ຫໍສະໝຸດກອງທັບໄດ້ຕ້ອນຮັບ ສະຖາບັນການເມືອງແລະການປົກຄອງແຫ່ງຊາດ ມາທັດສະນະສືກສາ ແລະ ແລກປ່ຽນບົດຮຽນກ່ຽວກັບວຽກງານຫໍສະໝຸດ.

     ໃນເວລາ 13:00 ຂອງວັນທີ່ 18 ກັນຍາ 2024, ທີ່ຫໍສະໝຸດກອງທັບ ໄດ້ຈັດພິທີຕ້ອນຮັບ ສະຖາບັນການເມືອງແລະການປົກຄອງແຫ່ງຊາດ ມາທັດສະນະສືກສາ ແລະ ແລກປ່ຽນບົດຮຽນກ່ຽວກັບວຽກງານຫໍສະໝຸດ ນຳພາໂດຍ ທ່ານ ບຸນປັນ ສຸວັນທອງ ຮອງຫົວໜ້າສູນຂໍ້ມູນຂ່າວສານການເມືອງແລະການປົກຄອງແຫ່ງຊາດ ພ້ອມດ້ວຍພະນັກງານຄູ - ອາຈານລວມທັງໝົດ 13 ທ່ານ. ເປັນກຽດຕ້ອນຮັບໂດຍ ທ່ານ ພັອ ວຽງທອງ ວີດພາວົງ ອຳນວຍການຫໍສະໝຸດກອງທັບ ພ້ອມດ້ວຍຄະນະ ແລະ ພະນັກງານຈຳນວນໜື່ງເຂົ້າຮວ່ມ. ພິທີແລກປ່ຽນບົດຮຽນໄດ້ດຳເນີນໄປຢ່າງມີເນື້ອໃນທີ່ສຳຄັນເລີກເຊີ່ງ ແລະ ມີບັນຍາກາດຟົດຟື້ນ.

     ເບື້ອງຕົ້ນ ທ່ານ ທ່ານ ບຸນປັນ ສຸວັນທອງ ຮອງຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງແຫ່ງຊາດ ໄດ້ຂື້ນລາຍງານຈຸດປະສົງຂອງການມາທັດສະນະສຶກສາ ແລະ ແລກປ່ຽນບົດຮຽນໃນຄັ້ງນີ້ ເພື່ອຢາກຖອດຖອນບົດຮຽນບາງວຽກງານ ດັ່ງນີ້: ການນຳໃຊ້ໂປແກຣມວິນາລີບ ແລະ ການບໍລິການຫໍສະໝຸດ(ການຢືມ-ສົ່ງປື້ມ), ການຊອກຫາຊັບພະຍາກອນຂໍ້ມູນຂ່າວສານເຂົ້າຫໍສະໝຸດ, ການຄຸ້ມຄອງເອກະສານ, ວີທີການສືບຄົ້ນ,ການເກັບຮັກສາປື້ມ ແລະ ວາລະສານ, ການວິເຄາະໝວດໝູ່ ແລະ ວາລະສານ.

     ຈາກນັ້ນ ພັອ ວຽງທອງ ວີດພາວົງ ອໍານວຍການຫໍສະໝຸດກອງທັບ ກໍ່ໄດ້ກ່າວຍີນດີຕ້ອນຮັບ ແລະ ພ້ອມທັງລາຍງານການເຄື່ອນໄຫວວຽກງານຫໍສະໝຸດໂດຍຫຍໍ້ໃນໄລຍະຜ່ານມາ ແລະ ມີຄຳເຫັນຊີ້ແຈງຕາມຄຳສະເໜີຂອງສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ສະເໜີມາ, ຈາກນັ້ນພະນັກງານວິຊາການກໍ່ໄດ້ຂື້ນອະທິບາຍກ່ຽວກັບວຽກງານວິຊາສະເພາະຂອງແຕ່ລະຂອດວຽກງານຕົວຈິງຢ່າງລະອຽດຄົບຖ້ວນ ແລະ ພະນັກງານທັງສອງຝ່າຍກໍ່ໄດ້ແລກປ່ຽນບົດຮຽນມີຄຳເຫັນຕໍ່ກັນ ດ້ວຍຄວາມຮັກແພງແບບເປັນກັນເອງຢ່າງເປັນເອກະສັນ. ຕໍ່ມາ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ມອບປື້ມຈຳນວນໜື່ງໃຫ້ແກ່ຫໍສະໝຸດກອງທັບ ເພື່ອເປັນການປະກອບສວ່ນໃນການສົ່ງເສີມການອ່ານເພື່ອໃຫ້ພະນັກງານ - ນັກຮົບໄດ້ຊອກຮູ້ຮໍ່າຮຽນຫຼາຍຂື້ນ.