၁.၃.၄။ ဒ္ဂေတ်ဝတ် ပ္ဍဲပဗ္ဗာဇနဳယကမ်စှ်ဒ္စါံသာ်
၂၈။ ယွံခမဳတအ် ခမဳ မဒးဒုၚ်သ္ပပဗ္ဗာဇနဳယကမ်ဂှ် ဒးဒ္ဂေတ်ဗွဲမဒးရးရ―
ကြက်သ္ဂးဂတဝွံတုန်― ပ္ဍဲအရာမဒ္ဂေတ်ဂှ် ဒ္ဂေတ်ဝတ်မဒးဒ္ဂေတ်သ္ပဗွဲမဒးရးရောၚ်― (သ္ပအ္စာဥပဇ္ၛာယ်တုဲ) ဟဂပ်ဝ်ပကဵုပယျၚ်ရ၊ ဟဂပ်ဝ်ကဵုနိဿယရ၊ ဟဂပ်ဝ်ကဵုသာမဏဳကၠောန်ၜိုတ်ရ၊ ဟဂပ်ဝ်သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ၜိုန်ဂွံဒုၚ်သၟိတ်လေဝ် ဟဂပ်ဝ်ကဵုဩဝါဒကဵုခမဳဗြဴဂမၠိုၚ်ရ၊ ဟွံထေက်ကဵုအာစိုပ် အာပတ်မဒှ်ဟိုတ်သ္ပပဗ္ဗာဇနဳယကမ်ရ၊ အာပတ်သအာၚ်တၠုၚ်လအာမတုပ်ကဵုဂှ်ကီု အာပတ်ယုတ်မာ ကြံၚ်မ္ၚိုဟ်လောန်လတူဂှ်ကီု ဟွံထေက်ကဵုအာစိုပ်ရ၊ ဟွံထေက်ကဵုဟီုဂရိုဟ်ကမ်ရ၊ ဟွံထေက်ကဵုဟီုဂရိုဟ် ခမဳသ္ပကမ်ဂမၠိုၚ်ရ၊ ဟွံထေက်ကဵုတန်ဒေါံဥပေါသ် ခမဳပကတတ်ရ၊ ပဝါဏာလေဝ် ဟွံထေက်ကဵုတန်ဒေါံရ၊ ဟဂပ်ဝ်သ္ပ ပွမဒၠောံဗတောန်ရ၊ ဟွံထေက်ကဵုစွံပတန် ပ္ဍဲအရာဇၞော်သကိုပ်သကရ၊ ဟွံထေက်ကဵုအာတ် အခေါၚ်ရ၊ ဟွံထေက်ကဵုစောဒနာရ၊ ဟွံထေက်ကဵု ကဵုဗှ်ဗၞုဟ်ရ၊ ဟွံထေက်ကဵု စိုန်သကီုနှဴရဴ ကေုာံခမဳပကတတ်ဂမၠိုၚ်ရ၊ (ဣဝွံတုန် ဒ္ဂေတ်ဝတ် မဒးဒ္ဂေတ်သ္ပ ဗွဲမဒးရးရောၚ်။)
✤ ဒ္ဂေတ်ဝတ် ပ္ဍဲပဗ္ဗဇနဳယကမ်စှ်ဒ္စါံသာ် တုဲရ။ ✤
၂၉။ ပ္ဍဲအခိၚ်ဂှ် ဂကောံခမဳမၞုံပဓာန်ဍေံ သာရိပိုတ် မောဂ္ဂလာန် က္ညအာကဳဋာဂိရိတုဲ သ္ပပဗ္ဗာဇနဳယကမ် ‘ပွမဗက်ဗ္ဒဴကၠေံ’ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ ရ၊ ၜိုန်သၚ်သ္ပပဗ္ဗာဇနဳယကမ် ‘ပွမဗက်ဗ္ဒဴကၠေံ’ လေဝ်ခမဳ (အဿဇိပုနဗ္ဗသုက) ဂမၠိုၚ်ဂှ် ဟွံဒ္ဂေတ်ဗွဲမဒးရးအိုတ်ရ၊ ဟွံဗလာပ်ဖျေံ တသော်မာန်အိုတ်ရ၊ ဟွံဒ္ဂေတ်တဴ ဒ္ဂေတ်ဝေတ်မဒှ်ဟိုတ်တိတ်ဗၠးနူကမ်အိုတ်ရ၊ ဟွံကလအ် ခမဳဂမၠိုၚ်အိုတ်ရ၊ တ္ၜေဟ်လက်အိုတ်ရ၊ လဗပ်ပကီုဟီုစုတ်အိုတ်ရ၊ ကဵုအာစိုပ် ဒဒှ်ညးဗက်စ ဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ရ၊ ဌာန်သအာၚ်လေဝ် ပါဲစ္ဍးအာအိုတ်ရ၊ ရာမ်လေဝ် ရာမ်တိတ်ခရှ်အိုတ်ရ။
