ကမ္မက္ခန္ဓက ဗွဲခမ္ဍန်
❖ ခမဳပဏ္ဍုက လောဟိတကဂမၠိုၚ် အလဵုဇကုလေဝ် သ္ပပွမကယျာန်ဓဝါတ်သေက်ဇဵုအိုတ်ရ၊ ပြာပ်အာဇရေၚ် ခမဳဂမၠိုၚ်မၞုံသဘဴသာ်ဂှ်တုဲမ္ဂး ပ္ဍဲပွမကယျာန်ဓဝါတ်သေက်ဇဵုလေဝ် ပတိတ်ဇြဟတ်အိုတ်ရ။
ပွမကယျာန်ဓဝါတ်သေက်ဇဵုဂမၠိုၚ် မဟွံကတဵုဒှ်ဏီလေဝ် ကတဵုဒှ်ကၠုၚ်အိုတ်ရ၊ ပွမကယျာန်ဓဝါတ်သေက်ဇဵုဂမၠိုၚ် မကတဵုဒှ်တုဲလေဝ် ဇၞော်မောဝ်တိုန်အိုတ်ရ။ ပၟိက်ဆန္ဒအောန်တုဲ ခမဳမသၞေံသၞဴ သဳလဂမၠိုၚ် ဟီုဂရိုဟ် ဗွဲဂတမတ်အိုတ်ရ။
ကျာ်တြဲ မလေပ်ကဵုဓရ်ညးသပ္ပုရိုဟ်ဂမၠိုၚ်တန်တဴ မကတဵုဒှ်အလဵုလဵုဇကု မအံၚ်ဇၞးမာရ်မသုန်ပြကာတုဲ မဒှ်ပူဂိုလ်ပြဲအိုတ်ဂှ် သွက်ဂွံသ္ပတဇ္ဇနဳယကမ် ပတိတ်အသမ်အမိၚ် ပ္ဍဲဍုၚ်သာရဝှ်တုဲရ၊ ‘ဖအောဝ်စကာသွက်ဂွံသ္ပတုဲ’ ရ။
ကမ်မဂပ်ဝ်သ္ပ သီုဟွံသေၚ်ဂတမတ် သီုဟွံသၟာန်သၟုက် သီုဟွံဒုၚ်ဝန်ကီု၊ ကမ်မဂပ်ဝ်သ္ပ သီုဟွံဒးအာပတ် သီုဟွံသေၚ်ကဵုအာပတ်ဒေသနာဂါမ် သီုမဟီုလၟိၚ်ဒေသနာတုဲဒှ်ကီု။
ကမ်မဂပ်ဝ်သ္ပ သီုဟွံစောဒနာ သီုဟွံကဵုဗှ်ဗၞုဟ် သီုဟွံပတိုန်အာပတ်ကီု၊ ကမ်မဂပ်ဝ်သ္ပ သီုဟွံသေၚ်ဂတမတ် သီုဟွံဗဗွဲဓရ် သီုဟွံညဳသၟဟ်သၟန်ကီု။
ကမ်မဂပ်ဝ်သ္ပ သီုဟွံသၟာန်သၟုက် သီုဟွံဗဗွဲဓရ် သီုဟွံညဳသၟဟ်သၟန်ကီု၊ ကမ်မဂပ်ဝ်သ္ပ သီုဟွံဒုၚ်ဝန် သီုဟွံဗဗွဲဓရ် သီုဟွံညဳသၟဟ်သၟန်ကီု။
ကမ်မဂပ်ဝ်သ္ပ သီုဟွံဒးအာပတ် သီုဟွံဗဗွဲဓရ် သီုဟွံညဳသၟဟ်သၟန်ကီု၊ ကမ်မဂပ်ဝ်သ္ပ သီုဟွံသေၚ်ကဵုအာပတ်ဒေသနာဂါမ် သီုဟွံဗဗွဲဓရ် သီုဟွံညဳသၟဟ်သၟန်ကီု။
တုပ်သၟဟ်သာ်ဂှ်ဟေၚ် ကမ်မဂပ်ဝ်သ္ပ သီုမဟီုလၟိၚ်ဒေသနာတုဲဒှ် သီုဟွံဗဗွဲဓရ် သီုဟွံညဳသၟဟ်သၟန်ကီု၊ တုပ်သၟဟ်သာ်ဂှ်ဟေၚ် ကမ်မဂပ်ဝ်သ္ပ သီုဟွံစောဒနာ သီုဟွံဗဗွဲဓရ် သီုဟွံညဳသၟဟ်သၟန်ကီု။
