၃။ ပွမပဒတဴ ပ္ဍဲသၟဝ်တၞံပတုက်

၅။ ပ္ဍဲကြဴနူဂှ် နမကလိလောန်အာထပှ်တ္ၚဲ တဳလမၞုံပိုဉ်ကျာ်တြဲ ဒၠိုက်ကတဵုနူ (အရဟတ္တဖိုလ်) သမာဓိတုဲ နူသၟဝ်တၞံဇြဲပၟၚ်ဗ္ၜေအ် ပြာပ်အာဇရေၚ်တၞံပတုက်တုဲ သီုမဒုၚ်စသိုၚ် တသိုခ်အရဟတ္တဖိုလ် လုကဴထပှ်တ္ၚဲ ပ္ဍဲသၟတ်တၞံပတုက်ဂှ် သ္ပပဒတဴဒၟံၚ် နမဂဇအ်တၚ်ထွာဲမွဲထွာဲဓဝ်ရ။

ပ္ဍဲအခိၚ်ဂှ် ဗြဴဇၞော်မဟွံသေၚ်ကဵုအခိၚ် မဂူဗၞတ်ထပှ်တ္ၚဲ ကျာဗြဲမဂံက်ပ္ဍဵုပ္ဍိုက်ရာန်သကိုတ်ဂူဖျေံရ။ ပ္ဍဲအခိၚ်ဂှ် သၟိၚ်နာဂ်မုစလိန္ဒ တိတ်ကၠုၚ်နူလွဳမာန်ဇကုတုဲမ္ဂး “ပရိုက်လၟုဟ် ပရိုက်ဂမ္တဴ တၟတ်ဒွံ ဂမိတ်ရုဲပၠာ ဇၚ်ရာဲ ကျာ ဂမ္တဴတ္ၚဲ ဇြုံဂဂဳအယံဂမၠိုၚ် လ္ပကဵုပ္ဍဵုပြိုက်ပျဲ တဳလမၞုံပိုဉ်ကျာ်တြဲညိ” ရဴဝွံ ပၠုပ်စိုတ်တုဲ ပူပါတ်ဇကု တဳလမၞုံပိုဉ်ကျာ်တြဲ နကဵုကဝးဇကုဂမၠိုၚ် ဗၞတ်ထပှ်ပွူတုဲ သ္ပစၟဳလဝ်ဒၞံက်မဇၞော် ပ္ဍဲလတူကၞိပ်တုဲ တန်တဴဒၟံၚ်ရ။

ပ္ဍဲအခိၚ်ဂှ် နကလိလောန်အာထပှ်တ္ၚဲ သၟိၚ်နာဂ်မုစလိန္ဒ တီကေတ် ဂၠမ်မတ်ဗြဲကၠေံစ္ဍးသောၚ်အး ပ္ဍဲအကးတုဲ သှ်ပၠိုဟ်လလိုဟ်ကၠေံ ကဝးဇကု နူဇကုတဳလမၞုံပိုဉ်ကျာ်တြဲတုဲ ပါဲပၠေၚ်ကၠေံလွေဟ်သဏ္ဌာန်ဇကု နိမိတ်ဗဒှ်လွေဟ်သဏ္ဌာန် သၟတ်ဗၠာဲတုဲမ္ဂး သီုမပၚ်ခၠအ်သၟိပ်တဲလ္ၚောဝ်ဒၟံၚ် တဳလမၞုံပိုဉ်ကျာ်တြဲဂှ် ဒတူဒၟံၚ်ပ္ဍဲဂတမုက် တဳလမၞုံပိုဉ်ကျာ်တြဲရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ်ဟိုတ်ဝွံတုဲ ပ္ဍဲအခိၚ်အခါဂှ် ကြီုဂအောတ်တိုန်ဥဒါန် ‘ဂလာန်မိပ်စိုတ်အိုဟ်တၟိုဟ်’ ဝွံရ—

ဥဒါန်

“ကုပူဂိုလ်တၠအရှန် မညာတ်ကေတ်ဓရ်ဂမၠိုၚ်အိုတ်သီု မၞုံကဵုပွမတရိုပ်စိုတမတွံဂး မဂ်ဉာဏ်ပန်ပြကာဒှ်တုဲ မၞုံကဵုဓရ်မတီပြာကဋ်တုဲဂှ် ဝိဝေက (မတွံဂးနိဗ္ဗာန်) ဂှ် ဒှ်တသိုခ်ရ၊ ပ္ဍဲလောကဝွံ ပွမဟွံထေဲပၞောတ်ကီု ပွမဟွံပြိုက်ပျဲပ္ဍဲဂကောံသတ်ဂမၠိုၚ်ကီုဂှ် ဒှ်တသိုခ်ရ။

ပ္ဍဲလောကဝွံ ဒဒှ်ရာဂ ‘ပွမစောဲစပ်’ စာ်စ္ဍး မဂပ်ဝ်တွံဂး ပွမကလိလောန် ကာမဂုဏ်ဂမၠိုၚ်ဂှ် ဒှ်တသိုခ်ရ၊ ပွမဝေတ်ကၠေံ မာနမတွံဂးအဲမာန်ဂှ် ဗွဲစၟတ် ဒှ်တသိုခ်ပြဲအိုတ်ရ” ရဴဝွံ (ကြီုဂအောတ်တိုန်ဥဒါန်ရ)။

ပွမသ္ပဒတဴ ပ္ဍဲသၟဝ်တၞံပတုက်တုဲရ။