CELEBRACIÓN DO NOSO PARTICULAR SAMAGOSTO

Celebramos o Magosto e o Samaín no noso centro

A última semana de outubro o alumnado do noso centro participou en diversas actividades relacionadas con dúas das tradicións máis representativas da nosa cultura: o Samaín e o Magosto.

O alumnado de 6º de Educación Primaria tivo un papel protagonista na organización e desenvolvemento de diferentes propostas lúdicas e educativas destinadas a todo o alumnado. Con moita ilusión e responsabilidade, prepararon actividades relacionadas co Samaín, fomentando a participación, a convivencia e o coñecemento das nosas tradicións.

Con motivo do Samaín, os corredores e aulas enchéronse de decoracións terroríficas, cabazas, contos e actividades creativas que permitiron achegar ao alumnado a esta antiga celebración de orixe celta. Ademais, realizáronse xogos temáticos e retos nos que os nenos e nenas puideron demostrar a súa imaxinación e espírito colaborativo.

Posteriormente, celebramos o Magosto, unha das festas máis emblemáticas do outono galego. As castañas foron as protagonistas dunha xornada festiva na que non faltaron os xogos populares tradicionais. Carreiras, probas de habilidade e diferentes actividades contribuíron a crear un ambiente de diversión e compañeirismo entre todos os participantes.

Estas experiencias permitiron non só gozar de momentos de lecer, senón tamén valorar e manter vivas as tradicións culturais galegas, promovendo o uso da lingua galega en contextos significativos e reforzando o sentimento de pertenza á nosa comunidade.

Agradecemos a implicación do alumnado, do profesorado e das familias que colaboraron para facer posible estas celebracións tan especiais.