宜蘭地檢署 相褒反賄選 蘭陽相褒表演團
作者:莊文龍0911217668
來來 來!鄉親請恁徛倚來!
看看 看!逐家相招緊來看!
1.選舉開始來比賽，推銷家己上厲害，
好人出頭做民代，保證地方好將來。
2.政見請恁著了解，拜託予我試看覓，
投我一票才應該，建設國家全民愛。
3.人講選舉無師傅，錢若開了伊閣輸，
買買票嘛無一定有，後改毋敢驚摃龜。
4.烏紗買票咱就害，偷工減料趁轉來，
風颱地動恁隨知，厝倒橋斷哭悲哀。
5.選舉若是 用買票，予伊選牢真𪁎 趒，
烏白亂做誠可惜，選民著愛選予著。
6.選舉替人佇運動，雞歕甲足膨風，
買票夆關第一戇，賣票坐監世界悾。
7.好人當選展抱負，歹人掠去監獄跍，
選民目金誰敢舞，啥人好膽閣貪汙。
8.檢舉獎金五十萬，逐家相招緊來趁，
買票賣票送法辦，清廉政治上蓋讚。
9.蘭陽相褒表演團，創新變化欲流傳，
需要逐家來運轉，予咱流行通台灣。
10.歡喜和您來相褒，正剾倒削免用刀，
做歹破膽變較好，金言玉語袂囉嗦。
11.現代褒歌真時行，唱出你我的心聲，
認真拍拚做好囝，疼惜台灣同齊行。
12.講著褒歌人人愛，巧妙七字好安排，
唱出你我的氣慨，心聲講出通人知。
13.唱歌算是好代誌，讀了若熟加捌字，
功課咱若做完備，閒閒通好唸歌詩。
14.學唸歌仔也真好，袂輸佮人讀暗學，
日時穡頭做清楚，三不五時唱𨑨迌。
15.唸歌算是若講話，小可談言拍笑詼，
招你相褒你若欲，這條唸出做歌媒。
16.相褒歌曲台灣寶，出喙成歌來相褒，
逐家來學真正好，欲揣這款世界無。
2009/11/14 志清堂10:00-11:30
套調:1-4蝸牛與黃鸝鳥、5-8卜卦調。