Aplikimi online bëhet duke shtypur butonin APLIKO. Pasi hapet formulari, plotësohen të dhënat që kërkohen ose në www.apply.unite.edu.mk duke klikuar në rubrikën: Cikli i parë

Kanditatët të cilët aplikojnë për transferim të studimeve ose ciklin e dytë, selektojnë rubrikën përkatëse.

Aplikimi online do të jetë i hapur edhe brenda datave të caktuara për dorëzimin e dokumenteve. 

Fillimisht duhet ta keni realizuar pagesën për aplikim prej 1050 denarëve (MKD) në bankë, në Postën e Maqedonisë ose online në https://epay.unite.edu.mk. 

Në rast se programi ku aplikoni ka provim pranues, atëherë duhet të realizoni edhe fletëpagesë tjetër të veçantë prej 600 denarësh për lëndë (shih listën më poshtë). Nëse pagesa kryhet online, atëherë duhet të selektoni edhe rubrikën e provimit pranues.

• PAGESA ONLINE: e-Pay UT 

• Fletëpagesa me udhëzime 

• Shtetasit e Maqedonisë së Veriut pagesën e realizojnë me fletëpagesë PP50 në llogarinë: 100000000063095, Në ,,llogaria e shfrytëzuesit buxhetor - subjekti shfrytëzues” (сметка на буџетски корисник – единка корисник“ – 1600160054 788 10; në ,,shifra dhe programi i të hyrave” (приходна шифра и програма) – 723019 43. 

• Shtetasit e huaj të cilët pagesën e bëjnë nga vendi i tyre: https://epay.unite.edu.mk/

• Fletëpagesa/at fotografohen apo skenohen dhe ruhen në pajisjen Tuaj, me qëllim që gjatë plotësimit të formularit ta bëni attach (upload file), në rubrikat ku kërkohet. 

• Fletëpagesa e paguar online, mund të shkarkohet pas pagesës, ndërsa e njëjta u dërgohet edhe në email.

LISTA 

Dokumentet fotografohen në të dyja anët (nëse kanë të dhëna në të dyja anët e fletës) dhe ruhen në pajisjen tuaj si fotografi apo të skenuara. Çdo dokument: dëftesat për secilin vit, diploma, certifikata e lindjes dhe shtetësisë që skenohen apo fotografohen, ruhen të veçanta në pajisjen Tuaj dhe më pas në çdo rubrikë gjatë plotësimit online ngarkohen (bëhen upload) në rubrikat përkatëse aty ku kërkohen.

Shtetasit e huaj të cilët kanë kryer shkollim të mesëm 3-vjeçar, në vend të vitit të parë e vendosin dëftesën ku është klasa e 9-të.

Shtetasit e huaj, të cilët të gjitha vitet e shkollimit të mesëm i kanë në një dokument, dokumentin e njëjtë e vendosin në të gjitha vitet e shkollimit, përveç vitit të parë ku duhet të vendoset klasa e 9-të

Ata që aplikojnë me korrespondencë, duhet të bashkëngjesin edhe një vërtetim që e arsyeton studimin me korrespondencë (vërtetim për marrëdhënie pune, vërtetim mjekësor nëse vështirësitë shëndetësore i pengojnë të jenë të rregullt).

Kandidatët që aplikojnë dhe bëjnë pjesë në ndonjërën kategori: fëmijë pa asnjërin prind apo fëmijë në përkujdesje sociale, invalid lufte apo person me aftësi të kufizuara, duhet të bashkëngjesin: certifikatat e vdekjes së të dy prindërve ose dokument nga Qendra për punë sociale se janë në mbikëqyrje kujdestarie ose dokument nga institucionet përkatëse për shkallën e invaliditetit.

Në çdo buton të vendosur te rubrikat e caktuara, mund t'i bëni dokumentet upload. Te rubrikat e dëftesave mund t'i bëni upload dy dokumente, gjegjësisht të dyja anët e dëftesave.

Notat vendosen në rubirkën e notave ashtu siç janë në dëftesë me radhë: shembull: 45345445343

Notat shkruhen ashtu siç janë të vlerësuara, me vlerat përkatëse.

