Euskaraz aritzeko guneek, euskaraz hitz egiteko aukera bermatzen dute, izan entitate barruan edo izan entitateak herritarrekin duen harremanean. Bi motako ariguneak bereizten ditugu:

Barne-ariguneak

Kide guztiek gutxienez euskara ulertzen duten taldeak dira. Sailak, atalak, ekipoak, sekzioak, zerbitzuak, taldeak izan daitezke. Taldekideek hizkuntza-ohiturak aldatzea adostuko dute. Arigunea osatzeko beharrezkoa izango da taldeko kideen %80a gutxienez ados egotea. Ariguneetako kide bakoitzak erabakiko du ahobizi edo belarriprest moduan parte hartzea.

Kanpo-ariguneak

Entitatean herritarrekiko harreman-espazioetan dauden pertsonek osatzen dute kanpo-arigunea, uneoro belarriprest edo ahobizi bat egongo dela bermatzen bada; hau da, herritarrek uneoro euskaraz artatuak izateko bermea badute. Horrelako espazioak izango dira jendaurreko edo harrera postuak, supermerkatuetako kutxak, telefono bidezko arreten arduradunak, tabernariak edo dendariak, besteak beste.