ພິທີປິດຂະບວນການແຂ່ງຂັນຮ້ອງເພງ ຊາວໜຸ່ມ-ແມ່ຍິງ ຫໍສະໝຸດກອງທັບ.

   ໃນວັນທີ 18 ກໍລະກົດ 2023 ນີ້, ຫໍສະໝຸດກອງທັບ ໄດ້ຈັດພິທີແຂ່ງຂັນນັກຮ້ອງສຽງດີໜ່ວຍ ຊາວໜຸ່ມ-ແມ່ຍິງ​ ຄັ້ງທີ​ ​II​ ປະຈຳປີ 2023,  ໂດຍໃຫ້ກຽດເປັນປະທານຂອງສະຫາຍ ພັນເອກ ວຽງທອງ​ ວິດພາວົງ ຫົວໜ້າອຳນວຍການຫໍສະໝຸດກອງທັບ​ພ້ອມດ້ວຍ​ຄະນະ,​ ມີສະຫາຍ ພັນໂທ​ ນ.​ ສຸພາບ​ ມະນີວົງ​ ຮອງຫົວໜ້າພະແນກສະຫະພັນແມ່ຍິງກົມໃຫຍ່ການເມືອງກອງທັບ,​ ຮ.​ອ​ ນ. ສຸກສາຄອນ ລືວັນໄຊ ​ວິຊາການຟ້ອນພະແນກປະດິດແຕ່ງກອງສິລະປະກອນກອງທັບ ພ້ອມດ້ວຍພະນັກງານ - ນັກຮົບໃນກົມກອງເຂົ້າຮ່ວມ.

     ການຈັດການແຂ່ງຂັນໃນຄັ້ງນີ້ມີຜູ້ເຂົ້າແຂ່ງຂັນ 12 ສະຫາຍ,​ ຍິງ 10 ສະຫາຍທີ່ມາຈາກຫໍສະໝຸດກອງທັບ.​ ສຳລັບຜົນການແຂ່ງຂັນນັກຮ້ອງສຽງດີ ປະເພດ I ໄດ້ແກ່​ ຮ.​ທ ນ.​ຂັນຄຳ ໄຊຍະສອນ,​ ປະເພດ II ຮ.​ທ​ ນ.​ ຄຳພອນ ແພງສົມບັດ, ປະເພດ III ສິບຕີ​ ວິໄຊ ພິພັກຂະວົງ​ ແລະ ລາງວັນຊົມເຊີຍ 9 ສະຫາຍ.​

     ໂອກາດດັ່ງກ່າວ ສະຫາຍ ພັນຕີ ນ.​ ແກ່ນສີ​ ຄຳພາວົງ ເລຂາໜ່ວຍແມ່ຍິງຫໍສະໝຸດກອງທັບ  ໄດ້ຜ່ານບົດສະຫຼູບຂະບວນການແຂ່ງຂັນນັກຮ້ອງສຽງດີ  ເພື່ອເປັນການຊຸກຍູ້ໃຫ້ນາຍ ແລະ ພົນທະຫານ ໃນກົມກອງອອກແຮງແຂ່ງຂັນກັນເຄື່ອນໄຫວສ້າງຂະບວນການ,​ ສ້າງຜົນງານໃນຄົງເຂດວຽກງານຮອບດ້ານຂອງກົມກອງໃຫ້ມີຂະບວນ ການຟົດຟື້ນ.​ ໂອກາດນີ້ ສະຫາຍ ປະທານ ກໍໄດ້ໃຫ້ຄຳເຫັນໂອ້ລົມພ້ອມທັງສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການຈັດການແຂ່ງຂັນໃນຄັ້ງນີ້ວ່າ: ການຈັດຕັ້ງຂະບວນການແຂ່ງຂັນນັກຮ້ອງສຽງດີ,​ ເພື່ອເປັນການສ້າງຜົນງານຂ່ຳນັບຮັບຕ້ອນກອງປະຊຸມໃຫຍ່ຄັ້ງທີ III​ ຂອງໜ່ວຍ​ພັກ,​ ກອງປະຊຸມໃຫຍ່ຄັ້ງທີ​ IV ຂອງໜ່ວຍຊາວໜຸ່ມຫໍສະໝຸດກອງທັບ​ ແລະ​ ວັນສ້າງຕັ້ງສະຫະພັນແມ່ຍິງລາວຄົບຮອບ​ 68​ ປີທີ່ໃກ້ຈະມາເຖິງນີ້, ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີເນື້ອໃນຄວາມໝາຍເລິກເຊິ່ງ. ພ້ອມກັນນີ້ກໍເປັນການເພີ່ມທະວີວຽກງານການ-ສຶກສາອົບຮົມໃຫ້ ພະນັກງານ-ນັກຮົບ​ ມີຈິດໃຈຮັກຊາດຮັກລະບອບໃໝ່ ເຄື່ອນໄຫວຈັດຕັ້ງປະຕິບັດຂະບວນການຕາມ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກໃຫ້ປະກົດຜົນເປັນຈິງ, ສ້າງໃຫ້ໄດ້ວຽກດີຄົນເດັ່ນ, ເຮັດໃຫ້ນາຍ ແລະ ພົນທະຫານມີຄວາມບຸກບືນຫ້າວຫັນພັດທະນາຕົນເອງ ແລະ ກົມກອງໃຫ້ມີສິງໃໝ່ໆເກີດຂຶ້ນ, ພ້ອມທັງໄດ້ກ່າວປິດພິທີຢ່າງເປັນທາງການ.​