ພິທີມອບ-ຮັບ ປຶ້ມຂອງ ທ່ານ​ ກາບແກ້ວ ທຳມະວົງ​ 

ນັກຂຽນໜຸ່ມແຫ່ງ ສປປ ລາວ ໃຫ້ແກ່ ຫໍສະໝຸດທົ່ວປະເທດ. 

     ໃນ​ຕອນບ່າຍ​ ຂອງວັນທີ່ 14 ມິຖຸນາ 2024 ຜ່ານມານີ້ ໄດ້ມີພິທີມອບ-ຮັບປຶ້ມຂຶ້ນຢ່າງເປັນທາງການທີ່ວັດສີສະເກດ,​ ນະຄອນຫຼວງ​ວຽງຈັນ. ໂດຍການໃຫ້ກຽດ​ເຂົ້າຮ່ວມຂອງ ທ່ານ ​​ພຣະອາຈານ​ໃຫຍ່​ ມະຫາເຫວດ ມະເສໄນ ເຈົ້າອະທິການວັດສີສະເກດ ຮອງ​ປະທານ​ສູນກາງ​ອົງການ​ພຸດທະ​ສາສະໜາ​ສັມພັນແຫ່ງ ສປປລາວ,​ ທ່ານ​ ປອ.​ ສຳລານ​ ຫລວງອາໄພ ຜູ້ອຳນວຍການ​ຫໍ​ສະໝຸດ​ແຫ່ງຊາດ,​ ທ່ານ​ ສຸກທະວີ​ ວົງໄຊ​ ຜູ້ອຸປະຖຳຫລັກໃນການຈັດພິມປຶ້ມພ້ອມດ້ວຍ ​ພຣະ​ເຖຣານຸເຖຣະ ແລະ ພະນັກງານຫໍສະໝຸດຈາກພາກສ່ວນຕ່າງໆອ້ອມຂ້າງນະຄອນຫຼວງວຽງຈັນກໍ່ມີໜ້າເຂົ້າຮ່ວມ.​

       ໃນພິທີ ທ່ານ ກາບແກ້ວ​ ທຳມະ​ວົງ (ເຈົ້າຂອງປຶ້ມ)​ ໄດ້ຂຶ້ນກ່າວຄຳເຫັນກ່ຽວກັບທີ່ມາຂອງປຶ້ມ. ພິທີດັ່ງກ່າວ ພະອາຈານໃຫຍ່ ມະຫາເຫວດ ມະເສໄນ ກ່າວຄຳຂອບໃຈຕໍ່ຄວາມສຳຄັນຂອງປຶ້ມດັ່ງກ່າວທີ່ ທ່ານ ກາບແກ້ວ ທຳມະວົງໄດ້ຄົ້ນຄິດ-ຮີບໂຮມປະດິດຄິດແຕ່ງຂຶ້ນມາ, ປຶ້ມດັ່ງກ່າວມີເນື້ອໃນກ່ຽວກັບປະຫວັດພະທາດເຈດີ ແລະ ວັດທີ່ສໍາຄັນຕ່າງໆໃນ ສປປລາວ. ເຊິ່ງເປັນເຫດການທີ່ສຳຄັນທີ່ບໍ່ເຄີຍມີໃຜຄົ້ນຄິດມາກ່ອນເປັນຂໍ້ມູນທີ່ຈຳເປັນ, ຄົນລາວເຮົາຄວນຮູ້ເປັນມໍລະດົກອັນສຳຄັນດ້ານວັດທະນາທຳຂອງຊາດທີ່ພວກເຮົາຄວນຮັກສາໄວ້.

       ຕໍ່ມາກໍ່ມີພິທີມອບ-ຮັບປຶ້ມໃຫ້ພາກສ່ວນຕ່າງໆທີ່ເຂົ້າຮ່ວມປຶ້ມທີ່ນຳມາມອບໃນຄັ້ງນີ້ມີ 570 ຫົວ​ລວມມູນຄ່າ​ : 285.000.000ກີບ (ສອງຮ້ອຍແປດສິບຫ້າລ້ານກີບ).​ ໂດຍການຈັດພິມຂອງຮ້ານຂາຍປຶ້ມ D-Book. ພິທີໄດ້ສຳເລັດລົງໃນເວລາ 15:00’ ຂອງວັນດຽວກັນຢ່າງມີເນື້ອໃນຄວາມໝາຍອັນເລິກເຊິ່ງ.