ပိဋကတ်ပိ ဘာသာမန် - ၁.၆.၄။ ဒ္ဂေတ်ဝတ်ပန်စှော်ပိသာ်

၁.၆.၄။ ဒ္ဂေတ်ဝတ်ပန်စှော်ပိသာ်

၆၀။ ယွံခမဳတအ် ခမဳ မဒးဒုၚ်သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ်ဂှ် ဒးဒ္ဂေတ်ဗွဲမဒးရးရ။ ကြက်သ္ဂးဂတဝွံတုန် ပ္ဍဲအရာမဒ္ဂေတ်ဂှ် ဒ္ဂေတ်ဝတ်မဒးဒ္ဂေတ်သ္ပဗွဲမဒးရးရောၚ်― (သ္ပအ္စာဥပဇ္ၛာယ်တုဲ) ဟဂပ်ဝ်ပကဵုပယျၚ်ရ၊ ဟဂပ်ဝ်ကဵုနိဿယရ၊ ဟဂပ်ဝ်ကဵုသာမဏဳကၠောန်ၜိုတ်ရ၊ ဟဂပ်ဝ်သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ၜိုန်ဂွံဒုၚ်သၟိတ်လေဝ် ဟဂပ်ဝ်ကဵုဩဝါဒကဵုခမဳဗြဴဂမၠိုၚ်ရ၊ ဟွံထေက်ကဵုအာစိုပ် အာပတ်ဒှ်ဟိုတ် သၚ်သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ်ရ၊ အာပတ်သအာၚ်တၠုၚ်လအာတုပ်ကဵုဂှ်ကီု အာပတ်ယုတ်မာ ကြံၚ်မ္ၚိုဟ်လောန်လတူဂှ်ကီု ဟွံထေက်ကဵုအာစိုပ်ရ၊ ဟွံထေက်ကဵုဟီုဂရိုဟ်ကမ်ရ၊ ဟွံထေက်ကဵုဟီုဂရိုဟ် ခမဳသ္ပကမ်ဂမၠိုၚ်၊ ဟွံထေက်ကဵုသာယျေန် ပွမလ္ၚောဝ် ပွမဒစးဒုၚ်တၠုၚ် တရဴ ပွမပၚ်ခၠအ်သၟိပ်တဲ ပွမသ္ပရှေ်သှေ်ရဴဂဴ ပွမရၚ်တၠုၚ်တူရူသၞာ ‘ပွမလးကဵုသၞာ’ ပွမရၚ်တၠုၚ်တူရူ သၞာသတိက် ‘ပွမလးကဵုသၞာသတိက်’ ဍာ်ကြဴဇိုၚ် ဂတဵုကြာတ်ဇိုၚ် ကဝေက်ပေါတ်ဇိုၚ် ပွမဟောဝ်ဂိုၚ် ကေတ်ဗဗေၚ်သ္ၚာ ပ္ဍဲအရာဟုံဍာ် ပွမတုဟ်ပေါတ်မိဟ် ပ္ဍဲစၞိန်စး ဒဒက်တဴခမဳပကတတ်ရ၊ ဟွံထေက်ကဵု စောတ်စောဲ ခမဳပကတတ် နပွမသဳလလီုလာ်ရ၊ ဟွံထေက်ကဵုစောတ်စောဲ နပွမဂယိုၚ်လမျီုလီုလာ်ရ၊ ဟွံထေက်ကဵုသ္ပ ညံၚ်ခမဳရၚ်သကအ် ဂွံပါ်ဒကးရ၊ ဟွံထေက်ကဵုပကၚ်ရၚ် ယာတ်မဒှ်ဇၞောဝ်လာံခရှ်ဂမၠိုၚ်ရ၊ ဟွံထေက်ကဵုပကၚ်ရၚ်ယာတ် မဒှ်ဇၞောဝ်အလာံတဳဂမၠိုၚ်ရ၊ ဟွံထေက်ကဵုသိပ်ဂၠိပ်နိဿဲဗ္ဒာဲကဵုတဳဂမၠိုၚ်ရ၊ ဒးသိပ်ဂၠိပ်နိဿဲဗ္ဒာဲကဵုခမဳဂမၠိုၚ်ရ၊ ဒးဒ္ဂေတ်လ္ၚတ် ပ္ဍဲဒ္ဂေတ်ဝတ်ခမဳရ၊ ဟွံထေက်ကဵုပဒတဴမွဲစွံ ကေုာံခမဳပကတတ် ပ္ဍဲဘာမၞုံကဵုကၟဳမွဲဓဝ်ရ၊ ဟွံထေက်ကဵုပဒတဴ ပ္ဍဲမပတမ်ဇြပ်တာန်ဆံၚ် မၞုံကဵုကၟဳမွဲဓဝ်ရ၊ ညာတ်ခမဳပကတတ်မ္ဂး ဒးကတဵုနူဒၞာဲရ၊ ပ္ဍဲအပ္ဍဲဘာကီု ပ္ဍဲမ္ၚးဘာကီု ဟွံထေက်ကဵုချုက်ချာဲ ခမဳပကတတ်ရ၊ ဟွံထေက်ကဵုတန်ဒေါံဥပေါသ် ခမဳပကတတ်ရ၊ ဟွံထေက်ကဵုတန်ဒေါံ ပဝါရဏာရ၊ ဟဂပ်ဝ် ပွမဒၠောံဗတောန်ရ၊ ဟွံထေက်ကဵုစွံပတန် ပ္ဍဲအရာဇၞော်သကိုပ်သကရ၊ ဟွံထေက်ကဵုအာတ်အခေါၚ်ရ၊ ဟွံထေက်ကဵုစောဒနာရ၊ ဟွံထေက်ကဵု ကဵုဗှ်ဗၞုဟ်ရ၊ ဟွံထေက်ကဵုစိုန်သကီုနှဴရဴကေုာံခမဳပကတတ်ဂမၠိုၚ်ရ၊ (ဣဝွံတုန် ဒ္ဂေတ်ဝတ် မဒးဒ္ဂေတ်သ္ပဗွဲမဒးရးရောၚ်။)