တုပ်သၟဟ်သာ်ဂှ်ဟေၚ် ကမ်မဂပ်ဝ်သ္ပ သီုဟွံကဵုဗှ်ဗၞုဟ် သီုဟွံဗဗွဲဓရ် သီုဟွံညဳသၟဟ်သၟန်ကီု၊ တုပ်သၟဟ်သာ်ဂှ်ဟေၚ် ကမ်မဂပ်ဝ်သ္ပ သီုဟွံပတိုန်အာပတ် သီုဟွံဗဗွဲဓရ် သီုဟွံညဳသၟဟ်သၟန်ကီု။
နနယ်ဝါရအဓမ္မကမ်ဟေၚ် ဝါရဓမ္မကမ်လေဝ် ဂပ်ဝ်တီကေတ်ရ၊ ယြဴကုခမဳမွဲ သၚ်နွံပၟိက် သ္ပတဇ္ဇနဳယကမ်မ္ဂး သ္ပမာန်ရ။
ကုခမဳကယျာန်ဓဝါတ်သေက်ဇဵုကီု ကုခမဳဒိုဟ်ဓီုကီု ကုခမဳနှဴရဴကေုာံခရှ်ကီု ကုခမဳသဳလမပြဲလောန်လီုလာ်ကီု ကုခမဳဒ္ဂေတ်မပြဲလောန်လီုလာ်ကီု ကုခမဳကွေတ်ဝါဒမပြဲလောန်လီုလာ်ကီု သၚ် သ္ပတဇ္ဇနဳယကမ်ရ။
ယြဴခမဳမွဲ ဟီုဂရိုဟ်ကျာ်ကီု ဟီုဂရိုဟ်ဓရ်ကီု ဟီုဂရိုဟ်သၚ်ကီုရ၊ ကုခမဳဂမၠိုၚ်ပိဇကုဂှ် သၚ် သ္ပတဇ္ဇနဳယကမ်ရ။
ယြဴခမဳမွဲဇကုမွဲ သ္ပပွမကယျာန်ဓဝါတ်သေက်ဇဵုရ၊ ဒိုဟ်ဓီုရ၊ သိပ်ဂၠိပ်ပွမနှဴရဴကေုာံခရှ်ဂမၠိုၚ်ရ၊ ယြဴခမဳမွဲဇကုမွဲ ပ္ဍဲသဳလမပြဲလောန်ကီု ပ္ဍဲဒ္ဂေတ်မပြဲလောန်ကီု ပ္ဍဲကွေတ်ဝါဒမပြဲလောန်ကီု လီုလာ်ရ။
ယြဴခမဳမွဲ ဟီုဂရိုဟ်ကျာ်ကီု ဟီုဂရိုဟ်ဓရ်ကီု ဟီုဂရိုဟ်သၚ်ကီုရ၊ ကုခမဳဂမၠိုၚ်ပိဇကုဂှ် သၚ် သ္ပတဇ္ဇနဳယကမ်ရ၊ ခမဳပိဇကုဂှ် ဂပ်ဝ်သ္ပတဇ္ဇနဳယကမ်ရ။ ဒ္ဂေတ်ဝတ်ဒးရး ခိုဟ်ဆာဲတုန် အတိုၚ်ကြက်သ္ဂးဂတဝွံရ။
ခမဳမဂပ်ဝ်သ္ပတဇ္ဇနဳယကမ်ဂှ် သ္ပအ္စာဥပဇ္ၛာယ်တုဲ ပွမပကဵုပယျၚ် ပွမကဵုနိဿယ ပွမကဵုသာမဏဳကၠောန်ၜိုတ် ပွမသၟိတ် သွက်ဂွံဒၠောံဗတောန်ခမဳဗြဴဂမၠိုၚ် ၜိုန်ကလိဂွံသၟိတ်လေဝ် ပွမသာယျေန် ပွမဒၠောံဗတောန်ဂှ် ဟွံထေက်ကဵုသ္ပရ။
