ພິທີມອບ-ຮັບປື້ມ ລະຫວ່າງພະແນກປະຫວັດສາດ ກອງບັນຊາການທະຫານແຂວງອຸດົມໄຊ - ຫໍສະໝຸດກອງທັບ.

    ໃນເວລາ 9:30 ຂອງເຊົ້າວັນທີ່ 25 ກັນຍາ 2025 ນີ້. ທີ່ຫໍສະໝຸດກອງທັບໄດ້ມີພິທີມອບ-ຮັບປື້ມຂື້ນ ລະຫວ່າງ ພະແນກປະຫວັດສາດ ກອງບັນຊາການທະຫານແຂວງອຸດົມໄຊ - ຫໍສະໝຸດກອງທັບ ໂດຍກ່າວມອບຈາກ ສະຫາຍ ພັອ ໂພນທອງ ພັນຈະເລີນພົນ ຮອງຫົວໜ້າ ກົມວິທະຍາ ສາດ-ປະຫວັດສາດ ການທະຫານ ກອງບັນຊາການແຂວງອຸດົມໄຊ ແລະ ກ່າວຮັບໂດຍ ສະຫາຍ ພັທ ນ. ຄູນທອງ ທໍາມະວົງ ຜູ້ຮັກສາການອໍານວຍການຫໍສະໝຸດກອງທັບ. ປື້ມທີ່ມອບໃນຄັ້ງນີ້ເປັນປື້ມມູນເຊື້ອຂອງ ກອງບັນຊາການທະຫານແຂວງອຸດົມໄຊ. ສະຫາຍ ພັທ ນ. ຄູນທອງ ທໍາມະວົງ ໄດ້ກ່າວສະແດງຄວາມຂອບໃຈ ມາຍັງກອງບັນຊາການທະຫານແຂວງອຸດົມໄຊ ທີ່ໄດ້ນໍາເອົາປື້ມມູນເຊື້ອຂອງກົມກອງມາມອບໃຫ້ແກ່ຫໍສະໝຸດກອງທັບ ສະຫາຍໄດ້ຕີລາຄາສູງເປັນປື້ມທີ່ມີຄຸນຄ່າ ແລະ ມີຄຸນປະໂຫຍດຢ່າງສູງເປັນການເກັບກໍາຜົນງານ ແລະ ມູນເຊື້ອຂອງກົມກອງໄວ້ໄດ້ຍາວນານໃຫ້ລູກຫຼານ ລຸ້ນໃໝ່ໄດ້ສຶກສາຕໍ່ໄປ.

   ຈາກນັ້ນຫໍສະໝຸດກອງທັບກໍ່ໄດ້ມອບປື້ມທີ່ມີເນື້ອໃນສໍາຄັນທາງປະຫວັດສາດ ຈໍານວນໜື່ງມອບໃຫ້ແກ່ກອງບັນຊາການທະຫານແຂວງອຸດົມໄຊຄືນ ເພື່ອສົ່ງເສີມໃຫ້ຄະນະພັກ-ຄະນະບັນຊາ ແລະ ພະນັກງານ-ນັກຮົບ ກອງບັນຊາການແຂວງອຸດົມໄຊໄດ້ຮັບຮູ້ ແລະ ເຂົ້າເຖີງຂໍ້ມູນຂ່າວສານອັນໃຫ່ມ ທັ້ງສອງຝ່າຍໄດ້ມີການໂອລົມດ້ວຍຄວາມຮັກແພງສະໜິດສະໝົມແບບເປັນກັນເອງ.

ພິທີໄດ້ສີ້ນສຸດລົງໃນເວລາ 10:00 ຂອງເຊົ້າວັນດຽວກັນນີ້ຢ່າງມີບັນຍາກາດແຫ່ງຄວາມສາມັກຄີ ທີ່ມີຄວາມໝາຍສໍາຄັນ.