၁.၁.၅။ ဟိုတ်မဟွံထေက်ကဵုလလမ်စှ်ဒ္စါဲသာ်
၈။ ပ္ဍဲအခိၚ်ဂှ် သၚ် သ္ပတဇ္ဇနဳယကမ် ကုခမဳပဏ္ဍုက လောဟိတကဂမၠိုၚ်ရ၊ ခမဳဂမၠိုၚ် သၚ်မသ္ပလဝ် တဇ္ဇနဳယကမ်ဂှ် ဒ္ဂေတ်တဴ ဗွဲမဒးရးအိုတ်ရ၊ ဖျေံကၠေံတသော်မာန်ရ ‘မာန်စှေ်’ အိုတ်ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠးနူကမ်အိုတ်ရ၊ ပြာပ်အာဇရေၚ်ခမဳဂမၠိုၚ်တုဲမ္ဂး―
“ယွံကောန်တၠတအ် ဟိုတ်နူသၚ်သ္ပလဝ် တဇ္ဇနဳယကမ်ဂှ်ရ ပိုဲညးဂမၠိုၚ် ဒ္ဂေတ်တဴ ဗွဲမဒးရးအိုတ်ရ၊ ဖျေံတေံတသော်မန်ရ ‘မာန်စှေ်’ အိုတ်ရ၊ ဒ္ဂေတ်တဴ ဒ္ဂေတ်ဝတ်ဒှ်ဟိုတ်တိတ်ဗၠး နူကမ်အိုတ်ရ၊ ပိုဲညးဂမၠိုၚ် ပသာ်ထေက်ကဵုဒ္ဂေတ်သ္ပရော?” ရဴဝွံ သၟာန်သၟုက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဥ်ကျာ်တြဲအိုတ်ရ။ ယွံခမဳတအ် ဒှ်သာ်ဂှ်မ္ဂး သၚ် ဩဝ်ကဵုလလမ်ကၠေံ တဇ္ဇနဳယကမ် ကုခမဳပဏ္ဍုက လောဟိတကဂမၠိုၚ်ညိ။
ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာဂှ် ဟွံထေက်ကဵုလလမ်ကၠေံ တဇ္ဇနဳယကမ်ရ၊ (ခမဳဂှ် သ္ပအ္စာဥပဇ္ၛာယ်တုဲ) ပကဵုပယျၚ်ရ၊ ကဵုနိဿယရ၊ ကဵုသာမဏဳကၠောန်ၜိုတ်ရ၊ သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန်ခမဳဗြဴဂမၠိုၚ်ရ၊ ကလိဂွံသၟိတ်တုဲ ဒၠောံဗတောန်ခမဳဗြဴဂမၠိုၚ်ရ။ ယွံခမဳတအ် ကုခမဳ မိုပေကေုာံအၚ်္ဂဂမၠိုၚ် မသုန်ပြကာဝွံ ဟွံထေက်ကဵုလလမ်ကၠေံ တဇ္ဇနဳယကမ်ရ။
ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ် မသုန်ပြကာသအာၚ်လေဝ် ဟွံထေက်ကဵုလလမ်ကၠေံ တဇ္ဇနဳယကမ်ရ၊ (ခမဳဂှ်) အာစိုပ်အာပတ် မဒှ်ဟိုတ်သ္ပတဇ္ဇနဳယကမ်ရ၊ အာပတ်သအာၚ်တၠုၚ်လအာတုပ်ကဵုဂှ်ကဵုဒှ် အာပတ်ယုတ်မာ ကြံၚ်မ္ၚိုဟ်လောန်လတူဂှ်ကဵုဒှ် အာစိုပ်ရ၊ ဟီုဂရိုဟ်ကမ်ရ၊ ဟီုဂရိုဟ် ခမဳသ္ပကမ်ဂမၠိုၚ်ရ။ ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ် မသုန်ပြကာဝွံ ဟွံထေက်ကဵုလလမ်ကၠေံ တဇ္ဇနဳယကမ်ရ။
ယွံခမဳတအ် ကုခမဳ မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံပြကာဂှ် ဟွံထေက်ကဵုလလမ်ကၠေံတဇ္ဇနဳယကမ်ရ၊ (ခမဳဂှ်) တန်ဒေါံဥပေါသ် ခမဳသကတတ်ရ၊ တန်ဒေါံပဝါရဏာရ၊ သ္ပပွမဒၠောံဗတောန်ရ၊ ဂိုၚ်ကေတ်အရာဇၞော်သကိုပ်သကရ၊ အာတ်အခေါၚ်ရ၊ စောဒနာရ၊ ကဵုဗှ်ဗၞုဟ်ရ၊ ကဵုစိုန်သကီုနှဴရဴကေုာံခမဳပကတတ်ဂမၠိုၚ်ရ။ ယွံခမဳတအ် မဍိုက်ပေၚ်တဴ ကေုာံအၚ်္ဂဂမၠိုၚ်ဒ္စါံပြကာဝွံ ဟွံထေက်ကဵုလလမ်ကၠေံ တဇ္ဇနဳယကမ်ရ။
✤ဟိုတ်မဟွံထေက်ကဵုလလမ်စှ်ဒ္စါံသာ် တုဲရ။✤
