Bahaut hi kaam ki aur kamaal ki baat hai.
Jo kuch nahi karte vo kamaal kaise kar sakte hai bhala? Aur ye toh uss kahawat se ek dum hi vipreet ho gaya fir, ki, "khali dimaag, shaitaan ka ghar"!
Par shayad baat bahaut hi zyada gambheer aur gehri kahi gayi hai iss kahawat mein ki,
"Jo kuch nahi karte" -- ye nahi bola ja raha ki khaali hai vo ya unka dimaag khaali hai (hala-ki ye bhi mumkin hai) par ye ki -- jo kuch kar nahi rahe hai, those, who do "Nothing".
Yahi se mamla bahaut dilchasp ho chalta hai. Kyon ki, Nothingness ek bahaut hi depressing, numbing aur confusing experience hota hai insaano ke haath aur mastiksh se rachaye gaye samaaj mein.
Aur iske paar ho chale jo, unke liye, issi ek moment se, samajh lo ek pura naya jahaan saamne khulta chala jata hai. Aur fir aati hai vo comma ke baad waali line ki, "vo kamaal karte hai."
Yaani ki, ye hi aise kuch log hote hai jo dekh paate hai ki jo ye "Samaaj" ya "System" insaano ne chhitiyon ki tarha milke banaya hai, iss mein abhi bhi kuch kaam karna baaki hai shayad; abhi bhi ye sab logon ke hitt mein nahi hua hai.
Abhi bhi kuch hai jispe gaur karna baaki hai. Abhi bhi kuch missing hai.
Ab yahan tak pahauch jana fir bhi asaan hai, par iske aage ka nirniye lena apne-apne haath sabka.
Kaafi aise logon se mile honge aap jinko anubhav nahi par gyaan bahaut hai. Aur kuch yun hai, jinko gyaan toh bilkul bhi nahi hai, lekin anubhav bahaut hai. Ab inn dono hi tarha ke logon ko ek pal aisa milta hai, jab vo ye banawati samaaj aur iski rachna ko samajh lete hai. Fir, kaafi hadd tak, bahaut gehri tarha se iss se peedit, aur hit hojaate hai. Lekin utni hi jaldi, iss se bhaag bhi jaate hai. Vo iss sachai ko apne bheetar nahi rakhna chahte kyon ki, waha pe fir "zimedaari" ki anubhooti hone lagti hai, jo kandhon pe bahaut bojh karne lagti hai aur lay-man terms mein, dimaag kharab kar deti hai.
"Iss sach ka kya kare? jaane do."
Kaafi kum hi hote hai jo iss sachai ko dekh, iske saath baith paate hai. Isko apne andar samaa paate hai. Aur iss se upar uth ke, wakai mein zimedaari samajh ke, iske hisaab se apni raahein naap paate hai.
Aur aise hi logon ko jab zara-bahaut success mil jaati hai ya inki baatein kuch log mehsoos karne lagg jaate hai, toh unko sab "visionary" bolne lagg jaate hai vo. Par saare "Visionary" kehlaaye jaane waale "kamaal" nahi karte. Zyadatar "Shaitaan" ko hi jagah de dete hai apne mastiksh mein. Kyon ki "Shaitaani" kise pasand nahi? Haha. Par yaha uss "masoom" shaitaani ki baat nahi ho rahi. Balki chalaki se, samajhdaari se, chaturta se, kisi ko behkaane ya apne haq mein istemaal karne ki baat kari ja rahi hai.
Aur yahi ye "Shaitaan" log maat khaate hai.
Kyon ki, jaise Maa kehti hai, ek dor humesha "Uske" haath.
Sach baat toh ye hai ki, chahe kitna hi paicheeda ho ye bunna hua jaal insaano ka, par hai toh aakhir har insaan iss milky way, iss universe mein, ek cheeinti barabar hi. Chahe vo ambaani, monroe ya musk ho ya aap aur hum. Bs ye hi "Ek Dor" ki baat jisse samajh aa jaati hai, samajh lo vo ab khud ko samajh gaya hai.
Vo jaan gaya hai ki mai ek hadd tak hi apne hisaab se chala hu ya chal ya chala sakta hu.
Niyati ko kaun rok sakta hai?
'Vatavaran' wakai bahaut khoobsurat shabd hai. Aur Chaturaai aur Chalaki, Saam, Daam, Dand, Bhed ye sab hi kuch hatiyaar jaise samjh lo toh Krishna tak pahauch sakte ho. Sahi maayno mein Shakuni ki tarha shak nahi, Premi ki tarha prem kar sakte ho. Aur fir samajh ata hai ki ye mahajaal jo bunna gaya hai aur iss mein jo vo ek dor ki kumi shayad abhi bhi hai, uska rasta apne se hi dhundna hoga.
Isliye nahi ki Khaali Dimaag mein Shaitaan viraajmaan hai. Par yu ki Khaali Dimaag mein ab "Bhagwaan" hai. Aur fir talaash khudke liye nahi hoti, kaam khudke liye nahi hota, balki iss ehsaans ke saath har kadam aage badhaya jata hai ki, "Mujhe sach maloom hai. Mujh pe zimedaari hai." Aur fir hota hai "Kamaal"!
Yaani ki, jab koi kuch kar raha ho aapke liye sach mein ek dumm bematlab hoke par ek pair humesha iss samaaj mein rakhte huye, kyon ki ab jeewan anmol ho chala hai khud ka uske liye...aur fir vo sunta hai apne aas-paas kuch aise vakya ki:
"What does he/she even wants?"
"Tumko kya matlab hai mujh se yaar?? Mai jeeyun ya maru!"
"Tum apni parwah karo. Mujhe chhodo."
"Itna accha koi nahi hota bhaaaii...iska kuch toh motive hoga."
"Badi pagal hai. Aise kaun uth kar kahi bhi chala jata hai?"
"Why can't he mind his own business??"
"What's your problem yaar! Tum apni sambhaalo na..."
Hua na "Kamaal" ye? Koi aapke liye kuch aisa kar jaaye, binn kuch maange/liye, bs yu hi... Kyun? Par socho toh aur kaise saabit karega vo jo sach mein Dil se saanf ho ki vo Shakuni nahi. Uske mann-mastiksh mein shaitaan nahi. Aur ye ki vo sach mein "Kuch Karna" chahta hai, kyon ki ab, "Zimedaar" hai vo.
Ouch. :(
Aur kya pata, shayad tabhi aisa bola gaya ho ki,
"Jo kuch nahi karte" (kyon ki vo ab ek gambheer sach se waakhif hai)
"Vo kamaal karte hai" (aur tabhi efforts laga rahe hai kuch hal karne ki, behtar karne ki, theek karne ki).