟွံမာန်ကီု ပွမဗိုတ်ပတိုန် ဇွသမ္အုဲကီု သၚ် ဗက်ပတိတ် ဒုဿဳလကီု ၜဳသၟတ် ကြုၚ်သၟတ်ဂမၠိုၚ် ပွမဟွံသၠး ကၠေံအိုတ်ရ။
ပွမဇွောဝ်လုပ် ပွမၜိုဟ်သတိုတ်ကီု ရှ်သာမွဲဂကူဓဝ် ဝိမုတ္တိရသကီု ပ္ဍဲဓမ္မဝိနယ မၞုံကဵုရတ်မဂၠိုၚ်ကီု သတ်မပတမ် ကတိမိ ပူဂိုလ်အရဳဂမၠိုၚ်ဒ္စါံကီု။
သ္ပဥပမာမှာသၟိဒ်တုဲ စွံလဝ်ဂုဏ် ပ္ဍဲသာသနာရ၊ ပ္ဍဲတ္ၚဲဥပေါသ် ပွမထ္ၜးပါတိမုက်ကီု ညးမမိက်ကဵုမွဲမွဲ ဟွံတီပိုဲညးဂမၠိုၚ်ကီု။
ပြဟ်ပြဟ်ဟေၚ် ပွမဂရိုဟ်ကီု ပွမတန်ဒေါံ ပါတိမုက် မွဲဂကူ ၜါဂကူ ပိဂကူ ပန်ဂကူ မသုန်ဂကူ တြဴဂကူ ထပှ်ဂကူ ဒ္စါံဂကူ စှ်ဂကူကီု။
သဳလ ဒ္ဂေတ် ကွေတ်ကီု ပွမဂယိုၚ်လမျီု ပွမတွံ ပ္ဍဲပွမပါ်ပရအ်ပန်ပြကာကီု ပါရာဇ်ကီု သံဃာဒိသေသ်ကီု ပါဲစိုတ်ကီု ပါဋိဒေသနိက်ကီု။
ဒုက္ကဋ်ကီု ပ္ဍဲပွမပါ်ပရအ်မသုန်ပြကာကီု ပွမသဳလဒ္ဂေတ်လီုလာ်ကီု သ္ဂုတ်သွာတ်မဟဂွံသ္ပဏီကီု သ္ဂုတ်သွာတ်မသ္ပတုဲကီု ပ္ဍဲပွမပါ်ပရအ်တြဴပြကာကီု အစဳရေၚ်မဗဗွဲကီု။
ပါရာဇ်ကီု သံဃာဒိသေသ်ကီု ထုလ္လစ္စယ်ကီု ပါဲစိုတ်ကီု ပါဋိဒေသနိက်ကီု ဒုက္ကဋ်ကီု ဒုဗ္ဘာသိုတ်ကီု ဂပ်ဝ်တွံ ပ္ဍဲသွက်ထပှ်ပြကာရ။
ပွမသဳလဒ္ဂေတ်လီုလာ်ကီု ကွေတ်ပွဂယိုၚ်လမျီုလီုလာ်ကီု ဒ္စါံပြကာမွဲဟာန်ကေုာံ သ္ဂုတ်သွာတ်မသ္ပတုဲ သ္ဂုတ်သွာတ်မဟွံဂွံသ္ပဏီကီု ပ္ဍဲသဳလဒ္ဂေတ်ကွေတ် သ္ဂုတ်သွာတ်မဟဂွံ သ္ပဏီကီု သ္ဂုတ်သွာတ်မသ္ပတုဲကီု သ္ဂုတ်သွာတ်မသ္ပတုဲ ဟဂွံသ္ပဏီကီု ရဴဝွံ ဗွဲအတိုၚ်မဗဗွဲဍာံစၟတ် ကျာ်တြဲ ဂပ်ဝ်တွံလဝ် ဒ္စိတ်ဂကူဂမၠိုၚ်အိုတ်ရ။
ခမဳစှေ်ပါရာဇ်ကီု သ္ဂုတ်သွာတ်မဟွံစိုပ်ဒတုဲဏီကီု ခမဳမဖျေံသိက္ခာကီု တုပ်သၟဟ်သာ်ဂှ် သ္ဂုတ်သွာတ်မဟွံစိုပ်ဒတုဲဏီကီု ပွမပြာပ်အာကီု ပွမဟွံဂိုၚ်ကေတ်မွဲလှ်ေပၠန်ကီု ဂလာန်မဂိုၚ်ကေတ်မွဲလှေ်ပၠန်ကီု။