ခမဳမဂပ်ဝ်သ္ပတဇ္ဇနဳယကမ်ဂှ် အာပတ်ဒှ်ဟိုတ်သ္ပတဇ္ဇနဳယကမ်ကဵုဒှ် အာပတ်တၠုၚ်လအာတုပ်ကဵုဒှ် အာပတ်ယုတ်ကြံၚ်မ္ၚိုဟ်လတူဂှ်ကဵုဒှ် ဟွံထေက်ကဵုအာစိုပ်ရ၊ ကမ်ကီု ခမဳသ္ပကမ်ဂမၠိုၚ်ကီု ဟွံထေက်ကဵုဟီုဓရိုဟ်ရ။
ခမဳမဂပ်ဝ်သ္ပတဇ္ဇနဳယကမ်ဂှ် ဥပေါသ်ခမဳပကတတ်ကီု ပဝါရဏာကီု ဟွံထေက်ကဵုတန်ဒေါံရ၊ ပွမဟီုဒၠောံဗတောန်ကီု ပွဂိုၚ်ကေတ်အရာဇၞော်သကိုပ်သကကီု ပွမအာတ်အခေါၚ်ကီု ပွမစောဒနာကီု ပွမကဵုဗှ်ဗၞုဟ်ကီု ပွမစိုန်သကီုနှဴရဴကေုာံခမဳဂမၠိုၚ်ကီု ဟွံထေက်ကဵုသ္ပရ။
သ္ပအ္စာဥပဇ္ၛာယ်တုဲပွမပကဵုပယျၚ် ပွမကဵုနိဿယ ပွမကဵုသာမဏဳကၠောန်ၜိုတ် ပွမသၟိတ် သွက်ဂွံဒၠောံဗတောန်ခမဳဗြဴဂမၠိုၚ် ၜိုန်ကလိဂွံသၟိတ်လေဝ် ပွမသာယျေန် ပွမဒၠောံဗတောန် ခမဳမၞုံကဵုအၚ်္ဂဂမၠိုၚ်မသုန်ပြကာဝွံ လလမ်ဟွံမာန်ရ။
အာပတ်ဒှ်ဟိုတ်သ္ပတဇ္ဇနဳယကမ်ကဵုဒှ် အာပတ်တၠုၚ်လအာတုပ်ကဵုဒှ် အာပတ်ယုတ်ကြံၚ်မ္ၚိုဟ်လတူဂှ်ကဵုဒှ် အာစိုပ်ရ၊ ခမဳဟီုဂရိုဟ် ကမ်ကီု ခမဳသ္ပကမ်ဂမၠိုၚ်ကီု လလမ်ဟွံမာန်ရ။
ပွမတန်ဒေါံ ဥပေါသ်ကီု ပွမတန်ဒေါံ ပဝါရဏာကီု ပွမဟီုဒၠောံဗတောန်ကီု ပွမဂိုၚ်ကေတ် အရာဇၞော်သကိုပ်သကကီု ပွမအာတ်အခေါၚ်ကီု ပွမစောဒနာကီု ပွမကဳုဗှ်ဗၞုဟ်ကီု ပွမစိုန်သကီုနှဴရဴကေုာံခမဳဂမၠိုၚ်ကီု ခမဳမစိုန်သကီုကေုာံအၚ်္ဂဂမၠိုၚ်ဒ္စါံပြကာဝွံ လလမ်နူတဇ္ဇနဳယကမ် ဟွံမာန်ရ။
နနယ်ဝါရအဓမ္မကမ်ဟေၚ် ဝါရဓမ္မကမ်လေဝ် ဂပ်ဝ်တီကေတ်ရ၊ ခမဳသေယျသကဒိုဟ်ဓီုရ၊ အာပတ်ဂၠိုၚ်ရ၊ နှဴရဴကေုာံခရှ်ဂမၠိုၚ်ရ၊ ကျာ်တြဲမဒှ်မုနိမပြဲ ဖအောဝ်စကာ (သွက်ဂွံသ္ပ) နိယဿကမ်ရ။
ပ္ဍဲကဳဋာဂရိ ခမဳအဿဇိပုနဗ္ဗသုကဂမၠိုၚ်ၜါဇကု ဟွံသ္ၚဳလလမ်မၚ်မွဲကာယပါၚ်ၜါ ပြကာဂမၠိုၚ်တုဲ ဒ္ဂေတ်တဴ အရာမဟဂပ်ဝ်ဒ္ဂေတ် နာနာသာ်အိုတ်ရ၊ ကျာ်တြဲမဇၞးမာရ် မသုန်ပြကာ ဖအောဝ်စကာ (သွက်ဂွံသ္ပ) ပဗ္ဗာဇနဳယကမ် ပ္ဍဲဍုၚ်သာရဝှ်ရ။
