ທ່ານ ດວງໄຊ ຫຼວງພະສີ ນັກປະພັນແຫ່ງຊາດລາວ ພົບປະໂອ້ລົມ ຫໍສະໝຸດກອງພັນໃຫຍ່ທະຫານຮາບຍານເກາະ11

ໃນວັນທີ 15 ມິຖຸນາ 2023 ນີ້, ທ່ານ ດວງໄຊ ຫຼວງພະສີ ນັກປະພັນແຫ່ງຊາດລາວພ້ອມດ້ວຍ ທ່ານ ພັນໂທ ນ.ຄູນທອງ ທຳມະວົງ ຮອງອຳນວຍການຫໍສະໝຸດກອງທັບໄດ້ພົບປະໂອ້ລົມ ພະນັກງານຫໍສະໝຸດກອງພັນໃຫຍ່ທະຫານຮາບຍານເກາະ11, ມີສະຫາຍ ພັນໂທ ໄມທອງ ຫີນລໍວັນ ຄະນະພັກກອງພັນໃຫຍ່ທະຫານຮາບຍານເກາະ11ຮອງຫົວໜ້າພະແນກການເມືອງ, ມີບັນດາຄະນະພັກ - ຄະນະບັນຊາ ຕະຫຼອດຮອດພະນັກງານ - ນັກຮົບເຂົ້າຮ່ວມ.ສໍາລັບການພົບປະໂອ້ລົມໃນຄັ້ງນີ້,ທ່ານໄດ້ຍົກໃຫ້ເຫັນດ້ານຕ່າງໆເປັນຕົ້ນແມ່ນປະຫວັດສາດໂດຍຫຍໍ້ ແລະ ຜົນງານທີ່ໂດດເດັ່ນໃນການປະດິດຄິດແຕ່ງໃນວົງການນັກປະພັນລາວຂອງທ່ານໃຫ້ຮັບຮູ້, ຄວາມສຳຄັນກ່ຽວກັບມູນເຊື້ອ ແລະ ບົດຮຽນໃນການປະດິດຄິດແຕ່ງບັນດາບົດ,ປື້ມຕ່າງໆຂອງທ່ານໃນໄລຍະຜ່ານມາ ພາຍໃຕ້ຫົວຂໍ້ “ ເຮັດໃຫ້ສະໝອງດີ, ມີປັນຍາຄວາມຮູ້, ຂຽນໄດ້, ຮຽນເກັ່ງ ຮັກຊາດ ແລະ ເປັນຄົນດີຂອງສັງຄົມ ” ທັງນີ້, ກໍເພື່ອເປັນການສ້າງທັກສະໃຫ້ພະນັກງານ - ນັກຮົບໃນກອງທັບໄດ້ຮັບຮູ້ ແລະ ມັກຮັກໃນການອ່ານ, ຮູ້ວິທີໃນການຂີດຂຽນປະດິດຄິດແຕ່ງບັນດາບົດຕ່າງໆ ເພື່ອນຳເອົາບົດຮຽນດັ່ງກ່າວໄປໝູນໃຊ້ເຂົ້າໃນວຽກງານຕົວຈິງຂອງກົມກອງໃຫ້ມີບາດກ້າວທີ່ດີຂື້ນ. ໂອກາດນີ້, ທ່ານ ດວງໄຊ ຫຼວງພະສີ ຍັງໄດ້ມອບປື້ມອ່ານໃຫ້ແກ່ຫໍສະໝຸດກອງພັນໃຫຍ່ທະຫານຮາບຍານເກາະ11 ຈໍານວນ 130 ຫົວ ລວມມູນຄ່າ 4 ລ້ານກວ່າກີບ ເພື່ອເປັນການປະກອບສ່ວນບູລະນະວຽກງານຫໍສະໝຸດໃຫ້ມີຄວາມເຕີບໃຫຍ່ຂະຫຍາຍຕົວຂື້ນເລື່ອຍໆ.