✤ပ္ဍဲဥက္ခေပနဳယကမ် မဂပ်ဝ်ဗက်ပတိတ် ဟိုတ်ပွမဟွံဇအုဲဇဗအာပတ် ဒ္ဂေတ်ဝတ်ပန်စှော်ပိသာ် တုဲရ။✤

၆၁။ ပ္ဍဲအခိၚ်ဂှ် သၚ် သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံ ကေုာံသၚ် ကုခမဳဆန္နရ၊ ခမဳဆန္န သၚ်မသ္ပလဝ်ဥက္ခေပနဳယကမ် ဟိုတ်ပွမဟွံဇအုဲဇဗ အာပတ်ဂှ် နူဘာဂှ် က္ညအာဘာသအာၚ်ရ။

ခမဳဂမၠိုၚ် မၞုံပ္ဍဲဘာဂှ် ဟွံလ္ၚောဝ်အိုတ်ရ၊ ဟွံဒစးဒုၚ်တၠုၚ်တရဴအိုတ်ရ၊ ဟွံသ္ပပွမပၚ်ခၠအ်သၟိပ်တဲအိုတ်ရ၊ ဟွံသ္ပပွမရှေ်သှေ်ရဴဂဴအိုတ်ရ၊ ဟွံကၠောန်ၜိုတ်ဗွဲမဒးရးအိုတ်ရ၊ ဟွံသ္ပအဲပရဲအိုတ်ရ၊ ဟွံသၞေံသၞဴအိုတ်ရ၊ ဟွံပူဇဴအိုတ်ရ။

