Visitamos co alumnado as instalacións da planta potabilizadora da Telva para aprendermos sobre o proceso de tratamento da auga desde o río Mero até as billas de milleiros de fogares da cidade da Coruña e arredores. Traballo de campo e de laboratorio.

Iván Méndez, investigador do Grupo Illa da UdC e experto en toponimia, comparte o seu coñecemento para abrirnos os ollos e dar a coñecer que por tras dun topónimo hai sempre unha historia, unha lenda ou mesmo unha alerta popular. Da man do tamén filólogo e músico Xurxo Souto, con carisma, vocación, paixón, vehemencia e arroutada pangalaica, visitamos a nosa contorna para enchérmonos de orgullo por formarmos parte da historia do Peruleiro e da Agra do Orzán.