กิจกรรมส่งเสริมการอ่านผ่านสื่อออนไลน์
ค่าวงดเหล้าเข้าวะสา
ค่าวงดเหล้าเข้าวะสา
เจ้าของภูมิปัญญา : หนานอ้วน ขันทะวงศ์
สาตุ๊..สา เข้าวะสาแล้ว ปี่แก้วน้องแก้ว ผ่องแผ้วผญา
ตางก๋ารเปิ่นต๊วง เป๋นห่วงนักหนา เรื่องงดสุรา ล้านนาน้ำเหล้า
ศรัทธาตังหลาย ยิงจายหนุ่มเถ้า ปากั๋นเข้ามา หาพระ
วะสา สามเดือน หื้อปากั๋นละ มัชชะ น้ำเหล้า เมรัย
ปั๋ญจะมะ สีละ สดใส ป๋าเวณีไทย เข้าใจ๋ทั่วหน้า
วันพระ วันศีล ป่อลุง แม่ป้า อุ๊ยหม่อน จ๊ะรา แก่ค้าว
จวนลูกจวนหลาน ปากั๋นฟั่งฟ้าว ตักบาตรใส่เข้า ทำบุญ
สร้างกุศลไว้ ปั๋จจั๋ยเกื้อหนุน จ่วยก๊ำจ่วยกูน ปายลูนเมื่อหล้า
เป๋นป๋าปั๋จจัย ไปสู่โลกหน้า กุศลบุญปา ส่งยู้
สุรา เมรัย ต๋ามที่ได้ฮู้ คุณหมอเปิ่นอู้ จี๊แจง
เหล้ากัดกระเพาะ กางกั๋บตั๋บแข็ง พ่องก็ลงแดง บ่าแฮงเหลือหน้อย
พ่องติดเรื้อรัง มือสั่นด้อย ๆ ผอมแห้งเอ็นแมน ดูกซ้อง
พ่องกิ๋นเหล้าเมา เอาหมาเป๋นน้อง เลียปากอยู่ข้าง ฮิมกอง
พ่องเมาแล้วยุบ ไปไหนบ่ถอง ปี่น้องจาวจอง เล่ากั๋นไคว่บ้าน
พ่องเมาแล้วจ๋า วาตาหยาบก้าน ด่าสงฆ์ องค์เณร ตุ๊พระ
พ่องกิ๋นเหล้าเมา โกรธกิ้วโก๋ธะ ต๋บตี๋ลูกแก้ว เมียแปง
พ่องเมาขับรถ คุณหมอแถลง ได้แช้มป์ตุงแดง ปี่น้องนั่งไห้
พ่องเมาหลงหลำ จ๋ำบ้านบ่ได้ ขึ้นเฮือนผิดไป ก็นัก
พ่องเมาแล้วเหงา ซบเซานั่งพัก กึ๊มงึ้มอยู่ข้าง พาไล
พ่องเมาแล้วเพอะ อู้จ๋าเหลวไหล พ่องตกคันได พ่องตกเล้าเข้า
พ่องเมาอวดหลวัก ว่าสุราเหล้า เป๋นวิตะมิน ยอดม้อน
พ่องเมาเสียก๋าร วงศ์วานเดือดฮ้อน ย้อนกิ๋นแต่เหล้า เมรัย
พ่องเมาแล้วบู๊ บุบหม้อบุบไห ผะตู๋คันได เต๋าไฟขาตู้
ฟังหมอเปิ่นจ๋า วาตาเล่าอู้ โต้ษของสุรา ปี่น้อง
เมื่อเข้าวะสา วันตา ขอร้อง อย่าได้เกี่ยวข้อง สุรา
หื้อเอาธรรมะ พระศาสนา ของพระสัมมา สัมปุ๊ดธะเจ้า
ขอหื้อลูกหลาน วงศ์วานเก๊าเหง้า ฝิ่น เหล้า สุรา เลิกละ
ขอหื้อทำต๋าม กำสอนของพระ สมณะต่านเจ้า โกดม
