La macia del vento
Sito mai stà, butelo, solo, in fima a un montesel,
soto l’ombra sbusolà de un olivo sentenaro,
stravacà su la jacheta,
co’ la tera che te broa, co’ el farfoio li a du passi,
co’ la menta parfumada e un castel dai muri eci che se ede de lontan,
in te ‘na macia ando’ el vento supia sempre note e di’?
Sito mai sta, butelo, ando’ siga le sigale,
in medo ai sgrepani de lujo, co’ i ciuffi de erba seca,
col parfumo del l’origano, ando cresce el sgolmarin?
Eto isto, buteloto, far le corse i formigoti?,
inansi, indrio, de su e de do, te se mai ando i gha da nar,
come i omeni de sita’ che i gha schei, palassi e done
e ijè tuti ‘n te un lintrolo che me pare ‘n bisso nero; do de q’i e do de li’,
co la testa sempre bassa, no i sa pi ando sipia el sol.
Eto sentio, butelo, come scrissola le paie a le do dopo disnar?
quando l’aria la te scota,
co’ el sol che scioca e scopia su le slote de la tera de ‘n campeto apena arà,
co’ el moscon che ruza intorno, nero e tuto immatonio,
co’ l’usertola che te arda, boca erta e senza coa?
Q’i gh’e’ el mondo dei baeti: sentogambe, setaijni, surle, lole e panaroti e
sigale e sigalini, che sigando, el par che i sega;
i someia ai nostri capi, q’ei do la’ che gh’e’ la do’, sempre ‘n drio a predicar.
Stando q’i co’ i oci in tera, te desmenteghi, butelo, i criori de la jente,
el bacan che l’omo fa par far édar che l’è vivo.
Caro fiolo, in ‘te sti monti, anca mi son sta butelo,
anca mi ho proa’ l’amor.
La Marieta de q’ei ani, l’era bela e dacarosa,
con le tresse e el grembialin, con du oci che parea do sirese de Cassan.
‘Na cossa ojo dirte de ste chiete e do sto sol:
q’i se impara el saor del silenzio natural,
e ‘na roba tanto bela: q’i se impara a amar.
Verona 16 agosto 1985
GLOSSARIO