Co gallo do 11 de febreiro, parte do alumnado do Club de Ciencia, en colaboración co Equipo de Mediación, levou ás aulas unha actividade de divulgación para achegar a labor das científicas ao resto do centro.

Cada participante presentouse como unha científica relevante, identificándose cunha chapa e cun obxecto representativo do seu traballo. En intervencións moi breves, compartiron quenes eran e por que as súas achegas seguen sendo importantes hoxe en día. 

Durante as semanas previas prepararon a actividade buscando información, seleccionando as ideas principais e practicando as súas presentacións con concentración e ilusión compartida. 

Froito deste esforzo, a iniciativa tivo moi boa acollida nas aulas. Agradecemos ao profesorado a súa colaboración por permitirnos entrar nas súas clases e facer posible esta experiencia.

Seguimos traballando para que a ciencia e a igualdade teñan cada vez máis voz e presencia… Ata o ano que vén! 🧪⚖️ 

 ⬆️ O alumnado preparado con batas e obxectos representativos antes de visitar as aulas ⬆️ 

O pasado 17 de decembro tivemos o pracer de contar con Xurxo Mariño, biólogo e divulgador científico galego, nunha charla dirixida ao alumnado de toda a ESO centrada no cerebro humano e o desenvolvemento da linguaxe.

Ao longo da sesión, Xurxo achegou conceptos complexos dun xeito claro, ameno e cheo de exemplos, convidando o alumnado a reflexionar sobre como pensamos, sentimos e nos comunicamos. A charla espertou moita curiosidade e deu lugar a numerosas preguntas entre o alumnado.

A actividade tivo lugar no Auditorio Municipal. Queremos agradecer ao Concello a cesión deste espazo e a Xurxo Mariño a súa dispoñibilidade e proximidade para achegar a ciencia ao noso alumnado (e profesorado!). 

Seguimos explorando técnicas de laboratorio enfocadas ao Nadal: desta volta traballando coa cristalización, un proceso natural que podemos reproducir no laboratorio con materiais moi sinxelos. 

Cada grupo deseñou a súa propia decoración de Nadal usando limpiapipas de cores, e preparou disolucións saturadas de sal ou azucre.

A auga quente das disolucións foi capaz de disolver máis cantidade de soluto (sal ou azucre) que a auga fría, polo que puidemos saturar as disolucións. Cando as disolucións arrefriaron e parte da auga evaporou, o soluto xa non "coubo" disolto e comezou a acumularse sobre os limpiapipas en forma de cristais.

Tamén intentamos empregar como soluto un produto comercial substituto do bórax… E descubrimos que non era o composto químico axeitado. Un pequeno erro de laboratorio que nos serviu para seguir comprobando que investigar é tamén equivocarse e volver intentalo con máis información. 

O resultado final foron unhas estupendas decoracións científicas de Nadal que exporemos no noso Recuncho da Ciencia, e moitas ganas de seguir experimentando! 

Neste mes quixemos achegarnos á ciencia a través de técnicas reais de laboratorio, pero dándolles unha volta creativa. 

Primeiro traballamos cunha técnica histórica, a cianotipia, que permite crear imaxes usando só a luz do Sol sobre un papel especial. As sales de ferro presentes no papel fotosensible redúcense coa enerxía da luz e forman un pigmento moi estable:o azul de Prusia. As zonas que reciben luz vólvense azuis escuras; as que quedan á sombra, permanecen claras.

Tamén coñecemos o traballo de Anna Atkins, considerada a primeira persoa en publicar un libro de fotografía: no século XIX empregou a cianotipia para rexistrar algas e plantas, unindo arte e botánica.

Coa súa inspiración, saímos ao patio para recoller follas, herbas e texturas naturais. Cada grupo preparou dúas composicións: unha de inspiración navideña e outra máis científica ou abstracta. 

A pesar de que as probas previas funcionaron, nas primeiras sesións os resultados non foron os esperados: os días nubrados provocaron unha subexposición á luz e a maioría dos fotogramas quedaron case en branco. Pero tamén diso se aprende: a ciencia non sempre sae á primeira, e a miúdo o erro é unha oportunidade de aprendizaxe. Así que en canto asome o Sol -se tal cousa ocorre- repetiremos a práctica. Neste Club de Ciencia non somos de rendirnos ante á primeira dificultade!

🎃 Coincidindo coa semana do Samaín / Halloween, hoxe o noso alumnado do Club de Ciencia mergullouse nun laboratorio un pouco diferente do habitual… Convertéronse en científicos e científicas de monstros!

Observamos mostras reais co microscopio —tecidos animais e pequenas preparacións biolóxicas— e transformámolas en achados fantásticos: “Pelos de lobishome”, “Papilas gustativas de chupacabras”, “Tripas de zombi”...

Cada grupo inventou un nome e unha historia para a súa mostra, ✏️ debuxou o que viu ao microscopio e elaborou unha ficha para o noso Museo microscópico de mostras, exposto no Recuncho de Ciencias.

Unha práctica para mirar con curiosidade… E descubrir que a ciencia tamén pode ter moito de arte... E de humor.