ပ္ဍဲပွမသဳလဒ္ဂေတ်လီုလာ်ကီု ယြဴယြဴပ္ဍဲပွမကွေတ်လီုလာ်ကီု ပွမညာတ် ပွမမိၚ် ပွမသၠေဟ်ပၟာကီု နတၟေၚ်ပကာရစှ်သာ်ဝွံ ဩဝ်တီကေတ် ပွမတန်ဒေါံပါတိမုက်ဂှ်အိုတ်ညိ။
ခမဳမွဲဇကု ညာတ်ခမဳမွဲဇကုရ၊ ခမဳသအာၚ်လေဝ် ညာတ်တုဲ ဟီုလဴထ္ၜးရ၊ ခမဳဂှ်ဟေၚ် ဟီုလဴထ္ၜးရ၊ မိၚ်ဂလာန်ဂှ်တုဲ ခမဳဂှ် တန်ဒေါံပါတိမုက်ရ။
သၟိၚ် ကမၠတ် ပၟတ် ဍာ် ကလော်လကိုဟ် သတ်ဒမြိဟ် ဇြုံဂဂဳအယဴ လမျီုဒ္ဂေတ်မပြဲ ပၞောဝ်အန္တရာယ်ဂမၠိုၚ်စှ်သာ် ဟိုတ်နူအန္တရာယ်မွဲမွဲသာ် ကတဵုအာရ။
ပ္ဍဲဘာကီု ပ္ဍဲဘာသအာၚ်ကီု ပွမတန်ဒေါံ မဗဗွဲဓရ် ပွမတန်ဒေါံ ဟွံဗဗွဲဓရ် ရဴဝွံ ဩဝ်တီကေတ် ဗွဲအတိုၚ်လၟေၚ်အိုတ်ညိ။
အခိၚ်မဗဗွဲ ပွမဍာံစၟတ် ပွမစပ်ကေုာံဖဵုကီု ကလိဂွံဟာ ဟွံကလိဂွံဟာ ဒ္ဂေတ်ဇကုပါၚ်ကီု မေတ္တာကီု ပွမလၟိၚ်လညာတ် ဂၠိုၚ်ကီု ပါတိမုက်ၜါဂမၠိုၚ်ကီု။
အခိၚ်မဗဗွဲ နဂလာန်မဍာံစၟတ်ကီု နဂလာန်မဍိုန်ဍောတ်ကီု နဂလာန်မစပ်ကေုာံဖဵုကီု နမေတ္တာစိုတ်ကီု ဒးစောဒနာရ၊ ကုခမဳမစောဒနာ ဗွဲဟွံဍာံစၟတ် အရာမပါဲပၠေၚ်ကၠေံ ပွမသၠိုက်သ္ၚောံစိုတ်ဟွံမာန် ညးဒးဒုၚ်စောဒနာလေဝ် တုပ်သၟဟ်သာ်ဂှ်ရောၚ်။ ခမဳစောဒနာ နဂလာန်ဍာံစၟတ် ခမဳဒးဒုၚ်စောဒနာ ပါဲပၠၚ်ကၠေံ ပွမသၠိုက်သ္ၚောံစိုတ်မာန်ရ၊ ပွမဆာန်ဍူ ပွမနွံပၟိက်ဒတုဲမြမောဝ် ပွမၚ်မွဲ ပွမကဵုဒၠိုက်ကတဵု ပွမသ္ပတူရူဂတကဵု (ဝိနယ်)။
ရဴဝွံ ကျာ်တြဲ ထ္ၜးကဵုဒ္ဂေတ်ဝတ် ကုခမဳစောဒကရ၊ ပ္ဍဲပွမဍာံစၟတ်ကီု ပ္ဍဲပွမဟွံထေဲပၞောဝ်ကီု သဘဴဓမ္မတာ ခမဳဒးဒုၚ်စောဒနာဟေၚ် ဒးဒ္ဂေတ်ရောၚ်။ ဣဝွံတုန် ဗွဲခမ္ဍန်တုဲရ။
☀︎ ☀︎ ☀︎ ပါတိမောက္ခဋ္ဌပနက္ခန္ဓကတုဲရ။ ☀︎ ☀︎ ☀︎
