kum 2022 - 2023 atan Parents teachers meet neih a ni

AMC Councellor Pi Chuauzikpuii'n hmanpui...

Naupang harsa te tan AMC Councellor-in tanpuina pe..

Kum 2022-23 chhung atana SMC leh PTA hruaitutur thlanna neih a ni..

Dt. 13.4.2022 (Nilaini) chawhma dar 10 khan Govt. Complex Primary School-ah Parent Teacher Meet neih a ni a, school naupang nu leh pate leh zirtirtuten inkawmhona hun tha tak an nei a ni. He Meet-ah hian Pandemic avanga kum 2 chhung zet naupangten school an kal theih loh avanga zirna lama harsatna an neih leh a hnufualna awm thei te sawi a ni a, chumi avanga harsatna nasa zawk naupangten an neih lohna tura hmalakna tur te pawh sawi a ni bawk. He Meet hi bialtu CRCC Pu Rk Lalpeksanga’n min rawn hmanpui thei bawk a, thusawiin Govt. Complex Primary School chu rampum huap ang pawha school tha a ni a, hri avanga harsatna tawk mahse tha takin zirna kalpui a nih leh theih a rin thu sawiin, chumi tur chuan zirtirtute hmalakna bakah nu leh paten theihtawp an chhuah a ngaih thu sawiin, nu leh pate pawh theih tawp chhuah turin a sawm nghal bawk a ni.

He Meet hi Pi Chuauzikpuii, bialtu AMC Councellor pawhin hmanpuiin, a bialchhunga school tha tak a lo nei reng chu lawmawm a tih thu sawiin, zirna leh enrolment-ah pawh sorkar school dangte entawntlak a nih thu sawiin, a bial chhunga school tha awm chu a theihtawpa tawiawm a tum thu a sawi bawk a ni. School tha nei tur chuan nu leh paten theihtawp an chhuah a ngai a, zirtirtute kuta naupang dah tawp lova mahni fate zirnaah nasa lehzuala pui turin a ngen bawk a ni. Bialtu AMC Councellor hian school naupang harsa zual, admission leh exercise book leina atana harsatna nei naupang 8 hnenah an mamawh leina tur sumfai tanpuina a pe bawk.

Meet-ah hian kum 2022-23 chhung atana School Management Committee (SMC) leh Parents Teachers Association (PTA) hruaitutur thlanna neih nghal a ni bawk.

Meet neih zawh hian Govt. Complex PS zirtirtute leh AMC Councellor bakah SMC leh PTA hruaitu thlan tharte bakah Local Council hruaituten inkawmkhawmna neih nghal a ni a. School-in hma a sawn theihna tura hmalakna turte sawiho niin, School lam atangin an mamawhte Councellor leh LC hruaitute hnenah an thlen a, a theih ang anga tihhlawhtlin sak an tum thu an sawi bawk. Hei bakah hian zirtirtute lam atangin Computer Aided Teacher (Visual Media Learning) neih an duh ve thu sawiin, hemi atana bungawr pawimawh te hi AMC Councellor hian ngaihtuahpui a tum thu a sawi bawk a ni.