Heilsufarskröfur Australian Shepherd og reglur HRFÍ um skráningu í ættbók
Í grundvallarreglum fyrir félagsmenn HRFÍ kemur fram að nota skuli hunda af sömu tegund til ræktunar og einungis hunda sem eru ættbókarfærðir hjá HRFÍ eða öðru félagi sem HRFÍ viðurkennir ættbækur frá. Ræktun, kaup og sala á óættbókarfærðum hundum er bönnuð.
Hér að neðan má sjá tengla á reglur Hundaræktarfélags Íslands um skráningu í ættbók félagsins. Hér má síðan sjá tengil á lög og reglur félagsins og þau eyðublöð er snúa að ræktun.
Reglur um skráningu í ættbók, gilda til 31. júlí 2024
Reglur um skráningu í ættbók, gilda frá 1. ágúst 2024
Grundvallarreglur fyrir félagsmenn HRFÍ
Helstu reglur um Australian Shepherd og skráningu í ættbók:
Skottlengd skal skráð
Undaneldisdýr skulu hafa gilt augnvottorð við pörun. Greinist hundur með arfgenga starblindu (hereditary cataract) skal hann skráður í ræktunarbann.
Undaneldisdýr skulu mjaðmamynduð við pörun. Greinist hundur með mjaðmagráðun D eða E verða afkvæmi hans ekki skráð í ættbók.
Óheimilt er að para saman tvo hunda með merle feldlit. Afkvæmi úr slíkri pörun fást ekki ættbókarfærð hjá félaginu. Það eru ýmsir heilsufars brestir sem geta fylgt því að para saman einstaklinga sem eru báðir af merle feldgerð, eins og heyrnarleysi og blinda. 25% af gotinu getur orðið blint og/eða heyrnarlaust við slíka pörun.
Fjár- og hjarðhundadeild mælir einnig með:
Augnskoðun hvolpa fyrir 12 vikna aldur með tilliti til CEA (Collie Eye Anomaly).
Að auki vill Fjár- og hjarðhundadeild árétta almenn ákvæði VI kafla reglna HRFÍ um skráningu í ættbók:
Hvolpar fást ekki skráðir í ættbók HRFÍ nema að viðkomandi undaneldisdýr hafi uppfyllt eftirtalin skilyrði:
Auðkenna skal öll undaneldisdýr fædd eftir 1. janúar 1997 með varanlegu auðkenni örmerki eða húðflúri. Eingöngu er tekið gilt örmerki sem er skráð og skjalfest af dýralækni, þar sem þeir einir hafa réttindi til að örmerkja hunda.
Sérreglur gilda fyrir alla undaneldishunda sem tilgreindir eru í VI. kafla um undaneldisdýr hvenær sem þeir eru fæddir. (Undanskilið varanlegt auðkenni).
Lágmarksaldur hunda í mjaðma- og olnbogamyndatöku er 12 mánuðir. (Undanskilið 10 hundakyn.)
Hundar sem greinast með C mjaðmir mega eingöngu parast með hundum með A eða B mjaðmir.
Áríðandi er að ræktendur noti ekki til undaneldis þá hunda sem uppfylla ekki þau heilsufarspróf (t.d. augnskoðun, mjaðmamyndun og/eða olnbogamyndir) sem gilda fyrir tegundina. Þeir ræktendur sem uppfylla ekki þessar kröfur verða áminntir með bréfi sem jafnframt verður sent til viðkomandi ræktunardeildar og Siðanefndar HRFÍ.
Röntgenmyndir af mjöðmum og olnbogum hunda eru sendar til Svíþjóðar eða Bandaríkjanna til aflestrar. Myndir eru ekki sendar utan fyrr en ættbókarskírteini hundsins hefur borist á skrifstofu HRFÍ ásamt greiðslu fyrir kostnaði.
Við augnskoðun á vegum HRFÍ er leitað eftir þeim augnsjúkdómum sem eru arfgengir í hverju hundakyni.
Greinist hundur með arfgenga vaxandi sjónurýrnun (PRA) fást hvolpar undan honum ekki ættbókarfærðir, né afkvæmi hvolpa hans úr fyrri gotum og/eða fleiri afkvæmi foreldra hans.