Прапаную вашай увазе для чытання кнігі на беларускай мове, беларускіх пісьменнікаў.

2 клас

Беларускія народныя казкі: “Як курачка пеўніка ратавала”, “Ганарыстая варона”, “Лёгкі хлеб”, “Зайкава хатка” і іншыя казкі.

Казкі ўваходзяць у нашае жыццё з маленькіх гадоў. Спачатку іх вам чытала маці, або бацька, а калі вы падраслі і навучыліся чытаць -то і самі. Казкі чытаць не перастаюць нават дарослыя людзі.

Вучням 3 –4 -х класаў думаю будзе цікава пазнаёміцца з кнігамі беларускіх аўтараў.

Гапеева Вольга “Сумны суп” .

Кніга году — 2015 (намінацыя «Дзіцячая літаратура») Прэмія «Экслібрыс» імя Янкі Маўра.

Зборнік казачна-філасофскіх гісторый. Героі гэтай кнігі — хатнія «жыхары»: суп, гузік, парасон і іншыя рэчы, добра знаёмыя ўсім дзеткам, і менавіта таму пра іх так весела чытаць з бацькамі. Выдатны тандэм цікавых тэкстаў і вельмі ўдалых ілюстрацый.

Сінявочка: казкі беларускіх пісьменнікаў. У зборнік “Сінявочка” увайшлі казкі пісьменнікаў нашай роднай сінявокай Беларусі. Акрамя класічных твораў М, Багдановіча, З.Бядулі, У.Караткевіча, Я.Коласа, юны чытач пазнаёміцца з казкамі сучасных пісьменнікаў: У.Ліпскага, У. Ягоўдзіка, Р.Баравіковай і інш.

Сцюарт Мэры “Людвік і зорны конь”.

Гэтая гісторыя здарылася шмат гадоў назад з адзінаццацігадовым хлопчыкам, якога звалі Людвік. Гісторыя пра тое,як Людвік разам са сваім сябрам канём Рэнці выпраўляецца ў небяспечнае падарожжа па фантастычнай зорнай краіна Задыяка. Пра гэтае падарожжа шатландская пісьменніца Мэры Сцюатр напісала кнігу, поўную дзівосных, фантастычных прыгод. Гісторыя паўдзівая і павучальная, і ты са мной згодзішся, калі прачытаеш гэтую кнігу.

Шырко Васіль. “Дзед Манюкін і ўнукі”: казкі. Дзед ведае многа казак. Чуў ён іх ад свайго дзеда, а той – ад свайго. Дарослыя не вельмі вераць яго словам і называюць рознымі мянушкамі: то, Манюкін, то Мюнхаўзен. А дзеці ад яго не адходзяцца, ловяць кожнае яго слова! Хочаце даведацца, як змагаўся дзед з нячыстай сілай, як шчасліва рыбачыў ці як ратаваўся ад мядзведзяў і ваўкоў? То не лянуйцеся, пачытайце казкі, якія ўвайшлі ў гэтую кнігу. Чэснае слова, не пашкадуеце.

Яшчэ пра аднаго цікавага беларускага пісьменніка і пра яго кнігу я вам раскажу.

Алесь Савіцкі “Прыгоды Муркі”. Паспрабуйце успомніць казкі, апавяданні, дзе расказваецца пра катоў і кошак. І абавязкова прыйдзе на памяць беларуская народная казка “Каток –залаты лабок”, а магчыма, нехта ўспомніць пра разумнага, вынаходлівага і хітрага “Ката ў ботах”. А вось пра незвычайныя прыгоды коткі Муркі, што жыла ў маленькай і ласкавай гаспадыні Алесі, раскажа кніга.