எங்கள் பள்ளியைப் பற்றி 

நான் மாட கூடல் நகரில் நடுநாயகமாய் அமைந்துள்ள தெற்கு வாசல் பகுதியில், சின்ன கடைவீதியில் எங்கள் பள்ளி அமைந்துள்ளது. கல்வியையும், கலைகளையும் , கட்டழகு உடல் காக்கும் விளையாட்டையும் மேன்மை மிகு நல்லொழுக்கப் பண்புகளையும் ஒருசேர கற்றுக் கொடுத்து வரும் ஒரு கல்வித் திருக்கோயில் தான் எம் பள்ளி..

100% தேர்ச்சியை இலக்காகக் கொண்டுள்ளது மட்டுமல்லாமல், பன்முக சிந்தனை மற்றும் படைப்பாற்றல் கொண்ட நல்ல குடிமக்களை உருவாக்கி , தேசத்தை உயர்த்த வேண்டும் என்ற உயரிய நோக்குடன் ,சீரிய முறையில் சிறப்புடன் இயங்கும் ஒப்பற்ற பள்ளி தான் மாசாத்தியார் மாநகராட்சி பெண்கள் மேல்நிலைப் பள்ளி. 

 1973 இல் ஆரம்பிக்கப்பட்ட இப்பள்ளி , 36 ஆண்டுகள் உயர்நிலைப் பள்ளியாகவும், 2009 முதல் மேல்நிலைப் பள்ளி ஆகத் தரம் உயர்த்தப்பட்டும் ஆயிரத்துக்கும் மேற்பட்ட மாணவியருடன், திறன்மிகு பள்ளியாகச் செயல்படுவது இதன் தனிச்சிறப்பு..

பெண் குழந்தைகளுக்குப் பாதுகாப்பான, அனுபவம் உள்ள திறமையான ஆசிரியர்களைக் கொண்டு 6 முதல் 12 ஆம் வகுப்பு வரை தமிழ் வழி மற்றும் ஆங்கில வழி வகுப்புகளுடன் சிறப்பாகச் செயல்படும் மாநகராட்சிப் பெண்கள் பள்ளி இது..

"நாளும் பொழுதும் நலிந்தோர்க்கு இல்லை ;

ஞாயிற்றுக்கிழமை கூட நமக்கு ஓய்வில்லை"

 என மாணவியர் நலன் கருதி "என் கடன் பணி செய்து கிடப்பதே" என்ற வாக்கியத்தை செயல்களாய் மாற்றி, பொதுநலமே சுயநலமாய் கொண்டுள்ள, தாயுள்ளம் கொண்ட ,தகுதியான ஆசிரியப் பெருமக்கள் கிடைக்கப் பெற்றுள்ளது மாசாத்தியாரின் தனிச்சிறப்பு