ພິທີແລກປ່ຽນບົດຮຽນ ວິຊາສະເພາະລະຫວ່າງຫໍສະໝຸດກອງທັບ - ຫໍສະໝຸດ ປກສ

ໃນເວລາ 9:00 ຂອງເຊົ້າວັນທີ 25 ເມສາ 2024ທີ່ຫ້ອງປະຊຸມຊັ້ນ 2 ຫໍສະໝຸດກອງທັບ ໄດ້ມີພິທີຕ້ອນຮັບພະນັກງານ ຫໍສະໝຸດ ກະຊວງປ້ອງກັນຄວາມສະຫງົບ ມາແລກປ່ຽນບົດຮຽນວຽກງານວິຊາສະເພາະ ນຳ ຫໍສະໝຸດກອງທັບ ນຳໂດຍ ສະຫາຍ ພັ.ອ ປະລິນຍາໂທ ທົງສະຫວັດ ຫຼວງຈັນດາວົງສ໌ ຮອງຫົວໜ້າກົມ 512 ກົມຄົ້ນຄວ້າວິທະຍາສາດ - ປະຫວັດສາດ ປກສ ເປັນຫົວໜ້າຄະນະ ພ້ອມດ້ວຍພະນັກງານ ຂອງກົມ ດັ່ງກ່າວຈຳນວນ 10 ສະຫາຍ. ໃຫ້ກຽດຕ້ອນຮັບໂດຍ ສະຫາຍ ພັ.ອ ວຽງທອງ ວີດພາວົງ ອຳນວຍການຫໍສະໝຸດກອງທັບ ພ້ອມດ້ວຍຄະນະ ແລະ ພະນັກງານຫໍສະໝຸດກອງທັບ ຈຳນວນໜຶ່ງ.

     ພິທີແລກປ່ຽນໄດ້ດຳເນີນໄປຢ່າງມີເນື້ອໃນ ແລະ ມີບັນຍາກາດ ເບີກບານ ມ່ວນຊື່ນ.

     ເບື້ອງຕົ້ນ ສະຫາຍ ພັ.ທ ນ. ຕິ່ງຄຳ ບຸນທອນອຸໄທ ຜູ້ຮັບຜິດຊອບ ຫໍສະໝຸດ ປກສ ໄດ້ຂື້ນຜ່ານບົດຄຳເຫັນແລກປ່ຽນ ແລະ ສະເໜີ ບາງບັນຫາ ເພື່ອໃຫ້ຫໍສະໝຸດກອງທັບຊ່ວຍເຫຼືອ. ຈາກນັ້ນ ສະຫາຍ ພັ.ທ ນ. ຄູນທອງ ທຳມະວົງ ຮອງອຳນວຍການຫໍສະໝຸດກອງທັບ ໄດ້ຂື້ນກ່າວຍີນດີຕ້ອນຮັບ ແລະ ມີຄຳເຫັນຊີ້ແຈ້ງຕາມຄຳສະເໜີຂອງຫໍສະໝຸດ ປກສ.

     ຈາກນັ້ນ ພະນັກງານ ວິຊາການ 03 ພະແນກກໍ່ໄດ້ຂື້ນອະທິບາຍກ່ຽວກັບການເຄື່ອນໄຫວຂອງແຕ່ລະພະແນກເພີ່ມເຕີ່ມ ແລະ ພະນັກງານທັງສອງພາກສ່ວນກໍ່ໄດ້ແລກປ່ຽນນຳກັນ ດ້ວຍຄວາມຮັກແພງ ແບບເປັນກັນເອງຢ່າງເປັນເອກະສັນກັນ.

     ພິທີໄດ້ສຳເລັດລົງໃນເວລາ 11:00 ຂອງວັນດຽວກັນຢ່າງໄດ້ຮັບຜົນດີ