ပ္ဍဲဇနပိုဒ်မစ္ဆိကာသဏ္ဍ ခမဳသုဓမ္မ ဒှ်နွံပိုဉ်ဂ္ဇအ်ဘာ သမ္ၚေဟ်စိတ္တရ၊ ခမဳသုဓမ္မ တ္ၜေဟ်လက်သမ္ၚေဟ်စိတ္တ နဂလာန်မစပ်ကဵုဂကူဇာတ်ရ၊ ကျာ်တြဲ ဖအောဝ်စကာ (သွက်ဂွံသ္ပ) ပဋိသာရဏဳယကမ်ရ။
ပ္ဍဲဍုၚ်ကောသမ္ဗဳ ခမဳဆန္န မဟွံမိက်မၠာ်သ္ၚေဝ်အာပတ်ဂှ် ကျာ်တြဲ ဖအောဝ်စကာ သွက်ဂွံသ္ပ ဥက္ခေပနဳယကမ် ဟိုတ်ပွမဟွံမၠာ်သ္ၚေဝ်အာပတ်ရ၊ အာပတ်ဂှ်ဟေၚ် ခမဳဆန္န ဟွံမွဲပၟိက် သွက်ဂွံဇအုဲဇဗရ၊ ကျာ်တြဲ ဖအောဝ်စကာ (သွက်ဂွံသ္ပ) ဥက္ခေပနဳယကမ် ဟိုတ်ပွမဟွံဇအုဲဇဗအာပတ်ရ။
ကွေတ်ဝါဒမိစ္ဆာမယုတ်မာ မနိဿယ်ကဵုမောဟပွမဝိဝိၚ် ကတဵုဒှ် ကုခမဳအရိဋ္ဌရ၊ ကျာ်တြဲ တွံတဴ ဥက္ခေပနဳယကမ် (မဂပ်ဝ်သ္ပ) ဟိုတ်ပွမဟွံသၠးကၠေံ ကွေတ်ဝါဒရ။
တုပ်သၟဟ်သာ်ဂှ်ဟေၚ် နိယဿကမ်ကီု ပဗ္ဗာဇနဳယကမ်ကီု ပဋိသာရဏီယကမ်ကီု ကမ်မဟွံမၠာ်သ္ၚေဝ်အာပတ်ကီု ကမ်မဟွံဇအုဲဇဗအာပတ်ကီု ကမ်မဟွံသၠးကၠေံကွေတ်ဝါဒကီု ကျာ်တြဲတွံရ။
ပိုဒ်ဂမၠိုၚ်မတွံဂး ဒဝါ အနာစာရ ဥပဃာတိ မိစ္ဆာဇဳဝ ပိုဒ်လောန်ပိုဒ်ပဵုဂမၠိုၚ် ပ္ဍဲပဗ္ဗာဇနဳယကမ်ရောၚ်။
ပိုဒ်ဂမၠိုၚ်မတွံဂး အလာဘပဉ္စက အဝဏ္ဏပဉ္စကၜါ ပဉ္စကၜါ မၞုံယၟုပဉ္စကဝွံ ပိုဒ်လောန် ပိုဒ်ပဵုဂမၠိုၚ် ပ္ဍဲပဋိသာရဏဳယကမ်ရောၚ်။ ပ္ဍဲတဇ္ဇနဳယကမ် နိယဿကမ်ဂမၠိုၚ်ၜါ တုပ်သၟဟ်ရ။
ပ္ဍဲပဗ္ဗာဇနဳယကမ် ပဋိသာရဏဳယကမ်ဂမၠိုၚ်လေဝ် ပိုဒ်လောန်ပိုဒ်ပဵုဂမၠိုၚ် နွံအိုတ်ရ၊ ပ္ဍဲဥက္ခေပနဳယကမ်ဂမၠိုၚ်ပိဂှ် ဗွဲအစောံပွမပါ်ပရအ် တုပ်သၟဟ်အိုတ်ဂ၊ နနယ်တဇ္ဇနဳယကမ်လေဝ် ဒးတီကေတ် ကမ်သှေ်သၟေဟ်ရ၊ ဣဝွံတုန် ဗွဲခမ္ဍန်ရ။
☀︎☀︎☀︎ ကမ္မက္ခန္ဓကတုဲရ။ ☀︎☀︎☀︎
