ຫໍສະໝຸດກອງທັບ ຈັດການແຂ່ງຂັນຖາມ-ຕອບຄວາມຮູ້ຮອບຕົວ​ ຂັ້ນກະຊວງປ້ອງກັນປະເທດ ຄັ້ງທີ​ ​III.​

    ໃນຕອນເຊົ້າຂອງວັນທີ 18 ມັງກອນ 2024 ນີ້, ຫໍສະໝຸດກອງທັບ ໄດ້ຈັດການແຂ່ງຂັນຖາມ-ຕອບ ຄວາມຮູ້ຮອບຕົວໃຫ້ບັນດາກົມກອງອ້ອມຂ້າງກະຊວງປ້ອງກັນປະເທດ, ໂດຍການເປັນປະທານຂອງ ສະຫາຍ​ ພັນເອກ​ ແສງອາລຸນ ແກ້ວສະຫວ່າງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີທັງໝົດ 17 ພາກສ່ວນເຂົ້າຮ່ວມຕອບຄຳຖາມ, ມີຄະນະພັກ-ຄະນະບັນຊາບັນດາພະນັກງານ-ນັກຮົບພາຍໃນຫໍສະໝຸດເຂົ້າຮ່ວມ.

         ສະຫາຍ ພັນເອກ​ ວຽງທອງ​ ວິດພາວົງ ອຳນວຍການຫໍສະໝຸດກອງທັບ,​ ໄດ້ຂື້ນຜ່ານແຜນການແຂ່ງຂັນ ຖາມ-ຕອບ ຄວາມຮູ້ຮອບຕົວ ແລະ​ ໄດ້ກ່າວເປີດພິທີຢ່າງເປັນທາງການ, ຈຸດປະສົງກໍ່ເພື່ອຊຸກຍູ້ຂະບວນການຂໍ່ານັບຮັບຕ້ອນບັນດາວັນປະຫວັດສາດສໍາຄັນຕ່າງໆ ຂອງພັກ, ຂອງຊາດ, ຂອງກອງ ທັບ ໂດຍສະເພາະແມ່ນການຂໍ່ານັບນັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ​ 75​ ປີໃຫ້ມີເນື້ອໃນຄວາມໝາຍເລິກເຊິ່ງ. ຜ່ານການແຂ່ງຂັນຖາມ-ຕອບ ຕົວຈິງສາມາດຍາດ ໄດ້ລາງວັນ ທີ I ໄດ້ແກ່ກອງພັນໃຫຍ່ 279,​ ລາງວັນທີ​ II​ ໄດ້ແກ່​ ກອງພັນໃຫຍ່​ 605, ແລະ  ລາງວັນທີ​ III​ ​ໄດ້ແກ່​ກົມ​ 213,​ ນອກນີ້ຍັງໄດ້ຮັບລາງວັນຊົມເຊີຍ 14​ ກົມກອງ.​

          ໂອກາດດັ່ງກ່າວ ສະຫາຍ​ ພັນເອກ​ ແສງອາລຸນ ແກ້ວສະຫວ່າງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ,​ ໄດ້ໃຫ້ກຽດໂອ້ລົມ ແລະ ​ສະແດງຄວາມຍ້ອງຍໍຊົມເຊີຍ ມາຍັງ​ຫໍສະໝຸດກອງທັບ ທີ່ຈັດການແຂ່ງຂັນຖາມ-ຕອບ ໃຫ້ນອນຢູ່ໃນທ່າມກາງບັນຍາກາດທີ່ທົ່ວພັກ,​ ທົ່ວກອງທັບພວມອອກແຮງແຂ່ງຂັນກັນສ້າງຂະບວນການຜົນງານດ້ານຕ່າງໆ, ເພື່ອຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ,​ ແລະ​ ຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວຄົບຮອບ​ 75 ປີຢ່າງເປັນຂະບວນຟົດຟື້ນ​ ແລະ​ ກ້ວາງຂວາງ.​  ຜ່ານການແຂ່ງຂັນຖາມຕອບຕົວຈິງພາກສ່ວນທີ່ຕອບໄດ້ດີກໍ່ມີຫຼາຍພາກສ່ວນ​ ແລະ​ ຍາດໄດ້ລາງວັນຈົນສຳເລັດ.​ ຕອນທ້າຍສະຫາຍ ພັນເອກ​ ວຽງທອງ​ ວິດພາວົງ ກໍ່ໄດ້ກ່າວປິດພິທີຢ່າງເປັນທາງການ.​