ခမဳပၟိက်အောန်ဂမၠိုၚ်ဂှ် “သၚ်သီုသ္ပလဝ်ပဗ္ဗာဇနဳယကမ်ဂှ် ခမဳ (အဿဇိပုနဗ္ဗသုက) ဂမၠိုၚ်ဂှ် ဟွံဒ္ဂေတ်ဗွဲမဒးရးအိုတ်ရော? ဟွံဗလာပ်ဖျေံ တသော်မာန်အိုတ်ရော? ဟွံဒ္ဂေတ်တဴ ဒ္ဂေတ်ဝတ်မဒှ်ဟိုတ်တိတ်ဗၠးနူကမ်အိုတ်ရော? ဟွံကလအ် ခမဳဂမၠိုၚ်အိုတ်ရော? တ္ၜေဟ်လက်အိုတ်ရော? လဗပ်ပကီုဟီုစုတ်အိုတ်ရော? ကဵုအာစိုပ် ဒဒှ်ညးဗက်စ ဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ရော? ဌာန်သအာၚ်လေဝ် ပါဲစ္ဍးအာအိုတ်ရော? ရာမ်လေဝ်ရာမ်တိတ်ခရှ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲမ္ဂး―
“ယွံခမဳတအ် သၚ်သီုသ္ပလဝ်ပဗ္ဗာဇနဳယကမ်ဂှ် ခမဳ (အဿဇိပုနဗ္ဗသုက) ဂမၠိုၚ်ဂှ်ဟွံဒ္ဂေတ် ဗွဲမဒးရးအိုတ်ရ၊ ဟွံဗလာပ်ဖျေံ တသော်မာန်အိုတ်ရ၊ ဟွံဒ္ဂေတ်တဴ ဒ္ဂေတ်ဝတ်မဒှ် ဟိုတ်တိတ်ဗၠးနူကမ်အိုတ်ရ၊ ဟွံကလအ်ခမဳဂမၠိုၚ်အိုတ်ရ၊ တ္ၜေဟ်လက်အိုတ်ရ၊ လဗပ်ပကီုဟီုစုတ်အိုတ်ရ၊ ကဵုအာစိုပ် ဒဒှ်ညးဗက်စ ဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ရ၊ ဌာန်သအာၚ်လေဝ် ပါဲစ္ဍးအာအိုတ်ရ၊ ရာမ်လေဝ်ရာမ်တိတ်ခရှ်အိုတ်ရ ဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ခမဳဂမၠိုၚ်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံခမဳတအ် ဟွံထေက်ရ ။ ပ ။ သၚ်သီုသ္ပလဝ်ပဗ္ဗာဇနဳယကမ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ဟွံဒ္ဂေတ်ဗွဲမဒးရးအိုတ်ရော? ဟွံဗလာပ်ဖျေံ တသော်မာန်အိုတ်ရော? ဟွံဒ္ဂေတ်တဴ ဒ္ဂေတ်ဝတ်မဒှ်ဟိုတ်တိတ်ဗၠး နူကမ်အိုတ်ရော်? ဟွံကလအ်ခမဳဂမၠိုၚ်အိုတ်ရော? တ္ၜေဟ်လက်အိုတ်ရော? လဗပ်ပကီုဟီုစုတ်အိုတ်ရော? ကဵုအာစိုပ် ဒဒှ်ညးဗက်စ ဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ရော? ဌာန်သအာၚ်လေဝ် ပါဲစ္ဍးအာအိုတ်ရော? ရာမ်လေဝ် ရာမ်တိတ်ခရှ်အိုတ်ရော? ယွံခမဳတအ် (ပွခမဳဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုပလာန်ဓရ်တုဲ သ္ဂးကဵုခမဳဂမၠိုၚ်ရ။ ယွံခမဳတအ် ဒှ်သာ်ဂှ်မ္ဂး သၚ် ဩဝ်ကဵုလလမ်ကၠေံ ပဗ္ဗာဇနဳယကမ်ညိ။
