ພິທີ ມອບ-ຮັບ ຖາວອນໂຄງການກໍ່ສ້າງຫໍສະໝຸດກອງທັບປະຊາຊົນລາວ​ ລະຫວ່າງກົມໃຫຍ່ການເມືອງກອງທັບ ກັບ ບໍລິສັດລາດຊະວົງພັດທະນາກໍ່ສ້າງຈຳກັດ

     ວັນທີ 25 ກໍລະກົດ 2023 ນີ້, ກົມໃຫຍ່ການເມືອງກອງທັບ​ ແລະ​ ບໍລິສັດລາດຊະວົງພັດທະນາກໍ່ສ້າງຈຳກັດໄດ້ຈັດຕັ້ງພິທີ ມອບ-ຮັບ ຖາວອນໃຫ້ກັບຫໍສະໝຸດກອງທັບປະຊາຊົນລາວ,​ ເຊິ່ງພິທີ ດັ່ງກ່າວໄດ້ຈັດຂຶ້ນຢູ່ຫ້ອງປະຊຸມຂອງຫໍສະໝຸດກອງທັບ ໂດຍການເປັນປະທານຂອງສະຫາຍ ພົນຕີ ສອນທອງ ພົມລາວົງ ກຳມະການຄະນະປະຈຳພັກກະຊວງ​ປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ,​ ມີຕາງໜ້າຫ້ອງການກົມໃຫຍ່ການເມືອງກອງທັບ,​ ກົມໂຄສະນາອົບຮົມ,​ ຫ້ອງການບໍລິຫານ ພ້ອມດ້ວຍຄະນະພັກ-ຄະນະບັນຊາ, ບັນດາພະແນກການຕະຫຼອດຮອດພະນັກງານ-ວິຊາການຫໍສະໝຸດກອງທັບທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

   ໃນພິທີຕາງໜ້າບໍລິສັດລາດຊະວົງພັດທະນາກໍ່ສ້າງຈຳກັດ ຂຶ້ນລາຍງານການກໍ່ສ້າງຫໍສະໝຸດກອງທັບວ່າດ້ວຍການດຳເນີນວຽກງານຮັບປະກັນການກໍ່ສ້າງ ແລະ​ ຜ່ານການຈັດຕັ້ງປະຕິບັດໄດ້ພົບທັງຂໍ້ສະດວກ ແລະ ຂໍ້ຍຸ້ງຍາກ.​ ໃນພິທີໄດ້ລົງນາມເຊັນ​ ມອບ-ຮັບ ​ຖາວອນໂຄງການກໍ່ສ້າງຫໍສະໝຸດກອງທັບປະຊາຊົນລາວ, ເຊິ່ງຕາງໜ້າມອບ ບໍລິສັດລາດຊະວົງພັດທະນາກໍ່ສ້າງຈຳກັດ​ ແລະ​ ຕາງໜ້າຮັບໂດຍສະຫາຍ ພົນຕີ​ ສອນທອງ ພົມລາວົງ ກຳມະການຄະນະປະຈຳພັກກະຊວງ​ປ້ອງກັນປະເທດ ຮອງຫົວໜ້າກົມໃຫຍ່ການເມືອງກອງທັບ.​