ພະແນກຊາວໜຸ່ມ ກົມໃຫ່ຍການເມືອງກອງທັບ ລົງຊຸກຍູ້ວຽກງານຂະບວນການຂໍ້ແຂ່ງຂັນ 04 ບຸກຢູ່ໜ່ວຍຊາວໜຸ່ມ ຫໍສະໝຸດກອງທັບ. 

ໃນເວລາ 14:00 ຂອງວັນທີ່ 13 ມີຖຸນາ 2025 ນີ້, ທີ່ຫໍສະໝຸດກອງທັບໄດ້ມີ, ພະແນກຊາວໜຸ່ມ ກົມໃຫ່ຍການເມືອງກອງທັບ ລົງມາເຄື່ອນໄຫວຊຸກຍູ້ຂະບວນການຂໍ້ແຂ່ງຂັນ 04 ບຸກຢູ່ ໜ່ວຍຊາວໝຸ່ມຫໍສະໝຸດກອງທັບ. ໂດຍການເປັນປະທານຮ່ວມຂອງ ສະຫາຍ ພັນໂທ ນ. ຄູນທອງ ທຳມະວົງ ຮັກສາການອຳນວຍການຫໍສະໝຸດກອງທັບ ຜູ້ຊີ້ນຳວຽກງານອົງການຈັດຕັ້ງມະຫາຊົນ ແລະ ສະ ຫາຍ ພັນໂທ ຈັນນະຄອນ ອາດສະໝຸດ ຫົວໜ້າພະແນກຊາວໜຸ່ມ ກົມໃຫ່ຍການເມືອງກອງທັບ, ມີພະນັກງານຊວ່ຍວຽກພະແນກຊາວໜຸ່ມ, ຄະນະໜ່ວຍຊາວໜຸ່ມ ແລະ ຫົວໜ້າຈຸພ້ອມດ້ວຍສະມາຊິກຊາວໜຸ່ມກໍ່ມີໜ້າເຂົ້າຮວ່ມຢ່າງພ້ອມພຽງ.

ພາຍຫຼັງພິທີເຂົ້າສູ່ຄວາມເປັນລະບຽບຮຽບຮ້ອຍແລ້ວ ສະຫາຍ ພັນຕີ ນ. ພົນເມກ ດາລາວົງ ເລຂາໜວ່ຍຊາວໜຸ່ມຫໍສະໝຸດກອງທັບ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນຊາວໜຸ່ມ 04 ບຸກ ປະຈຳປີ 2025 ຂອງໜວ່ຍຊາວໜຸ່ມຫໍສະໝຸດກອງທັບ ພ້ອມທັ້ງວາງທິດທາງແຜນການປະຈຳປີ 2026.

ຈາກນັ້ນ ສະຫາຍ ພັນໂທ ຈັນນະຄອນ ອາດສະໝຸດ ຫົວໜ້າພະແນກຊາວໜຸ່ມ ກົມໃຫ່ຍການເມືອງກອງທັບ ກໍ່ໄດ້ຂື້ນກ່າວຄຳເຫັນຢັ້ງຢືນຕໍ່ການປະເມີນຄຸນນະພາບຂອງສະມາຊິກຊາວໜຸ່ມໃນໜ່ວຍເຫັນວ່າ ມີຄວາມເຫັນດີເໝາະສົມຕາມການສະຫຼຸບຂອງສະຫາຍເລຂາໜ່ວຍ ແລະ ສະຫາຍ ກໍ່ໄດ້ຍົກໃຫ້ເຫັນຫຼາຍບັນຫາທີ່ສຳຄັນ ແລະ ຮຽກຮ້ອງໃຫ້ໜວ່ຍຊາວໜຸ່ມ ສືບຕໍ່ຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 04 ບຸກຂອງຊາວໜຸ່ມ ໃຫ້ເປັນຂະບວນການຟົດຟື້ນກ້ວາງຂວາງ, ຮັບປະກັນທາງດ້ານປະລິມານ ແລະ ຄຸນນະພາບ, ສ້າງອົງການຈັດຕັ້ງຊາວໜຸ່ມກາຍເປັນກຳລັງແຮງໃນການເຮັດສຳເລັດໜ້າທີການເມືອງຂອງກົມກອງ.

ຕໍ່ມາ ສະຫາຍ ພັນໂທ ນ. ຄູນທອງ ທຳມະວົງ ຮັກສາການອຳນວຍການຫໍສະໝຸດກອງທັບ ປະທານກອງປະຊຸມ ກໍ່ໄດ້ໃຫ້ກຽດຂື້ນໂອ້ລົມເຊີ່ງ ໄດ້ຍ້ອງຍໍ້ຊົມເຊີຍຕໍ່ຜົນງານທີ່ໜ່ວຍຊາວໜຸ່ມຫໍສະໝຸດກອງທັບຍາດມາໄດ້ໃນໄລຍະຜ່ານມາ ພ້ອມນັ້ນ ສະຫາຍກໍ່ໄດ້ຍົກໃຫ້ເຫັນຫຼາຍບັນຫາທີ່ສຳຄັນ ໂດຍສະເພາະ ວຽກງານສຶກສາອົບຮົມການເມືອງ-ນຳພາແນວຄິດ ແລະ ວຽກງານ 04 ບຸກ. ຕອນທ້າຍ ໄດ້ຢັ້ງຢືນຜົນງານການເຄື່ອນໄຫວຂອງໜ່ວຍຊາວໜຸ່ມ ຫໍສະໝຸດກອງທັບທີ່ຍາດມາໄດ້ ແລະ ໄດ້ສະເໜີໃຫ້ພະແນກຊາວໜຸ່ມ ກົມໃຫ່ຍການເມືອງກອງທັບ ຮັບການໃຫ້ໜ່ວຍຊາວໜຸ່ມຫໍສະໝຸດກອງທັບ ຄັດເລືອກເປັນໜ່ວຍຊາວໜຸ່ມ 04 ບຸກນຳໜ້າ.