၂။ ပွမပဒတဴ ပ္ဍဲသၟဝ်တၞံဇြဲပၟၚ်ဗ္ၜေအ်

၄။ ပ္ဍဲကြဴဴနူဂှ် နမကလိလောန်အာထပှ်တ္ၚဲ တဳလမၞုံပိုဉ်ကျာ်တြဲ ဒၠိုက်ကတဵုနူ (အရဟတ္တဖိုလ်) သမာဓိတုဲ နူသၟဝ်တၞံဇြဲဗောဓိ ပြာပ်အာဇရေၚ်တၞံဇြဲအဇပါလတုဲ သိုမဒုၚ်စသိုၚ်တသိုခ်အရဟတ္တဖိုလ် လုကဴထပှ်တ္ၚဲ ပ္ဍဲသၟဝ်တၞံဇြဲအဇပါလဂှ် သ္ပပဒတဴဒၟံၚ် နမဂဇအ်တၚ်ထွာဲမွဲထွာဲဓဝ်ရ။

ပ္ဍဲအခိၚ်ဂှ် ဗဗၞးမွဲတၞ မၞုံသဘဴမလေပ်သ္ပ (ပတူမာန်) ဟုဟ်ဟုဟ် (ဒဟုက်ဒဟက်) ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ ဟီုဂလာန်မိပ်စိုတ်အိုဟ်တၟိုဟ် ဆက်မိတ်ကေုာံတဳလမၞုံပိုဉ်ကျာ်တြဲရ၊ ဟီုပတုဲကၠေံ ဂလာန်မိပ်စိုတ်အိုဟ်တၟိုဟ် ထေက်ကဵုဗှ်ဗၞုဟ်တုဲ တန်တဴဒၟံၚ် ပ္ဍဲဒၞါဲမွဲရ၊ ဗဗၞးမတတ်တဴဒၟံၚ် ပ္ဍဲဒၞါဲမွဲဂှ် “ယွံတြနာဲဂေါတမ မုရဴနဗၞတ်ဗ္ၜတ်မွဲ ဒှ်ဗြာဟ္မဏရော? ဓရ်မလေပ်သ္ပကဵုဒဒှ်ဗြာဟ္မဏဂမၠိုၚ်တုန် ညးဍေံအိုတ်ရော?” ဂရၚ်ပတီ တဳလပိုဉ်ကျာ်တြဲရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ်ဟိုတ်ဝွံတုဲ ပ္ဍဲအခိၚ်အခါဂှ် ကြီုဂအောတ်တိုန်ဥဒါန် ‘ဂလာန်မိပ်စိုတ်အိုဟ်တၟိုဟ်’ ဝွံရ—

ဥဒါန်

“ယြဴတၠအရှန်မွဲ သ္ပကၠေံနူသရာပါပ်မ္ၚးတုဲဒှ်ရ၊ ဟွံလေပ်သ္ပ (ပွမပတူမာန်) ဟုဟ်ဟုဟ်ရ၊ ဟွံမွဲကဵုဍာ်လွံက် (ကိလေသ) ရ၊ မၞုံကဵုစိုတ်မပတိတ်ဇြဟတ် (ဇၞော်ပၟတ်ဘာဝနာ) ရ၊ အာစိုပ် (အရဟတ္တဖိုလ်) မဒှ်လအိတ်မဂ်ဉာဏ်ဂမၠိုၚ်ရ၊ ဒ္ဂေတ်လ္ၚတ်ဒ္ဂေတ်မပြဲတုဲဒှ်ရ၊ တၠအရှန်ဂှ် နသဘဴဍာံစၟတ် ထေက်ကဵုဟီုသ္ဂးဂလာန် မတွံဂးအဲဗြာဟ္မဏရ၊ ကုပူဂိုလ်တၠအရှန်ဂှ် ဟွံမွဲကဵုပွမကတဵုဒှ်ဇၞော်မောဝ်ဂမၠိုၚ် မပ္တံပွမထၞေန်စပ် ပ္ဍဲအာရီုမမိက်ကဵုမွဲမွဲ အပ္ဍဲအလုံလောကအိုတ်ရ” ရဴဝွံ (ကြီုဂအောတ်တိုန်ဥဒါန်ရ)။

ပွမသ္ပဒတဴ ပ္ဍဲသၟတ်တၞံဇြဲပၟၚ်ဗ္ၜေအ်တုဲရ။