ຫໍສະໝຸດກອງທັບ ລົງຢ້ຽມຢາມ ແລະ ອວຍພອນຄອບຄົວພະນັກງານບຳນານການນຳ

ຕອນເຊົ້າຂອງວັນທີ 11 ກຸມພາ 2025 ທີມງານ ຫໍສະໝຸດກອງທັບ ນຳໂດຍ ພັນໂທ ນ. ຄູນທອງ ທຳມະວົງ ພ້ອມດ້ວຍຄະນະ ແລະ ພະນັກງານຈຳນວນໜຶ່ງ ໄດ້ນຳເອົາກະຕ່າຂອງຂວັນ ແລະ ຄຳອວຍພອນລົງຢ້ຽມຢາມ ຄອບຄົວ ທ່ານ ພົນຕີ ວໍລະສານ ວິລັດດາວົງ ອາດີດ ຮອງຫົວໜ້າ ກົມໃຫຍ່ການເມືອງກອງທັບ ເພື່ອເປັນການສະແດງຄວາມຮັກແພງ ແລະ ຮູ້ບຸນຄຸນ ຕໍ່ພະນັກງານອາວຸໂສປະຕິວັດ ເນື່ອງໃນໂອກາດວັນສ້າງຕັ້ງກອງທັບ ຄົບຮອບ 76 ປີ ຫາກໍ່ຜ່ານພົ້ນໄປ.

     ເຈົ້າພາບກໍ່ໄດ້ໃຫ້ການຮັບຕ້ອນຢ່າງອົບອຸ່ນ ແລະ ມີເນື້ອໃນຄວາມໝາຍສຳຄັນຢ່າງເລິກເຊິ່ງ ພວກເຮົາມີຄວາມຮູ້ສຶກພາກພູມໃຈ ແລະ ເປັນກຽດຢ່າງຍິງ ຂໍໃຫ້ຄວາມສາມັກຄີຮັກແພງຈົ່ງຍືນຍົງຕະຫຼອດໄປ.