၁.၁.၄။ ဒ္ဂေတ်ဝတ် ပ္ဍဲတဇ္ဇနဳယကမ် 'ပွမဘပဠ' စှ်ဒ္စါံသာ်

၇။ ယွံခမဳတအ် ခမဳ မဒးဒုၚ်သ္ပတဇ္ဇနဳယကမ်ဂှ် ဒးဒ္ဂေတ်ဗွဲမဒးရးရ―

ကြက်သ္ဂးဂတဝွံတုန် ပ္ဍဲအရာမဒ္ဂေတ်ဂှ် ဒ္ဂေတ်ဝတ် မဒးဒ္ဂေတ်သ္ပ ဗွဲမဒးရးရးရောၚ်― (သ္ပအ္စာဥပဇ္ၛာယ်တုဲ) ဟဂပ်ဝ်ပကဵု ပယျၚ်ရ၊ ဟဂပ်ဝ်ကဵု နိဿယရ၊ ဟဂပ်ဝ်ကဵု သာမဏဳကၠောန်ၜိုတ်ရ၊ ဟဂပ်ဝ်သာယျေန်သ္ဍိုက်မၠိုက် ပွမသၟိတ်ပတိုန် သွက်ဂွံဒၠောံဗတောန် ခမဳဗြဴဂမၠိုၚ်ရ၊ ၜိုန်ဂွံဒုၚ်သၟိတ်လေဝ် ဟဂပ်ဝ်ကဵုဩဝါဒကဵုခမဳဗြဴဂမၠိုၚ်ရ၊ ဟွံထေက်ကဵုအာစိုပ်အာပတ် မထေက်ကဵုသ္ပတဇ္ဇနဳယကမ်ရ၊ အာပတ်သအာၚ်တၠုၚ်လအာတုပ်ကဵုဂှ်ကီု အာပတ်ယုတ်မာ ကြံၚ်မ္ၚိုဟ်လောန်လတူဂှ်ကီု ဟွံထေက်ကဵုအာစိုပ်ရ၊ ဟွံထေက်ကဵုဟီုဂရိုဟ်ကမ်ရ၊ ဟွံထေက်ကဵုဟီုဂရိုဟ် ခမဳသ္ပကမ်ဂမၠိုၚ်ရ၊ ဟွံထေက်ကဵုတန်ဒေါံဥပေါသ် ခမဳပကတတ်ရ၊ ပဝါရဏာလေဝ်ဟွံထေက်ကဵုတန်ဒေါံရ၊ ဟဂပ်ဝ် ပွမဒၠောံဗတောန်ရ၊ ဟွံထေက်ကဵုစွံပတန် ပ္ဍဲအရာဇၞော် သကိုပ်သကရ၊ ဟွံထေက်ကဵုအာတ်အခေါၚ်ရ၊ ဟွံထေက်ကဵုစောဒနာရ၊ ဟွံထေက်ကဵုဗှ်ဗၞုဟ်ရ၊ ဟွံထေက်ကဵုစိုန်သကီုနှဴရဴ ကေုာံ ခမဳပကတတ်ဂမၠိုၚ်ရ၊ (ဣဝွံတုန် ဒ္ဂေတ်ဝတ် မဒးဒ္ဂေတ်သ္ပဗွဲမဒးရောၚ်။)

✤ ဒ္ဂေတ်ဝတ် ပ္ဍဲတဇ္ဇနဳယကမ် ‘ပွမဘပဠ’ စှ်ဒ္စါံသာ် တုဲရ။ ✤