เงินทองสิ่งทรัพย์ สร้างบุญสะสม อย่าได้หลงลม ซื้อกิ๋นก่าเหล้า
โต้ษของสุรา สัตถาพระเจ้า ศาสะนาเฮา เตศน์ไว้
หนึ่ง เสียเข้าของ เงินทองจ่ายใจ๊ หื้อเป๋นก่าเหล้า สุรา
ข้อสอง โก๋ธะ โทสะ โมหา เกิดวิวาตา ต๋บตี๋เปื่อนบ้าน
ข้อสาม โรกา พยาธิหลายด้าน กำลังต้านทาน หลั่นลด
ข้อสี่ เสื่อมเสีย จื่อเสียงและยศ ไผบ่เจื่อหน้า คนเมา
ข้อห้า ปี่น้อง โศกต้องหมองเหงา มีญาติขี้เมา อับอายขายหน้า
ข้อหก ผญา ปั๋ญญาแก่กล้า ถูกตัดฮานลง ต่ำก๊อย
ครูบาอาจ๋ารย์ ป่อหนานป่อน้อย เด็กขาอ่อนหน้อย เมืองไทย
สุรา โต้ษนัก น้ำเปลี่ยนนิสัย ขอหื้อเร็วไว ละ เลิก หื้อเสี้ยง
ฮักษาศีลธรรม งดงามเลี่ยนเกลี้ยง สุขสันต์เจยบาน ปี่น้อง
กระเพาะตับไต๋ ครัวในปู๋มต๊อง บ่ใจ่ขันอ้อง กอฮอล์
ขอหมู่เฮาลด ละ เลิก กั๋นหนอ เรื่องแอลกอฮอล์ เมาวินปั่นบ้า
วะสา สามเดือน ปี่น้องเจ้าข้า อย่าหื้อสุรา ตกต๊อง
ด้วยความเมตต๋า จึงมาขอร้อง เป๋นสารค่าวสร้อย กำเมือง
เจื่อกำ ตุ๊ พระ เปิ่งป๊ะ ผ้าเหลือง ก้านกุ่งรุ่งเรือง หื้อเลิกกิ๋นเหล้า
ศรัทธาตังหลาย ยิงจายหนุ่มเถ้า ขอหื้อยึดเอา ธรรมะ
วะสา สามเดือน หื้อเข้าหาพระ จ๋ำศีลแปดห้า ฟังธรรม
ตุ๊เจ้าเตศน์ไว้ ขอได้จดจ๋ำ อย่าไปเหลือกำ ฮักษาศีลห้า
ผดเดือนเกี๋ยงเป็ง สามเดือนเจ้าข้า จีวิตจีวา จื่นจ๊อย
ย้อนฮักษาศีล บ่หมองต่ำก๊อย จิตใจ๋เป่งป้อย ยินดี
สามเดือนผ่านป๊น บ่หม่นหมองศรี เก้าเดือนยังมี ฮักษาต่อเจ้า
ครบสิบสองเดือน งดเว้นกิ๋นเหล้า จิตใจ๋คนเฮา มนุษย์
หมั้นกุงเหมือนหิน สมเป๋นจาวปุ๊ด บ่ต๋กหล่มโหม้ง อบาย
สุราน้ำปิ๊ด โต้ษมันมีหลาย มันเป๋นอบาย- ยะมุขแม่นหมั้น
ตุ๊เต้ดสะหนา ว่าไว้อย่างอั้น ใจ๋ความสำคัญ อย่างนี้
สุราเมรัย ไขจ๋ากล่าวจี๊ ขอจบเต่าอี้ เนอนาย
อย่าหื้อตกต๊อง ปี่น้องตังหลาย ใคร่สุขสบาย หื้อเลิกกิ๋นเหล้า …ๆ
ผู้แต่ง : หนานอ้วน ขันทะวงศ์ น.ธ.เอก,ป.ธ.๕(เกิด ๒๕๐๔)
ครู ร.ร.พญาลอวิทยาคม อ.จุน จ.พะเยา โทร.089 -9973108