Diplomimi në shkollim të mesëm ka ndryshuar gjatë viteve. Disa gjenerata para vitit 2007/08 nuk kanë dhënë maturë shtetërore, më pas prej vitit 2009-2012 kanë dhënë maturë shtetërore me dy lëndë eksterne dhe 2 interne (+detyra projektuese). Pas vitit 2013 deri 2019, kanë dhënë maturë shtetërore me tre lëndë eksterne dhe 1 interne (+detyra projektuese). 

Në vitin 2020, si rezultat i situatës së jashtëzakonshme, maturantët nuk kanë dhënë maturë shtetërore, andaj gjatë aplikimit e selektojnë: Shkollim i mesëm i kryer në vitin 2019/20;

Kanditatët të cilët kanë dhënë maturë shtetërore në vitin 2021, 2022, 2023 е selektojnë: maturë shtetërore 2021-2023, 

Llogaritësi i pikëve 

Llogaritja e pikëve ka karakter informues.

Pasi e plotësoni formularin me të gjitha rubrikat e kërkuara, atëherë e shtypni butonin dërgo dhe ju shfaqet një tekst konfrimues se aplikimi është dërguar.

Në e-mailin Tuaj do të pranoni një kopje të formularit me të dhënat që i keni plotësuar.

Nëse e-maili Juaj është shkruar gabim, atëherë nuk do të pranoni konfirmim, por megjithatë, aplikimi Juaj është evidentuar në sistem, nëse e keni dërguar.

Prej emailit Tuaj duhet të krijoni profilin e aplikuesit, prej ku do ta shihni procesin e rezultateve dhe prej ku do të mund ta bëni edhe regjistrimin pas pranimit.

https://apply.unite.edu.mk/Identity/Account/Login

Afati 1: 28.08 - 01.09.2023

Afati 2: 13 - 15.09.2023

Afati 3: 25-26.09.2023

Afati 1: 02.09.2023

Afati 2: 16.09.2023

Afati 3: 27.09.2023

Programet që mundësojnë studime me korrespondencë, te rubrika (kolona) ku shkruan KORRESPONDENCË kanë të evidentuar numër për vende të lira në konkursin për regjistrim.

Rezultatet do të shpallen në ueb faqen e universitetit sipas datës së caktuar në konkurs.

Rezultatet mund të shihen edhe në profilin e aplikuesit.

Në rezultatet e pranimit, do të shpallen të gjitha të dhënat e kandidatit dhe pikët e mbledhura. Kandidatët rangohen duke filluar nga ai që ka më shumë pikë të fituara. Pranimi i kandidatit mund të jetë me kuotë shtetërore (100 euro semestër), koofinancim (200 euro semestër), korrespondencë (200 euro semestër). Për shtetasit e huaj dhe kategoritë e tjera do të shkruhet vetëm i pranuar.

Për kandidatët që nuk do të pranohen, do të shkruhet: I/e papranuar) 

Arsye për të qenë jo i/e pranuar mund të jenë rastet kur: nuk ka vende të lira sipas konkursit (shih rubrikat me numra në konkurs për çdo program ku janë vendet e lira), keni më pak se 40 pikë, nuk e keni kaluar provimin pranues (më pak se 10 pikë) ose keni mangësi në dokumentacion.

Në rast se vëreni ndonjë lëshim teknik, atëherë mund të parashtroni ankesë online ose në arkiv, brenda ditës që shpallen rezultatet e para, me qëllim që komisioni ta shqyrtojë aplikimin tuaj përsëri.

Fillimisht rangohen kandidatët shtetas të Maqedonisë së Veriut për çdo program studimor, respektivisht ata që kanë më shumë pikë pranohen me kuotë shtetërore deri sa ka vende të lira, pastaj me koofinancim deri sa ka vende të lira dhe me korrespondencë. 

Kandidatët: kuotë e nacionaliteteve (pakicave), invalid lufte ose person me aftësi të kufizuara dhe kategori të tjera nuk konkurrojnë me të tjerët dhe shpallen të veçantë në listë;

Shtetasit e huaj nuk konkurrojnë me shtetasit e Maqedonisë, por vetëm me kandidatët e shtetit të tyre.

