Storia di stödafüch da San Ciascian

L’ann 1945 êl gnü mené cun le ciaval da Badia ite la pumpa nr. 2 da berba Lois Craffonara dl Ustí, por podëi destodé le medefüch rot fora tla vijinanza da Soplá. Odan le debojëgn che al foss sté de avëi na pumpa te paisc, av perié berba Paul Sorarú (da Verda) de podëi se tigní la pumpa a San Ciascian; insciö al ël metü sö a San Ciascian n corp de stödafüch. Inalota cumpedan dai 16 ai 18 omi tla uniun.

Podun se ponsé tan ri che al fo inlaota do la vera mëte sö y tigní adöm na te istituziun, nia ma pur i püc mesi finanziars, mo ince deache i omi gnüs zoruch dala vera messâ naota ponsé a trá in ester süa familia y s’organisé indô danü tla vita. Porchël ti val a berba Paul da Verda n reconescimënt paritcolar.

Do tröc agn d’ativité ti al surandé le laur da surastant a berba Pepi Crazzolara (d’Ansola) che cun la gran ligrëza y dediziun á mené inant le corp.

Al á dagnëra insigné jö sü omi cun gran forza y na orenté de fer, cualités che al á arpé por natöra y che ti é gnüdes renforzades tla scora pör stödafüch a Desproch.

Cun de gran bries él sté bun da arjigné les prömes mascins a motor y tröp material. Le pröm auto a motor é gnü arjigné da berba Pepi l’ann 1968. Ala se tratâ de na Fiat Campagnola che é ciamó tignida al dedaincö cun gran ligrëza dai stödafüch da San Ciascian sciöche meso storich.

Berba Pepi ê na porsona dër avisa, ordinada y che tignî dër sön la disciplina.

Canche berba Pepi ê jü en punsiun l’ann 1974, á Sciandro Agreiter (da Tamures) surantut la direziun di stödafüch. Chësc s’á cruzié tl 1978 de fá maiú le magasin.

Dal 1979 al 1999 é tumada la direziun dla uniun tles mans de Paul Rudiferia. Tratan chisc agn s’á Paul cruzié de arjigné ite deplü mesi y mascins y ti agn 1995/96 n magasin nü, plü gran y che corespogn ales esigënzes dl tëmp. Ince por Paul ê la disciplina y l’ordin tla uniun döt.

Ti agn dal 1999 al 2009 é spo Pertot Andy sté a ce dla uniun, gnüs do é spo Obojes Christian dal 2009 al 2014, Alton Daniel dal 2014 al 2019 y dal 2019 inant Crazzolara Devis.

Fontana: Test en pert tut dala publicaziun "Sas dla Crusc - Tla Val Badia intratan i agn 1985/86", dé fora dla Uniun di Ladins dla Val Badia (plata 44 - Festa di 40 agn di Stödafüch da San Ciascian)