Aínda que o final de curso atrasou a súa publicación, xa está dispoñible o podcast que captou a esencia da I Gala dos Premios José Hermida celebrada en maio. Nela, Lúa, Lián, Paula, Roi e Alexandra —gañadoras do Premio Xerais polo seu podcast sobre "Somos Pandeireteiras"— non se limitaron a recibir o galardón. Actuando como xornalistas que xa son, percorreron a gala co seu micrófono para rexistrar entrevistas exclusivas cos gañadores do IES Cambados e do CEIP San Clemente de César, o presentador e a presentadora do acto, ás Tanxugueiras e ao Presidente da Xunta, Alfonso Rueda. 

No ámbito do proxecto eTwinning "Dieta saludable interculturas", o alumnado de 1º da ESO do IES Castro Alobre realizou a gravación dun podcast para a radio do centro. Nesta emisión, os/as estudantes explicaron en detalle o traballo colaborativo realizado, centrándose especialmente en como elaboraron diversas receitas saudables. Este proxecto tivo unha dimensión internacional, contando coa participación activa de alumnado de Marrocos, Colombia e Galicia. 

Entrevista realizada por Xaínza, Maguette e Erica, alumnas do Agrupamento de Lingua Galega, a Siara, traballadora de Cruz Vermella (Vilagarcía de Arousa) que no día 18 de xuño se encontrou co Equipo de Correspondentes para falar sobre persoas refuxiadas, inmigración e os prexuízos que persisten na nosa sociedade e que nos levan a situación como as que se están a vivir en Torre Pacheco.