ခမဳဂမၠိုၚ်ဂှ် ဟိုတ်မဟွံကၠောန်ၜိုတ်ဗွဲမဒးရး ဟွံသ္ပအဲပရဲ ဟွံသၞေံသၞဴ ဟွံပူဇဴအိုတ်ဂှ်ရ၊ ပွမဟွံရှေ်သှေ်ရဴဂဴ ဂပ်ဝ်ပ္ဍဵုပ္ဍိုက်ရာန်သကိုတ်ဒှ်တုဲ ခမဳဆန္နဂှ် နူဘာဂှ်လေဝ် က္ညအာဘာသအာၚ်ပၠန်ရ။

ခမဳဂမၠိုၚ် မၞုံပ္ဍဲဘာဂှ်လေဝ် ဟွံလ္ၚောဝ်အိုတ်ရ၊ ဟွံဒစးဒုၚ်တၠုၚ်တရဴအိုတ်ရ၊ ဟွံသ္ပပွမပၚ်ခၠအ်သၟိပ်တဲအိုတ်ရ၊ ဟွံသ္ပပွမရှေ်သှေ်ရဴဂဴအိုတ်ရ၊ ဟွံကၠောန်ၜိုတ်ဗွဲမဒးရးအိုတ်ရ၊ ဟွံသ္ပ အဲပရဲအိုတ်ရ၊ ဟွံသၞေံသၞဴအိုတ်ရ၊ ဟွံပူဇဴအိုတ်ရ။

ခမဳဂမၠိုၚ် မၞုံပ္ဍဲဘာဂှ်လေဝ် ဟွံလ္ၚောဝ်အိုတ်ရ၊ ဟွံဒစးဒုၚ်တၠုၚ်တရဴအိုတ်ရ၊ ဟွံသ္ပပွမပၚ်ခၠအ်သၟိပ်တဲအိုတ်ရ၊ ဟွံသ္ပပွမရှေ်သှေ်ရဴဂဴအိုတ်ရ၊ ဟွံကၠောန်ၜိုတ်ဗွဲမဒးရးအိုတ်ရ၊ ဟွံသ္ပအဲပရဲအိုတ်ရ၊ ဟွံသၞေံသၞဴအိုတ်ရ၊ ဟွံပူဇဴအိုတ်ရ။

ခမဳဂမၠိုၚ်ဂှ် ဟိုတ်မဟွံကၠောန်ၜိုတ် ဗွဲမဒးရး ဟွံသ္ပအဲပရဲ ဟွံသၞေံသၞဴ ဟွံပူဇဴအိုတ်ဂှ်ရ၊ ပွမဟွံရှေ်သှေ်ရဴဂဴ ဂပ်ဝ်ပ္ဍဵုပ္ဍိုက်ရာန်သကိုတ်ဒှ်တုဲ ခမဳဆန္နဂှ် ကလေၚ်ကၠုၚ်ဍုၚ်ကောသမ္ဗဳပၠန်ရ။

ခမဳဆန္နဂှ် ဒ္ဂေတ်တဴ ဗွဲမဒးရးရ၊ ဖျေံကၠေံတသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ ပြာပ်အာဇရေၚ်ခမဳဂမၠိုၚ်တုဲ “ယွံကောန်တၠတအ်” အဲဍိက်သၚ်မသ္ပလဝ် ဥက္ခေပနဳယကမ် ဟိုတ်ပွမဟွံဇအုဲဇဗအာပတ်ဂှ် ဒ္ဂေတ်တဴဗွဲမဒးရးရ၊ ဖျေံကၠေံတသော်မာန်ရ ‘မာန်စှေ်’ ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်ရ၊ အဲဍိက် ပသာ် ဒးဒ္ဂေတ်သ္ပဏီရော?” ရဴဝွံ ဂရၚ်ပတီသၟာန်ရ။

ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဒှ်သာ်ဂှ်မ္ဂး သၚ် ဩဝ်ကဵုလလမ်ကၠေံ ဥက္ခေပနဳယကမ် (မသ္ပလဝ်) ဟိုတ်ပွမဟွံဇအုဲဇဗအာပတ် ကုခမဳဆန္နညိ။