Ang Pampelikulang Samahan ng mga Dalubguro (PASADO) ay samahan ng mga guro sa pribado at pampublikong paaralan at pamantasan, na nagbibigay ng mataas na pagpapahalaga sa pelikulang Pilipino at ginagamit ito bilang materyal panturo sa magkakaibang disiplina. Kinikilala ang mga likha ng mga manunulat, direktor, artista, at iba pang mga miyembro ng akademya na patuloy nagbibigay ng kontribusyon sa pagpapaunlad ng Philippine Cinema sa pamamagitan ng taunang GAWAD PASADO. Kaakibat ng pagtataguyod sa kahusayan sa panonood, pag-aaral, at pagsusuri ng pinilakang tabing, ang taunang kumperensiyang nagsisilbing lunsaran ng pag-aaral at/o pananaliksik na may kaugnayan sa pelikula at mass media. 

(PASADO is a film organization of educators from private and public schools from elementary to college level in the Philippines, that reviews and appreciates films as documents and materials for teaching different disciplines. It also recognizes the works of the film makers, artists, and notable members of the academe who contributed in the promotion of Philippine Cinema and innovations in teaching through its annual GAWAD PASADO PARA SA PELIKULA.) 

Misyon at Bisyon ng PASADO

Maimulat ang kaisipan ng  mga tagatangkilik ng Pelikulang Pilipino sa kahalagahan nito sa ating buhay, lipunan, kabuhayan, at edukasyon sa pamamagitan ng pagsusuri ng mga makabuluhang obra sa ating bansa. Maipalaganap ang sining ng Pelikula sa ating wika, kultura, agham, panitikan, at nasyonalismo sa mga Araling Pilipino na sumasalamin sa mga tunay na pangyayari sa ating lipunan. Gayundin, mabigyan ng pagtatangi ang mga likhang Pelikula ng mga direktor, artista, manunulat, at iba pang mga manggagawa na kabalikat upang mabuo ang pelikulang nagpapakilala sa ating identidad bilang bansa. Inaasahan na ang PASADO ang magiging moog ng kahusayan sa pag-aaral at pagbibigay ng parangal sa Pelikula sa bansa. 

Layunin ng PASADO

Pangkalahatang Layunin  

Maiangat ang antas ng kamalayan ng panonood, pagpapahalaga, at pag-aaral ng Pelikulang Pilipino. 

Mga Tiyak na Layunin

1. Makapagbigay ng gawad ng pagkilala sa mga PinakaPASADOng Pelikulang Pilipino na nagbigay ng katangi-tanging uri ng kamulatang pansining, pangwika, pangkultura, pang-agham, at panlipunan

2. Makapagmungkahi sa mga guro ng mga makabuluhang Pelikula bilang materyal na panturo at ang pamamahagi ng inobasyon sa pagtuturo at online modalities

3. Maipalaganap ang sining, wika, panitikan, kultura, agham, at nasyonalismong Pilipino sa pamamagitan ng paghikayat sa panonood ng pelikulang Pilipino

4. Makapagsagawa ng mga palihan at kumperensiya para sa mga guro at mga mag-aaral tungo sa pagpapahusay sa pananaliksik 

5. Mapahusay ang sensibilidad sa mga isyung panlipunan tungo sa kamalayang bayan at pagiging mas responsableng mamamayan