Rezultatet shpallen dy herë. Fillimisht rezultatet preliminare dhe pastaj rezultatet përfundimtare.

Pasi shpallen rezultatet e para (preliminare), kandidatët kanë të drejtë që brenda 8 orëve të parashtrojnë ankesë nëse kanë ndonjë vërejtje teknike, ndërkaq të nesërmen shpallen rezultatet përfundimtare, pas së cilave nuk ka më afat për ankesa.

Nëse në rezultatet përfundimtare jeni pranuar, atëherë brenda afatit të caktuar për regjistrim duhet ta bëni pagesën e semestrit (regjistrimin e studimeve).

Pagesa e semestrit dhe regjistrimi është i obligueshëm, për shkak se me këtë kandidati e konfirmon se do ta shfrytëzojë  vendin në të cilin është pranuar dhe do të bëhet student. 

Nëse nuk bëhet regjistrimi, atëherë vendi në të cilin është pranuar kandidati, do të shpallet i lirë për afatin e ardhshëm.

Pasi të kryhen të gjitha proceset e regjistrimit dhe të gjitha afatet, më 3 tetor do të fillojë dita e parë e procesit mësimor. 

Oraret e mësimit do të jenë të shpallura në profilin elektronik të studentit www.lms.unite.edu.mk;

Të gjithë studentët, do të pajisen me e-mail zyrtar të universitetit, përmes të cilit do t'i shfrytëzojnë të drejtat e studimeve dhe mundësitë e tjera elektronike.

Të gjithë studentët që duan t'i transferojnë studimet nga një universitet tjetër ose nga një program në program tjetër, duhet t'i ndjekin procedurat e njëjta, duke klikuar në rubrikën e aplikimit për transferim.

Dëshmia për akreditim kërkohet vetëm për kandidatët që janë shtetas të huaj. 

Kandidatët me transferim, rezultatin e transferit e pranojnë në e-mail dhe kanë afat prej 48 orësh ta korrigjojnë, në bashkëpunim me koordinatorin për ECTS, nëse ka ndonjë vërejtje të caktuar.

Afatet për transferim janë në rubrikën përkatëse të faqes.

Jo, në asnjë program të ciklit të dytë nuk realizohet provim pranues.

Pranimi bëhet sipas suksesit të arritur në studimet e ciklit parë.

Zakonisht leksionet në ciklin e dytë mbahen gjatë vikendit.

Po, pagesa e një semestri mund të realizohet me dy këste të barabarta. 

Të gjitha dokumentet mund të dorëzohen të noterizuara, përveç certifikatës së notave.

 Diploma duhet të dorëzohet origjinale për verifikim gjatë dorëzimit të dokumenteve.

Studentët të cilët studimet i përfundojnë në Universitetin e Tetovës, mund të aplikojnë me certifikatë diplome ose certifikatë të notave ku është e theksuar se kanë përfunduar studimet. Diplomën e dorëzojnë pasi ta pranojnë nga shërbimi përkatës.

Studimet dy vjeçare: 500 euro

Studimet një vjeçare: 750 euro

Po, studimet mund të bëhen me korrenspondencë.

Gjatë aplikimit duhet të dorëzohet edhe dokument që arsyeton statusin e studimeve me korrenspondencë. 

Studentët të cilët kanë kryer studimet në ndonjë vend ku sistemi i vlerësimit është i ndryshëm nga i RMV-së, duhet t'i konvertojnë notat në Ministrinë e Arsimit dhe Shkencës-RMV, me qëllim që të verifikohet nga komisioni.

Studentët të cilët studimet i kanë kryer jashtë RMV-së, duhet që në vendin ku i kanë kryer studimet të sigurojnë dokument (VENDIM) për akreditimin e programit studimor që e kanë përfunduar. Ky dokument zakonisht merret në Agjensionin për akreditim të vendit, MASH ose edhe online në faqet zyrtare të institucioneve përkatëse.